Jẹnẹsis
6 Asaọkiephana rẹ ihwo vwo buẹnphiyọ vwẹ otọrakpọ na, re ji vwo vwiẹ emetẹ vwọ kẹ ayen na, 2 emọ rẹ Ọghẹnẹ rẹ uyota na* de rhi noso nẹ emetẹ rẹ ihworakpọ vwo erhuvwu. Ọtiọyena kẹ ayen reyọ e rẹ ayen jẹre eje vwo ruẹ eya. 3 Jihova da ta: “Ẹwẹn mẹ che chirakon rẹ ohworakpọ bẹdẹẹ, kidie uvwo diodi yen ọ hepha.* Ọtiọyena ẹdẹ rọyen cha dia ikpe 120.”
4 Nẹfilim* hẹ otọrakpọ na ọke yena kugbe ra vwọ mrẹ ọke yena nu. Vwẹ uvwre ọke yena, emọ rẹ Ọghẹnẹ rẹ uyota na ji nene emetẹ rẹ ihworakpọ mroma, emetẹ na de vwiẹ emeshare kẹ ayen. Enana yen egba rẹ ọke awanre. Eshare ri titiri.
5 Ukuotọ rọyen Jihova da mrẹ nẹ umwemwu rẹ ohworakpọ ganre mamọ vwẹ akpọ na, kemu kemu ro roro vwẹ udu rọyen ọkieje kẹ obo re brare ọvo. 6 Jihova da viẹ idiekpọvwẹ fikirẹ ihworakpọ rọ ma phiyọ otọrakpọ na,* ẹwẹn* rọyen da kuọrọn.* 7 Ọtiọyena Jihova da ta: “Mi che si ihworakpọ re me mare nẹ otọrakpọ na, te ihworakpọ te eranvwe re dia orere, eranvwe ri kpono, kugbe emama re rhan vwẹ idjuvwu na, kidie ọ da vwẹ nẹ me ma ayen.” 8 Ẹkẹvuọvo Noa da mrẹ ẹroesiri ri Jihova.
9 Ọnana ikuegbe ri Noa.
Noa ọyen ohwo ọsoso. O dje oma rọyen phia kerẹ ohwo ro vwo ekaan vwẹ ohri rẹ ihwo rẹ ọke rọyen.* Noa nene Ọghẹnẹ rẹ uyota na yan. 10 Ọke vwọ yanran, Noa de rhi vwo emeshare erha, Shẹm, Ham, kugbe Jefẹt. 11 Ẹkẹvuọvo akpọ na rhi miovwin ku vwẹ ẹro rẹ Ọghẹnẹ rẹ uyota na, akpọ na je vọn vẹ ozighi. 12 E, Ọghẹnẹ vwo ni otọrakpọ na, ọ da mrẹ nẹ o miovwin ku; ihworakpọ eje* ruẹ obo re brare vwẹ otọrakpọ na.
13 Ọyena vwọ wan nu, Ọghẹnẹ da ta kẹ Noa: “Mi brorhiẹn ri mi vwo phioba phiyọ uvwo eje re, kidie akpọ na vọnre vẹ ozighi fikirẹ ayen, ọtiọyena me cha ghwọrọ ayen vẹ akpọ na kugbe. 14 Gba vwẹ omamọ urhe* vwọ bọn okọ* kẹ oma wẹn. Wọ me bọn ivun phiyọ evunrẹ okọ na, wọ me je reyọ orọnvwọn obiebi rọ sa yọnrọn ame* vwọ rharọ vwẹ obevun vẹ obotafe. 15 Enẹ yen wọ cha bọn wan: Ugrongron rẹ okọ na me dia kubit* 300, ohẹhẹre rọyen kubit 50, o mi rhe kpenu te kubit 30. 16 Wọ me bọn ovakpo* phiyọ okọ na fikirẹ orẹmrẹ, kubit ọvo nẹ obenu rhe. Wo mi phi ẹchẹ rẹ okọ na phiyọ orhoma rọyen, wọ me bọn rere o vwo uwevwin rẹ obotọ, ọrivẹ, kugbe ọrerha.
17 “Vwọ kẹ vwẹ, me cha vwẹ oghwe rhe akpọ na rhe ghwọrọ uvwo eje ri vwo ẹwẹn rẹ arhọ vwẹ otọ rẹ idjuvwu na. Kemu kemu rehẹ akpọ na cha ghwọrọ. 18 Me vẹ owẹ ke re ọphọ, ku wọ ro evunrẹ okọ na, te owẹ te emọ* wẹn, te aye wẹn kugbe eya rẹ emọ wẹn. 19 Wọ me reyọ koka koka rẹ emama ri vwo arhọ eje ivivẹ ro okọ na, rere a vwọ sẹro rẹ arhọ rayen vẹ ọwẹn kugbe, te ọ rẹ aye vẹ ọ rẹ ọshare; 20 Emama re rhan dohwo doka rọyen, eranvwe re dia orere dohwo doka rọyen, kugbe eranvwe eje ri kpono vwẹ otọ na dohwo doka rọyen, ayen cha ro okọ na ivivẹ bru we rhe rere wọ sa vwọ sẹro rẹ arhọ rayen. 21 Vwọ kẹ wẹ, wo mi koko je reyọ koka koka rẹ emuọre nene oma, rẹ owẹ vẹ eranvwe na cha re.”
22 Noa de ru erọnvwọn eje rẹ Ọghẹnẹ vuẹrẹ nẹ o ru, ọtiọyen o ghini ruo.