Ọbe Rivẹ rẹ Ivie

6 Emọ rẹ emraro na da ta kẹ Ẹlaisha nẹ: “Nighere! Asan rẹ avwanre vẹ owẹ dia na keke nọ kẹ avwanre. 2 Biko jẹ avwanre kpo Jọdan na. Jẹ avwanre ọvuọvo she urhe vwo nẹ etiyin rere avwanre bọn asan rẹ avwanre cha dia vwẹ etiyin.” Ọ da tanẹ: “Ovwan yanran.” 3 Ọvo vwẹ usun rayen da tanẹ: “Biko, wo che nene idibo wẹn yanran?” Ọtiọyena ọ da tanẹ: “Mi che nene ovwan.” 4 Ọtiọyena o de nene ayen yanran, ayen de te Jọdan na, kẹ ayen gbọ irhe na she. 5 Rẹ ọvo vwẹ usun rayen vwọ gbọ urhe, uyovwin rẹ ushurhe na de yoro she phiyọ ame, o de kperi phia nẹ: “Eghwo, onini mẹ, a yarerọ!” 6 Ohwo rẹ Ọghẹnẹ rẹ uyota na da tanẹ: “Tivọ yen o she phiyọ?” O de dje asan na kẹ. Ọ da nyavwe oghọn rẹ urhe, o de do phiyọ asan na, ọ da nẹrhẹ uyovwin rẹ ushurhe na phorhẹ. 7 Ọ da tanẹ: “Tọrọ rhe.” Ọtiọyena ọ da rionbọ rọyen phia, ọ da tọrọ.

8 Asaọkiephana ovie ri Siria yanran re nene Izrẹl phi ofovwin. Ọ vẹ idibo rọyen da jiroro kugbe, ọ da tanẹ: “Mẹ vẹ ovwan che wonphiyọ* asan tiọna tiọna.” 9 Etiyin ohwo rẹ Ọghẹnẹ rẹ uyota na da vwẹ ovuẹ rhe ovie rẹ Izrẹl nẹ: “Nomaso, wọ wan etinẹ naa, kidie ihwo ri Siria che rhi wonphiyọ etiyin.” 10 Ọtiọyena ovie rẹ Izrẹl de ji ihwo kpo asan rẹ ohwo rẹ Ọghẹnẹ rẹ uyota na vwẹ orhọesio kẹ kpahen na. Ọtiọyen kọyen Ẹlaisha vwẹ orhọesio kẹ ovie na, ọ da kẹnoma kẹ asan na vwẹ ọke sansan.*

11 Ọnana da nẹrhẹ ivun miovwo ovie* ri Siria na gangan, ọtiọyena o de se idibo rọyen, ọ da ta kẹ ayen nẹ: “Ovwan vuẹ vwẹ! Ono vwẹ usun rẹ avwanre na yehẹ ẹbẹre rẹ ovie rẹ Izrẹl?” 12 Ọvo vwẹ usun rẹ idibo na da tanẹ: “O vwo ohwo vuọvo vwẹ usun rẹ avwanree, ọrovwovwe ovie! Ẹlaisha rẹ ọmraro na vwẹ Izrẹl yen ohwo rọ vuẹ ovie rẹ Izrẹl erọnvwọn ru wọ tare vwevunrẹ uvun wẹn.” 13 Ọ da tanẹ: “Yanran ra guọnọ asan rọ hepha rere mi se vwo ji ihwo re muo.” Ọke vwọ yan obaro, a da niyẹnrẹn kẹ nẹ: “Ọ hẹ Dotan.” 14 Ugege yena, o de ji iyesi vẹ ekpẹrẹ rẹ ofovwin kpo etiyin, ọtiọyen ji te otuofovwin buebun; ayen da rhe vwẹ ason je gba riariẹ orere na.

15 Ọke rẹ odibo rẹ ohwo rẹ Ọghẹnẹ rẹ uyota na vwo vrẹn vwẹ edegburhiọke je ro otafe, ọ da mrẹ otuofovwin vẹ iyesi kugbe ekpẹrẹ rẹ ofovwin re riariẹ orere na phiyọ. Siẹvuọvo na, odibo na da ta kẹ nẹ: “E ghwuruo, onini mẹ! Die yen e che ru?” 16 Ẹkẹvuọvo ọ da tanẹ: “Wọ djoshọọ! Kidie ihwo re vẹ avwanre gba herọ bun nọ ihwo re vẹ ayen gba herọ.” 17 Etiyin Ẹlaisha da tuẹn ẹrhovwo ẹnẹ phiyọ, ọ da ta: “E Jihova, biko rhiẹro rọyen rere ọ mrẹ obo re riariẹ avwanre phiyọ.” Ugege yena, Jihova de rhiẹro rẹ odibo na, ọ da mrẹ, nighere! ekogho rẹ igbenu na vọnre vẹ iyesi kugbe ekpẹrẹ rẹ ofovwin rẹ erhanre re riariẹ Ẹlaisha phiyọ.

18 Ọke rẹ ihwo ri Siria na vwo bro rhe, Ẹlaisha da nẹrhovwo rhe Jihova nẹ: “Biko, rhuẹro rẹ ihwo* nana.” Ọtiọyena o de rhuẹro* rayen kirobo rẹ Ẹlaisha yare. 19 Ẹlaisha da ta kẹ ayen nẹ: “Ọnana dia idjerhe naa, ọnana je dia orere naa. Ovwan nene uvwe rere mi sun ovwan bru ohwo rẹ ovwan guọnọ na ra.” Ẹkẹvuọvo o de sun ayen kpo Sameria.

20 Ọke rẹ ayen vwo te Sameria, Ẹlaisha da tanẹ: “E Jihova, rhiẹro rayen rere ayen sa mrorẹ.” Ọtiọyena Jihova de rhiẹro rayen, ayen da mrẹ nẹ ayen hẹ uherevie ri Sameria. 21 Ọke rẹ ovie rẹ Izrẹl vwọ mrẹ ayen, ọ da ta kẹ Ẹlaisha nẹ: “Me teyen ayen hwe, me teyen ayen hwe, ọsẹ mẹ?” 22 Ẹkẹvuọvo ọ da tanẹ: “Wọ teyan ayen hwee. Wọ rhoma vwẹ ọlọkọ vẹ umurhabọ wẹn vwọ teyen ihwo ru wo muru ighuvwu hwe? Vwẹ ibrẹdi vẹ ame kẹ ayen rere ayen re je da, rere ayen rhivwin bru ọrovwori rayen.” 23 Ọtiọyena o de chere udemu rode vwọ kẹ ayen, ayen da re je da, ọyena vwọ wan nu, o de siobọnu ayen rhivwin bru ọrovwori rayen ra. Ẹko rẹ igborhugborho ri Siria rha rhe otọ rẹ Izrẹl ọfaa.

24 Ọke vwọ yan obaro, Bẹn-hedad ovie ri Siria de se otuofovwin rọyen eje koko, ayen da yanran ra gba riariẹ Sameria. 25 Ọtiọyena owẹnvwe ọgangan de rhi fi vwẹ Sameria, ayen gba riariẹ rhirin re te ọke rẹ uyovwin rẹ ekẹkẹtẹ rhe vwọ ghanre te idọnọ efuanfon 80, rẹ ẹkẹn ọvo rẹ ẹkẹ ẹne rẹ ovwanvwọ rẹ ikabu* rẹ isọn rẹ erurẹ da rhe ghanre te idọnọ efuanfon 5. 26 Rẹ ovie rẹ Izrẹl vwọ wan enu rẹ igbẹhẹ na wanvrẹ, aye ọvo de kperi se nẹ: “Cha avwanre uko, E ọrovwovwe ovie!” 27 Ọtiọyena ọ da tanẹ: “Jihova rha cha wẹ ukoo, tivọ me da sa mrẹ ukẹcha vwọ kẹ wẹ? Asan re de wonro ibi ekankọn? Gbanẹ asan re de miẹ iwaini yẹrẹ evwri?” 28 Ovie na da nọ aye na nẹ: “Die yen phiare?” Ọ da kpahen nẹ: “Aye nana ta kẹ vwẹ nẹ, ‘Vwẹ ọmọ wẹn kpahotọ rere a riọ nonẹna, odẹ rọ cha na ka cha re ọmọ mẹ.’ 29 Ọtiọyena avwanre de chere ọmọ mẹ, avwanre da riọ. Vwẹ ẹdẹ rọ vwọ kpahọn, me da ta kẹ nẹ, ‘Vwẹ ọmọ wẹn kpahotọ rere avwanre riọ.’ Ẹkẹvuọvo o de si ọmọ rọyen nu.”

30 Ugege rẹ ovie vwo nyo eta rẹ aye na, ọ da bẹrẹ iwun rọyen. Ọke rọ vwọ wan igbẹhẹ na vrẹ, ihwo na da mrẹ nẹ o ku ewun esiso phiyọ obevun rẹ iwun rọyen.* 31 Ọ da tanẹ: “E jẹ Ọghẹnẹ ru ọtiọyen kẹ vwẹ je vwọ ba, siẹrẹ mi rhe bru uyovwin rẹ Ẹlaisha ọmọ ri Shefat no nonẹnaa!”

32 Ẹlaisha chidia uwevwin rọyen, ekpako na ji chidia kẹrẹ. Ovie de ji ọshare ọvo kobaro kẹ, ẹkẹvuọvo tavwen ikọn na ke rhe, Ẹlaisha da ta kẹ ekpako na nẹ: “Ovwan mrẹ oborẹ ọmọ rẹ ozighẹ na ji ohwo rhe nẹ o rhi bru uyovwin mẹ no? Ovwan rhẹrẹ, ọke rẹ ikọn na da rhe, ovwan bi ẹchẹ na gbe rere ovwan vwẹ abọ tua ẹchẹ na o vwo jẹ uwevwin na ẹruọ. Ovwan nyo edo rẹ ichiyin rẹ ọrovwori rọyen rọ vwọ kpahọn kpakpakpa na?” 33 Ọke ro ji vwo nene ayen ta ota na, ikọn na de bro rhe, ovie na da tanẹ: “Okpetu nana obọ ri Jihova yen o nurhe. Diesorọ me je vwọ hẹrhẹ Jihova?”