Matiu

12 Vwẹ ọke yena Jesu kọ wan idju ra kọn ekankọn phiyọ vwẹ Ẹdẹ Urovwoma na. Owẹnvwe ko hwe idibo rọyen, ọtiọyena kẹ ayen kọrọ ibi ekankọn rayen ria. 2 Ihwo ri Farisi na vwọ mrẹ ọnana, ayen da ta kẹ nẹ: “Nighere! Idibo wẹn ruẹ obo re vwọso urhi vwẹ Ẹdẹ Urovwoma na.” 3 Ọ da ta kẹ ayen nẹ: “Ovwan ji rhi se oborẹ Devid ruru ọke rẹ owẹnvwe vwo hwe vẹ eshare re vẹ ọyen gba herọ? 4 Obo rọ ro evunrẹ uwevwin rẹ Ọghẹnẹ, ayen da re ibrẹdi re vwo dje na, orọnvwọn rẹ urhi rhọnvwe kẹ yẹrẹ ihwo re vẹ ọyen gba herọ nẹ ayen re-e, jokparẹ irherẹn na ọvo? 5 Gbanẹ ovwan ji rhi se vwevunrẹ Urhi na nẹ, vwẹ Ẹdẹ Urovwoma na, irherẹn rehẹ uwevwin rẹ ẹga na gbe Ẹdẹ Urovwoma na kuẹ jẹ ayen riabe-e? 6 Ẹkẹvuọvo me ta kẹ ovwan nẹ, orọnvwọn rọ rho vrẹ uwevwin rẹ ẹga na hẹ etinẹ. 7 Ẹkẹvuọvo, ọ da dianẹ ovwan vwo ẹruọ rẹ oborẹ ọnana mudiaphiyọ, ‘Me guọnọ arodọnvwẹ, ọ dia izobo-o,’ ovwan rhe brorhiẹn hwe ihwo ri jẹ abe ẹriọ na-a. 8 Kidie Ọmọ rẹ ohwo yen Ọrovwori rẹ Ẹdẹ Urovwoma na.”

9 Ro vwo vrẹn nẹ etiyin nu, o de kpo evunrẹ sinagọg rayen, 10 nighere! o vwo ọshare ọvo rẹ obọ rọyen sida!* Ọtiọyena ayen da nọ nẹ, “Urhi rhọnvwere nẹ e sivwin ohwo vwẹ Ẹdẹ Urovwoma na?” rere ayen mrẹ asan yọnrọn. 11 Ọ da ta kẹ ayen nẹ: “Ọ da dianẹ wo vwo ogodẹ ọvo, ogodẹ na de she phiyọ ukpotọ vwẹ Ẹdẹ Urovwoma, o vwo ohwo ọvo vwẹ usun rẹ ovwan na ro che jẹ ẹyọnrọn rere o muo phia? 12 Ohworakpọ ghanre vrẹ ogodẹ shesheri! Ọtiọyena urhi rhọnvwere nẹ e ru obo ri yovwirin vwẹ Ẹdẹ Urovwoma.” 13 Ọtiọyena ọ da ta kẹ ọshare na nẹ: “Rionbọ wẹn phia.” Ọ da riẹn phia, obọ na de shephiyọ kerẹ ọ ro chekọ na. 14 Ẹkẹvuọvo ihwo ri Farisi na da ro otafe, ayen da ra jiroro rẹ ayen vwo hwe. 15 Jesu rhe vwọ riẹn kpahen ọnana, o de vrẹn nẹ etiyin. Ihwo buebun de ji nene, o de sivwin ayen eje, 16 ẹkẹvuọvo o si ayen orhọ gangan nẹ ayen dje ọyen kẹ ihwo-o, 17 rere o se vwo ru orugba rẹ obo ra tare womarẹ ọmraro Aizaya, rọ tare nẹ:

18 “Nighere! Odibo mẹ re me jẹreyọ, ri mi vwo ẹguọnọ rọyen, ohwo ri mi* rhiabọreyọ! Mi che phi ẹwẹn mẹ phiyọ oma rọyen, ko che dje oborẹ orhiẹn abavo mudiaphiyọ vwọ kẹ ẹgborho na phephẹn. 19 Ọ cha kunu yẹrẹ kperi phia-a, yẹrẹ ohwo vuọvo che nyo urhuru rọyen vwẹ irhuvwun ride na-a. 20 O che vwirhin ugbẹn rẹ okankọn vuọvo ro vwirhin ghẹnghẹ-ẹn, o ji che fun iwiki vuọvo rọ joma fun re-e, bẹsiẹ rọ vwọ nẹrhẹ orhiẹn abavo phikparobọ. 21 Vwọrẹ uyota, ẹgborho che vwo iphiẹrophiyọ kpahen odẹ rọyen.”

22 Ọyena vwọ wan nu, ayen de mu ọshare ọvo rẹ ẹwẹn rẹ Idẹbono kpokpo bro rhe, o rhuẹro ọ je sa ta ota-a, o de sivwon, ọshare rọ sa ta ota na-a kọ ta ota je mrorẹ. 23 Ọtiọyena o de gbe otu na eje unu, kẹ ayen tanẹ: “Ọnana rha dia Ọmọ ri Devid na?” 24 Ọke rẹ ihwo ri Farisi na vwo nyo ọnana, ayen da tanẹ: “Ogangan ri Bẹlzibọb* rọ dia osun rẹ ẹwẹn rẹ Idẹbono na yen ohwo nana vwọ djẹ ẹwẹn rẹ Idẹbono na phia.” 25 Rọ vwọ riẹn iroro rayen, ọ da ta kẹ ayen nẹ: “Kuvie kuvie rọ ghare vwọso oma rọyen cha ghwọrọ, korere korere yẹrẹ uwevwin rọ ghare vwọso oma rọyen che se mudia-a. 26 Vwẹ idjerhe vuọvo na, Eshu da djẹ Eshu phia, kọyen ọ ghare vwọso oma rọyen re; kẹ mavọ yen uvie rọyen se vwo mudia? 27 Vwọ vrẹ ọyena, ọ da dianẹ ogangan ri Bẹlzibọb yen me vwọ djẹ ẹwẹn rẹ Idẹbono phia, kẹ ogangan rẹ ono yen emọ rẹ ovwan vwọ djẹ ayen phia? Ọnana yen sorọ ayen cha vwọ reyọ ovwan vwo guẹdjọ. 28 Ẹkẹvuọvo ọ da dianẹ womarẹ ẹwẹn rẹ Ọghẹnẹ yen me vwọ djẹ ẹwẹn rẹ Idẹbono na phia, kọyen Uvie rẹ Ọghẹnẹ na ghene ro ovwan ọrhan re. 29 Yẹrẹ mavọ yen ohwo sa vwọ ro uwevwin rẹ ọgba rọ da ghwẹ ekuakua rọyen reyọ, jokpanẹ ọ ka gba ọgba na tavwen? Ọke yena ọvo yen ọ sa vwọ ghwẹ ekuakua rẹ uwevwin rọyen reyọ. 30 Kohwo kohwo rọhẹ ẹbẹre mẹ-ẹ, jẹ ọ vwọso ovwẹ, kohwo kohwo ro nene uvwe koko-o jẹ ọ hra.

31 “Fikirẹ ọnana me ta kẹ ovwan nẹ, e che vwo ghovwo koka koka rẹ umwemwu kugbe ota rẹ ẹgua rẹ ihwo tare, ẹkẹvuọvo e che vwo ghovwo ota rẹ ẹgua ra ta vwọso ẹwẹn na-a. 32 Kerẹ udje, kohwo kohwo rọ ta ota vwọso Ọmọ rẹ ohwo, e che vwo ghovwo; ẹkẹvuọvo kohwo kohwo rọ ta ota vwọso ẹwẹn ọfuanfon na, e che vwo ghovwo-o, ẹjo, owenẹ ọ dia evunrẹ eyeren* nana yẹrẹ ọ rọ cha na.

33 “Ovwan rhe ru urhe yoyovwin rere emamọ rọyen je dia yoyovwi-in, kọyen ovwan che ru urhe na rere o gbon emamọ rọyen mi ji gbon, kidie womarẹ emamọ rọyen yen e che vwo vughe urhe na. 34 Emọ rẹ eredekọ, mavọ yen ovwan re dia ihwo umwemwu na sa vwọ ta eta esiri? Kidie obo re vọn evunrẹ ubiudu na yen unu na ta. 35 Ohwo esiri reyọ erọnvwọn esiri nẹ evunrẹ efe esiri ro kokori cha, ẹkẹvuọvo ohwo umwemwu reyọ erọnvwọn umwemwu nẹ evunrẹ efe umwemwu ro kokori cha. 36 Me ta kẹ ovwan nẹ vwẹ Ẹdẹ rẹ Ẹdjọeguo na, ihwo cha niyẹnrẹn rẹ kota kota ro fierere-e rẹ ayen ta; 37 kidie womarẹ eta wẹn yen e che vwo se we ọvwata, womarẹ eta wẹn yen e ji che vwo brorhiẹn hwe we.”

38 Kerẹ ẹkpahọnphiyọ vwọ kẹ, evo vwẹ usun rẹ isiẹbe na kugbe ihwo ri Farisi na da tanẹ: “Oyono, avwanre guọnọre nẹ wo ru oka kẹ avwanre mrẹ.” 39 Ọ da kpahen kẹ ayen nẹ: “Uvwiẹ umwemwu kugbe igberadja* na rha guọnọ oka, ẹkẹvuọvo e che dje oka vuọvo kẹ-ẹ, jokparẹ oka ri Jona ọmraro na. 40 Kidie kirobo ri Jona dia evunrẹ erin rode na vwẹ ẹdẹ erha kugbe ason erha na, ọtiọyen Ọmọ rẹ ohwo je cha dia evunrẹ ubiudu rẹ akpọ na vwẹ ẹdẹ erha kugbe ason erha. 41 Ihwo ri Ninive che vrẹn vwevunrẹ ẹdjọeguo na vẹ uvwiẹ nana ayen mi bru hwe, kidie ayen kurhẹriẹ fikirẹ oborẹ Jona ghwoghwori. Ẹkẹvuọvo nighere! orọnvwọn rọ vrẹ Jona hẹ etinẹ. 42 Ovie aye rẹ obọrhen ọnre na che vrẹn vwẹ ẹdjọeguo na vẹ uvwiẹ nana o mi bru hwe, kidie o nẹ oba rẹ akpọ na rhe rhi nyo aghwanre ri Solomọn. Ẹkẹvuọvo nighere! orọnvwọn rọ vrẹ Solomọn hẹ etinẹ.

43 “Ọke rẹ ẹwẹn ro jẹfuọn de nẹ oma rẹ ohwo, ọ me wan asan rẹ ame hepha-a rọ vwọ guọnọ asan ro de rovwoma, ẹkẹvuọvo ọ mrẹ asan vuọvo-o. 44 Ọ da tanẹ, ‘Mi che rhivwin kpo uwevwin mẹ ri mi vrẹn nu na,’ ọke ro vwo te etiyin, ọ da mrẹ nẹ ohwo vuọvo dia uwevwin na-a, ẹkẹvuọvo a nabọ hwerhe fon je rhuẹrẹ fia. 45 Ọ da yanran ra reyọ ẹwẹn ighwrẹn efa re bra vrẹ ekpuyovwin rọyen rhe, ayen vwọ ro evun rọyen, ayen da dia etiyin; ẹdia rẹ ọshare na ukuko na da rhe bra vrẹ ọke rẹsosuọ. Ọtiọyen ọ je cha dia vwọ kẹ uvwiẹ umwemwu nana.”

46 Rọ je vwọ ta ota kẹ otu na, oni rọyen vẹ iniọvo rọyen de rhi mudia otafe, rẹ ayen vwọ guọnọ ta ota kẹ. 47 Ọtiọyena ohwo ọvo da ta kẹ nẹ: “Nighere! Oni wẹn vẹ iniọvo wẹn mudia otafe, ayen guọnọ ta ota kẹ wẹ.” 48 Ọ da kpahen kẹ ohwo rọ ta ota kẹ na nẹ: “Ono yen oni mẹ, amono yen iniọvo mẹ?” 49 Rọ vwọ rionbọ phiyọ idibo rọyen, ọ da tanẹ: “Nighere! Oni mẹ kugbe iniọvo mẹ! 50 Kidie kohwo kohwo ro ru ọhọre rẹ Ọsẹ mẹ rọhẹ obodjuvwu, ohwo yena yen oniọvo mẹ rẹ ọshare kugbe oniọvo mẹ rẹ aye kugbe oni mẹ.”