Josaya Vwo Omamọ Igbeyan

Wo rori nẹ ọ bẹnre revwo ru obo ri yovwirin?— Ọtiọyen ihwo buebun rori. Baibol na vuẹ avwanre nẹ ọ bẹn vwọ kẹ ọmọshare ọvo re se Josaya rovwo ru obo ri yovwirin. Ẹkẹvuọvo, omamọ igbeyan ro vwori chọnruko. E jẹ e yono kpahen Josaya vẹ igbeyan rọyen na.

Ovie ri Juda re se Amọn, ọyehẹ ọsẹ ri Josaya. Amọn, ọyen orharhe rohwo, edjọ yẹn ọ ga. Ọke rẹ Amọn vwo ghwu nu, Josaya, ọmọ rọyen da rhe dia ovie ri Juda. Ẹgbukpe ẹrenren ọvo yen ọ hepha ọke yena! Wo rori nẹ ọ brare kerẹ ọsẹ rọyen?— Ẹjo, ọ diẹ ohwo ọbrabra-a!

Dedevwo nẹ Josaya ọmọtete, jẹ ọ guọnọ ru obo rẹ Jihova tare. Ọtiọyena, ihwo re ga Jihova kọyen o vwo ru igbeyan. Ayen vwẹ ukẹcha kẹ Josaya vwo ru obo ri yovwirin. Amono yen evo usun rẹ igbeyan rọyen?

Zẹfanaya ọyen ọvo usun rẹ igbeyan ri Josaya. Zẹfanaya ọyen ọmraro ro si ihwo ri Juda orhọ nẹ a cha vwẹ oja re ayen siẹrẹ ayen da ga ema. Josaya kerhọ ri Zẹfanaya ọ da ga Jihova.

Ohwo ọfa rọ je dia ugbeyan ri Josaya ọyehẹ Jerimaya. Ọ vẹ Josaya edje, asan ọvuọvo yẹn ayen dia ghwanre. Ayen ihwo-ivẹ kpẹkpẹre mamọ, ọke rẹ Josaya vwo ghwu, Jerimaya de si une rẹ uvweri roghẹresan kpahen obo rọ darọ te. Jerimaya vẹ Josaya chọn ohwohwo uko vwo ru obo ri yovwirin kugbe obo rẹ Jihova tare.

Die yen udje ri Josaya yonuwe?— Dedevwo nẹ Josaya ọmọtete, jẹ ọ guọnọ ru obo ri Jihova tare. Ọ riẹnre nẹ ofori rovwo nene ihwo re ga Jihova mwu ugbeyan. Jẹ igbeyan wẹn dia ihwo ri vwo ẹguọnọ ri Jihova, re je sa chọnwuko vwo ru obo ri yovwirin!