Ighene Eshare​—Ovwan Dia Inenikristi ri Tedje

1. Die yen ofori nẹ oniọvo ọshare ru o se vwo yerin tedje?

OVIE Devid vuẹ Solomọn nẹ: “Gan oma, re wo dje oma wẹn phia kerẹ ọshare.” (1Iv 2:​1-3) O ji fo nẹ iniọvo eshare eje re dia Inenikristi nonẹna vwẹ uchebro yena vwo ruiruo. Ayen se vwo ru ọtiọyen, ofori nẹ ayen yono obo re muọghọ kẹ irhi rẹ Ọghẹnẹ je reyọ odjekẹ ri Baibol na vwo ruiruo vwẹ kẹdia kẹdia rẹ akpeyeren rayen. (Lu 2:52) Diesorọ ọ vwọ dia obo re ghanre iniọvo eshare re dia ighene vwọ dia Inenikristi ri tedje?

2-3. Diesorọ ọ vwọ dia obo re ghanre oniọvo ọshare rọ dia eghene vwo yerin tedje kerẹ Onenikristi?

² Ọshare rọ dia Onenikristi vwo iruo ọghanghanre ro che ru vwẹ orua rọyen kugbe ukoko na. Iniọvo eshare re dia ighene, o muẹro nẹ ovwan roro kpahan iruo rẹ ovwan se ru vwẹ obaro na. Ọ sa dianẹ wo bru ẹkẹn kẹ oma wọ vwọ ro ẹga ọkieje, dia odibo rowian yẹrẹ ga kerẹ ọkpako ukoko ọke vwọ yanran na. Ọ je sa dianẹ wọ guọnọ rọvwọn ji vwiẹ emọ. (Ẹf 6:4; 1Ti 3:1) Wọ sa vwọ yanmu ẹkẹn ru wo bru kẹ oma ji ru ayen wiẹn, ofori nẹ wo yerin tedje.b

³ Die yen sa cha wẹ uko vwọ dia Onenikristi ro tedje? O vwo ena eghanghanre evo ro fori nẹ wo yono je tẹn. Kẹ, die yen wo se ru enẹna vwo muegbe vwọ kẹ ewian re hẹrhẹ owẹ vwẹ obaro na ji ru ayen wiẹn?

OBO RE SE RU VWO YERIN TEDJE

4. Tivọ yen wọ da sa mrẹ emamọ rẹ idje ru wọ sa vwẹrokere? (Ni uhoho na.)

⁴ Vwẹrokere omamọ rẹ idje. Baibol na vọnre vẹ emamọ rẹ idje rẹ ighene eshare sa vwẹrokere. Eshare yena re djunute vwẹ Baibol na vwo ẹguọnọ rẹ Ọghẹnẹ, ayen je vwẹrote ihwo rọyen vwẹ idjerhe sansan. Vwẹ orua yẹrẹ ukoko ru wọ hepha, wọ je sa mrẹ omamọ rẹ idje rẹ Inenikristi eshare ri tedje ru wọ sa vwẹrokere. (Hib 13:7) Wọ je sa vwẹrokere udje ọgbagba ri Jesu Kristi phi phiyotọ. (1Pi 2:21) Ru wo vwo yono kpahan idje rẹ eshare nana, vwo oniso rẹ omamọ uruemu rẹ ayen djephia. (Hib 12:​1, 2) Ọtiọyena, gbe roro kpahen obo ru wọ sa vwọ vwẹrokere ayen.

5. Mavọ yen wo se vwo yono ẹgba iroro wẹn, kẹ diesorọ ọ vwọ dia obo re ghanre? (Une rẹ Ejiro 119:9)

⁵ Vwo “omamọ rẹ . . . ọhọ” wọ sẹro rọyen. (Isẹ 3:21) Ọshare rẹ ẹgba iroro rọyen fiotọ nabọ fuẹrẹn emu nẹ tavwen o ki ruẹ. Ọtiọyena, davwẹngba vwo vwo iroro ro fiotọ wọ je sẹro rọyen. Diesorọ? Kidie akpọ na vọnre vẹ ighene eshare ri yeren akpọ nene ojevwe romobọ rayen yẹrẹ ri roro emu te tavwẹn ayen ki ruẹ-ẹ. (Isẹ 7:7; 29:11) Ekuakua re ghwa iyẹnrẹn ji se wene ẹro wo vwo nẹ emu. Ẹkẹvuọvo, kẹ mavọ wo se vwo vwo iroro ro fiotọ? Womarẹ wo vwo roro kpahan odjekẹ ri Baibol ji roro kpahan erere ro che norhe. Wo de ru ọyena nu, gbe nene odjekẹ na vwo bru erhiẹn re cha nẹrhẹ oma vwerhen Jihova. (Se Une rẹ Ejiro 119:9.) Wo de se yono ẹgba iroro wẹn, kọyen wọ jowọ ọghanghanre wọ vwọ dia Onenikristi ọshare ro tedje. (Isẹ 2:​11, 12; Hib 5:14) Roro kpahen oborẹ ẹgba iroro ro fiotọ sa vwọ cha wẹ uko vwẹ ẹdia ivẹ nana: (1) wo de nene iniọvo eya yerẹn kuẹgbe (2) wo de bru erhiẹn ri shekpahen irhuon vẹ osẹnvwe wẹn.

6. Mavọ yen iroro ro fiotọ sa vwọ cha eghene ọshare uko vwo muọghọ kẹ iniọvo eya?

⁶ Ẹgba iroro ro fiotọ cha vwẹ ukẹcha kẹ wẹ vwo muọghọ kẹ eya. Ọyen obo ri shephiyọ rẹ oniọvo ọshare rọ dia eghene vwọ vwẹ ugbeyan mu oniọvo aye rọ dia Onenikristi. Ẹkẹvuọvo, oniọvo ọshare rọ dia eghene ro vwo ẹgba iroro ro fiotọ cha ta ota, si ovuẹ yẹrẹ ru orọnvwọn vuọvo rọ cha kpare urhurusivwe rẹ oniọvo aye na-a, jokpanẹ kọ ghene guọnọ rọvwọn. (1Ti 5:​1, 2) Ọ da kọnphiyọ oniọvo aye, ọ cha sẹro omamọ rẹ odẹ rẹ oniọvo aye na womarẹ ayen ihwo ivẹ na vwọ kẹnoma kẹ asan rọ djahere jẹ ohwo ọfa ro tedje hẹ etiyi-in.​—1Kọ 6:18.

7. Mavọ yen iroro ro fiotọ sa vwọ cha eghene ọshare uko siẹrẹ o de brorhiẹn kpahen irhuon vẹ osẹnvwe?

⁷ Idjerhe ọfa rẹ oniọvo ọshare rọ dia eghene se vwo djephia nẹ o vwo iroro ro fiotọ yen, o vwo brẹ omamọ erhiẹn kpahen irhuon vẹ osẹnvwe rọyen. Ọke buebun na ihwo ri muọghọ kẹ Jihova-a yẹrẹ ri yeren akpọ ọfanrhiẹn yen titi ọka rẹ osẹnvwe kpokpọ ro sherhe. Iwun re tanmuẹ oma yẹrẹ e re nẹrhẹ eshare họhọ eya rẹ ayen kuẹphiyọ na, ghwe dje iroro rẹ ọfanrhiẹn rẹ ayen vwori phia. Siẹrẹ oniọvo ọshare rọ dia eghene rọ guọnọ yerin tedje de brorhiẹn rẹ oka rẹ ewun ro che kuphiyọ, ofori nẹ ọ vwẹ odjekẹ ri Baibol vwo ruiruo je vwẹrokere omamọ rẹ idje rẹ iniọvo ukoko na. Ọ sa nọ oma rọyen: ‘Erhiẹn ri mi brẹ djephia nẹ mi vwo iroro ro fiotọ ji dje erorokẹ vwọ kẹ ihwo efa? Osẹnvwe mẹ nẹrhẹ ihwo fobọ riẹn nẹ mẹvwẹ odibo rẹ Ọghẹnẹ?’ (1Kọ 10:​31-33; Tai 2:6) Iniọvo ukoko na muọghọ kẹ eghene ọshare ro vwo iroro ro fiotọ, oma rọyen je vwerhen ọsẹ avwanre rọhẹ Odjuvwu.

8. Mavọ yen eghene ọshare sa vwọ dia ohwo ra sa vwẹroso?

⁸ Dia ohwo ra sa vwẹroso. Oniọvo ọshare rọ dia eghene ra sa vwẹrosua ruiruo ra kẹrẹ eje fiotọ. (Lu 16:10) Je roro kpahen udje ọgbagba ri Jesu. O vwo ọke vuọvo ro vwo ni iruo ra kẹrẹ kuẹrofia-a. Ukperẹ ọtiọyen, ọ wian ewian ri Jihova kẹrẹ eje, tobọ te ọke rọ vwọ bẹn kẹ dede. O vwo ẹguọnọ rẹ ihwo ma rho kẹ idibo rọyen​—ọ je vwẹ arhọ rọyen vwọ kpahotọ kẹ ayen. (Jọ 13:1) Kerẹ Jesu, davwẹngba vwo ruiruo ra kẹ wẹ eje fiotọ. Wọ rha riẹn obo re ruiruo na-a, gba vwomakpotọ nokpẹn rẹ ukẹcha mie iniọvo eshare ri tedje. Ọ dia takpe nẹ wo ruro-o. (Ro 12:11) Ukperẹ ọtiọyen, nabọ ruiruo ra vwọ kẹ wẹ fiotọ, riẹn nẹ “Jihova yen [wo] ruo kẹ, ọ dia ihworakpọ-ọ.” (Kọl 3:23) Vwọrẹ uyota, wọ gbare-e, ọtiọyena vwomakpotọ rhọnvwe echobọ wẹn.​—Isẹ 11:2.

YONO ENA RE SA CHA WẸ UKO

9. Diesorọ o vwo fo nẹ eghene ọshare yono ena re cha vwẹ ukecha kẹ vwẹ akpeyeren?

⁹ Wọ sa vwọ dia oniọvo ọshare ro tedje, ofori nẹ wo yono ena re sa cha wẹ uko vwẹ akpeyeren. Ena na cha vwẹ ukẹcha kẹ wẹ vwo ruiruo ra kẹ wẹ vwẹ ukoko na, je nẹrhẹ wo ruiruo ru wọ sa vwọ vwẹrote oma yẹrẹ orua wẹn, ọ je cha nẹrhẹ owẹ vẹ ihwo efa vwo uvi rẹ oyerinkugbe. Jẹ a ta ota kpahen evo usun rẹ ena na.

10-11. Erere vọ yen che te eghene ọshare obọ siẹrẹ ọ da riẹn obo re se vẹ obo re siẹ? (Une rẹ Ejiro 1:​1-3) (Ni uhoho na.)

¹⁰ Yono obo re se vẹ obo re siẹ. Baibol na tare nẹ ọshare rọ ghwọrọ ọke kẹdẹ kẹdẹ vwo se ota rẹ Ọghẹnẹ ji roro kokodo kpahan obo ro se, oma vwerhọn obo ro ruẹ ji yovwẹn kẹ. (Se Une rẹ Ejiro 1:​1-3.) O de se Baibol na kẹdẹ kẹdẹ, kọ cha riẹn obo ri Jihova roro emu wan, vwo iroro ro fiotọ je riẹn obo ra reyọ odjekẹ ri Baibol na vwo ruiruo. (Isẹ 1:​3, 4) A guọnọ eshare tiọyen na vwẹ ukoko na. Diesorọ?

¹¹ Iniọvo rẹ ukoko na guọnọ ukẹcha rẹ iniọvo eshare ri muwan re sa vwẹ odjekẹ kugbe uchebro ri Baibol na vwọphia. (Tai 1:9) Wọ da nabọ riẹn obo re se ji siẹ, kẹ wọ sa nabọ muegbe rẹ eta vẹ ẹkpahọnphiyọ re cha bọn esegbuyota rẹ iniọvo na gan. Ọ je cha vwẹ ukẹcha kẹ wẹ vwọ jokaphiyọ ẹkpo eghanghanre siẹrẹ wo de ruẹ uyono romobọ, kugbe ọke wọ da kerhọ rẹ eta vwẹ emẹvwa, isikoko kugbe eghwẹkoko. Obo ru wo si phiyotọ na cha vwẹ ukẹcha kẹ wẹ vwo ru esegbuyota wẹn vẹ ọ rẹ ihwo efa gan.

12. Die yen cha vwẹ ukẹcha kẹ wẹ vwọ dia ohwo rọ tẹn ona rẹ otaẹtakuẹgbe?

¹² Tẹn ona rẹ omamọ rẹ otaẹtakuẹgbe. Ofori nẹ ọshare rọ dia Onenikristi nabọ riẹn obo re nene ihwo efa ta ota kuẹgbe. Ọshare rọ tẹn ona rẹ otaẹtakuẹgbe nabọ kerhọ, je davwẹngba vwo vwo ẹruọ rẹ oborẹ ihwo roro vẹ oborẹ oma ruẹ ayen. (Isẹ 20:5) Ọ sa riẹn oborẹ oma ruẹ ihwo womarẹ o vwo vwo oniso rẹ oborẹ ayen ta ota wan, epharo rayen kugbe oborẹ ayen ghwa oma wan. Wo se vwo ru ọtiọyen, ofori nẹ wẹ vẹ ihwo ghwọrọ ọke kugbe. Ọ da dianẹ ọkieje yen wọ vwọ vwẹ ekuakua re ghwa iyẹnrẹn vwo si evuẹ yẹrẹ ta ota kẹ ihwo, ọ sa nẹrhẹ wọ mrẹ bẹnbẹn wo vwo nene ihwo ru wọ mrẹ ta ota kugbe. Ọtiọyena, rhie uphẹn phiyọ wẹ vẹ ihwo ru wo mrẹ vwọ ta ota kugbe.​—2Jọ 12.

13. Ona ọfa vọ yen ofori nẹ eghene ọshare yono? (1 Timoti 5:8) (Ni uhoho na.)

¹³ Reyọ ena ru wo yonori vwọ vwẹrote oma wẹn. Ofori nẹ oniọvo ọshare ro tedje davwẹngba vwọ vwẹrote oma rọyen kugbe orua rọyen. (Se 1 Timoti 5:8.) Vwẹ ẹkuotọ evo, iniọvo eshare re dia ighene sa tẹn ona rẹ iruo ọvo mie ọsẹ yẹrẹ ohwo rẹ orua rayen ọfa. Vwẹ ẹkuotọ efa, eghene ọshare se yono obo ra chueki yẹrẹ tẹn ona rẹ iruo efa vwẹ ọke rọ dahẹ isikuru. Obo rọ wanre eje, ofori nẹ wọ tẹn ona ọvo rọ cha vwẹ ukẹcha kẹ wẹ vwọ mrẹ iruo ru wo che ru. (Iru 18:​2, 3; 20:34; Ẹf 4:28) Dia ọgbowian ro muomaphiyọ iruo rọyen, rọ je davwẹngba vwo ruiruo rọyen fiotọ. Wo de ru ọtiọyen, o muẹro nẹ wọ cha mrẹ iruo ji ruiruo na ọke grongron. Iruemu kugbe ena ra ta ota kpahen re na pha ghanghanre kẹ oniọvo ọshare, kidie e cha vwẹ ukẹcha kẹ ọ sa vwọ wian ewian re hẹrhẹ vwẹ obaro na. E ja ta ota kpahen evo usun rẹ ewian yena.

MUEGBE HẸRHẸ IRUO RE CHA VWẸ OBARO NA

14. Mavọ yen eghene ọshare se vwo muegbe vwọ kẹ iruo ẹga ọkieje?

¹⁴ Ẹga ọkieje. Iniọvo eshare buebun re dia Inenikristi ri tedje ton ẹga ọkieje phiyọ ọke rẹ ayen vwọ hẹ eghene. Iruo ọkobaro ọkieje vwẹ ukẹcha kẹ oniọvo ọshare rọ dia eghene vwọ riẹn oborẹ a vẹ ihwo sansan sa vwọ wian kuẹgbe. Ọ je vwẹ ukẹcha kẹ vwo yono obo ra vwẹ aghwanre ghwọrọ igho. (Fil 4:​11-13) A vwọ ga kerẹ ọkobaro ubrọke yen idjerhe ọvo ro me yovwin ra vwọ ton ẹga ọkieje phiyọ. Iniọvo buebun gare kerẹ ekobaro ubrọke vwẹ uvwre rẹ ọke evo, rọ cha ayen uko vwọ ton iruo ọkobaro ọkieje phiyọ. Iruo ọkobarọ ọkieje se rhie uphẹn ẹga ọkieje sansan phiyọ, kerẹ a vwọ ga vwẹ Bẹtẹl yẹrẹ ga kerẹ oniọvo ro ruiruo rẹ ebanbọn.

15-16. Mavọ yen eghene ọshare se vwo muwan rọ vwọ ga vwẹ ukoko na?

¹⁵ Odibo rowian yẹrẹ ọkpako. Ofori nẹ eshare re dia Inenikristi bru ẹkẹn kẹ oma rẹ ayen vwo muwan je ga kerẹ ekpako ukoko. Baibol na tare nẹ eshare da davwẹngba rẹ ayen vwo ru ọtiọyen jẹ “iruo esiri yen [ayen] guọnọ ru.” (1Ti 3:1) Oniọvo ọshare sa vwọ ga kerẹ ọkpako, o che muwan rọ vwọ ga kerẹ odibo rowian tavwen. O vwo idjerhe sansan rẹ idibo rowian vwọ vwẹ ukẹcha kẹ ekpako. Ekpako vẹ idibo rẹ owian vwomakpotọ wian owian rẹ ukoko na ji vwobọ vwẹ iruo aghwoghwo na vẹ oruru. Iniọvo eshare re dia ighene se muwan rẹ ayen vwọ ga kerẹ idibo rowian vwẹ ọke rẹ ayen vwọ hẹ imighene. A je sa vwẹ odibo rowian rọhẹ ẹgbukpe 20 fiẹ 24 vwo mu ọkpako.

¹⁶ Mavọ yen wo se vwo muwan vwọ kẹ ewian nana? Biabol na vuẹ avwanre iruemu ro fori nẹ avwanre vwo e se vwo muwan. E mu iruemu nana kpahen ẹguọnọ ru wo vwo kpahen Jihova, orua wẹn vẹ ukoko na. (1Ti 3:​1-13; Tai 1:​6-9; 1Pi 5:​2, 3) Davwẹngba vwo vwo ẹruọ rẹ uruemu ọvuọvo ro fori nẹ wo vwo wo se vwo muwan. Nẹrhovwo rhe Jihova vwọ kẹ ukẹcha wo se vwo muwan vwo nene odjekẹ ri Baibol na.c

17. Mavọ yen eghene ọshare se vwo muegbe rọ vwọ dia ọshare kugbe ọgbuyovwin rẹ orua? (Ni uhoho na.)

¹⁷ Ọshare kugbe ọgbuyovwin rẹ orua. Kirobo rẹ Jesu tare, Inenikristi eshare evo ri tedje cha dia kpogono. (Mt 19:12) Ẹkẹvuọvo, ọ da dianẹ wo brorhiẹn ru wọ vwọ rọvwọn, wo che vwo owian ru wọ vwọ dia ọshare kugbe ọgbuyovwin rẹ orua. (1Kọ 11:3) Jihova guọnọre nẹ ọshare vwo ẹguọnọ rẹ aye rọyen, vwẹrote vwọrẹ ugboma, vwọrẹ iroro je cha uko vwo sikẹrẹ Jihova phiyọ. (Ẹf 5:​28, 29) Iruemu kugbe ena ra ta ota kpahen re vwẹ uyono nana, kerẹ e vwo vwo iroro ro fiotọ, muọghọ kẹ eya, je dia ohwo ra sa vwẹrosua cha vwẹ ukẹcha kẹ wẹ vwọ dia omamọ rẹ ọshare. Kẹ wo se muwan wọ vwọ wian ewian ri te we kerẹ ọshare kugbe ọgbuyovwin rẹ orua.

18. Mavọ yen eghene ọshare se vwo muegbe rẹ obo rọ sa vwọ dia ọsẹ?

¹⁸ Ọsẹ. Wọ da rọvwọn nu, wọ sa dia ọsẹ. Die yen wo se yono mie Jihova kpahen obo ru wọ sa vwọ dia omamọ rẹ ọsẹ? O vwo erọnvwọn buebun wo se yono mie. (Ẹf 6:4) Jihova vuẹ Ọmọ rọyen Jesu vwẹ azagba nẹ ọyen vwo ẹguọnọ rọyen ji rhiabọreyọ. (Mt 3:17) Wọ da dia ọsẹ, vuẹ emọ wẹn ọkieje nẹ wo vwo ẹguọnọ rayen. Nabọ jiri ayen ọkieje fikirẹ erọnvwọn iyoyovwin rẹ ayen ruru. Esẹ re vwẹrokere udje ri Jihova cha emọ rayen uko ayen sa vwọ dia Inenikristi eya vẹ eshare ri tedje. Wo se muegbe rẹ owian yena enẹna womarẹ wọ vwọ vwẹrote ihwo rẹ orua wẹn kugbe iniọvo rẹ ukoko na, je vuẹ ayen nẹ wo ni ayen ghanghanre, wo ji vwo ẹguọnọ rayen. (Jọ 15:9) Ọnana cha vwẹ ukẹcha kẹ wẹ vwọ wian owian rẹ ọshare kugbe ọsẹ rọ hẹrhẹ owẹ vwẹ obaro na fiotọ. Wo de ru obo re djunute na enẹna, wọ cha dia ghanghanre vwẹ ẹro ri Jihova, orua wẹn kugbe ukoko na.

DIE WO CHE RU ENẸNA?

19-20. Die yen cha vwẹ ukẹcha kẹ iniọvo eshare re dia ighene vwọ dia Inenikristi ri tedje? (Ni uhoho rọhẹ opharo ọbe na.)

¹⁹ Iniọvo eshare re dia ighene, ọ guọnọ ẹgbaẹdavwọn ovwan ke sa dia Inenikristi ri tedje. Ofori nẹ wọ sane emamọ rẹ idje ru wọ sa vwẹrokere, vwo iroro ro fiotọ, dia ohwo ra sa vwẹrosua wo mi ji muegbe vwọ kẹ ewian re hẹrhẹ owẹ vwẹ obaro na.

²⁰ Ofu se dje we ọkievo siẹrẹ wo de roro kpahen ewian re hẹrhẹ owẹ vwẹ obaro na. Ẹkẹvuọvo, wo se ru ayen wiẹn. Riẹn nẹ Jihova vwo owenvwe rọ vwọ cha wẹ uko. (Aiz 41:​10, 13) Vwọrẹ uyota, iniọvo ukoko na je cha vwẹ ukẹcha kẹ wẹ. Wọ da rhe dia ọshare ro yerin tedje re, wọ cha mrẹ omavwerhovwẹn vẹ ebruphiyọ ri Jihova vwẹ akpeyeren wẹn. Iniọvo eshare re dia ighene avwanre vwo ẹguọnọ rẹ ovwan! E jẹ Jihova bruphiyọ kẹ ovwan gbidiki enẹna rẹ ovwan vwọ wian gangan rẹ ovwan vwọ dia Inenikristi eshare ri tedje.​—Isẹ 22:4.