Jẹnẹsis

4 Asaọkiephana Adam vẹ aye rọyen Ivi da mroma, aye na da mrevun. Ọke ro vwo vwiẹ Ken, ọ da ta: “Mi vwiẹ ọmọshare womarẹ ukẹcha ri Jihova re.” 2 Ọke vwọ yanran na, o de vwiẹ ọmọ ọfa, oniọvo rọyen ọmọshare Ebẹl.

Ebẹl da rhe dia osuigodẹ, ẹkẹvuọvo Ken da rhe dia ọghwẹrẹ.* 3 Ọke evo vwọ wan nu, Ken da ghwa emamọ rẹ otọ na evo rhe kerẹ okẹ vwọ kẹ Jihova. 4 Ẹkẹvuọvo Ebẹl de mu emọ rẹsosuọ rẹ igodẹ rọyen evo vẹ ivwri rayen rhe. Jihova de ni Ebẹl vẹ ẹroesiri ji rhiabọreyọ okẹ rọyen, 5 jẹ o ni Ken vẹ ẹroesiri ji rhiabọreyọ okẹ rọyeen. Ọtiọyena ivun de miovwo Ken gangan, o de muomaphiyọ.* 6 Jihova da ta kẹ Ken: “Diesorọ ivun vwo miovwo uwe, ru wo ji vwo muomaphiyọ? 7 Wo de kurhẹriẹ vwo ru obo ri yovwirin, wọ rha rhoma vwo ẹroesiri rhivwin?* Ẹkẹvuọvo wo rhe kurhẹriẹ vwo ru obo ri yovwiriin, umwemwu fiọnko hẹrhẹ owẹ vwẹ anurhoro, ọ guọnọ sun we; ẹkẹvuọvo ku wo se suon?”

8 Ọyena vwọ wan nu, Ken da ta kẹ oniọvo rọyen Ebẹl: “E jẹ avwanre kpo obo aghwa na.” Ọke rẹ ayen vwọ hẹ evunrẹ aghwa na, Ken da ghwiẹ oniọvo rọyen Ebẹl, o de hwe. 9 Ọke vwọ yan obaro, Jihova da nọ Ken: “Oniọvo wẹn Ebẹl rhọ?” ọ da kpahen: “Me riẹnree. Mẹvwẹ yen vwẹrote oniọvo mẹ?” 10 Ọtiọyena ọ da ta: “Die yen wo ruru na? Kerhọ! Ọbara rẹ oniọvo wẹn viẹ hwe vwe vwo nẹ otọ na cha. 11 Asaọkiephana me hanrhe owẹ je djẹ wẹ nẹ otọ na ro rhie unu rọyen phiyọ vwọ reyọ ọbara rẹ oniọvo wẹn mie we na. 12 Ọke wo de voro otọ na, omamọ emu che norhee.* Wọ cha dia osoghoro kugbe ohwo ro muẹ yan vwẹ otọrakpọ na.” 13 Ọtiọyena Ken da ta kẹ Jihova: “Oja re me cha re fikirẹ obo ri mi ruru na vrẹ obo ri mi se chiri. 14 Nonẹna wọ djẹ vwẹ nẹ otọ na,* ki mi che siomanu vwo nẹ obaro wẹn; ke me cha rhe dia osoghoro kugbe ohwo ro muẹ yan vwẹ otọrakpọ na, kohwo kohwo rọ mrẹ vwẹ kọ cha teyen ovwẹ hwe.” 15 Ọtiọyena Jihova da ta kẹ: “Fikirẹ ọyena, kohwo kohwo ro hwe Ken cha rioja rẹ orukeri abọ ighwrẹn.”

Jihova da vwẹ oka vwo mu vwọ kẹ Ken rere kohwo kohwo rọ mrẹrẹ vwo je hwe. 16 Ọtiọyena Ken de vrẹ nẹ obaro ri Jihova, ọ da ra dia otọ rẹ Ighuvwu,* vwẹ ẹbẹre ọnre va nẹcha rẹ Idẹn.

17 Ọke vwọ yanran na, Ken vẹ aye rọyen da mroma, aye na da mrevun, o de vwiẹ Inọk. Ken da ton ebanbọn rẹ orere ọvo phiyọ, o de mu odẹ rẹ ọmọ rọyen Inọk vwọ kẹ orere na. 18 Ọke vwọ yan obaro, e de vwiẹ Airad vwọ kẹ Inọk. Airad da rhe dia ọsẹ ri Mẹhujaẹl, Mẹhujaẹl da rhe dia ọsẹ ri Mẹtushẹl, Mẹtushẹl da rhe dia ọsẹ ri Lemẹk.

19 Lemẹk da reyọ eya ivẹ kẹ oma rọyen. Odẹ rẹ ọrẹsosuọ na yen Eda, odẹ rẹ ọrivẹ na ke rha Zilla. 20 Eda de vwiẹ Jebal. Ọyen ohwo rẹsosuọ ro tu dia itughẹ ji vwo ichuru. 21 Odẹ rẹ oniọvo rọyen ọshare yen Jubal. Ọyen ohwo rẹsosuọ ro tu hworo ihapu vẹ iflutu. 22 Vwọba, Zilla de vwiẹ Tuba-ken, rọ dia ohwo rọ vwẹ ẹrovwo vẹ utehru vwo duvwun koka koka rẹ erọnvwọn. Oniọvo ri Tuba-ken ọmọtẹ kẹ Neama. 23 Ọtiọyena Lemẹk da ta eta nana kẹ eya rọyen Eda vẹ Zilla:

25 Adam vẹ aye rọyen da rhoma mroma, aye na de vwiẹ ọmọshare. O* de se Sẹt* kidie kirobo rọ tare, “Ọghẹnẹ vwẹ ọmọ* ọfa kẹ vwẹ vwẹ ẹdia rẹ Ebẹl re, kidie Ken hwe re.” 26 E de ji vwiẹ ọmọshare kẹ Sẹt, o de se Inọsh. Ọke yena yen ihwo vwọ ton ese rẹ odẹ ri Jihova phiyọ.