Orua Wen Se Vwo Omavwerhovwẹn

1, 2. Die yen Jihova guọnọre nẹ orua vwo?

JIHOVA ỌGHẸNẸ yen ton orọnvwe rẹsosuọ phiyọ. Baibol na tare nẹ, ọ vwọ ma aye ẹsosuọ nu, “ọ da reyọ vwọ kẹ ọshare na.” Oma vwerhen Adam mamọ ọ da ta: “Ọnana ubeku mẹ kugbe uvwo rẹ uvwo mẹ.” (Jẹnẹsis 2:22, 23) Ọnana ghwe djephia nẹ Jihova guọnọre nẹ oma vwerhen ihwo re rọvwọnre.

² Ọ da ohwo mamọ nẹ buebun rẹ orọnvwe vwo omavwerhovwẹ-ẹn. Ẹkẹvuọvo, iyono buebun evunrẹ Baibol na re sa chọn ihwo rehẹ orua na uko vwo yerinkugbe vwọ rẹ omavwerhovwẹn.—Luk 11:28.

OBORẸ JIHOVA GUỌNỌ MIE ESHARE RE RỌVWỌNRE

3, 4. (a) Mavọ yen ofori nẹ ọshare nene ayen rọyen yerin wan? (b) Diesorọ ọ vwọ ghanre rẹ ọshare vẹ aye vwọ reyọ vwo ghovwo ohwohwo?

³ Baibol na tare nẹ omamọ rẹ ọshare vwo ẹguọnọ rẹ aye rọyen, o mi ji bru ọghọ phiyọ oma. Biko se Ẹfesọs 5:25-29. Ọke ejobi yen o vwo fo nẹ ọshare nene aye rọyen yerin vwọ rẹ ẹguọnọ. O ji fo nẹ ọ chochọ rẹ aye na, je vwẹrote.

⁴ Ẹkẹvuọvo, die yen ofori nẹ ọshare ru siẹrẹ aye rọyen de ru chọ? A vuẹ eshare nẹ, “ovwan guọnọ eya rẹ ovwan, [ovwan] djaoma ku aye-en.” (Kọlose 3:19) Eshare, ovwan karophiyọ nẹ ovwan ji ruẹ chọ. Wọ da guọnọ nẹ Ọghẹnẹ vwo ghovwo owẹ, o vwẹ obo ọ wanre-e, ku wo ji vwo ghovwo aye wẹn. (Matiu 6:12, 14, 15) Ọshare vẹ aye da dia ihwo ri vwo ẹwẹn rẹ evwoghovwo, ọnana cha nẹrhẹ orọnvwe rayen dia ọ rẹ omavwerhovwẹn.

5. Diesorọ ọshare vwo bru ọghọ phiyọ aye rọyen oma?

⁵ Jihova guọnọre nẹ ọshare bru ọghọ phiyọ aye rọyen oma. Ofori ọshare vwọ nabọ roro kpahen ọdavwẹ rẹ aye rọyen. Ota nana pha ghanghanre. Siẹrẹ ọshare rha vwẹrote aye rọye-en, Jihova se jẹ ẹrhovwo rọyen enyo. (1 Pita 3:7) Jihova vwo ọdavwaro kpahen ihwo fikirẹ ẹguọnọ rẹ ayen vwo kpahọn. Jihova vwo ẹguọnọ rẹ eshare vwọ vrẹ eya-a.

6. Die yen o mudiaphiyọ ọshare vẹ aye vwọ dia “oma ọvo”?

⁶ Jesu tare nẹ ọshare vẹ aye “gbe hẹ ihwo ivẹ ọfa-a, ẹkẹvuọvo ayen kẹ oma ọvo.” (Matiu 19:6) Ọkieje yen ayen vwọ fuevun kẹ ohwohwo. (Isẹ 5:15-21; Hibru 13:4) E jẹ ihwo ivẹ re rọvwọnre na dje erorokẹ vwọ kẹ ohwohwo kpahen ovwerhẹn rẹ aye gbe ọshare. (1 Kọrẹnt 7:3-5) Ọshare me karophiyọ nẹ “ohwo se tuoma obọ rọye dẹvo-o, ẹkẹvuọvo ọ ghẹrẹ ọ me nabọ vwẹ ẹro te.” Ọtiọyena, ko fori nẹ ọshare na vwo ẹguọnọ, je vwẹrote aye rọyen. Ẹguọnọ vẹ ẹwẹn esiri yen orọnvwọn rẹ aye ma guọnọ mie ọshare.—Ẹfesọs 5:29.

OBORẸ ỌGHẸNẸ GUỌNỌ MIE EYA RE RỌVWỌNRE

7. Diesorọ orua vwọ guọnọ ọgbuyovwin?

⁷ Orua eje guọnọ ọgbuyovwin rọ cha vwẹrote orua na, rere ayen sa nabọ yerinkugbe. Vwẹ 1 Kọrẹnt 11:3 Baibol na da ta: “Kristi hẹ uyovwi rẹ ọshare kọshare, uyovwi rẹ aye ke rha vwẹ ọshare rọye, uyovwi rẹ Kristi ke rha vwẹ Ọghẹnẹ.”

8. Idjerhe vọ yen aye sa vwọ vwẹ oma kpotọ kẹ ọshare rọyen?

⁸ Eshare re rọvwọnre eje se ruẹ chọ. Ẹkẹvuọvo, aye de bicha orhiẹn-ebro rẹ ọshare rọyen, orua na eje yen sa mrẹ erere no rhe. (1 Pita 3:1-6) Baibol na tare: “Aye vwẹ oma kpotọ kẹ ọshare” rọyen. (Ẹfesọs 5:33) Ẹga ọshare na da rha fẹnẹ ọ rẹ ayen na vwo? Ofori nẹ aye na je vwẹ oma kpotọ kẹ. Baibol na tare: “Ovwan eya ri kpo orọvwe, wa vwẹ oma kpotọ kẹ eshare rẹ ovwan, rere otu evo, ri se ota na gbuyota-a dede, a sa vwi fiki rẹ uruemu rẹ eya na ku ayen rhẹriẹ, siẹ rẹ ayen da mrẹ eyere esiri rẹ ovwan kugbe ọfanrhiẹ rẹ ovwan sioma nu.” (1 Pita 3:1, 2) Omamọ rẹ uruemu aye vwori sa nẹrhẹ ọshare rọyen riẹn, ji mu ọghọ kẹ ẹga rọyen.

9. (a) Die yen aye se ru siẹrẹ ọ rha rhọnvwe phiyọ orhiẹn-ebro rẹ ọshare rọye-en? (b) Uchebro vọ yen a vwọ kẹ eya vwẹ Taitọs 2:4, 5?

⁹ Die yen aye se ru siẹrẹ ọ rha rhọnvwe phiyọ orhiẹn-ebro rẹ ọshare rọye-en? E jẹ ọ ta obo rehẹ evunrẹ ẹwẹn rọyen vẹ ọghọ. Kerẹ udje, o vwo ota ọvo rẹ Sera vuẹ Ebraham, jẹ Ebraham rhọnvwe phiyọ-ọ, ẹkẹvuọvo Jihova da vuẹ Ebraham: “Ru kirobo rọ tare” na. (Jẹnẹsis 21:9-12) Ọ cha bẹn rẹ ọshare rọ dia Onenikristi vwo brorhiẹn rọ vwọso Baibol na, ọtiọyena, e jẹ aye rọyen bicha. (Iruo Rẹ Iyinkọn Na 5:29; Ẹfesọs 5:24) Omamọ rẹ aye vwẹrote orua rọyen. (Se Taitọs 2:4, 5.) Siẹrẹ ọshare vẹ emọ rọyen da mrẹ nẹ aye na wian gangan, ẹguọnọ vẹ ọghọ rẹ ayen vwo vwọ kẹ kọ cha ganphiyọ.—Isẹ 31:10, 28.

10. Die yen Baibol na ta kpahen aye gbe ọshare vwọ yanjẹ ohwohwo vwo vẹ orọnvwe ẹfan?

¹⁰ Vwẹ ọkiọvo, eya gbe eshare bru okpakpa brorhiẹn rẹ ayen vwọ yanjẹ ohwohwo vwo, yẹrẹ fan orọnvwe. Ẹkẹvuọvo, Baibol na tare nẹ “aye siobọ nẹ ọshare rọye-e,” “ọshare ghwrara ji siobọ nẹ aye rọye-e.” (1 Kọrẹnt 7:10, 11) O vwo ẹdia evo rẹ ihwo re rọvwọnre da sa yanjẹ ohwohwo vwo, ẹkẹvuọvo orhiẹn-ebro yena pha ghanghanre. Kẹ orọnvwe ẹfan vwo? Baibol na tare nẹ siẹrẹ ọshare yẹrẹ aye na de gbe igberadja ọvo, yen a da sa fan orọnvwe na.—Matiu 19:9.

OBORẸ ỌGHẸNẸ GUỌNỌ MIE EMIỌVWỌN

11. Die yen emọ ma guọnọ?

¹¹ Emiọvwọn, ovwan davwẹngba vwo nene emọ rẹ ovwan ghwọrọ ọke kugbe. Emọ wẹn guọnọre nẹ wẹ vẹ ayen ghwọrọ ọke kugbe, ma rho, ofori nẹ vwo yono ayen kpahen Jihova.—Urhi Rivẹ 6:4-9.

12. Die yen ofori nẹ emiọvwọn ru vwọ sẹro rẹ emọ rayen?

¹² Akpọ rẹ Idẹbono na rhi miovwin phiyọ, ihwo evo herọ re guọnọ miovwon emọ wẹn, je tobọ guọnọ gbe ayen ẹgua dede. Ọ bẹn vwọ kẹ emiọvwọn evo ayen vwọ ta ota kpahen uyovwinrota nana kẹ emọ rayen. Ofori emiọvwọn vwo si emọ rayen orhọ kpahen oka ihwo tiọyena, ji yono ayen vwọ kẹnoma kẹ ihwo ọtiọyena. Emiọvwọn, ovwan sẹro rẹ emọ rẹ ovwan.a—1 Pita 5:8.

13. Idjerhe vọ yen emiọvwọn vwo yono emọ rayen?

¹³ Ọyen oghwa rẹ emiọvwọn ayen vwo yono emọ rayen omamọ rẹ uruemu. Mavọ yen wo se vwo yono emọ wẹn? Emọ wẹn guọnọ ọghwọku, ẹkẹvuọvo, wo jẹ ọghwọku wẹn dia ọ rẹ ovan yẹrẹ e vwo gboja kẹ emọ na-a. (Jerimaya 30:11) Ọtiọyena, wọ ghwọ kuẹ emọ wẹn siẹrẹ ophu de mu we-e. Wo jẹ eta wẹn dia “kerẹ adjara ro duvwẹ ohwo” rọ da wan ayen oma-a. (Isẹ 12:18) Yono emọ wẹn oboresorọ ayen vwo nyẹme.—Ẹfesọs 6:4; Hibru 12:9-11; ni Eta rẹ Odjefiotọ 30.

OBORẸ ỌGHẸNẸ GUỌNỌ MIE EMỌ

14, 15. Diesorọ emọ vwọ kerhọ rẹ esẹ vẹ ini rayen?

¹⁴ Jesu kerhọ rẹ Ọsẹ rọyen ọkieje, tobọ te ọke rẹ erọnvwọn ghwa lọhọ vwọ kẹ-ẹ. (Luk 22:42; Jọn 8:28, 29) Jihova je guọnọ nẹ emọ kerhọ rẹ esẹ vẹ ini rayen.—Ẹfesọs 6:1-3.

¹⁵ Emọ, ovwan de roro nẹ ọ pha bẹnbẹn rẹ ovwan vwọ kerhọ rẹ esẹ vẹ ini rẹ ovwan, ovwan karophiyọ nẹ oma cha vwerhen Jihova vẹ esẹ kugbe ini rẹ ovwan siẹrẹ ovwan de se ru ọtiọyen.b—Isẹ 1:8; 6:20; 23:22-25.

16. (a) Idjerhe vọ yen Eshu vwọ guọnọ riẹriẹ ighene vwo ru obo ri miovwirin? (b) Diesorọ ọ vwọ ghanre wo vwo mu igbeyan rẹ ihwo ri vwo ẹguọnọ rẹ Jihova?

¹⁶ Idẹbono sa vwẹ igbeyan wẹn vẹ ighene efa vwọ riẹriẹ owẹ ru obo ri miovwirin. Ọ riẹnre nẹ ọ bẹnre mamọ rẹ ighene sa vwọ reyọ vwọso okeke ọtiọyena. Kerẹ udje, ọmọtẹ rẹ Jekọp re se Dinah mu ugbeyan rẹ ihwo ri vwo ẹguọnọ rẹ Jihova-a. Ọnana da so okpetu kẹ vẹ orua rọyen. (Jẹnẹsis 34:1, 2) Siẹrẹ igbeyan wẹn rhe vwo ẹguọnọ rẹ Jihova-a, ayen sa nẹrhẹ wo ru obo rẹ Jihova vwo utuoma kpahen, rọ sa so emiavwen kẹ wẹ, orua wẹn vẹ Ọghẹnẹ. (Isẹ 17:21, 25) Ọna yen sorọ wo vwo mu igbeyan rẹ ihwo ri vwo ẹguọnọ rẹ Jihova.—1 Kọrẹnt 15:33.

ORUA WẸN SE VWO OMAVWERHOVWẸN

17. Oghwa vọ yen te ohwo vuọvo vwevunrẹ orua na?

¹⁷ Siẹrẹ ihwo rẹ orua de nene odjekẹ rẹ Ọghẹnẹ, ayen ke sa vrabọ rẹ okpetu vẹ ebẹnbẹn buebun. Ọtiọyena, wọ da dia ọshare, vwo ẹguọnọ rẹ aye wẹn ọkieje. Wọ da dia aye, vwẹ oma kpotọ kẹ ọshare wẹn, wọ je vwẹrokere aye re gbikun rọyen vwẹ Isẹ 31:10-31. Wọ da dia ọmiọvwọn, yono emọ wẹn vwo vwo ẹguọnọ rẹ Ọghẹnẹ. (Isẹ 22:6) Wọ da dia ọsẹ, dia ohwo rọ “nabọ suẹn uwevwi” wẹn. (1 Timoti 3:4, 5; 5:8) Emọ, kerhọ rẹ esẹ vẹ ini rẹ ovwan. (Kọlose 3:20) Karophiyọ nẹ ihwo eje vwẹ orua na ruẹ chọ, ọtiọyena vwẹ oma kpotọ yovwunu nẹ evwoghovwo owẹ. Baibol na vwẹ odjekẹ rẹ Jihova vwọ kẹ ihwo eje rehẹ evunrẹ orua na.