Ẹyano
3 Mosis da rhe dia osuigodẹ rẹ ichuru rẹ ọgọ rọyen Jẹtro, orherẹn ri Midian. Ọke ro vwo suẹn ichuru na vwo kpo ẹbẹre ọnre shera rẹ aton na, o de rhi te ugbenu rẹ Ọghẹnẹ rẹ uyota na vwẹ Horẹb. 2 Amakashe ri Jihova da vwomaphia kẹ vwẹ erhanre rọ la vwevunrẹ umurhe ọvo ro vwo inwe. Ọke ro vwo no, ọ da mrẹ nẹ erhanre hẹ umurhe ro vwo inwe na, ẹkẹvuọvo umurhe na torhẹẹ. 3 Ọtiọyena Mosis da ta: “Me cha yanran re nughe nana ra je rhe mrẹ dẹvo naa, rere me mrẹ oboresorọ umurhe ro vwo inwe na vwo jẹ torhẹ.” 4 Ọke rẹ Jihova vwọ mrẹ nẹ o siẹkẹrẹ ro vwo no, Ọghẹnẹ de se vwo nẹ umurhe ro vwo inwe na rhe, ọ da ta: “Mosis! Mosis!” ọ da kpahen: “Mẹvwẹ na.” 5 Ọtiọyena ọ da ta: “Wo siẹkẹrẹ obonẹẹ. Ku isabatu wẹn nẹ awọ wẹn, kidie asan ru wo mudia na ọyen otọ ọfuanfon.”
6 Ọ da ta: “Mẹvwẹ Ọghẹnẹ rẹ ọsẹ wẹn, Ọghẹnẹ rẹ Ebraham, Ọghẹnẹ rẹ Aizik, kugbe Ọghẹnẹ ri Jekọp.” Ọtiọyena Mosis de si opharo rọyen nu, kidie oshọ muo ro vwo ni Ọghẹnẹ rẹ uyota na. 7 Vwọba, Jihova da ta: “Me ghene mrẹ ojaẹriọ rẹ ihwo mẹ rehẹ Ijipt re, mi ji nyo oviẹ rayen fikirẹ ihwo re gba ayen vwọ wian; me nabọ riẹn ọmiaovwẹ rẹ ayen rioja rọyen. 8 Mi che wontọ re sivwin ayen nẹ obọ rẹ ihwo Ijipt, je reyọ ayen nẹ otọ yena vwo kpo otọ rọ pha yoyovwin ro ji phẹn ghwrororo, otọ rọ djẹ ọkẹre rẹ ameivie vẹ ame ọnyọn, ẹkuotọ rẹ ihwo ri Kenan, ihwo ri Hẹt, ihwo rẹ Amọ, ihwo ri Pẹriz, ihwo ri Haiv, kugbe ihwo ri Jẹbus. 9 Asaọkiephana nighere! Oviẹ rẹ ihwo rẹ Izrẹl te asan re me hepha re, me je mrẹ idjerhe ọbrabra rẹ ihwo rẹ Ijipt vwo shenyẹ ayen. 10 Asaọkiephana gba yanrhe, mi che ji we bru Fero ra, ku wọ cha reyọ ihwo mẹ, ihwo rẹ Izrẹl nẹ Ijipt.”
11 Ẹkẹvuọvo, Mosis da ta kẹ Ọghẹnẹ rẹ uyota na: “Ono yen omẹvwẹ ro che bru Fero ra ra reyọ ihwo rẹ Izrẹl nẹ Ijipt?” 12 Ọtiọyena ọ da ta: “Me vẹ owẹ cha dia, ọnana yen oka vwọ kẹ wẹ nẹ mẹvwẹ yen ji we: Ọke ru wọ da reyọ ihwo na nẹ Ijipt rhe nu, kẹ ovwan cha ga Ọghẹnẹ rẹ uyota na vwẹ ugbenu nana.”
13 Ẹkẹvuọvo Mosis da ta kẹ Ọghẹnẹ rẹ uyota na: “Kẹ ọ da rha dianẹ mi bru ihwo rẹ Izrẹl na ra, me da ta kẹ ayen nẹ, ‘Ọghẹnẹ rẹ esẹ rẹ ovwan ride ji vwe bru ovwan rhe,’ ayen da nọ vwẹ nẹ, ‘Die yen odẹ rọyen?’ Kẹ die me cha vuẹ ayen?” 14 Ọtiọyena Ọghẹnẹ da ta kẹ Mosis: “Me Cha Dia Obo re Me Guọnọ Dia.”* Ọ da je ta: “Ọnana yen oborẹ wọ cha ta kẹ ihwo rẹ Izrẹl, ‘Me Cha Dia yen ji vwe bru ovwan rhe.’” 15 Vwẹ obọfa Ọghẹnẹ da ta kẹ Mosis:
“Ọnana yen oborẹ wọ cha ta kẹ ihwo rẹ Izrẹl, ‘Jihova Ọghẹnẹ rẹ esẹ rẹ ovwan ride, Ọghẹnẹ rẹ Ebraham, Ọghẹnẹ rẹ Aizik, kugbe Ọghẹnẹ ri Jekọp yen ji vwe bru ovwan rhe.’ Ọnana yen odẹ mẹ bẹdẹ, ọnana yen obo ra je cha vwọ karophiyọ ovwẹ vwo nẹ uvwiẹ re te uvwiẹ. 16 Asaọkiephana, gba yanran re koko ekpako rẹ Izrẹl na rere wọ ta kẹ ayen, ‘Jihova Ọghẹnẹ rẹ esẹ rẹ ovwan ride vwomaphia kẹ vwẹ, Ọghẹnẹ rẹ Ebraham, Aizik, kugbe Jekọp, ọ da ta: “Mi ghini rhi vwo oniso rẹ ovwan kugbe obo re ruẹ ovwan vwẹ Ijipt re. 17 Ọtiọyena mẹ da ta, mi che si ovwan vwo nẹ oja rẹ ovwan ria vwẹ abọ rẹ ihwo rẹ Ijipt, vwo kpo otọ rẹ ihwo ri Kenan, ihwo ri Hẹt, ihwo rẹ Amọ, ihwo ri Pẹriz, ihwo ri Haiv, kugbe ihwo ri Jẹbus, vwo kpo otọ rọ djẹ ọkẹre rẹ ameivie vẹ ame ọnyọn.”’
18 “Vwọrẹ imuẹro, ayen che nyo urhuru wẹn, ku wọ yanran, wẹ vẹ ekpako rẹ Izrẹl, kẹ ovwan bru ovie rẹ Ijipt ra, kẹ ovwan ta kẹ: ‘Jihova Ọghẹnẹ rẹ ihwo ri Hibru nene avwanre ta ota. Ọtiọyena biko jẹ avwanre yan oyan rẹ ẹdẹ erha kpo evunrẹ aton na, rere avwanre se ze izobo kẹ Jihova Ọghẹnẹ rẹ avwanre.’ 19 Ẹkẹvuọvo mẹvwẹ komobọ nabọ riẹn nẹ ovie rẹ Ijipt cha rhọnvwe nẹ ovwan yanraan, jokpanẹ obọ ọgangan gbarọ vwo ru ọtiọyen. 20 Ọtiọyena ke me cha rionbọ mẹ phia, ki mi gboja kẹ Ijipt vẹ iruo rẹ igbevwunu mẹ eje ri mi che ru vwẹ etiyin, ọyena da wan nu ko che siobọnu ovwan yanran. 21 Me cha nẹrhẹ ihwo nana mrẹ ẹroesiri rẹ ihwo rẹ Ijipt, ọke rẹ ovwan da yanran ovwan cha nama fiabọ yanraan. 22 Aye ọvuọvo kọ nokpẹn rẹ ekuakua ra vwẹ idọnọ efuanfon vẹ iro vwo ru kugbe iwun vwo mie ọrivẹ rọyen kugbe aye rọ dia uwevwin rọyen, kẹ ovwan che ku ayen phiyọ emeshare rẹ ovwan kugbe emetẹ rẹ ovwan; kẹ ovwan gborho ihwo rẹ Ijipt.”