Vwo Obo wọ Tẹnrovi Vwẹ Ọke rẹ Ẹkarophiyọ Na

Kukpe kukpe yen ihwo ri Jihova vwo rhẹro rẹ Ẹkarophiyọ na rẹ ayen che ru kugbe. Vwẹ idughwrẹn evo tavwen e ki ru ẹkarophiyọ na vẹ idughwrẹn rẹ vwọ kpahọn, avwanre reyọ uphẹn oghẹresan ro rhiephiyọ vwọ kpẹvwẹ ji jiri Jihova fikirẹ okẹ rẹ ọtanhirhe na. (Ẹfe. 1:​3, 7) Kerẹ udje, avwanre wian gangan vwo durhie ihwo cha Ẹkarophiyọ na. Ihwo evo ru ewene evo rere ayen sa vwọ dia ọkobaro rẹ ubrọke vẹ ẹwẹn rẹ ayen vwọ wian inọke 30 yẹrẹ 50 vwẹ emeranvwe ri March yẹrẹ April na. Wọ guọnọ phiba ọke wọ ghwọrọ vwẹ iruo rẹ aghwoghwo na vwẹ ọke rẹ Ẹkarophiyọ na? Die yen sa chọn wẹ uko vwo ruo?

Ọke buebun na, avwanre se ru erọnvwọn buebun wiẹn siẹrẹ e de muegbe phiyotọ. (Isẹ 21:5) Kidie nẹ ọke rẹ Ẹkarophiyọ na kerire, ọnana yen ọke re vwo muegbe phiyotọ. Roro kpahen idjerhe wo se vwo ru bunphiyọ vwẹ iruo rẹ aghwoghwo wẹn vwẹ ọke rẹ Ẹkarophiyọ na, vẹ obo ro fori nẹ wo ru wọ sa vwọ yan mu obo wọ tẹnrovi. Wọ me nẹrhovwo rhe Jihova nẹ o bruba ẹgbaẹdavwọn wẹn.​—1 Jọn 5:​14, 15.

Wọ sa vwẹ ẹwẹn roro idjerhe evo wo se vwo ru bunphiyọ vwẹ iruo rẹ aghwoghwo wẹn vwẹ ọke rẹ Ẹkarophiyọ na?