Sẹro rẹ Iphiẹrophiyọ Wẹn Gan

1. Iphiẹrophiyọ vọ yen JIhova kẹ avwanre?

JIHOVA kẹ avwanre uvi rẹ iphiẹrophiyọ rẹ arhọ ri bẹdẹ. Ihwo evo vwo iphiẹrophiyọ rẹ ayen vwọ dia odjuvwu bẹdẹ kerẹ ihwo rẹ ẹwẹn ri jeghwo. (1 Kọr. 15:​50, 53) Jẹ efa buebun vwo iphiẹrophiyọ rẹ ayen vwọ dia otọrakpọ na vẹ omavwerhovwẹn bẹdẹ ji vwo uvi rẹ omakpokpọ. (Ẹvwọ. 21:​3, 4) Ọ da dianẹ iphiẹrophiyọ ra vwọ dia bẹdẹ vwẹ odjuvwu yẹrẹ otọrakpọ na yen e vwori, avwanre niro ghanghanre

2. Die yen mu iphiẹrophiyọ avwanre kpahen, kẹ diesorọ a vwọ ta ọtiọyen?

² Ota na “hẹrhẹ [iphiẹrophiyọ]” re vwo ruiruo vwẹ Baibol na se mudiaphiyọ “ra vwọ rhẹro nẹ emuesiri cha phia.” Iphiẹrophiyọ re vwo kpahen obaro na muẹro kidie obọ ri Jihova yen o nurhe. (Rom 15:13) A riẹn obo ro veri, a je riẹn nẹ ọkieje ọyen o vwo ruẹ ive rọyen gba. (Ukeri 23:19) Jihova vwo owenvwe, o ji vwo ẹgba ro vwo ru ive rọyen eje gba, ọnana mu avwanre ẹro dẹn. Ọtiọyena, e mu iphiẹrophiyọ avwanre kpahen iroro ghevweghe yẹrẹ obo ra guọnọre nẹ ọ phia-a, ẹkẹvuọvo, e muro kpahen obo ri muẹro dẹn.

3. Die yen a cha ta ota kpahen vwẹ uyono nana? (Une Rẹ Ejiro 27:14)

³ Ọsẹ avwanre rọhẹ odjuvwu vwo ẹguọnọ rẹ avwanre, ọ guọnọre nẹ a vwẹrosuọ ọyen. (Se Une Rẹ Ejiro 27:14.) Iphiẹrophiyọ re vwo kpahen Jihova da gan, ke se chirakon rẹ edavwini ji fiudugberi vwọ hẹrhẹ obo re cha phia obaro na vẹ aghọghọ. E jẹ a ta ota kpahen oborẹ iphiẹrophiyọ sẹro rẹ avwanre wan. Ẹsosuọ, avwanre cha fuẹrẹn oborẹ iphiẹrophiyọ wan họhọ ọtan vẹ erhu. A me rha ta ota kpahen obo re se vwo ru iphiẹrophiyọ rẹ avwanre ganphiyọ.

IPHIẸROPHIYỌ AVWANRE PHA KERẸ ỌTAN

4. Idjerhe vọ yen iphiẹrophiyọ vwọ họhọ ọtan? (Hibru 6:19)

⁴ Vwẹ ileta rẹ ọyinkọn Pọl si rhe Inenikristi ri Hibru, ọ da vwẹ iphiẹrophiyọ rẹ avwanre vwo dje ọtan. (Se Hibru 6:19.) Ọke buebun yen ọ vwọ ro okuna kpo asan sansan, ọtiọyena, ọ riẹnre nẹ ọtan yen a vwọ yọnrọn okuna o vwo je bo ghwrẹ. Ẹdẹ ọvo rọ vwọ hẹ okuna kpo asan, ogiribo de mu edjuo phiyọ. Ọke yena, ọ mrẹ otu ri biẹ okuna ri do ọtan rẹ ayen phiyọ abadi na rere o vwo jẹ shuo yẹrẹ e bo ghwrẹ. (Iruo 27:​29, 39-41) Kirobo rẹ ọtan yọnrọn okuna rere o vwo je bo ghwrẹ ye, ọtiọyen iphiẹrophiyọ rẹ avwanre je sẹro avwanre rere ebẹnbẹn re pha kerẹ ogiribo vwo jẹ avwanre e bo ghwrẹ nẹ ẹbẹre ri Jihova. Iphiẹrophiyọ rọ ganre chọn avwanre uko vwo yerẹn ghene ebẹnbẹn re pha kerẹ ogiribo, kidie avwanre vwo imuẹro nẹ erọnvwọn che shephiyọ kẹrẹkpẹ. Karophiyọ nẹ, Jesu siẹ avwanre orhọn nẹ e che mu kpahen avwanre. (Jọn 15:20) Ọtiọyena, e de roro kokodo kpahen ive ri shekpahen obaro na, ke se mudiagan kerẹ Inenikristi.

5. Mavọ yen iphiẹrophiyọ vwọ bọn Jesu gan ọke ro vwo hirharoku ughwu?

⁵ Roro kpahen oborẹ iphiẹrophiyọ vwọ nẹrhẹ Jesu mudiagan dede nẹ o che ghwu ughwu rẹ oja. Vwẹ Pẹntikọst 33 C.E., ọyinkọn Pita da vwanriẹn eta rẹ aroẹmrẹ rehẹ Une Rẹ Ejiro vwo dje kpahen ẹwẹn ri dọe ri Jesu vẹ obo ro fiudugberi wan: “Ugboma mẹ kọ dia vwẹ evun rẹ iphiẹrohọ. Fikiridie wọ cha yan jẹn erhi mẹ vwo vwẹ evun rẹ ushi-i, eyẹ wo che se siobo nẹ Ọvuọvo Ọfuanfon wẹn na nẹ o gbo-o. . . . vwẹ aro wẹ wo de che ru uvwe vọn vẹ omavwerhe.” (Iruo 2:​25-28; Une 16:​8-11) Dede nẹ Jesu riẹnre nẹ ọyen che ghwu, jẹ o vwo iphiẹrophiyọ nẹ Ọghẹnẹ cha rhọvwọn ọyen nushi ji vwo aghọghọ rẹ ọyen vẹ Ọsẹ rọyen cha vwọ rhoma dia kugbe vwẹ odjuvwu.​—Hib. 12:​2, 3.

6. Die yen oniọvo ọvo ta kpahen iphiẹrophiyọ?

⁶ Iphiẹrophiyọ chọn iniọvo rẹ avwanre buebun uko vwo chirakon rẹ ebẹnbẹn re. Roro kpahen udje ri Leonard Chinn, ọnana oniọvo rọ fuevun rọ dia England. Vwẹ ọke rẹ Ofovwin rẹ Akpọeje Rẹsosuọ, e de muo phiyọ uwodi kidie nẹ ọ rhọnvwe vwomaba isodje-e. Emeranvwe ivẹ yen ọyen ọvo vwọ hẹ uwodi, ọyena vwọ wan nu, a da gba vwọ wiowian ọgangan. O de si: “Obo ri mi rhiẹromrẹ na nẹrhẹ me riẹn oborẹ iphiẹrophiyọ ghanre te ọke re de chirakon rẹ ebẹnbẹn. E vwo udje rẹ ihwo ra sa vwẹrokere kerẹ Jesu, iyinkọn na vẹ emramro na ji te ive eghanghanre rehẹ Baibol na. Enana eje na nẹrhẹ iphiẹrophiyọ re vwo kpahen obaro na ganphiyọ, e je chọn avwanre uko vwo chirakon.” Iphiẹrophiyọ ọyen ọtan kẹ Leonard, ọ je sa dia ọtiọyen kẹ avwanre.

7. Idjerhe vọ yen ebẹnbẹn vwọ nẹrhẹ iphiẹrophiyọ rẹ avwanre ganphiyọ? (Rom 5:​3-5; Jems 1:12)

⁷ Siẹrẹ e de chirakon rẹ ebẹnbẹn nu, je mrẹ oborẹ Jihova chọn avwanre uko wan vẹ aroesiri rọyen, ọ nẹrhẹ iphiẹrophiyọ avwanre ganphiyọ (Se Rom 5:​3-5; Jems 1:12.) Ọnana nẹrhẹ iphiẹrophiyọ avwanre gan vrẹn ọ re ke vwo ọke re vwo rhiabọreyọ iyẹnrẹn esiri na rẹsosuọ. Eshu guọnọre nẹ ebẹnbẹn rẹ avwanre mu avwanre rọ, ẹkẹvuọvo e se yerin ghene ayen ọvuọvo womarẹ ukẹcha ri Jihova.

IPHIẸROPHIYỌ AVWANRE PHA KERẸ ERHU

8. Idjerhe vọ iphiẹrophiyọ vwọ họhọ erhu? (1 Tẹsalonaika 5:8)

⁸ Baibol na je vwẹ iphiẹrophiyọ rẹ avwanre vwo dje erhu. (Se 1 Tẹsalonaika 5:8.) Isodje kuẹ erhu phiyọ vwọ sẹro rẹ uyovwin rọyen vwo nẹ egbọnọ rẹ ivwighwrẹn sa cha. Vwẹ ohọnre ra vẹ Eshu họnran na, ọfori nẹ a sẹro rẹ ubiudu avwanre rere egbọnọ rẹ Eshu sa cha vwo je e te. Ọ reyọ erọnvwọn sansan vwọ davwẹn avwanre nẹ ro se vwo miovwo iroro rẹ avwanre. Kirobo rẹ erhu sẹro rẹ uyovwin rẹ isodje ye, ọtiọyen iphiẹrophiyọ je sẹro rẹ iroro rẹ avwanre rere a sa vwọ fuevun kẹ Jihova ọkieje.

9. Die yen phia kẹ ihwo ri vwo iphiẹrophiyọ-ọ?

⁹ Iphiẹrophiyọ rẹ arhọ ri bẹdẹ rẹ avwanre vwori, cha chọn avwanre uko vwo brorhiẹn aghwanre. Jẹ, iphiẹrophiyọ rẹ avwanre de dogho, a da je tẹnroviẹ ojevwe romobọ avwanre, ọ sa nẹrhẹ a kpairoro vrẹn iphiẹrophiyọ rẹ arhọ ri bẹdẹ na. Roro kpahen Inenikristi re dia Kọrẹnt vwẹ ọke awanre. Esegbuyota rẹ ayen vwo kpahen ive rẹ Ọghẹnẹ rọ dia iphiẹrophiyọ rẹ evrẹnushi na va ayen abọ. (1 Kọr. 15:12) Pọl siri nẹ ihwo ri se evrẹnushi na gbuyota-a, yeren akpọ nene ojevwe romobọ rayen ọvo. (1 Kọr. 15:32) Nonẹna, buebun ri vwo iphiẹrophiyọ kpahen ive rẹ Ọghẹnẹ-e yeren akpọ ri nonẹ ọvo ji ru kemu kemu rẹ ayen rorori nẹ ọ sa kẹ ayen omavwerhovwẹn. Ẹkẹvuọvo, avwanre fẹnẹre kidie a vwẹroso ive rẹ Ọghẹnẹ veri kpahen obaro na. Iphiẹrophiyọ rẹ avwanre rọ pha kerẹ erhu na, sẹro rẹ iroro rẹ avwanre je chọn avwanre uko vwo jẹ ojevwe romobọ enene, rọ dia obo ri se miovwo oyerinkugbe avwanre vẹ Jihova.​—1 Kọr. 15:​33, 34.

10. Mavọ yen iphiẹrophiyọ sa vwọ sẹro rẹ avwanre vwo nẹ iroro ọchọchọ?

¹⁰ Iphiẹrophiyọ rẹ avwanre je sa chọn avwanre uko vwọ kẹnoma kẹ iroro ọchọchọ nẹ e che se ru obo re vwerhen Jihova oma-a. Kerẹ udje, ihwo evo se roro: ‘Me cha sa dia usun rẹ ihwo re cha dia bẹdẹ-ẹ. Mi muwa-an. Mi che se yeren akpọ nene iwan rẹ Ọghẹnẹ-ẹ.’ Karophiyọ nẹ Elifaz rọ dia obruche rẹ efian je vuẹ Job ọkpọ rẹ eta nana. Elifaz da ta: “Die ohwo epha, rọ sa vwọ fuan?” Ọ da je kpahen Ọghẹnẹ: “Nighe, Ọghẹnẹ vwẹ ẹro so otuefuanfọn rọye na-a, idjuvwu na je fon vwẹ obaro rọye-e.” (Job 15:​14, 15) Ọyena ofian koko! Karophiyọ nẹ Eshu yen guọnọre nẹ wo vwo iroro yena. Ọ riẹnre nẹ wo de roro iroro ọtiọyen, iphiẹrophiyọ wẹn kọ cha va wẹ abọ. Ọtiọyena, gba sen orharhe rẹ iroro yena re wọ tẹnrovi ive ri Jihova. Jẹ o muwẹro nẹ ọ guọnọre nẹ wọ dia bẹdẹ, nẹ ọ je cha chọn wẹ uko vwo ru ọtiọyen.​—1 Tim. 2:​3, 4.

YỌNRỌN IPHIẸROPHIYỌ WẸN GAN

11. Diesorọ rẹ ofu vwo jẹ avwanre edje ra vwọ hẹrhẹ orugba rẹ ive rẹ Ọghẹnẹ na?

¹¹ A vwọ yọnrọn iphiẹrophiyọ rẹ avwanre gan ghwa lọhọ ọkieje-e. Ofu se dje avwanre ra vwọ hẹrhẹ orugba rẹ ive rẹ Ọghẹnẹ. Ẹkẹvuọvo, ọ vwọ dianẹ Jihova herọ bẹdẹ na, obo ro kere ẹdẹ wan fẹnẹ ọ rẹ avwanre. (2 Pita 3:​8, 9) O che ru ive rọyen eje gba vwẹ ọke ro fori, ẹkẹvuọvo, ọ sa dianẹ ọ dia ọke rẹ avwanre vwo vwẹ ẹwẹn yen o che vwo ruo-o. Die yen sa chọn avwanre uko vwọ sẹro iphiẹrophiyọ rẹ avwanre re vwo vwo erhiorin hẹrhẹ orugba rẹ ive Ọghẹnẹ na?​—Jems 5:​7, 8.

12. Vwo nene obo rehẹ Hibru 11:​1, 6, idjerhe vọ yen iphiẹrophiyọ vwo churobọ si esegbuyota?

¹² Iphiẹrophiyọ rẹ avwanre cha ganphiyọ siẹrẹ e de sikẹrẹ Jihova rọ dia ohwo rọ kẹ avwanre iphiẹrophiyọ na. E se vwo vwo iphiẹrophiyọ, kẹ ofori nẹ e vwo esegbuyota nẹ Jihova herọ, nẹ “ọye re hwa osa kẹ ayen otu re guọnerọ.” (Se Hibru 11:​1, 6.) O de ghini mu avwanre ẹro dẹn nẹ Jihova yerẹn, kẹ avwanre je sa vwẹrosuọ nẹ o che ru ive rọyen eje gba. E gbe ja fuẹrẹn idjerhe evo e se vwo ru oyerinkugbe ra vẹ Jihova vwori ganphiyọ re cha nẹrhẹ a sẹro rẹ iphiẹrophiyọ rẹ avwanre.

13. Mavọ yen e se vwo sikẹrẹ Ọghẹnẹ?

¹³ Nẹrhovwo rhe Jihova, wo ji se Ota rọyen. Dede nẹ a cha sa mrẹ Jihova-a, jẹ e se sikẹrẹ. A sa ta ota kẹ vwẹ ẹrhovwo vẹ imuẹro nẹ ọ cha kerhọ kẹ avwanre. (Jer. 29:​11, 12) Avwanre sa kerhọ rẹ Ọghẹnẹ siẹrẹ e de se Baibol na ji roro kpahọn. E de se kpahen oborẹ Jihova vwẹrote ihwo re fuevun kẹ vwẹ ọke awanre, iphiẹrophiyọ rẹ avwanre kọ cha ganphiyọ. Kemu kemu re si phiyọ Baibol na, “e si ayen phihọ otọ kẹ eyono rẹ avwanre, rere vwẹ erhiori kugbe uchebro ro nẹ ẹbe ọfuanfon na rhe avwanre se vwo iphiẹrohọ.”​—Rom 15:4.

14. Diesorọ e vwo roro kpahen oborẹ Jihova ru kẹ ihwo efa wanre?

¹⁴ Roro kokodo kpahen oborẹ Jihova ru ive rọyen gba vwẹ ọke re wanre. Ji roro kpahen oborẹ Ọghẹnẹ ru kẹ Ebraham vẹ Sera. Ayen ghwanre tẹdia rẹ ayen rhe che se vwiẹ-ẹ. Dedena, Ọghẹnẹ de ve kẹ ayen nẹ ayen che vwiẹ ọmọ. (Jẹn. 18:10) Ẹwẹn vọ yen Ebraham vwo kpahen ive na? Baibol na da ta: “O de segbuyota jo rhẹro, rere ọ rhe vwọ dia ọsẹ rẹ ẹgborho buebu.” (Rom 4:18) Dede nẹ ọnana oborẹ ihworakpọ niri nẹ ọ cha sa phia-a, jẹ Ebraham vwẹroso Jihova nẹ o che ru uve Rọyen gba. Ofu dje ọshare yena rọ fuevun na-a. (Rom 4:​19-21) Ikuegbe tiọyena yono avwanre nẹ a sa vwẹroso Jihova ọkieje nẹ o che ru ive rọyen eje gba, o toro oborẹ ẹdia na gan te-e.

15. Diesorọ o vwo fo re vwo roro kpahen oborẹ Ọghẹnẹ ru kẹ avwanre wanre?

¹⁵ Roro kpahen oborẹ Jihova ru kẹ wẹ re. Ji roro kpahen oborẹ wẹ komobọ wan mrẹ erere vwo nẹ orugba rẹ ive rẹ Ọghẹnẹ rehẹ Baibol na. Kerẹ udje, Jesu veri nẹ Ọsẹ rọyen cha vwẹrote ọdavwẹ rẹ akpeyeren wẹn eje. (Mat. 6:​32, 33) Jesu je vwẹ imuẹro kẹ wẹ nẹ Jihova cha kẹ wẹ ẹwẹn ọfuanfon na ọke wọ da nokpẹn rọyen mie. (Luk 11:13) Jihova ruẹ ive yena gba ọkieje. Wo se roro kpahen ive efa rẹ Jihova ru gba vwọ kẹ wẹ re. Kerẹ udje, o veri nẹ ọyen che vwo ghovwo uwe, bru we uche je kẹ wẹ erọnvwọn rẹ wọ guọnọre wo se vwo sikẹrẹ phiyọ. (Mat. 6:14; 24:45; 2 Kọr. 1:3) Wo de roro kokodo kpahen oborẹ Ọghẹnẹ ru kẹ wẹ re, ọ cha nẹrhẹ iphiẹrophiyọ ru wo vwo kpahen obo ro che ru kẹ wẹ vwẹ obaro na ganphiyọ.

GHỌGHỌ VWẸ EVUNRẸ IPHIẸROPHIYỌ NA

16. Diesorọ iphiẹrophiyọ vwọ dia okẹ ọghanghanre?

¹⁶ Iphiẹrophiyọ rẹ arhọ ri bẹdẹ rẹ avwanre vwori na, ọyen okẹ ọghanghanre ro nẹ obọ rẹ Ọghẹnẹ rhe. Avwanre rhẹrẹ rẹ akpọ kpokpọ rọ dia obo ri muẹro. Ọ pha kerẹ ọtan rọ yọnrọn avwanre rere e se vwo chirakon rẹ edavwini, yerin ghene omukpahen, je tobọ hirharoku ughwu dede. Ọ pha kerẹ erhu rọ sẹro rẹ iroro rẹ avwanre ra sa vwọ sen obo ri miovwirin, e mi ji tinkamu obo ri yovwirin. Iphiẹrophiyọ rẹ avwanre re mu kpahen Baibol na nẹrhẹ e siẹkẹrẹ Ọghẹnẹ phiyọ, o ji dje oborẹ Ọghẹnẹ vwo ẹguọnọ rẹ avwanre te. A mrẹ erere gbidiki siẹrẹ a da sẹro rẹ iphiẹrophiyọ rẹ avwanre ji ruo ganphiyọ ọkieje.

17. Diesorọ iphiẹrophiyọ avwanre vwọ nẹrhẹ avwanre ghọghọ?

¹⁷ Vwẹ ileta rẹ ọyinkọn Pọl si rhe iniọvo rehẹ Rom, ọ da vwẹ uchebro kẹ ayen nẹ ayen “ghọghọ vwẹ evun rẹ iphiẹrohọ” na. (Rom 12:12) Pọl sa ghọghọ kidie o vwo imuẹro nẹ ọyen da fuevun ọkieje, o che vwo arhọ ri bẹdẹ vwẹ odjuvwu. Avwanre je sa ghọghọ vwẹ iphiẹrophiyọ rẹ avwanre kidie e vwo imuẹro nẹ Jihova che ru ive rọyen eje gba. Kirobo rẹ ọbuine na siri, “aghọghọ kẹ otu . . . rẹ iphiẹrohọ rọye hẹ evun rẹ Ọrovwohwo Ọghẹnẹ rọye, . . . rọ yọnrọn esegbuyota rọye bẹdẹ.”​—Une 146:​5, 6.