ENỌ RẸ IGHENE NỌ
E Rhe Rhiabọreyọ Ovwẹ Vwo-o?
“Wo yivwin fẹnẹ ihwo efa-a, wo de ru ọtiọyen ju wo fiabọ rẹ igbeyan, akpeyeren wẹn enẹna vẹ ọke rọ cha vwẹ obaro ji che vwotọ-ọ.”—Carl.
Wo rorori nẹ o muro ta? Ọkiọvo. Jẹ, ihwo evo se ru kemu kemu vwọ kẹnoma kẹ oborẹ Carl tare na. Kẹ owẹ vwo? Uyovwinrota nana cha chọn wẹ uko vwọ riẹn obo ro fori nẹ wo ru.
Diesorọ ihwo vwọ guọnọ nẹ e rhiabọreyọ ayen?
Kidie ayen guọnọre nẹ e bi ayen nẹ oma-a. “Me vwọ hiẹ wẹbsaiti ọvo re de muẹ igbeyan, me da mrẹ ifoto rẹ igbeyan mẹ evo ri kpo akpọẹriọ, jẹ ayen se vwe-e. Ki mi roro sẹ mi gbe ayen ku, yẹrẹ sẹ mi te ohwo ro nene aye-en.”—Natalie.
OBO RE RORO KPAHEN: O vwo ọke ọvo wo vwo no nẹ e bi we nẹ oma? Wọ davwẹngba vwo ru ewene evo rere e vwo rhiabọreyọ owẹ?
Kidie ayen guọnọ fẹnẹ-ẹ. “Ọsẹ vẹ oni mẹ rhọnvwe nẹ mi vwo ifonu-u. Emọ efa da nokpẹn rẹ ukeri ifonu mẹ, ke me vuẹ ayen nẹ mi vwo ifonu-u, ayen me ta: ‘Wọ nẹ die? Bro ikpe wọ hepha?’ Me da ghwa vuẹ ayen nẹ mẹvwẹ ọmọ rẹ ẹgbukpe 13, ẹro mẹ kọ dọn ayen.”—Mary.
OBO RE RORO KPAHEN: Oka rẹ iji vọ yen ọsẹ vẹ oni wẹn sa vwọ kẹ wẹ rọ cha nẹrhẹ wo no nẹ wọ fẹnẹre? Die yen wo se ru kpahọn?
Kidie ayen guọnọre nẹ e shenyẹ aye-en. “Emọ ri kpo isikuru kẹnoma kẹ ihwo rẹ uruemu, eta vẹ ẹga rayen fẹnẹre. Ihwo de no nẹ wọ fẹnẹ oma, kẹ ayen che mu kpahen owẹ.”—Olivia.
OBO RE RORO KPAHEN: O vwo ọke ọvo re vwo mukpahen owẹ kidie nẹ wọ fẹnẹre? Die yen wo ru kpahọn?
Kidie ayen guọnọre nẹ ugbeyan rayen fa-an. “Me davwẹngba vwo ruẹ họhọ igbeyan mẹ. Me vwẹrokere oborẹ ihwo efa ta ota wan. Me hwẹ phiyọ eta ri te ehwẹ-ẹ. Me sa tobọ vwomaba emọ efa ọke rẹ ayen da vwẹ ohwo vwọ jehwẹ, dede nẹ me riẹnre nẹ ọ cha da ohwo na.”—Rachel.
OBO RE RORO KPAHEN: Mavọ yen ọ ghanre kẹ wẹn te, rẹ igbeyan vwo vwo ẹguọnọ wẹn? O vwo ọkiọvo wo vwo wene uruemu wẹn rere igbeyan wẹn vwo rhiabọreyọ owẹ?
Obo ro fori nẹ wọ riẹn
E se vwo utuoma kpahen owẹ siẹrẹ wọ da vwẹrokere ihwo. Diesorọ? Kidie ihwo fobọ riẹn siẹrẹ ohwo de me ruẹ. Brian rọhẹ ẹgbukpe 20 da ta: “Ọke mi vwo me ruẹ, emọ rẹ iklasi mẹ de vwo utuoma kpahen ovwẹ. Mi yonori nẹ ofori ohwo vwọ ghwa dia oborẹ ọ hepha, kidie ihwo sa riẹn ọke wo de me ruẹ.”
OBO RO CHE ME SHEPHIYỌ: Roro kpahen obo re ma ghanre kẹ wẹ. Baibol na tare nẹ e “vughe obo ri yovwiri.” (Filipae 1:10) Nọ oma wẹn, ‘Die yen ma ghanre kẹ vwẹ? Ihwo rẹ uruemu rayen fẹnẹ ọmẹ vwo rhiabọreyọ ovwẹ, gbanẹ me vwọ sẹro rẹ odẹ esiri mẹ?’
“Erere herọ siẹrẹ a da davwẹngba vwọ họhọ ihwo efa-a. Ọ dia ọyena yen cha nẹrhẹ ihwo vwo ẹguọnọ wẹ, yẹrẹ nẹrhẹ wọ dia omamọ rẹ ohwo-o.”—James.
Ọdavwẹ rẹ ihwo vwo rhiabọreyọ owẹ se miovwo odẹ wẹn. Wo se rhi hirhephiyọ ohwo ro “phoro ẹro kẹ ihwo,” ro di ruẹ oborẹ ihwo efa guọnọ mie. Eghene ọshare ọvo re se Jeremy da ta: “Dẹvure, mi se ruẹ kemu kemu rere ihwo vwo rhiabọreyọ ovwẹ, o torori sẹ obo mi che ru na che miovwo odẹ mẹ-ẹ. Ọyena nẹrhẹ ovwẹ dia ọviẹn kẹ ihwo tiọyena. Ke me rhe họhọ imidọbebi.”
OBO RO CHE ME SHEPHIYỌ: Riẹn obo wọ ghene guọnọ rere wo churu muo, ukperẹ wọ vwọ họhọ eghwughwẹ ro wene vwo nene asan rọ hẹpha. Ọnana yen sorọ Baibol na vwọ tanẹ: “Wọ vwẹ ẹro kerẹ otu ri ruẹ imwemwu-u.”—Eyanno 23:2.
“Me davwẹngba mi vwo rhiabọreyọ uhworo, eha, osẹnvwe, ughe, ekuakua ra vwọ rhuẹrẹ opharo, kugbe erọnvwọn efa ri je ayen . . . Me davwẹngba me vwọ họhọ ayen. Ẹkẹvuọvo, ọ họhọre nẹ ayen niroso nẹ mi me ruẹ. Mẹvwẹ komobọ je riẹn. Mi de rhi muomaphiyọ je dia ẹdia rẹ ọruvwohwo, me rha tobọ riẹn ọka rẹ ohwo me hepha ọfa-a. Me rha riẹn obo ri je vwe-e. Me da rhe mrẹvughe nẹ ọ dia kohwo kohwo yen sa dia ugbeyan mẹ-ẹ; ihwo eje ji che se vwo ẹguọnọ mẹ-ẹ. Ọ dia ọyena ko mudiaphiyọ nẹ e che se vwo igbeya-an; vwo edirin hẹrhẹ te ọke wọ vwọ mrẹ omamọ rẹ ohwo ru wo che vwo ru ugbeyan.”—Melinda.
Ọdavwẹ rẹ ihwo vwo rhiabọreyọ owẹ se wene uruemu wẹn. Eghene ọshare ọvo re se Chris vwo oniso rẹ ọnana kpahen omoni rọyen ọvo. Ọ da ta: “Kidie ọ guọnọre nẹ e rhiabọreyọ ọyen, kọ reyọ ihuvwun egangan ji ruẹ erọnvwọn efa re brare. O de rhi hirhephiyọ ọviẹn vwọ kẹ ihuvwun egangan na, re joma reyọ arhọ rọyen.”
OBO RO CHE ME SHEPHIYỌ: Kẹnoma kẹ ihwo rẹ eta vẹ uruemu rayen yovwiri-in. Baibol na da ta: “Ohwo rọ yan nene evwaghwanre ko vwo aghwanre, ẹkẹvuọvo ugbeyan rẹ ẹkpa kọ re oja.”—Isẹ 13:20.
“Ọ ghwa dia obo re brare siẹrẹ a da davwẹngba vwo kuomakugbe ihwo efa-a. Jẹ, ọ chọre siẹrẹ ẹgbaẹdavwọn tiọyena da nẹrhẹ wọ vwẹ arudo vwo ru oborẹ wọ riẹnre nẹ o yovwiri-in. Omamọ ihwo che rhiabọreyọ owẹ kirobo wọ ghwa hepha.”—Melanie.
Iroroẹjẹ: Wọ da guọnọ vwo igbeyan kpokpọ, wo ghwe siẹkẹrẹ ihwo ri vwo ẹguọnọ rẹ obo ri je we ọvo-o. Guọnọ igbeyan ri vwo omamọ uruemu kugbe oshọẹdjẹ rẹ Ọghẹnẹ.
Kirobo rẹ iwun evo che se fo we-e, ọtiọyen uruemu rẹ ihwo evo vẹ ọwẹn che se shephiyọ-ọ