August

Jesu vwo ẹwẹn re dọe ọke re vwo mukpahọn, kidie ọ riẹnre nẹ ọhọre rẹ Ọsẹ rọyen yen o ruẹ. Ọ fuevun vwẹ ọke rọ vwọ bẹn kẹ. Ọ vwẹ ẹga rẹ Jihova vwọ kobaro, kidie o vwo ẹguọnọ rẹ Ọsẹ rọyen. Jesu nene Ọghẹnẹ wian kugbe kerẹ “onotu rẹ ọwena” tavwen ọ ke rhe akpọ na. (Isẹ 8:30) O de ji ghwoghwo kpahen Ọsẹ rọyen vẹ oruru ọke rọ vwọ hẹ otọrakpọ na. (Mat. 6:9; Jọn 5:17) Iruo yena ghene kẹ Jesu aghọghọ rode. (Jọn 4:34-36) Avwanre sa vwẹrokere Jesu siẹrẹ e de nyupho rẹ Jihova, ji “dje ebuo-ebuo phihọ vwẹ iruo rẹ Ọrovwohwo” na. (1 Kọr. 15:58) Avwanre sa vwẹ ẹro abavo vwo ni ebẹnben rẹ avwanre siẹrẹ e de “gboma phihọ” iruo rẹ aghwoghwo na. (Iruo 18:5) Kerẹ udje, ihwo buebun rẹ avwanre ghwoghwo ota kẹ na hirharoku ebẹnbẹn re gan vrẹ e rẹ avwanre shesheri. Jẹ, ayen de rhi vwo ẹguọnọ rẹ Jihova ji yeren akpọ nene odjekẹ rọyen, akpeyeren rayen mi rhi yovwinphiyọ, oma kọ je vwerhen ayen. Emu tiọyena da phia, ọ kẹ avwanre imuẹro nẹ Jihova cha vwẹrote ọdavwẹ rẹ avwanre. w19.04 10-11 ¶8-9

Ihwo nana ghini vwo ẹwẹn rẹ ayen vwọ họnre vwọso emekashe rẹ Idẹbono. Igho buebun yen ayen vwọ dẹ ẹbe ri imajiki na. Ayen da torhẹ ẹbe na eje, ukperẹ ayen vwọ shẹ ẹbe na yẹrẹ reyọ ayen vwo ruẹse kẹ ihwo efa. Oyerinkugbe rayen vẹ Jihova da ayen aro nọ uchunu igho rẹ ayen vwọ dẹ ẹbe na. Mavọ yen avwanre sa vwọ vwẹrokere Inenikristi rẹ ẹgbukpe ujorin rẹsosuọ? Ofori nẹ a ghwọrọ kemu kemu rẹ avwanre vwori ro churobọ si orhan. E sa dia erọnvwọn kerẹ egbene, inehweri, yẹrẹ erọnvwọn efa rẹ ihwo kuẹphiyọ vwọ chọn oma rayen vwo nẹ abọ rẹ emekashe rẹ Idẹbono. (1 Kọr. 10:21) Nabọ fuẹrẹn erọnvwọn ra vwọ diotọ ri je we. Nọ oma wẹn, ‘Erọnvwọn ri mi vwọ diotọ churobọ si orhan?’ Ọke wọ da sane erọnvwọn ru wọ cha vwọ diotọ, davwẹngba vwọ kẹnoma kẹ i ri tun Jihova oma. E jẹ a davwẹngba avwanre eje vwo vwo “omamọ rẹ udu” kẹ Ọghẹnẹ.—Iruo 24:16. w19.04 22-23 ¶10-12

Ekpako na roro kpahen erọnvwọn buebun siẹrẹ ovuẹ ro ohwo ro ru umwemwu vẹ ọkpan de te ayen obọ. Ekpako na yen vwo oghwa re vwo ru odẹ rẹ Ọghẹnẹ fon. (Liv. 22:31, 32; Mat. 6:9) Ayen ji roro kpahen oyerinkugbe rẹ iniọvo na vẹ ọ ri Jihova, kugbe oborẹ ayen sa vwọ vwẹ ukẹcha kẹ ihwo re ru umwemwu so. Vwọba, ohwo na da dia oniọvo, ekpako na davwẹngba vwọ riẹn sẹ ohwo na kurhẹriẹ, o de kurhẹriẹ, kẹ ayen chọn uko vwọ rhuẹrẹ oyerinkugbe rọyen vẹ ọ ri Jihova. (Jems 5:14, 15) Oniọvo ro shufi rẹ ojevwe ọchọchọ, ro de ru umwemwu ro vwo ọkpan, muọga rẹ ẹwẹn. Ọnana mudiaphiyọ nẹ o rhe vwo omamọ rẹ oyerinkugbe vẹ Jihova-a. Vwẹ ẹdia tiọnana, a sa vwẹ ekpako vwo dje idọktọ. Ọtiọyena, kẹ ayen cha davwẹngba vwo “sivwi ohwo rọ họnvwan na [kọyen ohwo ro ru umwemwu na].” Uchebro ro nẹ Baibol rhe rẹ ayen vwọphia na, sa chọn ohwo na uko vwọ rhuẹrẹ oyerinkugbe rọyen vẹ Jihova phiyọ, ẹkẹvuọvo, ọ sa dia ọtiọyen siẹrẹ ohwo na de dje uvi rẹ okurhẹriẹ phia.—Iruo 3:19; 2 Kọr. 2:5-10. w19.05 10 ¶10-11

Jihova sa kẹ avwanre owenvwe re se vwo ru oborẹ avwanre guọnọ ru. Ọ sa dianẹ, o vwo ẹdia ọvo ra da guọnọ ukẹcha vwevunrẹ ukoko rẹ avwanre yẹrẹ vwẹ otafe. Ohwo ọvuọvo sa nọ oma rọyen, ‘Mavọ yen me sa vwọ vwẹ ukẹcha phia?’ Yẹrẹ a da kẹ avwanre owian ọvo rọ vọnre vẹ egbabọse, avwanre se roro sẹ e se ruo kirobo ra guọnọre. Yẹrẹ e de se ẹkpo ri Baibol ọvo nu, e se roro, ‘Mavọ yen me sa vwọ reyọ ẹkpo nana vwọ vwẹ ukẹcha kẹ ihwo efa?’ Jihova da mrẹ nẹ e vwo owenvwe ra vwọ fuẹrẹn oma avwanre, ọ sa kẹ avwanre owenvwe re vwo ru oborẹ avwanre guọnọ ru na. Jihova sa kẹ avwanre ẹgba re se vwo ru obo ra guọnọ ru na. (Aiz. 40:29) Ọ sa vwẹ ẹwẹn ọfuanfon rọyen vwo ru ona rẹ avwanre vwori yovwinphiyọ. (Eyan. 35:30-35) Womarẹ ukoko rọyen, Jihova se yono avwanre obo re se vwo ru oka rẹ iruo evo. Wo de vwo ẹwẹn ivivẹ kpahen oborẹ wo se vwo ruiruo ọvo ra vwọ kẹ wẹ, nokpẹn rẹ ukẹcha. Je vwẹ ọkieje vwọ yare “ẹgba rọ vrẹ ẹgba” vwo mie Ọsẹ rẹ avwanre ro siobọnẹ ghwologhwolo na. 2 Kọr. 4:7; Luk 11:13. w19.10 21 ¶3-4

Ihwo vwẹ ojevwe romobọ rayen vwọ kobaro-o. Ọbe ọvo tare nẹ vwẹ uvwre rẹ ikpe re kpahen 1970, “ẹbe re vwẹ uchebro phia kpahen obo re se vwo yeren omamọ rẹ akpọ rhi vọn asan eje.” Evo usun rẹ ẹbe nana tare nẹ “ohwo wene emu vuọvo vwẹ oma rọyen yẹrẹ roro nẹ emu ọvo she chọ vwẹ oma rọye-en.” Kerẹ udje, roro kpahen oborẹ ọvo usun rẹ ẹbe tiọyena tare: “Vwo ẹguọnọ rẹ oma wẹn, kidie wẹ yen ohwo ro me yovwin kparobọ.” Ọbe na tare nẹ “ohwo ọvuọvo yen che brorhiẹn rẹ oka rẹ uruemu rọ guọnọ vwo, o mi ji ru kemu kemu ro rorori nẹ o shephiyọ vwọ kẹ.” Wo nyo eta tiọyena jovwo re? Eshu vuẹ Ivi nẹ o ru orọnvwọn rọ họhọ ọtiọyen. Ọ vuẹrẹ nẹ ọ cha “họhọ Ọghẹnẹ, rọ riẹn erhuvwu vẹ umiovwo.” (Jẹn. 3:5) Nonẹna, ihwo buebun ni oma rayen gegerege te asan rẹ ohwo vuọvo cha sa vuẹ ayen obo ri yovwirin yẹrẹ obo re brare-e, owene ọ dia Ọghẹnẹ dede. Kerẹ udje, a rhe mrẹ uruemu nana vwẹ ẹro rẹ ihwo vwo ni orọnvwe. w19.05 23 ¶10-11

O ji vwo ọke sansan rẹ Ovie Devid vwọ ro ẹnwan. Roro kpahen egbabọse ro hirharoku. Ofu djere fikirẹ erọnvwọn buebun ro ru chọ. (Une 40:12) Absalọmu rọ dia ọmọ rọyen ro vwo ẹguọnọ kpahen gbe vwọsuọ, ọnana da rhe so ughwu rẹ Absalọmu. (2 Sam. 15:13, 14; 18:33) Ugbeyan rẹ Devid rọ kẹrerẹ mamọ ji kuophiyotọ. (2 Sam. 16:23–17:2; Une 55:12-14) Devid dje ofudjevwe rọyen vẹ ẹroẹvwọsuọ ọgangan ro vwo kpahen Jihova phia vwẹ ine buebun ro siri. (Une 38:5-10; 94:17-19) Ọke vwọ yanran na, ọbuine ọvo kọ rioma kpahan akpeyeren rẹ irumwemwu. Ọ sa dianẹ uvwiẹ rẹ Asaf rọ dia ohwo rẹ Livae rọ gare vwẹ “asan ẹshẹ rẹ Ọghẹnẹ” yen ọbuine na nurhe. Ẹnwan mu ọbuine nana rọ te ẹdia rẹ oma rha vwerhọ-ọn, obo ro vwori rha je da ẹro-o. Ebruphiyọ rẹ Jihova vwọ kẹ rha tobọ te kẹ-ẹ.—Une 73:2-5, 7, 12-14, 16, 17, 21. w19.06 17 ¶12-13

Eshu phiẹn ihwo vẹ urhurusivwe rẹ obo ra ghene guọnọ. Avwanre eje guọnọ yono ona rọ cha nẹrhẹ a sa vwẹrote oma rẹ avwanre vẹ orua rẹ avwanre. (1 Tim. 5:8) Jẹ, ọke buebun, avwanre kpo isikuru, je wian gan tavwen e ki se vwo ona na. Ẹkẹvuọvo, o fori nẹ a jomaotọ. Ọ dia ena re se vwo ruiruo ọvo yen isikuru rehẹ ẹkuotọ buebun nonẹna yono-o, ayen ji yono ihwo aghwanre rẹ akpọ na. Kerẹ udje, isikuru buebun nẹrhẹ emọ vwo ẹwẹn ivivẹ kpahen Ọghẹnẹ, je kpairoro vrẹ oborẹ Baibol na tare. E ji yono ayen nẹ ihwo re riẹn ọbe mamọ vwo imuẹro nẹ erọnvwọn mamarhe. (Rom 1:21-23) Iyono tiọyena vwọso “aghwanre rẹ Ọghẹnẹ. (1 Kọr. 1:19-21; 3:18-20) Brorhiẹn rere akpọ rẹ Eshu nana vwo jẹ owẹ “ẹphiẹn fiki rẹ erianriẹn vẹ uyono rẹ efian” rọyen. (Kọl. 2:8) Wo jẹ Idẹbono phiẹn wẹ-ẹ. (1 Kọr. 3:18) Wọ vwẹ uphẹn kẹ nẹ ọ nẹrhẹ ẹro rẹ Jihova vwo ni emu chọrọ owẹ ẹro-o. Yeren akpọ nene iwan ọgbagba rẹ Jihova. Wo jẹ Eshu phiẹn wẹ vwo chukoku uchebro rẹ Jihova-a. w19.06 5 ¶13; 7 ¶17

Wọ da cha sane uyovwinrota rẹ wo che vwo ghwoghwo, roro kpahen ihwo ru wo che ghwoghwo ota kẹ. Vwẹ ẹro roro erere ro che te ayen obọ siẹrẹ ayen da riẹn oborẹ Baibol na ghini yono. Wẹ vẹ ayen da ta ota, muọghọ kẹ ayen, je nabọ kerhọ rayen. Ọnana cha nẹrhẹ wọ nabọ vwo ẹruọ rayen, kẹ ayen ji che vwo owenvwe rẹ ayen vwọ kerhọ wẹn. Ọkievo, ọ guọnọ ẹgbaẹdavwọn vẹ ọke tavwen ohwo ke rhọnvwe nẹ ọyen che yono Baibol na. Diesorọ? Kidie a ghwa fobọ mrẹ ihwo evo vwẹ uwevwi-in. Vwọba, ihwo evo ke rhọnvwephiyọ uyono ri Baibol, ofori e vwo rhivwin bru ayen ra abọ buebun tavwen. Karophiyọ nẹ okakọn re ku ame kuẹ ọkieje yen sa riẹn djẹ. Ọtiọyen ọ jẹ hepha, a da vwẹ Baibol na vwo yono ohwo ọkieje, ẹguọnọ rẹ ohwo na kpahen Jihova vẹ Jesu kọ je cha ganphiyọ. w19.07 14 ¶1; 15-16 ¶7-8

Die yen ota ri Jesu na mudiaphiyọ? Ọ dia Jesu tanẹ oma cha vwerhen Inenikristi ọke re de muẹkpahen aye-en. Ukperẹ ọtiọyen, ọ vuẹ avwanre kpahen obo re cha phia kẹ avwanre. Avwanre dia ẹbẹre ọvo rẹ akpọ na-a. Avwanre yeren akpọ nene iyono ri Jesu, ji ghwoghwo ovuẹ ro ghwoghwori. Ọna yen sorọ akpọ na vwo vwo utuoma kpahen avwanre. (Jọn 15:18-21) Avwanre guọnọ ru obo re cha vwerhen Jihova oma. Ihwo de vwo utuoma kpahen avwanre kidie nẹ avwanre vwo ẹguọnọ rẹ Ọsẹ rẹ avwanre, ọyena kẹ ẹdjọ rayen. E jẹ e roro nẹ e rhe fiemu-u keridie nẹ e muẹ kpahen avwanre-e. Avwanre riẹn ọke rẹ omukpahen cha vwọ rhe yẹrẹ ọke ra cha vwọ dobọ rẹ ẹga rẹ avwanre ji-i. Ẹkẹvuọvo, avwanre riẹnre nẹ avwanre se muegbe asaọkiephana womarẹ e vwo ru oyerinkugbe rẹ avwanre vẹ ọ ri Jihova ganphiyọ, e vwo ruẹ obo re cha nẹrhẹ uduefiogbere rẹ avwanre ganphiyọ vẹ e vwo yono obo re se vwo vwo phi oshọẹdjẹ rẹ ihworakpọ kparobọ. Egbe rẹ avwanre muru enẹna cha vwẹ ukẹcha kẹ avwanre vwo mudia gan vwẹ obaro na. w19.07 6 ¶17-18; 7 ¶21

Avwanre da vwẹ Baibol na vwo yono ihwo ri se Ọghẹnẹ gbuyota-a, ofori nẹ a vwẹ ọkieje vwọ chọn ayen uko vwo ru esegbuyota rayen kpahen Ọghẹnẹ ganphiyọ. O ji fo nẹ a vwẹ ukẹcha kẹ ayen vwọ bọn esegbuyota rayen kpahen Baibol na ganphiyọ. E se vwo ru ọnana, avwanre sa vwariẹn iyono ri Baibol evo abọ buebun. Kọke kọke rẹ avwanre de nene ayen yono, ofori nẹ a ta ota kpahen obo ri djerephia nẹ Baibol na Ota rẹ Ọghẹnẹ kerẹ aroẹmrẹ ri Baibol ri rugba re, ovuẹ egbagba ri Baibol na vwọphia kpahen isayẹnsi vẹ ikuegbe awanre, yẹrẹ aghwanre rọhẹ Baibol na. Avwanre vwẹ ukẹcha kẹ ihwo vwọ dia idibo ri Jesu Kristi siẹrẹ e de dje ẹguọnọ kẹ ayen, otorori sẹ ayen kpo ẹga yẹrẹ ayen ra-a. (1 Kọr. 13:1) E vwo yono ayen na, ọdavwẹ avwanre ọyen e vwo dje kẹ ayen nẹ Ọghẹnẹ vwo ẹguọnọ rẹ ihwo ejobi, ọ je guọnọ nẹ e vwo ẹguọnọ rọyen. Kukpe kukpe yen ihwo uriorin buebun ri ghwe vwo omavwerhovwẹn kpahen ẹga jovwo-o vwo bromaphiyame, kidie ayen rhi vwo ẹguọnọ rẹ Ọghẹnẹ re. Ọtiọyena, gbe dje uruemu abavo phia kẹ koka koka rẹ ihwo, ji vwo ọdavwẹ rayen. Kerhọ rẹ ayen. Davwẹngba vwo vwo ẹruọ rẹ oborẹ ayen roro. Yono ayen vwọ dia idibo ri Kristi womarẹ udje wẹn. w19.07 24 ¶16-17

Emetẹ ri Shallum usun rẹ ihwo ri Jihova reyọ vwo ruiruo rẹ ẹrhomabọn ri igbẹhẹ ri Jerusalẹm. (Neh. 2:20; 3:12) Dede nẹ ọsẹ rayen ọmọ rẹ ovie, jẹ emetẹ ri shallum na vwo owenvwe rẹ ayen vwo ruiruo yena rọ bẹnre rọ je vọn vẹ egbabọse na. (Neh. 4:15-18) Nonẹna, oma vwerhen iniọvo eya rẹ ayen vwọ vwobọ vwẹ iruo rẹ ebanbọn vẹ ẹroevwote rẹ iwevwin ra da vwẹ ẹga vwọ kẹ Ọghẹnẹ. A guọnọ ona, oruru, vẹ evun-ẹfuọn rẹ iniọvo eya nana rere e se vwo phikparobọ vwẹ iruo na. Jihova reyọ Tabita rọ dia “oruẹse” rọ je dia ohwo ro vwo “uruemu esiri” vwọ vwẹ ukẹcha kẹ ihwo, marho kẹ eyauku. (Iruo 9:36) Fikirẹ uruemu esiri vẹ ẹse-eruo rọyen na, buebun da viẹ ọke ro vwo ghwu. Ẹkẹvuọvo, oma vwerhen ayen gangan ọke rẹ ọyinkọn Pita vwọ rhọvwọn nẹ ughwu. (Iruo 9:39-41) Die yen avwanre yono mie Tabita? Owenẹ avwanre dia ighene yẹrẹ emare, eshare yẹrẹ eya, a sa vwẹ ukẹcha ro fori vwọ kẹ iniọvo rẹ avwanre. w19.10 23 ¶11-12

Mavọ yen a sa vwọ dia ikprowọ kẹ ohwo ọfa? Roro kpahen ẹdia nana. Ohwo ra vwẹ Baibol yono davwẹngba mamọ vwo sun urhurusivwe ọgangan ro vwo kpahen udiẹda. Ọtiọyena, ọ da rhe mrẹvughe nẹ ofori ọ vwọ dobọ rẹ udi ọgangan ẹda ji kakare. O de ru ewene buebun vwẹ akpeyeren rọyen, ji bromaphiyame. Ọke vwọ yanran na, oniọvo ọvo de durhie kpo udemu, ọ da je vwẹ udi ọgangan vwọ ghọ. Ọ da vuẹ: “Wọ da riẹn oma suẹn, wọ cha vwẹ aghwanre vwọ da udi ọgangan.” Die wo rorori nẹ ọ cha phia siẹrẹ oniọvo kpokpọ na da kerhọ rẹ orharhe rẹ uchebro yena? Emẹvwa rẹ Inenikristi cha vwẹ ukẹcha kẹ avwanre vwọ reyọ uchebro rẹ a vwọ phia vwẹ isese ri kẹdi kẹdẹ ri nonẹna vwo ruiruo. Oborẹ avwanre yono vwẹ emẹvwa na nẹrhẹ a riẹn obo re ma ghanre ki Jihova vẹ obo ra sa vwọ reyọ obo re yonori vwo ruiruo rere a sa vwọ dia fuanfon. E je chọn avwanre uko vwo vwo ẹguọnọ kpahen Ọghẹnẹ vẹ iniọvo rẹ avwanre. Ẹguọnọ rẹ Ọghẹnẹ vẹ ọ rẹ iniọvo na da gan vwẹ ubiudu rẹ avwanre, ka cha davwẹngba avwanre eje vwo jẹ ikprowọ ẹdia vwọ kẹ ayen. w19.08 10 ¶9; 11 ¶13-14

E se roro nẹ ihwo ri fiudugberẹ rẹ oma jẹ vuọ kparoma. (Jọn 1:46, 47) Te avwanre dia ihwo rẹ omavua yẹrẹ ihwo rẹ oma jẹ vuọ, ofori nẹ avwanre davwẹngba vwọ dia ihwo re vwomakpotọ. Roro kpahen udje rẹ ọyinkọn Pọl. Jihova reyerọ vwọ vwẹ ikoko buebun vwo mu vwẹ irere buebun. Ọ sa tobọ dianẹ obo ro ruru vwẹ iruo rẹ aghwoghwo na bun vrẹ e rẹ iyinkọn ri Jesu efa. Dedena, Pọl ni oma rọyen gegerege vwẹ ohri rẹ iniọvo rọye-en. Pọl sa ta ọtiọyen gbagba kidie ẹserọphẹ rẹ Ọghẹnẹ yen nẹrhẹ o se vwo omamọ oyerinkugbe vẹ Jihova, ọ dia ẹgba romobọ rọye-en. (1 Kọr. 15:10) Pọl ghene omamọ rẹ udje rẹ ohwo rọ vwomakpotọ. Dede nẹ iniọvo rehẹ ukoko ri Kọrẹnt reyọ Pọl vwo guẹdjọ, ọ vwẹ obo ro ruru vwọ yeyan ọke ro vwo si ileta rhe aye-en!—2 Kọr. 10:10. w19.09 3 ¶5-6

Umwemwu ra riuku rọyen vẹ jẹgba ọyen iroro ọvo rọ nẹrhẹ ọ bẹn ra vwọ vwomakpotọ kẹ Jihova. Ọnana yen sorọ avwanre rhọnvwa kerhọ rẹ Ọghẹnẹ ọkieje-e. Ghwe vwo nẹ ọke Adam vẹ Ivi vwo gbevwọso Ọghẹnẹ ji re emamọ na, ayen da vwẹ iwan rẹ obọ rayen vwo mu. (Jẹn. 3:22) Nonẹna, ihwo buebun chukoku Jihova, ayen ọvo kọyen brorhiẹn rẹ obo ri yovwirin vẹ obo re brare. Ọ je tobọ bẹn vwo kẹ ihwo re riẹn Jihova ji vwo ẹguọnọ rọyen ayen vwọ vwomakpotọ kẹ. Ọyinkọn Pọl hirharoku ẹdia nana. (Rom 7:21-23) Kerẹ Pọl, avwanre guọnọ ru obo ri yovwirin vwẹ ẹro ri Jihova. Ẹkẹvuọvo, avwanre nene iroro echọchọ muabọ ọkieje. Ẹkuruemu rẹ asan avwanre nurhe ọyen iroro ọfa rọ nẹrhẹ ọ bẹn ra vwọ vwomakpotọ kẹ Jihova. Iroro rẹ ihworakpọ buebun vwọso ọhọre ri Jihova. Ọtiọyena, ofori nẹ avwanre davwẹngba vwọ họnre vwọso iroro tiọyena ọkieje. w19.09 15 ¶4-6

Ofori nẹ avwanre mrẹvughe nẹ o vwo asan rẹ ẹgba rẹ avwanre ohwo ọvuọvo teri. Ọtiọyena, avwanre jomaotọ kpahen oborẹ avwanre davwẹngba vwo ruẹ. Kerẹ udje, a sa ghwọrọ ẹgba avwanre phiyọ ekoko rẹ ekuakua rẹ ugboma. Jokaphiyọ oborẹ Jesu vuẹ eghene ọshare ọvo rọ dia ọdafe, rọ nọ rọ nẹ, “Die mi ru mi vwo vwo arhọ ri bẹdẹ na?” O muẹro nẹ ọshare na omamọ ohwo kidie iyẹnrẹn ri Mak djerephia phephẹn nẹ ọshare na “je” Jesu. Ọtiọyena, Jesu de durhie ọshare na, Ọshare na kirobo re si phiyọ obenu na. Ọshare na guọnọ nene Jesu, ẹkẹvuọvo, ọ guọnọ kpairoro vrẹ ekuakua “buebu” ro vwori-i. (Mak 10:17-22) Ọtiọyena, ọ da sen urhekpe ri Jesu je dia ọviẹn vwọ kẹ “Efe.” (Mat. 6:24, NW.) Ọ da dia owẹ die yen wo re ru? Ofori nẹ a fuẹrẹn oborẹ avwanre vwọ kobaro vwẹ akpeyeren nọke ra ruọke. Diesorọ? Rere a sa vwọ vwẹ ẹgba avwanre vwo ruiruo vwẹ idjerhe aghwanre. w19.09 24 ¶17-18

Ọke ri Jihova vwọ tanẹ o tere yen iruo aghwoghwo na che vwo vwoba. Brẹ ọke yen ihwo ji vwo ayen vwọ rhe riẹn Jihova Ọghẹnẹ vẹ Jesu? (Jọn 17:3) Avwanre riẹn re-e. Ẹkẹvuọvo, avwanre riẹnre nẹ bẹsiẹ ukpokpogho rode na ke tonphiyọ, ihwo re “ve arhọ ri bẹdẹ na kẹ” vwo uphẹn rẹ ayen vwọ kerhọ rẹ iyẹnrẹn esiri na je ga Jihova. (Iruo 13:48) Mavọ yen a sa vwọ chọn ihwo nana uko vwẹ ọmọke ro chekọ na? Jihova kẹ avwanre ekuakua re se vwo yono ihwo uyota na womarẹ ukoko rọyen. Kerẹ udje, e yono avwanre kudughwrẹn kudughwrẹn vwẹ uyono rẹ uvwre rẹ udughwrẹn na. Uyono nana chọn avwanre uko vwọ riẹn obo ra sa ta vwẹ obọ rẹsosuọ kugbe orhivwinbrura. Wọ da vwẹ itrati yẹrẹ imagazini vwọ kẹ ohwo rọ nabọ dje omavwerhovwẹn phia, ko se se bẹsiẹ wo vwo rhivwin bro ra. Avwanre ohwo vuọvo vwo oghwa re vwo vwobọ vwẹ iruo aghwoghwo na te asan ẹgba avwanre teri kemeranvwe kemeranvwe. w19.10 9 ¶7; 10 ¶9-10

Jihova ve kẹ Simiọn, ọshare rọ fuevun rọ je kpakore vwẹ Jerusalẹm nẹ, ọ cha mrẹ Mesaya na tavwen o ki ughwu. Ive yena ghene bọn Simiọn gan mamọ kidie ikpe buebun rhire na yen ọ vwọ hẹrhẹ Mesaya na. Jihova hwosa kẹ fikirẹ esegbuyota vẹ akon-echiro rọyen. Ẹdẹ ọvo, “[“ẹwẹn ọfuanfon,” NW] na de muo” rhe uwevwi rẹ ẹga na. Etiyin Simiọn da mrẹ ọmọboba na Jesu, Jihova de muo vwọ ta eta aroẹmrẹ ri shekpahen ọmọ na rọ cha dia Kristi na. (Luk 2:25-35) Dede nẹ, ọ sa dianẹ Simiọn tọn te asan rọ da mrẹ Mesaya na ọke ro vwo ruiruo rẹ aghwoghwo rọye-en, jẹ oma vwerhenrọ fikirẹ uphẹn yena, ebruphiyọ efa je hẹrhẹ vwẹ obaro na! Vwẹ akpọ kpokpọ na ọshare yena rọ fuevun na cha mrẹ oborẹ usuon ri Jesu cha ghwa ebruphiyọ rhe orua rẹ ihworakpọ eje. (Jẹn. 22:18) Oma je sa vwerhen avwanre fikirẹ uphẹn rẹ ẹga ri Jihova vwọ kẹ avwanre. w19.10 22 ¶7; 23 ¶12

Owenẹ e feri yẹrẹ e feri-i, ofori nẹ a sẹro rẹ ubiudu rẹ avwanre. Vwẹ idjerhe vọ? Wo vwo ẹguọnọ rẹ efe-e. Wọ je vwẹ iruo wẹn vwọ kobaro kẹ ẹga ri Jihova-a. Mavọ wọ sa vwọ riẹn sẹ ọnana phia kẹ wẹ re? Nọ oma wẹn: ‘Ọkieje mi vwo roro iroro rẹ iruo ọke me da hẹ uyono yẹrẹ iruo aghwoghwo? Me ro ẹnwan kpahen oborẹ mi se vwo fe vwẹ obaro na? Igho vẹ ekuakua rẹ akpeyeren so ẹghwọ vwẹ uvwre mẹ vẹ aye mẹ? Mi se ruiruo rẹ ihwo niri kueku rere me sa vwọ mrẹ ọke buebun ghwọrọ vwẹ ẹga ri Jihova?’ (1 Tim. 6:9-12) Ọke re de roro kpahen enọ nana, e jẹ avwanre karophiyọ nẹ Jihova vwo ẹguọnọ rẹ avwanre, o ji ve ive nana kẹ ihwo re fuevun ga: “Me sa phiẹn wẹ-ẹ eyẹ me sa sen wẹ-ẹ.” Ọnana yen sorọ ọyinkọn Pọl vwo si nẹ, “Si oma wẹn nẹ urhuru si vwe rẹ igho.”—Hib. 13:5, 6. w19.10 29 ¶10

Avwanre vẹ iniọvo rẹ avwanre da wiankuẹgbe, ke che rhi vughe iruemu iyoyovwin rayen ji sikẹrẹ ayen. Kerẹ udje, mavọ yen oma ru we siẹrẹ wọ da mrẹ oniọvo wẹn rọ nabọ fiudugberi chochọn rẹ esegbuyota ro vwo kpahen Jihova vẹ ọhọre rọyen vwẹ aghwoghwo na? Ọ muẹro nẹ wo che vwo ẹwẹn wo vwo sikẹrẹ phiyọ. Adeline rọ dia oniọvo aye rọhẹ ẹgbukpe 23 vuẹ ugbeyan rọyen re se Candice nẹ ayen kpo ẹkuotọ rẹ obọ je te de re ghwoghwo. Ọ da ta: “Avwanre guọnọ ghwoghwo vẹ oruru je riavwerhen rẹ iruo aghwoghwo na kpobarophiyọ. Avwanre je guọnọ obo re cha nẹrhẹ avwanre ru bunphiyọ vwẹ ẹga ri Jihova.” Erere vọ yen ayen mrẹre? Adeline da ta: “Vwẹ oba rẹ ẹdẹ ọvuọvo, avwanre ta ota kpahen oborẹ oma vwerhen avwanre te, ihwo avwanre ghwoghwo ota kẹ, kugbe oborẹ Jihova chọn avwanre uko wan. Avwanre riavwerhen rẹ otaẹtakuẹgbe na je nabọ rhe riẹn ohwohwo phiyọ.” w19.11 5 ¶10-11

Vwẹ ọke rẹ awanre, emu rẹ ophọphọvwe rẹ isodje vwo nẹ ofovwin kpo ababọ rẹ ekpọfia rọyen. Ogbikuegbe rẹ ihwo ri Rom re se Tacitus de si: “Emu rẹ ophọphọvwe ro te ọ rẹ isodje vwọ djẹ jẹ ekpọfia rọyen vwẹ ofovwin herọ-ọ.” Ọtiọyena, isodje na ke yọnrọn ekpọfia rayen kokoroko. Avwanre yọnrọn ekpọfia rẹ esegbuyota rẹ avwanre kokoroko siẹrẹ e de kpo uyono ọkieje, ji vuẹ ihwo efa kpahen odẹ ri Jihova kugbe Uvie rọyen. (Hib. 10:23-25) Vwọba, ofori nẹ avwanre se Ota rẹ Ọghẹnẹ kẹdi kẹdẹ je yare ukẹcha rọyen ra sa vwọ reyọ obo re seri na vwo ruiruo. (2 Tim. 3:16, 17) E de ru enana, o vwo ibiri rẹ Eshu vuọvo ro cha sa guọghọ esegbuyota rẹ avwanre-e. (Aiz. 54:17) “Ekpọfia rẹ esegbuyota” rẹ avwanre na cha sẹro rẹ avwanre. Avwanre che fuidugberi nene iniọvo rẹ avwanre wiankugbe. Ọnana cha nẹrhẹ avwanre phi edavwini ri kẹdi kẹdẹ kparobọ je ka ẹbẹre ri Jesu ọke ro de che phi Idẹbono vẹ usun rọyen kparobọ.—Ẹvwọ. 17:14; 20:10. w19.11 19 ¶18-19

Ọrhuẹrẹphiyotọ ra nabọ si phiyotọ sa nẹrhẹ ọ lọhọ re vwo ru nene orhiẹn re bruru. (1 Kọr. 14:40) Kerẹ udje, a vwẹ odjekẹ vwọ kẹ ekpako ukoko nẹ ayen sanẹ ọkpako ọvo ro che si erhiẹn rẹ ekpako na bruru phiyotọ, ohwo ro che ruo kugbe ẹdẹ re che vwo ruo re. Ekpako ri nene odjekẹ nana rha cha mrẹ bẹnbẹn rẹ ayen vwo ru nene orhiẹn ebro raye-en. Wo ji se nene odjekẹ yena. Kerẹ udje, wo se si erọnvwọn ru wo che ru kẹdi kẹdẹ phiyotọ je ghare ayen utute vwo nene oborẹ wo che ru ayen wan. Ọnana cha nẹrhẹ wọ wian ewian na eje ji fobọ wian ayen re. Wọ cha rharen oma vi. Ọ guọnọ ẹgbaẹdavwọn re se vwo ru nene orhiẹn re bruru, e mi ruo re. (Rom 12:11) Ọyinkọn Pọl vuẹ Timoti nẹ o “mie se ọbe ọfuanfon na” rere ọ sa vwọ dia uvi rẹ oyono. Uchebro yena ji churobọ si kemu kemu rẹ avwanre guọnọ ru vwẹ ẹga ri Jihova.—1 Tim. 4:13, 16. w19.11 29-30 ¶15-16

Ọke ri Jihova vwọ vuẹ Mosis nẹ o re si ihwo rẹ Izrẹl nẹ eviẹn vwẹ Ijipt, Mosis ghwe vwo uduefiogbere ro vwo ruiruo na-a, ọtiọyena ọ da vuẹ Jihova abọ ivẹ soso nẹ ọyen muwa-an. Ẹkpahọnphiyọ rẹ Jihova vwọ kẹ Mosis djerephia nẹ Jihova vwo arodọnvwẹ kpahen Mosis. (Eyan. 4:10-16) Ọnana de mu Mosis vwo fiudugberi ghwoghwo ẹdjọeguo ọgangan rẹ Ọghẹnẹ kẹ Fero. Mosis mrẹ oborẹ Jihova vwẹ ẹgba rọyen vwo sivwin ihwo rẹ Izrẹl je ghwọrọ Fero vẹ isodje rọyen vwẹ Abadi Ọvwavware na. (Eyan. 14:26-31; Une 136:15) Mosis vwo sun emọ rẹ Izrẹl vwo nẹ Ijipt nu, enuenu kọyen ayen brẹ. Vwevunrẹ ẹdia yena, Mosis je mrẹ oborẹ Jihova vwo edirin ọgangan kpahen ihwo rọyen ro ghwe si nẹ eviẹn na. (Une 78:40-43) Ọke ri Mosis vwọ rẹ Jihova nẹ ọ ghwọrọ ihwo rẹ Izrẹ-ẹl, ọ da mrẹ omaevwokpotọ rẹ oghẹresan rẹ Jihova djephia ro vwo wene ẹwẹn rọyen.. (Eyan. 32:9-14) Ọke ri Mosis vwo sun ihwo rẹ Izrẹl vwo nẹ Ijipt nu, oyerinkugbe rọyen vẹ ọ ri Jihova da rhe kpẹkpẹphiyọ, kọ ghwa họhọ nẹ ọ mrẹ Jihova.—Hib. 11:27. w19.12 17 ¶7-9

Idibo ri Jesu buebun ihwo ri Galili. Kọyen ugbenu ọvo rẹ ihwo buebun de se sikoko yen e de che ru omẹvwa yena, ọ dia uwevwin vuọvo vwẹ Jerusalẹmu-u. Vwọba, Jesu ra kpare nushi na je ka mrẹ iyinkọn 11 na vwẹ ubruwevwin ọvo vwẹ Jerusalẹm jovwo re. Kọ dianẹ iyinkọn na ọvo yen ọ guọnọre nẹ i ghwoghwo ota na jovwo, manẹ ọ ra vuẹ ayen vwẹ Jerusalẹm ukperẹ rọ vwọ vuẹ ayen vẹ ihwo efa nẹ i vwoma vwẹ Galili. (Luk 24:33, 36) Ọ dia Inenikristi rẹ ọke yena ọvo yen Jesu vwẹ iji re vwo gbe idibo na kẹ-ẹ. Mavọ yen e ru riẹn? Jesu vwo kuẹ iji na phiyọ, ọ da ta: “Me vẹ ovwan herọ vwẹ ọke ejobi, rhirin rhi te oba rẹ eyeren na.” (Mat. 28:19, 20) Ihwo buebun ghene ruiruo rẹ odibo egbe na nonẹna. Di roro! Omarẹ ihwo 300,000 re dia Iseri ri Jihova yen bromaphiyame kukpe kukpe rhe dia idibo ri Jesu Kristi! w20.01 2 ¶1; 3 ¶5-6

Eghene rọ mwa okpọga rọ guọghọ oma na ememerha. Ọshare rọ vrẹ ẹgbukpe 50 ra djẹ nẹ iruo guọnọ iruo jẹ ọ je rhe mrẹ-ẹ. Oniọvo rọ kpakore rọ ga Jihova ikpe buebun re, ro rhe se ruẹ te asan ro ruẹ te jovwo-o. Ẹdia wẹn da họhọ ọvo usun re djunute na, wo se ni oma wẹn nẹ o rhe vwo obo ra cha reyọ owẹ vwo ru ọfa-a. Ẹdia na sa nẹrhẹ aghọghọ wẹn shekpotọ, ọ sa nẹrhẹ wọ vwẹ ẹro okueku vwo ni oma wẹn ji gbowọphiyọ oyerinkugbe wẹn vẹ ọ rẹ ihwo efa. Ẹro rẹ Eshu vwo ni arhọ yen akpọ na ji vwo no. Eshu vwẹ ikabọ vwo muẹ ihworakpọ kerẹsiẹ ra da mrẹ nẹ ayen fiemu vuọvo-o. Ọ vuẹ Ivi nẹ o che vwo ugbomọphẹ siẹrẹ o de churhi ri Jihova, dede nẹ ọ riẹnre nẹ ughwu yen che nẹ obuko rọyen rhe. Eshu yen suẹn ekiẹchuọ, usuon vẹ ẹga rẹ efian rẹ akpọ na. Ọnana yensorọ rẹ ineki, ihwo ri sivwẹn oseghe rẹ usuon vẹ ilori ega buebun rhe brọghọ phiyọ ihwo oma yẹrẹ ni arhọ ghanghanre-e. Jihova guọnọre nẹ a riẹn nẹ o ni avwanre ghanghanre, o ji biẹcha avwanre siẹrẹ e de hirharoku ẹdia re nẹrhẹ e ni oma rẹ avwanre kueku.—Rom 12:3. w20.01 14 ¶1-4

Ọ da hanvwe mamọ ẹgbukpe ujuvẹ yen Jerimaya dia ohri rẹ ihwo ri vwo udu ọgangan, ọkiọvo ji te ihwo rẹ orua rọyen ri nẹ orere rẹ Anatọt rhe. (Jer. 12:6) Ẹkẹvuọvo, ọ kẹnoma kẹ aye-en. Ọ tobọ ta evun rọyen kẹ osiọbe rọyen Barọk, ọtiọyen ji te avwanre kidie e si ikuegbe rọyen na phiyọ Baibol na. (Jer. 8:21; 9:1; 20:14-18; 45:1) O muẹro nẹ ọghọ vẹ ẹguọnọ ri Barọk vẹ Jerimaya vwo kpahen ohwohwo rhoma kodophiyọ ọke ri Barọk vwo si ikuegbe rẹ akpeyeren ri Jerimaya. (Jer. 20:1, 2; 26:7-11) Vwẹ ikpe buebun, Jerimaya fiudugberi si ihwo ri Izrẹl orhọ kpahen obo re cha phia kẹ Jerusalẹm. (Jer. 25:3) Jihova rhoma vwẹ uchebro kẹ ihwo na nẹ ayen kurhẹriẹ, ọ da vuẹ Jerimaya nẹ o si orhọesio na phiyọ ukpirhin ọbe. (Jer. 36:1-4) Vwẹ uvwre ọke ri Jerimaya vẹ Barọk vwo ruiruo nana rẹ Ọghẹnẹ vwọ kẹ ayen rọ sa reyọ emeranvwe buebun na, aphro herọ-ọ nẹ ayen bọn esegbuyota rẹ ohwohwo gan. w19.11 2-3 ¶3-4

Ẹro vọ yen ofori nẹ wo vwo ni iniọvo rẹ eya vẹ eshare ra jẹreyọ na? Ọ chọre re vwo muọghọ roghẹresan vwọ kẹ oniọvo, ọ da tobọ dia ọyen Onenikristi ra jẹreyọ. (Mat. 23:8-11) A da ta ota kpahen ekpako na vwẹ Baibol na, a vuẹ avwanre nẹ a “vwẹ ẹro kere esegbuyota rayen,” ọ dia a vwọ vwẹ ohworakpọ vwo ru onini-i. (Hib. 13:7) Vwọrẹ uyota, Baibol na tare nẹ evo usun rẹ ekpako na fo ihwo re mu “omamọ rẹ ọghọ” kẹ kidie ayen “riẹn sun,” ayen je “wian owian rẹ eghwoghwo kugbe uyono,” ọ dia kidie nẹ a jẹ ayen reyọ-ọ. (1 Tim. 5:17) Siẹrẹ e de jiri yẹrẹ titi ihwo ra jẹreyọ na gan nọ, oma cha vwerhen aye-en. Ọ sa tobọ nẹrhẹ ayen phuoma. (Rom 12:3) Avwanre guọnọ ru emu vuọvo rọ sa nẹrhẹ iniọvo ri Kristi ra jẹreyọ na she ro uruemu ọtiọyena-a!—Luk 17:2. w20.01 29 ¶8

O vwo erọnvwọn buebun re so ẹnwan kẹ Ọyinkọn Pọl. Ọ ro ẹnwan kpahen ebẹnbẹn rẹ iniọvo rẹ ukoko na hirharokuẹ fikirẹ ẹguọnọ ro vwo kpahen ayen. (2 Kọr. 2:4) Ihwo re vwọsua hwe Pọl ji muo phiyọ uwodi ọke ro vwo ruiruo rọyen kerẹ ọyinkọn. Ọ je “riẹn obo [emu] kanre ohwo” wan. (Fil. 4:12) Ọ sa dianẹ Pọl ro ẹnwan kọke kọke rọ da ro okọ kpo asan, kidie okọ shuro ọ da hanvwe mamọ abọ erha jovwo re. (2 Kọr. 11:23-27) Die yen vwẹ ukẹcha kẹ Pọl vwẹ ọke yena? Pọl ro ẹnwan kpahen ebẹnbẹn rẹ iniọvo rẹ ukoko na hirharoku, ẹkẹvuọvo, ọ davwẹngba vwọ rhuẹrẹ ayen eje phiyọ-ọ. Ọ riẹnre nẹ ọyen ọvo che se ruo-o. O ru ọrhuẹrẹphiyotọ rẹ iniọvo efa vwọ chọn ọyen uko vwọ vwẹrote ọdavwẹ rẹ iniọvo rẹ ukoko na, eshare evo ra vwẹroso kerẹ Timoti vẹ Taitọs. Aphro herọ-ọ, ukẹcha rẹ eshare nana vwọ kẹ Pọl na nẹrhẹ ẹnwan rọyen kpotọ.—Fil. 2:19, 20; Taitọs 1:1, 4, 5. w20.02 23 ¶11-12

Jihova je guọnọ nẹ e nyẹme rọyen. O muwan rẹ ẹmienyo rẹ avwanre kidie ọyehẹ Ọmemama vẹ Ohwo rọ Sẹro rẹ arhọ rẹ avwanre, ọ ke je ghwanre nọ emiọvwọn rehẹ akpọ na eje. Ẹkẹvuọvo, iroro ọvo kiriguo rọ nẹrhẹ avwanre nyẹme ri Jihova yen ẹguọnọ re vwo kpahọn. (1 Jọn 5:3) Dede nẹ o vwo iroro buebun re sorọ avwanre vwo nyẹme ri Jihova, jẹ ọ gba avwanre ruẹ ọtiọye-en. Jihova kẹ avwanre okẹ rẹ ugbomọphẹ, ọtiọyena oma kọ vwerhọn siẹrẹ avwanre ọvo de brorhiẹn re vwo nyẹme rọyen. Emiọvwọn guọnọ sẹro rẹ emọ rayen. Ọnana yensorọ rẹ ayen vwo jẹ irhi sansan kẹ emọ na. Ọke rẹ emọ na de nene irhi na, kẹ ayen djephia nẹ ayen vwẹroso emiọvwọn na ji muọghọ kẹ ayen. Ọtiọyena, mavọ yen ọ ghanre te ra vwọ riẹn irhi vẹ iwan rẹ Ọsẹ rẹ avwanre rọhẹ obodjuvwu ji yeren akpọ nene. Avwanre de ru ọtiọyen, ke se djephia nẹ avwanre vwo ẹguọnọ ri Jihova ji muọghọ kẹ. Ọnana che fierere kẹ avwanre. (Aiz. 48:17, 18) Ẹkẹvuọvo, ihwo re sen Jihova vẹ irhi rọyen so ukuoma kẹ oma rayen.—Gal. 6:7, 8. w20.02 9-10 ¶8-9

Ofori nẹ avwanre fiudugberi ta ota kerẹ Abigail siẹrẹ avwanre da mrẹ ohwo rọ guọnọ ruẹ obo re chọre. (Une 141:5) Ofori nẹ e fiudugberi ta ota, ẹkẹvuọvo, e ruo vwẹ idjerhe rẹ ọghọ. Avwanre cha dia uvi rẹ ugbeyan kẹ oniọvo rẹ avwanre siẹrẹ e de bru ayen uche vwẹ idjerhe rẹ ẹguọnọ. (Isẹ 27:17) Marho, ofori nẹ ekpako fiudugberi ta ota kẹ iniọvo re jowọ rọ chọre vwẹ ukoko na. (Gal. 6:1) E jẹ ekpako je karophiyọ nẹ ayen komobọ je gba-a, ọtiọyena, ayen je guọnọ uchebro. Ẹkẹvuọvo, e jẹ ọna dobọ rẹ ekpako jẹ rẹ ayen vwọ jẹ ọkpọvi ẹ vwọ kẹ iniọvo re guọnerọ-ọ. (2 Tim. 4:2; Taitọs 1:9) Ọke rẹ ayen da vwẹ uchebro kẹ ohwo, ayen davwẹngba vwọ vwẹ okẹ rẹ ota ẹta rayen na vwo ruiruo vwẹ idjerhe rẹ ona vẹ akoechiro. Ẹguọnọ yen mu ayen vwọ vwẹ ukẹcha tiọyena phia. (Isẹ 13:24) Obo re ma ghanre kẹ ekpako na yen, ayen vwọ sẹro rẹ odẹ ọfuanfon ri Jihova vẹ ukoko rọyen.—Iruo 20:28. w20.03 20 ¶8-9

Jihova reyọ Mosis vwo sivwin ihwo rẹ Izrẹl. Ẹkẹvuọvo, ọke vọ yen Jihova vwọ reyọ vwo ruiruo? Ọke re vwo “yono Mosis phihọ aghwanre rẹ ihwo rẹ Ijipt ejobi” yen Jihova vwọ reyọ vwo ruiruo? (Iruo 7:22-25) Ẹjo, ọke ri Jihova vwo yono Mosis phiyọ ohwo ri dẹndẹn rọ je vwomakpotọ nu, yen ọ vwọ reyọ vwo ruiruo. (Iruo 7:30, 34-36) Jihova kẹ Mosis uduefiogbere rọ vwọ ta ota kẹ ovie rẹ Ijipt rọ dia osun ro me vwo ẹgba ọke yena. (Eyan. 9:13-19) Avwanre yono nẹ ọnana rhe nẹ ihwo re davwẹngba rẹ ayen vwọ vwẹrokere iruemu ri Jihova, re je vwẹrosuọ, yen ọ reyọ vwo ruiruo. Jihova reyọ idibo rọyen vwo ruiruo vwẹ idjerhe sansan vwẹ ikuegbe rẹ ihworakpọ re. Die yen ọ cha chọn wẹ uko vwo ru? Wẹwẹ yen cha vwomakpahotọ rere ọ sa vwọ reyọ owẹ vwo ruiruo. (Kọl 1:29) Wọ da vwomakpahotọ, Jihova sa nẹrhẹ wọ dia oghwoghwota ro vwo oruru, uvi oyono, obruche, ugbeyan, ọwena rẹ owian, yẹrẹ dia kemu kemu rọ guọnọre o se vwo ru ọhọre rọyen gba. w19.10 21 ¶5; 25 ¶14

Uvi rẹ igbeyan cha chọn avwanre uko vwọ fuevun kẹ Jihova. Idjerhe ro me yovwin re se vwo vwo uvi rẹ igbeyan ọyen ọ rẹ avwanre komobọ je vwọ dia uvi rẹ igbeyan. (Mat. 7:12) Kerẹ udje, Baibol na vwẹ uchebro kẹ avwanre nẹ a vwẹ ukẹcha kẹ ihwo efa, ma rho kẹ “otu rẹ akpọ bẹn.” (Ẹfe. 4:28) Oma cha vwerhen avwanre mamọ siẹrẹ e de vwo uruemu ra vwọ vwẹ ukẹcha kẹ ihwo efa. (Iruo 20:35) Igbeyan rẹ avwanre sa vwẹ ukẹcha kẹ avwanre vwẹ ọke rẹ edavwini, rere ẹwẹn rẹ avwanre vwo totọ. Kirobo rẹ Elihu kerhọ rẹ Job ọke rọ vwọ ta ota kpahen ebẹnbẹn rọyen, eriyin igbeyan rẹ avwanre ji che ru ọke rẹ avwanre da ta ọdavwẹ rẹ avwanre. (Job 32:4) E jẹ avwanre noso nẹ igbeyan rẹ avwanre che se brorhiẹn kẹ avwanre-e, ẹkẹvuọvo ọyen emu rẹ aghwanre ra vwọ kerhọ rẹ uchebro rẹ Baibol rẹ ayen vwọ kẹ avwanre. (Isẹ 15:22) E jẹ avwanre vwomakpotọ rhiabọreyọ ukẹcha rayen vwẹ ọke rẹ ebẹnbẹn, kirobo rẹ Ovie Devid ruru ọke rẹ igbeyan rọyen vwọ vwẹ ukẹcha kẹ. (2 Sam. 17:27-29) Igbeyan tiọyena ghini okẹ ro nẹ obọ rẹ Jihova rhe.—Jems 1:17. w19.04 11 ¶12; 12 ¶14-15