Ẹyano

4 Ẹkẹvuọvo Mosis da kpahen: “Kẹ ọ da rha dianẹ ayen se vwe gbuyota je kerhọ rẹ urhuru mẹẹ vwo? Kidie ayen cha ta, ‘Jihova vwomaphia kẹ wẹẹ.’” 2 Ọtiọyena Jihova da ta kẹ: “Die yen rhe we obọ na?” Ọ da kpahen: “Ọkpọ.” 3 Ọ da ta: “Do phiyotọ.” Ọtiọyena o de do phiyọtọ, o de hirhephiyọ ọrọdekọ, Mosis da mrẹ djẹ. 4 Etiyin Jihova da ta kẹ Mosis: “Rionbọ wẹn phia rere wọ yọnrọn urhurhu rọyen.” Ọtiọyena ọ da rionbọ phia, ọ da yọnrọn, o de hirhephiyọ ọkpọ vwẹ obọ rọyen. 5 Ọghẹnẹ da ta: “Ọnana dia ọtiọyen rere ayen vwo segbuyota nẹ Jihova rọ dia Ọghẹnẹ rẹ esẹ rayen ride, Ọghẹnẹ rẹ Ebraham, Ọghẹnẹ rẹ Aizik, kugbe Ọghẹnẹ ri Jekọp vwomaphia kẹ wẹ.”

6 Jihova da rhoma ta kẹ: “Biko, duvwun obọ wẹn phiyọ evunrẹ ewun wẹn.” Ọtiọyena o de duvwun obọ rọyen phiyọ evunrẹ ewun rọyen. Ọke ro vwo yoro phia, nighere, oti mu obọ rọyen re, kọ fuan kerẹ imicho! 7 Ọtiọyena ọ da ta: “Duvwun obọ wẹn rhivwin phiyọ evunrẹ ewun wẹn na.” O de duvwun obọ rọyen rhivwin phiyọ evunrẹ ewun rọyen. Ọke ro vwo yoro phia nẹ ewun na rhe, o rhivwin kpo oborẹ ẹbẹre ri chekọ rẹ ugboma rọyen hepha re! 8 Ọ da ta: “Ọ da dianẹ ayen se we gbuyotaa yẹrẹ davwerhọ rẹ oka rẹsosuọ naa, ọke yena re, kẹ ayen che vwo imuẹro kpahen oka rivẹ na. 9 Dedena ọ da dianẹ ayen se eka nana ivẹ na gbuyotaa, ayen je rhọnvwe nyo urhuru wẹẹn, wo mi vo ame nẹ Urhie ri Nail na rhe rere wo kuo phiyọ otọ ọyaya na, ame ru wo vo nẹ Nail rhe na ko che hirhephiyọ ọbara vwẹ otọ ọyaya na.”

10 Asaọkiephana Mosis da ta kẹ Jihova: “Wọ ghwọọ Jihova, eta mẹ je rhe ghwraghwra dẹvoo, rhabae rhe yẹrẹ rhanvwẹ ọke wẹ vẹ odibo wẹn vwọ ta ota naa, kidie eta mẹ pha bọrọbọrọ,* ẹrẹnvwe mẹ je sasaa.” 11 Jihova da ta kẹ: “Ono yen ma ugbunu kẹ ohworakpọ yẹrẹ ono yen nẹrhẹ ayen diunu, dierhọ, mrorẹ fiotọ, yẹrẹ rhuẹro? O dia omẹvwẹ ri Jihova? 12 Ọtiọyena gba yanran asaọkiephana, mẹ vẹ owẹ cha dia ọke wọ da ta ota,* mi ji che yono uwe obo ru wọ cha ta.” 13 Ẹkẹvuọvo ọ da ta: “Wọ ghwọọ Jihova, biko ji ohwo ọfa ru wọ guọnọ ji.” 14 Ọtiọyena ophu de mu Jihova kpahen Mosis, ọ da ta: “Kẹ oniọvo wẹn Erọn ohwo ri Livae na vwo? Me riẹnre nẹ ọ nabọ riẹn ota ta. Ọ hẹ idjerhe bru we cha asaọkiephana. Ọ da mrẹ wẹ, ubiudu rọyen kọ cha ghọghọ. 15 Ọtiọyena wọ me ta ota kẹ ji phi eta na phiyọ unu rọyen, mẹ vẹ owẹ kugbe ọyen cha dia ọke rẹ ovwan da ta ota, ki mi che yono ovwan oborẹ ovwan che ru. 16 Ọ cha cha wẹ uko vwọ ta ota kẹ ihwo na, kọ cha dia ọtota wẹn, ku wọ cha ga* kerẹ Ọghẹnẹ vwọ kẹ. 17 Ku wọ cha yọnrọn ọkpọ na vwẹ obọ wẹn rere wọ reyọ vwo ru emu rẹ igbevwunu na.”

18 Ọtiọyena Mosis de rhivwin bru Jẹtro ọgọ rọyen ra, ọ da ta kẹ: “Me guọnọ yanran, biko, me guọnọ rhivwin bru iniọvo mẹ rehẹ Ijipt ra, ra mrẹ sẹ ayen jehẹ akpọ.” Jẹtro da ta kẹ Mosis: “Yanran vwọrẹ ufuoma.” 19 Ọyena vwọ wan nu, Jihova da ta ota kẹ Mosis rọ vwọ hẹ Midian: “Yanran, rhivwin kpo Ijipt, kidie ihwo eje re guọnọ owẹ hwe* ghwure.”

20 Ọtiọyena Mosis da reyọ aye rọyen vẹ emeshare rọyen, o de mu ayen phiyọ enu rẹ ekẹkẹtẹ, ọ da ton oyan phiyọ ro vwo rhivwin kpo otọ rẹ Ijipt. Vwọba, Mosis yọnrọn ọkpọ rẹ Ọghẹnẹ rẹ uyota na vwẹ obọ rọyen. 21 Jihova da ta kẹ Mosis: “Wo de rhivwin kpo otọ rẹ Ijipt re, jẹ o muwẹro nẹ wo ru igbevwunu na eje re me kẹ wẹ egba nẹ wo ru vwẹ obaro ri Fero na. Ẹkẹvuọvo mi che ruo rere ubiudu rọyen vwọ dia gangan, ọ cha rhọnvwe siobọnu ihwo na yanraan. 22 Ku wọ ta kẹ Fero: ‘Ọnana yen oborẹ Jihova tare: “Izrẹl ọyen ọmọ mẹ,* ọmọkpako mẹ. 23 Me ta kẹ wẹ, Siobọnu ọmọ mẹ yanran rere ọ ra ga vwẹ. Ẹkẹvuọvo wọ rha rhọnvwe siobọno yanraan, ki mi che hwe ọmọ wẹn, ọmọkpako wẹn.”’”

24 Asaọkiephana rẹ ayen vwọ hẹ idjerhe vwẹ asan rẹ ayen wonphiyọ,* Jihova da vwa, kọ guọnọ teyọn hwe.* 25 Ukuotọ rọyen Zipora da reyọ aphia, ọ da yanvwe ọmọ rọyen na, ọ da nẹrhẹ uvweruvwe rọyen te awọ rọyen, ọ da ta: “Mi ru ọnana kidie wẹwẹ ọshare ọpha rẹ ọbara vwọ kẹ vwẹ.” 26 Ọtiọyena Ọghẹnẹ da yan jovwo. Vwẹ ọke yena ọ da ta, “ọshare rẹ ọpha rẹ ọbara,” fikirẹ oyanvwe na.

27 Ọyena vwọ wan nu, Jihova da ta kẹ Erọn: “Yan ro evunrẹ aton na ra vwa Mosis.” Ọ da yanran, ọ da vwa Mosis vwẹ ugbenu rẹ Ọghẹnẹ rẹ uyota na, o de yeren je fiọnfiọn. 28 Mosis da vuẹ Erọn eta ri Jihova eje, kugbe eka na eje ro ji iji rọyen kẹ nẹ o ru na. 29 Ọyena vwọ wan nu, Mosis vẹ Erọn da yanran re koko ekpako rẹ Izrẹl eje. 30 Erọn da vuẹ ayen eta rẹ Jihova ta kẹ Mosis eje, o de ji ru eka na vwẹ irharo rẹ ihwo na. 31 Ayen vwọ mrẹ ọnana, ihwo na de segbuyota. Ayen vwo nyo nẹ Jihova vwo oniso rẹ ihwo rẹ Izrẹl re, nẹ ọ je mrẹ ojaẹriọ rayen re, ayen da vwẹ uyovwin kpotọ ji sherhẹn totọ.