UYOVWINROTA RẸ ỌBE NA | DIE YEN BAIBOL NA TA KPAHEN EMEKASHE?
Uyota ro Shekpahen Emekashe
Wọ guọnọ riẹn uyota ro shekpahen emekashe na? Amono yen emekashe na, tivọ ayen nurhe, die yen ayen ruẹ? Baibol na yen sa kpahenphiyọ enọ nana. (2 Timoti 3:16) Die yen Baibol na tare?
Kirobo rẹ Ọghẹnẹ dia Ohwo rẹ Ẹwẹn na, ọtiọyen emekashe na je hepha, ayen ihwo ri jẹ “uvwo vẹ ibeku” evwo. Emekashe ri fuevun dia obodjuvwu, ayen ji mudia obaro rẹ Ọghẹnẹ.—Luk 24:39; Matiu 18:10; Jọn 4:24.
O vwo ọke evo rẹ emekashe vwo wene oma kpo ihworakpọ rere ayen se vwo ru iruo rẹ Ọghẹnẹ vwọ kẹ ayen vwẹ otọrakpọ, ayen vwo ruiruo na nu, kẹ ayen rhoma wene oma.—Iguẹdjọ 6:11-23; 13:15-20.
Dede nẹ Baibol na dje ayen kerẹ eshare, eshare yen ayen je hepha ọke rẹ ayen vwo wene oma phiyọ ihworakpọ, o vwo ọke vuọvo a vwọ fẹnẹ ayen phiyọ emekashe rẹ eya yẹrẹ eshare-e. Ayen rọvwọ-ọn, ayen ji vwiẹ-ẹ. Kpobarophiyọ, emekashe na ka dia otọrakpọ kerẹ emọ yẹrẹ imiragua tavwen ayen ki kpo odjuvwu-u. Jihova yen ma ayen, kọyensorọ Baibol na vwo se ayen “emọ rẹ Ọghẹnẹ.”—Job 1:6; Une Rẹ Ejiro 148:2, 5.
Baibol na ta ota kpahen “ẹrenvwe rẹ ohwo rẹ akpọ kugbe ọ rẹ emakashe,” ro djerephia nẹ emekashe na vwo ejajẹ rẹ ayen jẹ. Dede nẹ Ọghẹnẹ ta ota kẹ ihworakpọ womarẹ emekashe na vwẹ ọke ọvo rọ wanre, jẹ ọ vuẹ avwanre nẹ a vwẹ ẹga kẹ ayen yẹrẹ nẹrhovwo rhe aye-en.—1 Kọrẹnt 13:1; Ẹvwọphia 22:8, 9.
Uriori ihwe vware uriori ihwe rẹ emekashe yen herọ, ọkiọvo ayen bun te oduima buebun.—Daniẹl 7:10; Ẹvwọphia 5:11.
Emekashe na “egba,” ayen vwo ẹgba vẹ aghwanre nọ ihworakpọ shesheri. Oyan rayen je kpata nọ ọ rẹ ihworakpọ dibidibi.—Une Rẹ Ejiro 103:20; Daniẹl 9:20-23.
Dede nẹ ayen vwo ẹgba vẹ aghwanre mamọ, ẹgba vẹ aghwanre rayen basan. O vwo erọnvwọn evo ayen riẹnre-e.—Matiu 24:36; 1 Pita 1:12.
Emekashe na vwo iruemu, oka rẹ iwan ri rhe Ọghẹnẹ kugbe egbomọphẹ. Ọtiọyena, kerẹ ihworakpọ, ayen sa jẹ ojẹ rẹ ayen vwo ru erhuvwu yẹrẹ umiovwo. Jẹ ọ da ohwo mamọ nẹ emekashe evo jẹ ojẹ rẹ ayen vwo gbevwọso Ọghẹnẹ.—Jude 6.