Obọdẹn rẹ Akpeyeren Vwẹ Obaro Na
O rhe che kri-i, a cha do Eshu vẹ emekashe rọyen phiyọ ukpotọ
O rhe che kri-i, ophiẹnvwe rẹ Eshu vẹ emekashe rọyen che vwoba kẹrẹkpẹ. Jihova djẹ ayen nẹ odjuvwu re. (Ẹvwọphia 12:9) Vwẹ obaro na, Ọghẹnẹ cha ghwọrọ Eshu vẹ emekashe rọyen. Vwọ kpahen emramrẹ rẹ ọyinkọn Jọn mrẹre, ọ da ta: “Etiyin me da mrẹ amakashe ọvo ro wontọ nẹ odjuvwu cha, ọ yọnre usiaphrẹ rẹ orho rẹ igbephẹre [ukpotọ ro jẹ oba evwo, NW] vwẹ obọ rọyen kugbe ọjọrọ rode. O de shabọ họ okpodje na, ọrọdekọ rẹ awanre na, kọyen hẹ Idẹbono kugbe Ukọn na, ọ da gba ikpe uriorin, ọ da kparọ phihọ orho rẹ igbẹphẹre [ukpotọ ro jẹ oba evwo, NW] na, a da kanre ẹchẹ gbe a da rharọ mu kokoroko, rere o vwo jẹ ẹgborho rẹ akpọ na ẹphiẹn ọfa, bẹsiẹ ikpe uriorin na vwọ gba.” (Ẹvwọphia 20:1-3) Ukuotọ rọyen a cha ghwọrọ Eshu vẹ emekashe rọyen bẹdẹ.—Ẹvwọphia 20:10.
A cha ghwọrọ iruimwemwu nẹ otọrakpọ na.—Une Rẹ Ejiro 37:9, 10; Luk 13:5.
Ihwo ri Ghwuru Cha Rhoma Dia!
A cha rhọnvwọ ihwo ri ghwuru rhivwin rhe otọrakpọ na
Jihova da ghwọrọ Eshu vẹ emekashe rọyen nu, ko ku ebruphiyọ ku ihworakpọ. Karophiyọ nẹ ihwo ri ghwuru vwo arhọ-ọ. Jesu vwẹ ughwu vwo dje ovwerhẹn—ovwerhẹn okokodo rọ vrabọ rẹ evwerhẹn. (Jọn 11:11-14) Ọ ta ọtiọyen kidie ọ riẹnre nẹ ọke na cha rẹ ihwo re vwerhẹn vwọrẹ ughwu cha vwọ rhoma dia. Ọ da ta: “Ọke na cha rẹ irivwin re hẹ evun rẹ ishi ejobi . . . [cha vwọ] yan phia.”—Jọn 5:28, 29; ni Iruo 24:15.
A cha rhọnvwọ ayen rhe dia otọrakpọ na. Ukperẹ e vwo ghwoghwo nẹ ohwo ghwuru, aghwoghwo rẹ ihwo ra rhọnvwọ nushi yen e che nyo! Evrẹnushi na cha dia emu rẹ aghọghọ, re che vwo dede ihwo re vwo ẹguọnọ kpahen ri ghwuru!