Ẹyano
15 Ọke yena Mosis vẹ ihwo rẹ Izrẹl da so une nana kẹ Jihova:
“Juvwe so une kẹ Jihova kidie a kparerọ kpenu mamọ re.
O do iyesi na kugbe ohwo rọ gua phiyọ abadi na re.
2 Jah* yen ẹgba kugbe ogangan mẹ kidie ọ rhe dia usivwin mẹ re.
Ọnana yen Ọghẹnẹ mẹ, mi che jiro, Ọghẹnẹ rẹ ọsẹ mẹ, me cha kparọ kpenu.
3 Jihova ọyen ọgba ofovwin ro vwo ẹgba mamọ. Jihova yen odẹ rọyen.
4 O do ekpẹrẹ ri Fero kugbe otuofovwin rọyen phiyọ abadi na,
Egba ofovwin rọyen ri me vwo ẹgba divwirin vwevunrẹ Abadi Ọvwavware na.
5 Ọgbogho rẹ ame na rhurhu ayen; ayen divwin kpo otọ rẹ ame na kerẹ ukuta.
6 Obọrhen wẹn, E Jihova, vọnre vẹ ẹgba;
Obọrhen wẹn, E Jihova, sa guọghọ ọvweghrẹn.
7 Vwẹ ọrho wẹn, wo se genre ihwo ri vrẹn vwọso owẹ she;
Wo siobọnu ophu wẹn rọ tua na, ọ da torhẹ ayen kerẹ ugbẹn rẹ ekankọn.
8 Womarẹ ẹwẹn ro nẹ iwen wẹn rhe, ame ma koko;
Ọ domaji, ọ da yọnrọn oghwe na;
Ọgbogho rẹ ame na mudje vwẹ uherevie* rẹ abadi na.
9 Ọvweghrẹn na da ta: ‘Me cha vwọtua ayen! Me cha djẹ ayen vwa!
Me cha ghare ugborho bẹsiẹ evun vwọ vọn vwẹ!*
Mi che yoro ọlọkọ mẹ phia! Obọ mẹ ko phi ayen kparobọ!’
10 Wọ wẹn odju wẹn, abadi na de rhurhu ayen;
Ayen de divwin kerẹ ilẹdi* vwẹ ame rode.
11 Ono vwẹ usun rẹ eghẹnẹ na yen họhọ owẹ, E Jihova?
Ono yen họhọ owẹ, ro dje oma wẹn phia rhuarho vwẹ ofuanfon?
Ohwo ra cha djoshọ rọyen je vwẹ ine vwo jiri, Ọ ro ruẹ igbunu.
12 Wọ riẹn obọrhen wẹn phia, otọ na de mu ayen rọ.
13 Ẹguọnọ wẹn ro jẹ rhẹriẹ yen wo vwo sun ihwo ru wọ dẹ reyọ;
Ẹgba wẹn yen wo che vwo sun ayen kpo asan ọfuanfon wẹn ru wọ dia.
14 Ihwo che nyo; ayen che guegue;
Ihwo re dia Filistia che muomaphiyọ.
15 Vwẹ ọke yena, oshọ che mu ilori* rẹ Idọm,
Uguegue cha ro isun ri Moab ri vwo ẹgba na oma.
Udu che nẹ ihwo eje re dia Kenan awọ.
16 Oshọ vẹ uguegue cha ro ayen oma.
Ayen che ghwu mu kerẹ ukuta fikirẹ ọrho rẹ obọ wẹn
Bẹsiẹ ihwo wẹn vwọ wanvrẹ, E Jihova,
Bẹsiẹ ihwo ru wọ mare ke wanvrẹ.
17 Wọ cha vwẹ ayen rhe rhe kọn ayen phiyọ ugbenu rẹ ughwẹ wẹn,
Asan wọ rhuẹrẹphiyọ ru wo muegbe rọyen kẹ oma wẹn ru wọ cha dia, E Jihova,
Asan ọfuanfon, E Jihova, rẹ abọ wẹn rhuẹrẹphiyọ.
18 Jihova che sun kerẹ ovie rhirin bẹdi bẹdẹ.
19 Ọke rẹ iyesi ri Fero vẹ ekpẹrẹ rẹ ofovwin rọyen kugbe isodje rọyen re gua iyesi vwọ ro abadi na,
Jihova da reyọ ame rẹ abadi na rhivwin rhe enu rayen,
Ẹkẹvuọvo ihwo rẹ Izrẹl da yan vwẹ otọ ọyaya wan abadi na.”
20 Ọke yena, Miriam ọmraro rẹ aye na, oniọvo rẹ Erọn, da reyọ itamborini,* eya ri chekọ na eje de nene vẹ itamborini, jẹ ayen gbeha. 21 Miriam da so une nene eshare na:
“So une kẹ Jihova kidie a kparerọ kpenu mamọ re.
O do iyesi na vẹ ohwo rọ gua phiyọ abadi na re.”
22 Ọke vwọ yan obaro, Mosis de sun Izrẹl vwo nẹ Abadi Ọvwavware na, ayen da ro aton ri Shọ, ayen da yan oyan rẹ ẹdẹ erha vwẹ aton na, ẹkẹvuọvo ayen mrẹ amee. 23 Ayen de te Mera,* ẹkẹvuọvo ayen sa da ame rọhẹ Meraa kidie ọ yara. Kọyensorọ o vwo se Mera. 24 Ọtiọyena ihwo na ki brenu hwe Mosis nẹ: “Die yen avwanre cha da?” 25 O de kperi se Jihova, Jihova de dje urhe ọvo kẹ. Ọke ro vwo do phiyọ ame na, ame na kọ rhe vwerhen.
Etiyin kọyen Ọ da vwẹ iji ọvo kẹ ayen kugbe uwan re ni vwo guẹdjọ, Ọ da davwen ayen ni vwẹ etiyin. 26 Ọ da ta: “Ovwan de nyo urhuru ri Jihova Ọghẹnẹ rẹ ovwan gbagba ji ru obo ri shephiyọ vwẹ ẹro rọyen, ovwan da je davwerhọ rẹ iji rọyen je yọnrọn irhi rọyen eje, me cha hwarhiẹ ọga vuọvo vwẹ usun rẹ ega ri mi vwo rhe ihwo rẹ Ijipt na rhe ovwaan, kidie mẹvwẹ ri Jihova na yen sivwin ovwan.”
27 Ọyena vwọ wan nu, ayen de te Ilim, asan rẹ igbugbu rẹ ame 12 vẹ iriẹ 70 hepha. Ọtiọyena ayen de wonphiyọ* etiyin kẹrẹ ame na.