Bicha Oniruo rẹ Avwanre Jesu

1. Die yen ọhọre ri Jihova nonẹna?

ỌYEN ọhọre rẹ Ọghẹnẹ re vwo ghwoghwo iyẹnrẹn esiri na vwo nene otọrakpọ na eje nonẹna. (Mak 13:10; 1 Tim. 2:3, 4) Owian nana ọ ri Jihova, ọyen obo ri fori dẹn nẹ o phiro phiyọ obotọ rẹ ẹroevwote rẹ ọmọ ọghanghanre rọyen. Kidie nẹ Jesu yen vwẹrote iruo rẹ aghwoghwo na, avwanre vwo imuẹro dẹn nẹ e che ruo re kirobo rẹ Jihova guọnọre tavwen oba na ke rhe.—Mat. 24:14.

2. Die yen a cha ta ota kpahen vwẹ uyono nana?

² Vwẹ uyono nana, a cha mrẹ oborẹ Jesu reyọ “odibo esiri na” vwọ reyọ ota rẹ Ọghẹnẹ vwo yono avwanre kugbe obo rọ vwọ reyọ vwo muegbe rẹ idibo rọyen vwọ kẹ iruo rẹ aghwoghwo rọ ma rho vwẹ ikuegbe rẹ akpeyeren rẹ ihworakpọ. (Mat. 24:45) A je cha ta ota kpahen oborẹ avwanre ohwo ọvuọvo se ru re se vwo bicha Jesu vẹ odibo esiri na.

JESU YEN VWẸROTE IRUO RẸ AGHWOGHWO NA

3. Ogangan vọ yen a vwọ kẹ Jesu?

³ Jesu yen vwẹrote iruo rẹ aghwoghwo na. Die yen kẹ avwanre imuẹro nana? Ọmọke krẹn tavwen o ki kpo odjuvwu, Jesu vẹ idibo rọyen evo re fuevun da vwoma vwẹ enu rẹ ugbenu ọvo vwẹ Galili. Ọ da vuẹ ayen: “Ogangan ejobi re hẹ odjuvwu vẹ akpọ, a vwẹ ayen kẹ vwẹ.” Vwo oniso rẹ obo ro rhoma vuẹ ayen: “Ovwan gba yanran re we re yono ihwo rẹ akpọ na ejobi.” (Mat. 28:18, 19) Vwọ vrẹ iruo efa rẹ Jesu vwori, a je vwẹ ogangan kẹ rọ vwọ vwẹrote iruo rẹ aghwoghwo na.

4. Diesorọ o vwo mu avwanre ẹro nẹ Jesu vwẹrote iruo rẹ aghwoghwo na rhi te nonẹna?

⁴ Jesu tare nẹ e che ruiruo rẹ aghwoghwo vẹ odibo egbe na vwẹ “akpọ na ejobi,” ọ je tanẹ ọyen che nene idibo rọyen dia vwẹ ọke na ejobi “rhiri rhi te oba rẹ akpọ na.” (Mat. 28:20) Eta yena ghini dje phenphẹn nẹ Jesu cha vwẹrote iruo rẹ aghwoghwo na rhirin rhi te ọke rẹ avwanre na.

5. Idjerhe vọ yen avwanre vwo vwobọ vwẹ orugba rẹ aroẹmrẹ rọhẹ Une Rẹ Ejiro 110:3?

⁵ Jesu ro ẹnwan sẹ ewiowian na che bun te obo ra guọnọre vwẹ oba rẹ eyeren na-a. Kidie ọ riẹnre nẹ eta rẹ ọbuine na mraro rọyen phiyotọ rọ tare nẹ, “ihwo wẹn che siobọ nẹ oma rẹ ayen ọphọphẹ vwẹ ẹdẹ wo de sun otuofovwi wẹn” che rugba. (Une 110:3) Ọ da dianẹ wo vwobọ vwẹ iruo aghwoghwo na, jẹ wo biẹcha Jesu vẹ odibo esiri na, jẹ wo ji vwobọ vwẹ orugba rẹ aroẹmrẹ na. Owian na nabọ yan obaro, ẹkẹvuọvo, egbabọse evo herọ.

6. Ọrhọ yen egbabọse ọvo rẹ ighwoghwota rẹ Uvie na hirharokuẹ nonẹna?

⁶ Egbabọse ọvo rẹ ighwoghwota rẹ Uvie na hirharokuẹ yen ẹvwọsuọ. Ilori rẹ ẹga, ihwo ri she nẹ ukoko na re vwọ suọ kugbe ihwo ri sivwẹn oseghe rẹ usuon gun efian kẹ ihwo kpahen owian rẹ avwanre. Ọ da dianẹ ihwo rẹ orua, ihwo efa re vugheri yẹrẹ ihwo re nene ruiruo se efian nana gbuyota, ọnana sa nẹrhẹ ayen kpokpo avwanre vwọ dobọ rẹ iruo aghwoghwo na vẹ ẹga rẹ avwanre vwọ kẹ Jihova ji. Vwẹ ẹkuotọ evo, ẹvwọsuọ na sa vwomaphia womarẹ oshenyẹ, ra vwọ djẹ uguegue muẹ ohwo, ra vwọ reyọ elọkpa vwo muẹ ohwo yẹrẹ a vwọ tobọ kanra ohwo dede. O gbe avwanre unu siẹrẹ erọnvwọn tiọna da phia-a kidie Jesu tarọ phiyotọ nẹ, “ivun rẹ ovwan ko che miovwo ẹgborho ejobi fiki rẹ odẹ mẹ.” (Mat. 24:9) Utuoma nana eje rẹ avwanre rhiẹromrẹ na, ọyen odjephia nẹ avwanre vwo ẹroesiri ri Jihova. (Mat. 5:11, 12) Idẹbono yehẹ obuko rẹ ẹvwọsuọ nana eje. Ẹkẹvuọvo, o vwo ẹgba te Jesu-u! Fikirẹ ukẹcha ri Jesu, ihwo rẹ ẹgborho na eje ki se nyo iyẹnrẹn esiri na. Jẹ a mrẹ oboresorọ ọnana vwo mu avwanre ẹro.

7. Die yen wọ mrẹ nonẹna ro djerephia nẹ aroẹmrẹ rọhẹ Ẹvwọphia 14:6, 7 ruẹgba re?

⁷ Kerẹ ighwoghwota rẹ Uvie na, egbabọse ọfa rẹ avwanre vwori yen ephẹrẹ rẹ ihwo efa jẹ re fẹnẹ ọ rẹ avwanre. Vwẹ ẹvwọphia ra vwọ kẹ ọyinkọn Jọn, Jesu tarọ phiyotọ nẹ vwẹ ọke rẹ avwanre na, iyẹnrẹn esiri na che phi egbabọse yena kparobọ. (Se Ẹvwọphia 14:6, 7.) Vwẹ idjerhe vọ? Avwanre rhie uphẹn phiyọ vwọ kẹ ihwo buebun rere ayen se vwo nyo ovuẹ rẹ Uvie na. Nonẹna, ihwo buebun vwẹ akpọneje se se ẹbe rẹ avwanre ra fan nẹ Baibol rhe vwẹ jw.org kidie ọ herọ vwẹ ephẹrẹ re vrẹ 1,000! Ẹko Rọvwẹrote na rhọnvwere nẹ a fan ọbe rẹ Vwo Omavwerhovwẹn Bẹdẹ! rọ dia ọbe kiriguo re vwo ruiruo rẹ odibo egbe na vwo kpo ephẹrẹ re vrẹ 700! A je vwẹ odjekẹ ri Baibol vwọphia womarẹ ividio re ruẹ vwọ kẹ idin kugbe ọbe re se braille re ruẹ vwọ kẹ irhuẹro. Avwanre mrẹ aroẹmrẹ ri Baibol sansan ri ruẹgba nonẹna. Ihwo buebun ri “nẹ ẹgborho rẹ ephẹrẹ kephẹrẹ rhe” yono uyota ri Baibol na vwẹ “omamọ rẹ ephẹrẹ.” (Zek. 8:23; Zẹf. 3:9) Kidie avwanre hẹ otọ rẹ oniruo rẹ avwanre Jesu Kristi, kọyensorọ rẹ avwanre se vwo ruẹ erọnvwọn nana eje.

8. Die yen nẹ obuko rẹ iruo rẹ aghwoghwo rẹ avwanre na rhire?

⁸ Nonẹna, ihwo re vrẹ 8,000,000 ri nẹ ibrotọ ri te 240 rhe yehẹ ẹbẹre ọvo rẹ ukoko ri Jihova, kukpe kukpe yen ihwo uriorin buebun vwo bromaphiyame! Uruemu rẹ Inenikristi rẹ ihwo kpokpọ nana vwori, rọ dia “ohwo ọkpokpọ na,” yen ma ghanre vrẹ oborẹ ayen bun te. (Kọl. 3:8-10) Buebun rayen dobọ rẹ uruemu rẹ ọfanrhiẹn, ozighi, omaẹfẹnẹ, kugbe uruemu re vwo titi ẹkuotọ ji re. Aroẹmrẹ rọhẹ Aizaya 2:4 ruẹgba re; kidie ayen “gbe . . . kpare ofovwi ofa-a.” Avwanre vwọ davwan rere avwanre vwo vwo uruemu rẹ ohwo ọkpokpọ na, ọnana ko siẹ ihwo vwọ cha ukoko rẹ Ọghẹnẹ, ọnana jẹ odjephia nẹ e nene oniruo rẹ avwanre Jesu Kristi. (Jọn 13:35; 1 Pita 2:12) Enana di muẹ phia-a. Jesu yen vwẹ ukẹcha ra guọnọre vwọ kẹ avwanre.

JESU VWẸ ODIBO VWO MU

9. Vwo nene obo rehẹ Matiu 24:45-47, die yen a ta phiyotọ kpahen oba rẹ ẹdẹ na?

⁹ Se Matiu 24:45-47. Jesu tarọ phiyotọ nẹ vwẹ ọke rẹ oba na, ọyen cha vwẹ “odibo esiri” vwo mu rọ cha vwẹ odjekẹ ro nẹ Ota rẹ Ọghẹnẹ rhe vwọ ghẹrẹ avwanre. Ọtiọyena, avwanre rhẹro nẹ odibo na cha wian gangan vwẹ ọke rẹ avwanre na. Ọnana ghwa hẹ oborẹ odibo na ruẹ. Jesu reyọ ẹmẹko rẹ ihwo nana ra jẹreyọ na vwọ vwẹ emu kẹ ihwo rẹ Ọghẹnẹ kugbe ihwo ri dje omavwerhovwẹn phia “vwẹ ọke yena [ọke ro fori, NW ]”. Eshare nana vwẹ oma rayen vwo ruẹ inini vwẹ esegbuyota rẹ ihwo efa-a. (2 Kọr. 1:24) Ukperẹ ọtiọyen, ayen riẹnre nẹ Jesu Kristi yen “osun kugbe onotu” rẹ ihwo rọyen.—Aiz. 55:4.

10. Ọvọ vwẹ usun rẹ ẹbe nana rehẹ uhoho na yen chọn wẹ uko vwọ ton ẹga ri Jihova phiyọ?

¹⁰ Rhanvwe ukpe ri 1919 rhe yen odibo esiri na vwo muegbe rẹ ẹbe sansan phiyotọ, rere ihwo ri dje omavwerhovwẹn phia se vwo vwo uphẹn rẹ ayen vwo yono uyota rọhẹ Ota rẹ Ọghẹnẹ. Vwẹ ukpe ri 1921, odibo na de muegbe rẹ ọbe re se The Harp of God rere a sa vwọ vwẹ ukẹcha kẹ ihwo ri dje omavwerhovwẹn phia vwo yono uyota ri Baibol na. Ọke vwọ yanran na, a da rhoma vwẹ ẹbe efa vwọ phia. Ọbe vọ yen chọn wẹ uko vwo vughe ji vwo ẹguọnọ rẹ Ọsẹ rẹ avwanre rọhẹ odjuvwu? Ọbe rẹ “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, Die Yen Baibol na Se Yono Avwanre?, gbanẹ ọbe ri Vwo Omavwerhovwẹn Bẹdẹ!, rọ dia ọbe kpokpọ re vwo ruẹ uyono ri Baibol na? E ru ẹbe nana eje e vwọ cha avwanre uko vwo gbe odibo. A ghwa vwẹ ayen vwọ phia vwẹ ọke rẹ avwanre vwọ guọnọ ayen.

11. Diesorọ rọ vwọ ghanre re vwo yono kpahen Jihova vẹ Baibol na?

¹¹ Ọ dia ihwo kpokpọ ri dje omavwerhovwẹn phia ọvo yen fo ihwo ri vwo erianriẹn okokodo ri Jihova vẹ Baibol na-a! Ofori nẹ avwanre eje vwo erianriẹn ọtiọyena. Ọyinkọn Pọl de si: “Emuọre ọgangan ọye a vwọ kẹ omiro gua.” Ọ da vwọba, a da reyọ obo re se nẹ Baibol na rhe vwo ruiruo, kọ cha chọn avwanre uko vwo “vughe emu esiri vẹ ọbrabra.” (Hib. 5:14) Nonẹna, ọ pha bẹnbẹn re vwo ru nene iwan ri Jihova kidie ihwo buebun vwobọ vwẹ iruemu rẹ ọfanrhiẹn. Jesu davwẹngba mamọ rere avwanre se vwo yono kpahen erọnvwọn re sa cha avwanre uko vwo vwo esegbuyota rọ ganre. Ota rẹ Ọghẹnẹ rọ dia Baibol yen odjekẹ nana nẹ cha. Womarẹ otọ rẹ usuon ri Jesu ọyen odibo esiri na vwo muegbe je vwẹ odjekẹ ro nẹ obọ rẹ Ọghẹnẹ rhe vwọ kẹ avwanre.

12. Kerẹ Jesu, idjerhe vọ yen avwanre vwo muọghọ kẹ odẹ rẹ Ọghẹnẹ re?

¹² Kerẹ Jesu, avwanre muọghọ ro fori vwọ kẹ odẹ rẹ Ọghẹnẹ. (Jọn 17:6, 26) Kerẹ udje, vwẹ 1931 avwanre da re odẹ na Iseri ri Jihova. Avwanre womarẹ ọnana vwo djephia nẹ odẹ rẹ Ọghẹnẹ pha ghanghanre vwọ kẹ avwanre, a je guọnọ nẹ a reyọ odẹ na vwo vughe avwanre. (Aiz. 43:10-12) Rhanvwe October rẹ ukpe yena yen odẹ erhi rẹ Ọghẹnẹ Jihova, vwọ vwomaphia vwẹ opharo rẹ imagazini nana kemeranvwe kemeranvwe. Vwọba, odẹ erhi rẹ Ọghẹnẹ Jihova, vwomaphia vwẹ asan ro fori vwẹ Baibol ri New World Translation of the Holy Scriptures. Ọnana fẹnẹ ishọshi buebun ri si odẹ erhi rẹ Ọghẹnẹ Jihova vwo nẹ Baibol rayen!

OBORẸ JESU SUẸN IDIBO RỌYEN WAN

13. Die yen kẹ wẹ imuẹro nẹ Jesu reyọ “odibo esiri na” vwo ruiruo nonẹna? (Jọn 6:68)

¹³ Womarẹ “odibo esiri na,” Jesu vwẹ ukoko ọvo vwo mu vwẹ otọrakpọ na ro titi ẹga rẹ uyota. Mavọ yen oma ru we kpahen ukoko yena? Ọkiọvo, oma se ru we kerẹ ọyinkọn Pita rọ ta kẹ Jesu nẹ: “kono mi bru ra? Wẹ ri vwo eta rẹ arhọ ri bẹdẹ na.” (Jọn 6:68) Tivọ yen avwanre ohwo ọvuọvo rha dia nonẹna jovwo, ọ da dianẹ avwanre mrẹ ukoko ri Jihova vughe-e. Womarẹ ukoko na, Jesu kẹ avwanre erọnvwọn eje ra guọnọre rere a sa vwọ fuevun kẹ Ọghẹnẹ. O ji yono avwanre rere a sa vwọ nabọ ruiruo rẹ aghwoghwo rẹ avwanre fiotọ. Vwọba, ọ je chọn avwanre uko vwo vwo uruemu rẹ “ohwo ọkpokpọ na,” rere oma rẹ avwanre sa vwọ vwerhen Jihova.—Ẹfe. 4:24.

14. Erere vọ yen wọ mrẹ nẹ ukoko ri Jihova rhe rhanvwe ọke rẹ ọga akpọeje ri COVID-19 vwọ tonphiyọ na?

¹⁴ Jesu reyọ odjekẹ rẹ aghwanre vwọ kẹ avwanre ọke rẹ ebẹnbẹn da vwomaphia. Avwanre mrẹ erere vwo nẹ odjekẹ tiọyena rhe ghwe vwo nẹ ọke rẹ ọga ri COVID-19 rẹ akpọeje vwọ tonphiyọ na. Ihwo buebun vwevunrẹ akpọ na vwọ ro ẹnwan rẹ oborẹ ayen che ru, jẹ Jesu vwẹ odjekẹ vwọ kẹ avwanre kpahen oborẹ avwanre se ru ra vwọ kẹnoma. E jiriro kẹ avwanre nẹ avwanre ku nose mask phiyọ, ji tephe kẹ ohwohwo siẹrẹ avwanre da hẹ azagba. A karophiyọ ekpako na nẹ ayen vwẹ ọkieje vwọ yanmu iniọvo na rere ayen sa vwọ riẹn oborẹ iniọvo na guọnọre, ayen sa vwọ sẹro rẹ omakpokpọ rayen ji sikẹre Jihova. (Aiz. 32:1, 2) Iyẹnrẹn rẹ Ẹko Rọvwẹrote na je vwẹ odjekẹ vẹ ọbọngan efa vwọ kẹ avwanre.

15. Rhanvwe ọke rẹ ọga akpọeje na ghwa vwọ tonphiyọ, odjekẹ vọ yen a vwọ kẹ avwanre kpahen obo re ruẹ uyono vẹ iruo rẹ aghwoghwo na wan, die yen nẹ obuko rọyen rhe?

¹⁵ Rhanvwe ọke rẹ ọga akpọeje na vwọ tonphiyọ, ọyen a vwọ kẹ avwanre odjekẹ kpahen obo re ru uyono vẹ iruo rẹ aghwoghwo na wan. Ọ ghwọrọ ọke-e, avwanre da ton uyono eruo, isikoko vẹ eghwẹkoko phiyọ womarẹ itanẹti. Avwanre da je ton iruo rẹ aghwoghwo phiyọ womarẹ ifonu kugbe ileta esio. Jihova bruba ẹgbaẹdavwọn rẹ avwanre. Eghọn ukoko buebun niyẹnrẹn nẹ ighwoghwota rhoma bunphiyọ. Vwọrẹ uyota, ihwo buebun gbikun rẹ oborẹ ayen rhiẹromrẹ re sa bọn avwanre gan vwẹ uvwre rẹ ọke nana.—Ni ekpeti na, “Jihova Bruba Iruo rẹ Aghwoghwo rẹ Avwanre.”

16. Imuẹro vọ yen avwanre vwori?

¹⁶ Ihwo evo se roro nẹ ukoko na siẹ ufi rẹ eta ri shekpahen ọga akpọeje na gan nọ. Ọke buebun na yen avwanre vwo no sua nẹ odjekẹ ro nẹ obọ rẹ ukoko na cha vọnre vẹ aghwanre. (Mat. 11:19) Avwanre de roro kokodo kpahen oborẹ Jesu suẹn ihwo rọyen wan, avwanre ki se vwo imuẹro nẹ o vwo obo ri shecha rọ cha bẹrẹ odo-o, kidie Jihova vẹ Ọmọ rọyen che bicha avwanre.—Se Hibru 13:5, 6.

17. Mavọ yen oma ru we kidie wọ wian vwẹ otọ rẹ oniruo rẹ avwanre Jesu?

¹⁷ Mavọ yen ọ vwerhen oma te avwanre vwọ wian vwẹ otọ rẹ oniruo rẹ avwanre Jesu! Avwanre evunrẹ ukoko rẹ ihwo rọyen titi ẹkuruemu, ephẹrẹ kugbe asan re nurhe vwọ vrẹ ọ rẹ ihwo efa-a. Ukoko na vwẹ odjekẹ kẹ avwanre womarẹ Ota rẹ Ọghẹnẹ, ji yono avwanre oborẹ avwanre se vwo ruiruo rẹ aghwoghwo rẹ avwanre fiotọ. E ji yono avwanre obo re se vwo vwo uruemu rẹ ohwo ọkpokpọ na kugbe obo re se vwo vwo ẹguọnọ rẹ ohwohwo. Fikirẹ enana, avwanre sa vwẹ Jesu vwọ yan eyan kerẹ oniruo rẹ avwanre!