Wọ Cha Vwẹrokere Oruru ri Jihova vẹ Jesu Vwẹ Ọke rẹ Ẹkarophiyọ Ughwu Ri Jesu?

1. Diẹ yẹn Iseri ri Jihova cha davwẹngba ru vwẹ ọke rẹ Ẹkarophiyọ na?

¹ Jihova ruẹ ọhọre rọyen vẹ oruru. Aizaya 9:7 vwọ tota kpahen ebruphiyọ evo rẹ Uvie Ọghẹnẹ cha ghwa rhe, ọ da ta: “Oruru rẹ Ọrovwohwo rẹ otuofovwi na yin ri ru ọna.” Vwẹ idjerhe vuọvo na, ọke Jesu vwọ hẹ otọrakpọ na, o dje oruru ọgangan vwọkẹ ẹga rẹ uyota. (Jọn 2:​13-​17; 4:​34) Kukpe kukpe, e de che ruẹ Ẹkarophiyọ na, ighwoghwota buebun davwẹngba ayen vwọ vwẹrokere oruru ri Jihova vẹ Jesu, rẹ ayen vwo ruiruo rẹ Uvie rayen hẹrẹphiyọ. Wo che ji ru ọtiọyen?

2. Die yen oruru che mu avwanre vwo ru vwonẹ March 7?

² Egbada-ẹdjẹ rẹ Ẹkarọphiyọ Na: Egbada-ẹdjẹ rẹ enukpe nana cha tonphiyọ vwẹ Saturday, March 7. Muegbe wo vwo vwobọ vwọ vọnvọn. Oma cha vwerhe iniọvo na eje rẹ ayen che vwo ghwoghwo ekogho rẹ ukoko rayen da wian. Davwẹngba vwo durhie ihwo wo yono Baibol na, irhivwinbrura, ihwo wọ vẹ ayen gbe ruiruo, ihwo orua, ihwo rẹ isikuru wẹn. Wo se durhie ayen womarẹ ọmọbe edurhie na yẹrẹ jw.org.

3. Mavọ yen e sevwo ruiruo aghwoghwo avwanre hẹrephiyọ vwẹ March vẹ April?

³ Ọkobaro Ubrọke: Oruru je cha nẹrhẹ avwanre hẹre iruo aghwoghwo na phiyọ. Aphro herọ-ọ, ihwo buebun je cha dia ekobaro ubrọke vwẹ March vẹ April, kidie uphẹn herọ ra vwọ niyẹnrẹn rẹ inọke 30 vwẹ emeranvwe yena. Vwẹ ẹga orua yẹrẹ uyono romobọ wẹn, nẹrhovwo kpahen obo wo se vwo ru ọnana. (Isẹ 15:22) Ọdavwẹ wo vwo kpahen egbada-ẹdjẹ na se phi oruru phiyọ ihwoefa oma. Wọ da rhuẹrẹ ọke wẹn phiyọ, wo vwo vwobọ vwẹ iruo na vọnvọn, jẹ wọ vwẹrokere oruru rẹ Jesu.​​—⁠Mak 6:​31-​34.

4. Erere vọ yin che no rhe siẹrẹ a da vwẹrokere oruru ri Jihova vẹ Jesu?

⁴ Avwanre cha mrẹ ebruphiyọ gbidiki siẹrẹ a da vwẹrokere oruru ri Jihova vẹ Jesu vwẹ ọke Ẹkarophiyọ na. E che soseri kẹ ihwo buebun vwẹ ẹkuotọ avwanre de ghwoghwo. A cha mrẹ aghọghọ vẹ evunvọnvwẹ kidie avwanre ga Jihova, avwanre je kẹ okẹ. (Iruo 20:35) Ọ rọ ma ghanre, ọnana cha nẹrhẹ omavwerhen Ọghẹnẹ vẹ Ọmọ rọyen.