ẸBẸRE 7
Idjerhe Wo se Vwo Yono Ọmọ Wẹn
“Eta nana ri mi jiji kẹ wẹ nonẹ na, me dia evun rẹ udu wẹn: wọ me vwẹ ayen yono emọ wẹn.”—Urhi Rivẹ 6:6, 7
Ọke rẹ Jihova vwọ vwẹ ọrhuẹrẹphiyotọ rẹ orua vwo mu, ọ da vwẹ oghwa rẹ ẹroevwote rẹ emọ na vwọ kẹ esẹ vẹ ini. (Kọlose 3:20) Emiọvwọ, ovwan yin vwo oghwa rẹ ovwan vwo yono emọ rẹ ovwan, rere ayen se vwo vwo ẹguọnọ ri Jihova, je dia omamọ ihwo siẹrẹ ayen da ghwanre. (2 Timoti 1:5; 3:15) Ovwan riẹn obo rọhẹ evunrẹ ẹwẹn rẹ ọmọ ovwan. O ji fo nẹ ovwan dia omamọ udje kẹ ayen. Ovwan ke sa vwẹ Ota ri Jihova vwo yono ayen, ofori nẹ ovwan kọn phiyọ ubiudu ovwan tavwen.—Une Rẹ Ejiro 40:8.
1 RU OBO RE SA NẸRHẸ EMỌ WẸN TOTA KẸ WẸ
OBO RI BAIBOL NA TARE: ‘Fobọ nyo ẹme, wọ fobọ kpahen ota-a.’ (Jems 1:19) Jẹ emọ wẹn riẹn nẹ ayen sa tota kẹ wẹ ọkeneje. Jẹ ayen riẹn nẹ wọ choma wọ vwọ kerhọ rayen. Ru obo re sa nẹrhẹ emọ wẹn tota kẹ wẹ. (Jems 3:18) Wọ da hanrhe emọ wẹn je van ku ayen, ayen rhe che rhievun kẹ wẹ-ẹ. Dje ẹguọnọ kẹ ayen ọkeneje, wo ji vwo odirin rayen.—Matiu 3:17; 1 Kọrẹnt 8:1.
OBO WO SE RU:
Vwẹ uphẹn kẹ emọ wẹn siẹrẹ ayen da guọnọ tota
Nene emọ wẹn tota ọkieje, ọ ghwa diẹ ọke rẹ ayen vwo vwo ebẹnbẹn ọvo-o
2 DAVWẸNGBA WỌ VWỌ RIẸN OBO RỌHẸ EVUNRẸ UBIUDU RAYEN
OBO RI BAIBOL NA TARE: “Ohwo rọ kerhọ rẹ ota ko yovwin kẹ.” (Isẹ 16:20) Ọkiọvo, ofori nẹ wo vwo ẹruọ rẹ obo rọhẹ evunrẹ ubiudu rayen, ọ ghwa dia eta rayen ọvo-o. Imighene tota mamọ, ọkiọvo obo rẹ ayen ta ghwa dia obo rọhẹ ẹwẹn raye-en. “Wọ da kpahen ota tavwen wo ki nyo, ọyen ẹkpa.” (Isẹ 18:13) Wọ fobọ muophu-u.—Isẹ 19:11.
OBO WO SE RU:
O toro obo rẹ emọ na vuẹ wẹ-ẹ, wo gbota phiyẹ ayen unu-u
Karophiyọ obo rọ hepha kẹ wẹ ọke rẹ wọ vwọ hẹ edje rayen vẹ obo re ghanre kẹ wẹ ọke yena
3 OVWAN WIAN KUGBE
OBO RI BAIBOL NA TARE: “Ọmọ mẹ, nyo uyono rẹ Ọsẹ wẹn, wọ jẹ uyono rẹ oni wẹn kuẹfia-a.” (Isẹ 1:8) Jihova vwẹ ẹgba vwọ kẹ emiọvwọ nẹ ayen sun emọ rayen. Yono emọ wẹn ayen vwo nyupho wẹn, ji muọghọ kẹ wẹ. (Ẹfesọs 6:1-3) “Ovwan ku evun gbe,” ọ rha dia ọtiọye-en, emọ na cha riẹn. (1 Kọrẹnt 1:10) Emọ na da riẹn nẹ ovwan vwo ẹwẹn ọvo-o, ayen rhe che muọghọ kẹ ovwa-an.
OBO WO SE RU:
Ovwan jiroro rẹ obo ovwan cha ghwọ ku emọ na wan
Ọ da dianẹ iroro wẹn fẹnẹ iroro rẹ ọrivẹ wẹn kpahen obo ovwan che yono emọ na wan, gba davwẹngba wo se vwo vwo ẹruọ rẹ iroro rọyen
4 OVWAN VWO ỌRHUẸRẸPHIYOTỌ
OBO RI BAIBOL NA TARE: “Yono ọmọ phihọ idjerhe ro che nene.” (Isẹ 22:6) Ọ guọnọ owian ọgangan wọ kẹ sa vwẹ omamọ uyono vwọ kẹ emọ wẹn. Ofori nẹ wo vwo omamọ ọrhuẹrẹphiyotọ rẹ obo wo che yono emọ na wan, vẹ oka rẹ ọghwọku rẹ wọ cha vwọ kẹ ayen. (Une Rẹ Ejiro 127:4; Isẹ 29:17) Ọghwọku ghwa dia oja ra vwọ riẹ ọmọ-ọ, ẹkẹvuọvo ọyen wọ vwọ chọn emọ wẹn uko vwọ riẹn oboresorọ wọ vwọ vwẹ urhi kẹ ayen. (Isẹ 28:7) Vwọba, yono ayen vwo vwo ẹguọnọ rẹ Ota ri Jihova, rere ayen sa mrẹ iji rọyen vughe. (Une Rẹ Ejiro 1:2) Ọnana cha vwẹ ukẹcha kẹ ayen vwo vwo omamọ ẹwẹn-obrorhiẹn.—Hibru 5:14.
OBO WO SE RU:
Jẹ emọ wẹn nabọ vughe Ọghẹnẹ kerẹ ohwo rẹ ayen rhiẹro mrẹ rere ayen sa vwẹrosuọ
Chọn ayen uko vwọ kẹnoma kẹ erọnvwọn vẹ ihwo ri se miovwo uruemu rayen, a sa mrẹ enana vwẹ Intanẹti vẹ ifonu. Yono ayen kpahen obo rẹ ayen sa vwọ kẹnoma kẹ ihwo ri gbe imitete ẹgua
“Yono ọmọ phihọ idjerhe ro che nene”