Ẹyano

17 Ọghwẹgbe rẹ ihwo rẹ Izrẹl na eje de vrẹn nẹ aton ri Sin, ayen da yan nẹ asan kpo asan vwo nene iji ri Jihova, ayen de wonphiyọ* Rẹfidim. Ẹkẹvuọvo ame herọ rẹ ihwo na cha daa.

2 Ọtiọyena ihwo na ki nene Mosis kunu, kẹ ayen ta: “Kẹ avwanre ame da.” Ẹkẹvuọvo Mosis da ta kẹ ayen: “Diesorọ ovwan vwo nene uvwe kunu? Diesorọ ovwan vwọ davwan Jihova nẹ ọkieje?” 3 Ẹkẹvuọvo urhuru rẹ ame de si ihwo na mamọ vwẹ etiyin, kẹ ayen brenu kpahan Mosis, kẹ ayen ta: “Diesorọ wọ vwọ reyọ avwanre nẹ Ijipt rhe rhe reyọ urhuru rẹ ame vwọ teyen avwanre vẹ emọ rẹ avwanre kugbe ichuru rẹ avwanre hwe?” 4 Ukuotọ rọyen Mosis de kperi se Jihova: “Die mi che ru kpahen ihwo nana? O rhe che krii, kẹ ayen che phi vwe!”

5 Ọtiọyena Jihova da ta kẹ Mosis: “Kobaro kẹ ihwo na rere wọ reyọ evo vwẹ usun rẹ ekpako rẹ Izrẹl nene oma, wọ me je reyọ ọkpọ ru wọ vwọ ghwiẹ Urhie ri Nail na. Yọnrọn vwẹ obọ wẹn rere wọ yanran. 6 Nighere! Mi che mudia obaro wẹn vwẹ enu rẹ oragha rọhẹ Horẹb. Ku wọ ghwiẹ oragha na, ame ko che nẹ evun rọyen rhe, ihwo na ke cha da.” Mosis de ru ọtiọyen vwẹ obaro rẹ ekpako rẹ Izrẹl. 7 Ọtiọyena o de se asan na Masah* kugbe Mẹriba* fikirẹ unuẹkọ rẹ ihwo rẹ Izrẹl kugbe fikiridie nẹ ayen davwen Jihova ni rẹ ayen vwọ ta: “Jihova hẹ ohri rẹ avwanre gbanẹ ọ herọọ?”

8 Ọyena vwọ wan nu, ihwo rẹ Amalẹk da rhe, ayen da họnre vwọso ihwo rẹ Izrẹl vwẹ Rẹfidim. 9 Ọtiọyena Mosis da ta kẹ Joshua: “Sane eshare kẹ avwanre rere ovwan yanran ra họnre vwọso ihwo rẹ Amalẹk. Odẹ rọ cha na, mi che mudia enu rẹ ugbenu otete na vẹ ọkpọ rẹ Ọghẹnẹ rẹ uyota na vwẹ obọ mẹ.” 10 Joshua de ru kirobo rẹ Mosis vuẹrẹ na, ọ da ra họnre vwọso ihwo rẹ Amalẹk. Mosis, Erọn, kugbe Họr de kpo obenu rẹ ugbenu otete na.

11 Kọke kọke rẹ Mosis da kpare abọ rọyen kpenu, ihwo rẹ Izrẹl ki phiẹkparobọ, ẹkẹvuọvo ugege rọ da vwẹ abọ rọyen kpotọ, ihwo rẹ Amalẹk na ki phiẹkparobọ. 12 Ọke rẹ abọ ri Mosis vwọ rhọ re, ayen de mu ukuta ọvo kẹrẹ, o de chidia enu rọyen. Ọtiọyena Erọn vẹ Họr de mudia obọrhen vẹ obohwẹre rọyen, ayen da yọnrọn abọ rọyen, abọ rọyen da dia enu bẹsiẹ rẹ ọnre na vwo she kpotọ. 13 Ọtiọyena Joshua da vwẹ ọlọkọ vwo phi Amalẹk vẹ ihwo rọyen kparobọ.

14 Asaọkiephana Jihova da ta kẹ Mosis: “Si ọnana phiyọ ọbe na kerẹ ẹkarophiyọ, wọ me je vwanriẹn kẹ Joshua, ‘Mi che si ihwo rẹ Amalẹk nẹ otọ rẹ idjuvwu na karekare, a rha cha karophiyọ ayen ọfaa.’” 15 Ọtiọyena Mosis da so agbada ọvo, o de se Jihova-nisai,* 16 rọ vwọ ta: “Kidie obọ rọyen vwọso ekete ri Jah, Jihova che nene ihwo rẹ Amalẹk phi ofovwin vwo nẹ uvwiẹ re te uvwiẹ.”