ENỌ RẸ IGHENE NỌ
Mavọ Me Sa Vwọ Rhuẹrẹ Echobọ Mẹ Phiyọ?
Die wo che ru?
Se kpahen obo re phia kẹ Karina, re wọ vwẹ ẹwẹn roro nẹ wẹ yen ọ phia kẹ. Die yen wo che ru, wọ da hẹ ẹdia rọyen na?
Karina: “Ọke me vwọ djẹ imoto kpo isikuru, ọlọkpa ọvo da da vwẹ ji, ọ da kẹ vwẹ ọbe kidie nẹ me djẹ gan nọ. Ivun miovwe mamọ! Me da vuẹ oni mẹ kpahọn, oni mẹ da tanẹ me vuẹ ọsẹ mẹ, jẹ me guọnọ nẹ ọsẹ mẹ riẹn kpahọ-ọn.”
Die wo che ru?
Ẹsosuọ: Dion phiyọ oma, wo roro nẹ Ọsẹ wẹn cha riẹn kpahọ-ọn.
Ọrivẹ: Vuẹ Ọsẹ wẹn obo re ghene phia.
Ọkiọvo, Ojẹ Ẹsosuọ na yen che je we. Ọkiọvo, oni wẹn gbe cha nọ wẹ kpahọn ọfa-a, kidie o rorori nẹ wọ vuẹ ọsẹ wẹn nure. Ẹkẹvuọvo o vwo uvi rẹ iroro re sorọ o vwo fọ nẹ wọ rhọnvwe echobọ wẹn, owenẹ ọ dia ọbe yen a kẹ wẹ kidie nẹ wọ djẹ gan nọ yẹrẹ echobọ efa.
Iroro erha re sorọ wọ vwọ rhọnvwe echobọ wẹn
1. Ọyen obo ri fori. Baibol na vwọ to ota kpahen uruemu ro fori nẹ Inenikristi djephia, ọ da ta: “Avwanre . . . guọnọ ruẹ emu rẹ ọghọ vwi kemu kemu ejobi.”—Hibru 13:18.
“Me davwẹngba mamọ me vwọ dia ohwo rẹ uyota, me je vwọ rhọnvwe echobọ mẹ ugege mi ghwe vwo ruo.”—Alexis.
2. Ihwo se vwo ghovwo ihwo re rhọnvwe echobọ rayen. Baibol na da ta: “Ohwo ro si ogbeku rọye nu che se yovwi-i, ẹkẹvuọvo ohwo rọ rhọvwerọ ro de siobọ nẹ ayen cha mrẹ arodọvwẹ.”—Isẹ 28:13.
“Ọ guọnọ uduefiogbere a ke sa rhọnvwe echobọ, ẹkẹvuọvo ọyena cha nẹrhẹ ihwo vwẹroso wẹ. Ayen cha riẹn nẹ wẹ ohwo rẹ uyota. Wọ da rhọnvwe echobọ wẹn, kọyen wo hirhe obo ri miovwirin phiyọ obo ri yovwirin.”—Richard.
3. Ọ rọ ma ghanre yen, ọ vwerhen Jihova Ọghẹnẹ oma. Baibol na da ta: “Ohwo ọchọchọ ẹgua kẹ Ọrovwohwo oma, ẹkẹvuọvo ọ vwẹ ẹro sua ohwo rọ dia ọvwata.”—Isẹ 3:32.
“Ọke rẹ orọnvwọn ọvo vwọ chọ vwẹ obọ nu, ke me rhe mrẹvughe nẹ ofori nẹ me rhọnvwọ echobọ mẹ. Me cha sa mrẹ ebruphiyọ rẹ Jihova-a, jokpanẹ ki mi ru erọnvwọn ri shephiyọ ọhọre rọyen.”—Rachel.
Die yen Karina ruru kpahen echobọ rọyen na? Ọ davwẹngba ro vwo si ọbe na nu rere ọsẹ rọyen vwo jẹ mrẹ. Ẹkẹvuọvo o se sionu bẹdẹ-ẹ. Karina da ta: “Omarẹ ẹgbukpe ọvo vwọ wan nu, ọsẹ mẹ da mrẹ ọbe na. Ọnana da rhoma toroba ebẹnbẹn mẹ, ivun tobọ ji miovwo oni mẹ mamọ kidie mi ru obo rọ vuẹ vwẹ nẹ mi ru-u!”
Obo re yonori: Karina da ta: “E vwo si echobọ rẹ ohwo nu toroba ebẹnbẹn na. Kidie a je cha mrẹ otọ rọyen obọ!”
Obo wo se vwo yono nẹ echobọ wẹn
Ihwo ejobi ruẹ chọ. (Rom 3:23; 1 Jọn 1:8) Kirobo ra ta cha na, ra vwọ rhọnvwe echobọ rẹ ohwo ugege re vwo ru emu chọ, ọyen oka rẹ omaevwokpotọ kugbe ọ ra vwọ riẹn nẹ ohwo ghwanre tedje.
Owọẹjẹ rọ vwọ kpahọn, ọyen wo vwo yono vwo nẹ echobọ wẹn. Ọ da ohwo mamọ nẹ ighene evo yono vwo nẹ echobọ raye-en! Ọ sa dianẹ oka rẹ iroro ro rhe eghene re se Priscilla jovwo yen ji rhe ayen. Priscilla da ta: “Ọke ri jovwo, ofu djevwe mamọ siẹrẹ mi de ru chọ. Mi nẹ oma mẹ kueku, ọtiọyena echobọ mẹ ke họhọ oghwa rẹ mi che se mu-u. Ọyena kọ so ọkuọrọn kẹ vwẹ.”
Oka rẹ iroro tiọyena ji rhe we ọke evo? Ọ da dia ọtiọyen, karophiyọ ọnana: Re vwo roro kpahen echobọ re ru wanre ọkieje, họhọ ohwo rọ djẹ imoto, jẹ o nẹ ughegbe ra vwọ mrẹ obuko. Re vwo roro kpahen echobọ re ru wanre ọkieje cha nẹrhẹ wo ni oma wẹn kueku, wo ji che vwo ẹgba wo vwo hirharoku ebẹnbẹn re cha obaro-o.
Ukperẹ ọyena, reyọ ẹro abavo vwo ni echobọ wẹn.
“Roro kpahen echobọ wẹn, re wo yono vwo nẹ ayen, rere wo vwo jẹ ayen ẹvwariẹn ruẹ. Ẹkẹvuọvo wo roro kpahọn ọkieje-e, wo vwo jẹ ọkuọrọn eshe.”—Elliot.
“Me davwẹngba mi vwo ni echobọ mẹ kerẹ uyono rọ cha vwẹ ukẹcha kẹ vwẹ vwọ dia omamọ rẹ ohwo, je nẹrhẹ mi ru yovwinphiyọ ọke ọfa. Ọyena yovwirin, kidie ọ vwẹ ukẹcha kẹ wẹ vwo ruẹ yovwẹnphiyọ.”—Vera.