Ọbe rẹsosuọ ri Samuẹl
1 Asaọkiephana o vwo ọshare ọvo, ohwo ri Remateim-zofim* rẹ ekogho rẹ igbenu rẹ Ifrem, odẹ rọyen Ẹlkena, ọmọ ri Jeroham, ọmọ rẹ Ẹlaihu, ọmọ ri Tohu, ọmọ ri Zọf, ohwo rẹ Ifrem. 2 O vwo eya ivẹ; odẹ rẹ ọvo Hana, odẹ rẹ ọ ro chekọ ke rha Pẹnina. Pẹnina vwo emọ, ẹkẹvuọvo Hana vwo emọọ. 3 Kukpe kukpe yen ọshare na vwo vrẹn nẹ orere rọyen ra ga ẹga* ji ze izobo kẹ Jihova rẹ otuofovwin na vwẹ Shailo. Etiyin yen emọ rẹ Ilai ivẹ Họfnai kugbe Finihas da ga kerẹ irherẹn ri Jihova.
4 Ẹdẹ ọvo rẹ Ẹlkena vwo ze izobo, ọ da vwẹ ẹbẹre evo vwọ kẹ aye rọyen Pẹnina ọtiọyen ji te emeshare vẹ emetẹ rọyen eje, 5 ẹkẹvuọvo ọ da vwẹ ẹbẹre rẹ oghẹresan vwọ kẹ aye rọyen Hana, kidie Hana yen o me vwo ẹguọnọ rọyen; jẹ Jihova je rhe kẹ Hana emọọ.* 6 Vwọ vrẹn ọyena, Pẹnina* kọ reyọ vwọ jehwẹ ọkieje rere ophu vwo muo kidie Jihova je rhe vwẹ emọ vwọ kẹẹ. 7 Ọtiọyen yen Pẹnina ruẹ kukpe kukpe; kọke kọke rẹ Hana de kpo uwevwin ri Jihova, Pẹnina me reyọ vwọ jehwẹ gangan te ẹdia rọ da viẹ, ọ rha riemuu. 8 Ẹkẹvuọvo ọshare rọyen Ẹlkena da ta kẹ nẹ: “Hana diesorọ wọ vwọ viẹ, diesorọ wo vwo jẹ emu ẹriọ, diesorọ wo vwo muomaphiyọ?* Me rha ghanre kẹ wẹ vrẹ emeshare ihwe?”
9 Ọtiọyena Hana de vrẹn ọke rẹ ayen vwọ re je da vwẹ Shailo nu. Vwẹ ọke yena, jẹ Ilai orherẹn na chidia agbara vwẹ anurhoro rẹ uwevwin rẹ ẹga* ri Jihova na. 10 Hana* muomaphiyọ gangan, kọ nẹrhovwo rhe Jihova, jẹ ọ viẹ patapata. 11 O de ve ive nana: “E Jihova rẹ otuofovwin, wo de ni ojaẹriọ rẹ odibo wẹn je karophiyọ ovwẹ, odibo wẹn rha chọrọ owẹ ẹroo, wọ da vwẹ ọmọshare vwọ kẹ odibo wẹn, ke me cha vwọ kẹ Jihova vwẹ ẹdẹ rẹ akpọ rọyen eje, anre* vuọvo che te uyovwin rọyeen.”
12 Ọke rọ vwọ nẹrhovwo krekri vwẹ obaro ri Jihova na, jẹ Ilai nẹ unu rọyen. 13 Hana kọ ta ota phiyọ evun, ẹbẹrunu rọyen ọvo yen kpogho, ẹkẹvuọvo e nyo obo rọ taa. Ọtiọyena Ilai de roro nẹ udi muo. 14 Ilai da ta kẹ nẹ: “Brọke yen udi wẹn na che mu we kri te? Dobọ rẹ iwaini ẹda wẹn na ji.” 15 Ọtiọyena Hana da kpahen nẹ: “Ẹjo ọrovwovwe! Mẹvwẹ aye rẹ ẹwẹn rọyen yanghan ku;* me je rhe da iwaini yẹrẹ koka koka rẹ udi ọgangan vuọvoo, ẹkẹvuọvo mi ku ẹwẹn mẹ eje kẹ Jihova. 16 Wọ reyọ odibo wẹn vwo roro aye fanrhiẹn fanrhiẹẹn, fikirẹ odjadja ọgangan vẹ ofudjevwe rọhẹ udu mẹ ọyen me vwọ ta ota rhi te ọke na.” 17 Ọtiọyena Ilai da kpahen kẹ nẹ: “Yanran vwọrẹ ufuoma, e jẹ Ọghẹnẹ rẹ Izrẹl kpahen phiyọ oyare ru wọ yare mie na.” 18 Ọtiọyena Hana da tanẹ: “E jẹ odibo wẹn mrẹ ẹroesiri vwẹ obaro wẹn.” Aye na da yanran, ọ da riemu, o rhe muomaphiyọ ọfaa.
19 Ọtiọyena ayen de vrẹn vwẹ edegburhiọke, ayen vwọ ga Jihova nu, ayen de rhivwin kpo uwevwin rayen vwẹ Rema. Ẹlkena vẹ aye rọyen Hana da mroma, Jihova da karophiyọ Hana. 20 Vwẹ uvwre rẹ ẹgbukpe ọvo,* Hana da mrevun, o de vwiẹ ọmọshare, o de se Samuẹl,* kidie kirobo rọ tare, “Jihova yen me yarerọ mie.”
21 Ọke vwọ yan obaro, Ẹlkena vẹ evwruwevwin rọyen eje da yanran re ze izobo ri kukpe kukpe kẹ Jihova rere ọ je reyọ obo ro veri vwọ kpahotọ. 22 Ẹkẹvuọvo Hana raree kidie ọ ta kẹ ọshare rọyen nẹ: “Ugege me da ghwa djẹ ọmọ na evie nu, me cha reyọ rhe; kọ cha vwomaphia vwẹ obaro ri Jihova je dia etiyin vwo nẹ ọke yena yanran.” 23 Ọtiọyena Ẹlkena rẹ ọshare rọyen da ta kẹ nẹ: “Ru obo ru wo rorori nẹ ọyen me yovwin.* Dia uwevwin bẹsiẹ wọ vwọ djẹ evie. E jẹ Jihova ru obo ru wọ tare na.” Ọtiọyena aye na da dia uwevwin rhirin re te ọke rọ vwọ djẹ ọmọ na evie.
24 Ugege rọ vwọ djẹ evie nu, ọ da reyọ kpo Shailo, o mu erhuẹn rẹ ikpe erha, ifah* ọvo rẹ iflawa, kugbe ochẹ rode rẹ iwaini nene oma, ọ vẹ ọmọ na de kpo uwevwin ri Jihova vwẹ Shailo. 25 Ayen de hwe erhuẹn na je reyọ ọmọ na bru Ilai rhe. 26 Ọtiọyena ọ da tanẹ: “E ọrovwovwe! Wọ vwọ herọ yerẹn na,* ọrovwovwe, mẹvwẹ yen aye rọ vẹ owẹ gbe mudia etinẹ rọ nẹrhovwo rhe Jihova sidẹvọ ye. 27 Fikirẹ ọmọ nana ọyen me vwọ nẹrhovwo, Jihova da kpahen phiyọ obo re me yare mie na. 28 Asaọkiephana me vwerọ kẹ* Jihova. Vwẹ ẹdẹ rẹ akpọ rọyen eje kọ dia ọ ri Jihova.”
Ọ* da vwẹ uyovwin kpotọ kẹ Jihova vwẹ etiyin.