ENỌ RẸ IGHENE NỌ
Ofori nẹ Me Dobọ rẹ Isikuru Ji?
“Isikuru tuvwoma!” Ọ da dianẹ ẹro tiọyen yen wo vwo no, ọ sa nẹrhẹ wọ dobọ rọyen ji. Uyovwinrota nana cha reyọ iroroẹjẹ iyoyovwin vwọphia re sa chọn wẹ uko.
Oboresorọ ihwo evo vwọ dobọ jẹ
Ena yen iroro evo kiriguo ri muẹ ihwo vwọ dobọ rẹ isikuru jẹ rẹ ihwo ri yono ẹbẹ kodo ta ota kpahen:
Jẹ ọbe ẹriẹn. ‘Kọke kọke yen irhezọtu mẹ vwọ braphiyọ.’
Jẹ owenvwe evwo. ‘Mi no nẹ obo ri mi yono vwẹ isikuru na ghanre kẹ vwẹ-ẹ.’
Uweren ọgangan. ‘Ofori nẹ me wian owian rẹ igho mi se vwo bicha orua mẹ.’
Roro kpahen obo ri che norhe
Baibol na da ta: “Ohwo ro vwo iroro obo rọ ra ọye o nẹ.” (Isẹ 14:15) Die yen se yono norhe? Roro kpahen obo ri se norhe wọ da dobọ rẹ isikuru ji.
Nọ oma wẹn:
‘Me da dobọ rẹ isikuru ji, me sa mrẹ omamọ iruo vwẹ obaro obọ?’
“Roro kpahen ọke wọ cha vwọ guọnọ iruo je vwẹrote orua wẹn. Mavọ yen wo che vwo phi ẹdia yena kparobọ ọ da dianẹ ihwo ri che phi we phiyọ iruo na nokpẹn rẹ ọbe erhanre wẹn?”—Julia.
‘Me da dobọ rẹ isikuru ji, ọ cha lọhọ kẹ vwẹ mi vwo yerin ghene ebẹnbẹn re cha vwẹ obaro na?’
“Isikuru muegbe rẹ ohwo vwọ kẹ akpeyeren. Wọ cha mrẹvughe nẹ ihwo rẹ wo che hirharoku, edavwini wo che rhiẹromrẹ, vẹ ọka rẹ iruo ru wo che ru vwẹ obaro na cha họhọ oborẹ wo rhiẹromrẹ vwẹ isikuru wanre.”—Daniel.
‘Me sa tẹn ena evo re me guọnọre kerẹ omiragua siẹrẹ me da dobọ rẹ isikuru ji?’
“Wo se no nẹ isikuru ghanre kẹ wẹ enẹna-a, jẹ, wo de te ẹgbukpe 23 re ji kere igho wẹn, oma kọ cha vwerhen owẹ nẹ wo yono kpahen imasi.”—Anna.
Owọẹjẹ ro shephiyọ
Guọnọ ukẹcha. Baibol na da ta: “Asan rẹ evwiroro vẹ ibruche epha ihwo rọye she-e.” (Isẹ 11:14) Ọ da dianẹ irhezọtu rẹ isikuru wẹn miovwẹn phiyọ, gba nokpẹn rẹ ukẹcha mie ọsẹ, oni, oyono yẹrẹ ohwo ọfa ru wọ vwẹroso rọ sa chọn wẹ uko vwo ru yovwinphiyọ vwẹ isikuru.
“Nene oyono rẹ isikuru wẹn ta ota wọ da mrẹ bẹnbẹn wọ vwọ wan ọdavwini. Ọkiọvo wo se roro nẹ oyono wẹn yen nẹrhẹ wo she ọdavwini, jẹ ọke buebun na, wọ sa rhuẹrẹ ebẹnbẹn na phiyọ siẹrẹ wọ da nokpẹn rẹ ukẹcha.”—Edward.
Roro kpahen oborẹ isikuru sa vwọ chọn wẹ uko vwo yeren omamọ rẹ akpọ vwẹ obaro na. Baibol na da ta: “Oba rẹ emu yovwi nọ ẹtuọhọ rọye.” (Aghwoghwo 7:8) Ọ dia obo re yono uwe ọvo yen wo che vwo erianriẹn rọyen siẹrẹ wo de wontọ nẹ isikuru-u, wo ji che vwo iwan vẹ ena eghanghanre ru wo se vwo yeren akpọ.
“Dede nẹ wo che si ọbe yẹrẹ muegbe vwọ kẹ edavwini ọke wo de te omiragua-a, jẹ, wo de se phi ẹbẹnbẹn rẹ isikuru kparobọ, kọ cha lọhọ kẹ wẹ wo se vwo phi egbabọse rẹ akpeyeren efa kparobọ vwẹ ọke wo de wontọ nẹ isikuru re.”—Vera.
Ra vwọ dobọ rẹ isikuru jẹ pha kerẹ ohwo ro vrẹn nu okọ jẹ okọ na ji duvwu vwẹ unuerhuru rọye-en; wọ cha viẹ idiekpọvwẹ siẹrẹ wo de vrẹn no tavwen o ki duvwun!
Roro kpahen iroroẹjẹ efa. Baibol na da ta: “Ohwo ro bru okpakpa che fiabọ.” (Isẹ 21:5) Wo brokpakpa brorhiẹn nẹ a vwọ dobọ rẹ isikuru ji yen ojẹ ro chekọ ru wo ghwe vwo-o. Wo ji se kpo isikuru vwẹ itanẹti yẹrẹ ru ọrhuẹrẹphiyotọ re vwo yono uwe vwẹ uwevwin.
“Isikuru yono uwe phiyọ oborẹ wọ sa vwọ dia ọgbowian, oborẹ wọ sa vwọ rhuẹrẹ ebẹnbẹn phiyọ vẹ oborẹ wẹ vẹ ihwo efa sa vwọ wian kugbe. Ọtiọyena, ẹgbaẹdavwọn wo vwo wontọ vwo nẹ isikuru shefia-a, kidie o che fierere kẹ wẹ vwẹ akpeyeren.”—Benjamin.
Obo ra ta na kọna: Wo de wontọ nẹ isikuru, wo che yono erọnvwọn buebun re cha chọn wẹ uko vwẹ ọke wo de te omiragua re.