“Rhe Nene” Jesu Wo de Bromaphiyame Nu

1-2. Idjerhe vọ yen akpeyeren vwo yovwẹnphiyọ e de bromaphiyame nu?

ỌYEN emu rẹ aghọghọ re vwo bromaphiyame je dia ọvo usun rẹ orua ri Jihova. Ihwo rehẹ evunrẹ orua nana cha rhọnvwephiyọ eta rẹ ọbuine Devid rọ tare nẹ: “Ebruphihọ kẹ ohwo ro wọ [Jihova] jẹreyọ nẹ o si kẹrẹ owẹ, rọ dia ọguan wẹn.”​—Un 65:4.

² Ọ dia kohwo kohwo yen Jihova rhọnvwa kẹ nẹ ọ dia ọguan rọyeen. Kirobo ra ta ota kpahen vwẹ uyono rọ wanre na, o siẹkẹrẹ ihwo ri djerephia nẹ ayen guọnọ vwo uvi rẹ oyerinkugbe vẹ ọyen. (Jem 4:8) Wọ da vwomakpahotọ kẹ Jihova ji bromaphiyame nu, kẹ wo che sikẹrẹ vwẹ idjerhe rẹ oghẹresan. Wo de ru ọyena nu, wo se vwo imuẹro nẹ o che ‘ku oburhubu rẹ ebruphihọ [rọyen] ku we.’​—Mal 3:10; Jer 17:7, 8.

3. Oghwa vọ yen Inenikristi re vwomakpahotọ ji bromaphiyame vwori? (Aghwoghwo 5:4, 5)

³ Vwọrẹ uyota, omaebrophiyame ọyen ọtonphiyọ rẹ ẹga ra vwọ kẹ Jihova. Wọ da jowọ yena nu, wọ cha davwẹngba vwo yerin mu ive rẹ omaẹvwọkpahotọ wẹn ọ da tobọ dianẹ wo hirharoku ebẹnbẹn yẹrẹ edavwini. (Se Aghwoghwo 5:4, 5.) Kerẹ odibo ri Jesu, wo che nene udje vẹ iji rọyen kpẹkpẹkpẹ. (Mt 28:19, 20; 1 Pi 2:21) Uyono nana cha vwẹ ukẹcha kẹ wẹ vwo ru ọtiọyen.

“RHE NENE” JESU Ọ DA TOBỌ DIANẸ WO HIRHAROKUẸ EBẸNBẸN KUGBE EDAVWINI

4. Idjerhe vọ yen idibo ri Jesu vwo muẹ “urhe rẹ oja”? (Luk 9:23)

⁴ Wo de bromaphiyame nu, ọ dia ọyen ebẹnbẹn cha vwọ kanre akpeyeren wẹẹn. Vwọrẹ uyota, Jesu tarọ phephẹn nẹ idibo rọyen che mu “urhe rẹ oja.” Ayen che rhe ruẹ ọtiọyen “kẹdi kẹdẹ.” (Se Luk 9:23.) Kẹ ọnana mudiaphiyọ nẹ Jesu tanẹ ọkieje yen idibo rọyen cha vwọ rioja? Ẹjo kakaka. Ẹkẹvuọvo, Jesu tanẹ vwọba ebruphiyọ ro che te ayen obọ, ayen che hirharoku ebẹnbẹn sansan. Ebẹnbẹn nana evo sa so ọmiaovwẹ ọgangan.​—2 Ti 3:12.

5. Ebruphiyọ vọ yen Jesu tare nẹ ihwo re vwẹ erọnvwọn vwo ze cha mrẹ?

⁵ Ọ sa dianẹ ihwo rẹ orua wẹn vwọso wẹ re yẹrẹ wọ reyọ ekuakua rẹ ugboma vwo ze wo se vwo phi Uvie na phiyọ ẹdia rẹsosuọ vwẹ akpeyeren wẹn. (Mt 6:33) Ọ da dia ọtiọyen, o se muwẹro nẹ Jihova vwo oniso rẹ iruo esiri wẹn. (Hib 6:10) Ọ je sa dianẹ, wọ mrẹ orugba rẹ eta ri Jesu tare nẹ: “O vwo ohwo vuọvo rọ yanjẹ iwevwin yẹrẹ iniọvo eshare yẹrẹ iniọvo eya yẹrẹ oni yẹrẹ ọsẹ yẹrẹ emọ yẹrẹ idju vwo fiki mẹ kugbe fikirẹ iyẹnrẹn esiri na ro che jẹ ayen evwo abọ 100 asaọkiephana vwẹ uvwrẹ ọke nana-a​—iwevwin, iniọvo eshare, iniọvo eya, ini, emọ, kugbe idju, vẹ omukpahen​—kugbe arhọ ri bẹdi bẹdẹ vwẹ eyeren rọ cha na.” (Mk 10:29, 30) Ebruphiyọ nana eje ri te we obọ re na vrẹ erọnvwọn buebun ru wo vwo ze dibi dibi.​—Un 37:4.

6. Diesorọ o vwo fo nẹ wọ vwẹ ọkieje vwọ họnre vwọso “ojevwe rẹ ugboma” wo de bromaphiyame nu?

⁶ Wo de bromaphiyame nu, wọ je cha họnre vwọso “ojevwe rẹ ugboma.” (1Jọ 2:16) Kidie, wẹwẹ jẹ ohwo rọ gbare-e. Ọkievo oma ji se ru we kirobo ro ru ọyinkọn Pọl. O siri nẹ: “Vwọrẹ uyota, oma rẹ urhi rẹ Ọghẹnẹ vwerhen ovwẹ vwẹ obevun mẹ, ẹkẹvuọvo me mrẹ urhi ọfa vwevunrẹ oma mẹ rọ họnra vwọsua urhi ro suẹn iroro mẹ, rọ vwẹ ovwẹ ruẹ ọviẹn vwọ kẹ urhi rẹ umwemwu rọhẹ oma mẹ.” (Ro 7:22, 23) Ọkievo ofu se dje we fikirẹ urhurusivwe rẹ ugboma wẹn. Ẹkẹvuọvo, wo de roro kpahen ive ru wo ve kẹ Jihova ọke wọ vwọ vwomakpahotọ kẹ, ọ sa kẹ wẹ ẹgba vwọ họnre vwọso ọdavwini. Vwọrẹ uyota ive rẹ omaẹvwọkpahotọ wẹn cha cha wẹ uko ọke wo de hirharoku ọdavwini. Vwẹ idjerhe vọ?

7. Idjerhe vọ yen omaẹvwọkpahotọ wẹn vwọ kẹ Jihova sa vwọ vwẹ ukẹcha kẹ wẹ vwọ fuevun kẹ ọkieje?

⁷ Wọ sen oma wẹn ọke wọ vwọ vwomakpahotọ kẹ Jihova. Ọnana mudiaphiyọ nẹ wọ sen ojevwe rẹ ugboma wẹn kugbe kemu kemu rọ cha nẹrhẹ wo ru obo ri che miovwo Jihova ivun. (Mt 16:24) Ọtiọyena wo de hirharoku ọdavwini, o rhe fo nẹ wọ ghwọrọ ọke vwo roro kpahen obo ru wo che ruu. Kidie wo brorhiẹn rẹ obo ru wo che ru jovwo re, ọyen ọ ru wọ vwọ fuevun kẹ Jihova. Wọ cha davwẹngba wo vwo ru obo re vwerhen Jihova oma ọkieje. Wo de ru ọtiọyen kẹ wọ cha dia kerẹ Job. Dede nẹ o hirharoku edavwini egangan, jẹ ọ tare vẹ imuẹro nẹ: “Mi se ku ase mẹ fia-a!”​—Job 27:5.

8. Wo de roro kpahen ẹrhovwo wọ nẹre wọ vwọ vwomakpahotọ kẹ Jihova, mavọ yen ọ sa vwọ cha wẹ uko vwọ sen kọdavwini kọdavwini?

⁸ Wo de roro kpahan ẹrhovwo wọ nẹre wọ vwọ vwomakpahotọ kẹ Jihova, kẹ wo che vwo ẹgba wọ sa vwọ sen kọdavwini kọdavwini. Kerẹ udje, wọ cha rha frẹfrẹ nene aye yẹrẹ ọshare rẹ ohwo ọfa? Ẹjo kakaka! Kidie wọ sen uruemu ọtiọyena jovwo re. Ọnana cha nẹrhẹ wọ kẹnoma kẹ ọmiaovwẹ re vwo nene iroro echọchọ muabọ siẹrẹ e da vwẹ awọ muotọ re. Wọ cha “Kẹnẹ oma” kẹ ‘idjerhe ohwo umwemwu.’​—Isẹ 4:14, 15.

9. Wo de roro kpahen ẹrhovwo wọ nẹre wọ vwọ vwomakpahotọ kẹ Jihova, idjerhe vọ yen ọ je sa vwọ cha wẹ uko vwo phi ẹga ri Jihova phiyọ ẹdia rẹsosuọ?

⁹ Kẹ ọ da rha dianẹ wọ mrẹ iruo rọ cha nẹrhẹ wo gbe ẹdẹ rẹ uyono vwo? Ọ muẹro dẹn nẹ wọ riẹn obo wo che ru. Tavwen wọ ke mrẹ iruo na, jẹ wo brorhiẹn nẹ wọ cha sen oka rẹ iruo ọtiọyen jovwo re. Ọtiọyena, wọ cha tanẹ wo che rhiabọreyọ oka rẹ iruo ọtiọyen je ga Jihova ghenee. Wo de roro kpahan owenvwe ri Jesu vwori ro vwo ru obo re vwerhen Ọsẹ rọyen oma, kẹ wo che brokpakpa ji mudia gan ru wọ vwọ sen korọnvwọn korọnvwọn ro che miovwo Ọghẹnẹ ivun, rọ dia ohwo ru wọ vwomakpahotọ kẹ.​—Mt 4:10; Jọ 8:29.

10. Wo de bromaphiyame nu, idjerhe vọ yen Jihova cha vwọ cha we uko vwo “rhe nene” Jesu?

¹⁰ Uyota nẹ edavwini rhie uphẹn phiyọ wo vwo djephia nẹ wo che “rhe nene” Jesu. Wo de ru ọtiọyen, jẹ o muwẹro nẹ Jihova cha vwẹ ukẹcha kẹ wẹ. Baibol na da ta: “Ọghẹnẹ fuevun, ọ cha rhọnvwe nẹ a davwen ovwan ni vrẹ oborẹ ovwan se chiri-i, ukperẹ ọtiọyen, ọdavwini na da rhe, ọ cha gbẹn idjerhe kẹ ovwan rẹ ovwan se vwo chiro.”​—1 Kọ 10:13.

OBO RE SE VWO NENE JESU ỌKIEJE

11. Ọrhọ yen idjerhe ọvo ro me yovwin re se vwo nene Jesu ọkieje? (Ni uhoho na.)

¹¹ Jesu ga Jihova vẹ oruru, o ji sikẹrẹ womarẹ ẹrhovwo ọkieje. (Lu 6:12) Vwọrẹ uyota, idjerhe ọvo ro me yovwin wo vwo rhe nene Jesu wo de bromaphiyame nu yen wo vwo vwo ẹkuruemu re vwo ruẹ erọnvwọn re cha nẹrhẹ wo sikẹrẹ Jihova. Baibol na tare nẹ: “Asan rẹ avwanre yan obaro te, e jẹ avwanre rha yan obaro vwẹ idjerhe vuọvo na.” (Fil 3:16) Nọke ra ruọke, wo che nyo kpahen ikuegbe rẹ iniọvo eya vẹ eshare re davwẹngba vwo ru bunphiyọ vwẹ ẹga rẹ ayen vwọ kẹ Jihova. Ọkiọvo ayen kpo Isikuru rẹ Ihwo ri Ghwoghwo Uvie na yẹrẹ kpo asan ra da ma guọnọ ukẹcha. Ọ da dia obo ru wo se ru, bru ẹkẹn ọtiọyena kẹ oma. Ihwo ri Jihova vwo owenvwe rẹ ayen vwo ru bunphiyọ vwẹ ẹga rẹ ayen vwọ kẹ. (Iru 16:9) Kẹ ọ da rha dianẹ wo se ru ọtiọyen enẹnaa vwo? Wo roro nẹ ihwo ri se ruo yovwin nọ wẹẹ. A guọnọ akoechiro vwẹ onẹ rẹ arhọ rẹ Inenikristi djẹ na. (Mt 10:22) Wo jẹ ọ chọrọ owẹ ẹroo nẹ oma vwerhen Jihova siẹrẹ wọ da ga te asan rẹ ẹgba wẹn muru eje. Ọyena yen idjerhe ọvo rọ ma ghanre ru wo se vwo nene Jesu ọkieje wo de bromaphiyame nu.​—Un 26:1.

12-13. Die yen wo se ru ọ da dianẹ oruru wo vwori memerha shekpotọ? (1 Kọrẹnt 9:16, 17) (Ni ekpeti na “Rha Djonẹ Na.”)

¹² Kẹ, ọ da rha dianẹ wo roro nẹ ọkievo ẹrhovwo wẹn rhe nẹ otọ rẹ udu cha yẹrẹ wọ rha riavwerhen rẹ iruo rẹ aghwoghwo na kirobo ri jovwoo vwo? Kẹ, ọ da rha dianẹ nẹ wọ rha mrẹ erere vwo nẹ isese ri Baibol wẹn cha kirobo ri jovwoo vwo? Wo de vwo ọkpọ rẹ iroro ọtiọna siẹrẹ wo de bromaphiyame nu, wo ghwe roro nẹ ẹwẹn ọfuanfon ri Jihova nẹ uwe omaa. Kerẹ ohworakpọ rọ gbaree, obo wo roro kpahan se wene. Ọ da dianẹ oruru wo vwori memerha shekpotọ, roro kpahen udje rẹ ọyinkọn Pọl. Dede nẹ ọ davwẹngba rọ vwọ vwẹrokere Jesu, Pọl riẹnre nẹ ọ dia ọkieje yen ọyen che vwo vwo oruru ro vwo ru obo rọ guọnọ ruu. (Se 1 Kọrẹnt 9:16, 17.) Ọ tare nẹ: “Mi rhe vwo owenvwe ri mi vwo ruo-o, mi ji che ruo ghene, kidie ọyen iruo ra vwọ kẹ vwẹ.” Ọtiọyena, Pọl vwo owenvwe ro vwo ruiruo rẹ aghwoghwo rọyen gba o toro oborẹ oma ruo vwẹ ọke yenaa.

¹³ Vwẹ idjerhe vuọvo na, wo muẹ orhiẹn ebro wẹn kpahan oborẹ oma ru wee. Brorhiẹn nẹ wo che ru obo ri yovwirin, ọ da tobọ dianẹ wọ guọnọ ruo vwẹ ọke yenaa. Wo de ru obo ri shephiyọ ọkieje, ọke vwọ yanran na ọnana se wene iroro wẹn. O toro obo rọ wanree, wo de muomaphiyọ erọnvwọn re cha nẹrhẹ wo sikẹrẹ Jihova phiyọ, ọ cha nẹrhẹ wo sikẹrẹ Jesu wo de bromaphiyame nu. Wo de muomaphiyọ eruo rẹ ọhọre ri Jihova ọkieje, ọnana che phiuduphiyọ iniọvo wẹn awọ.​—1Tẹ 5:11.

“OVWAN RHA DAVWAN . . . OVWAN RHE DJE”

14. Die yen ofori nẹ wọ fuẹrẹn ọkieje, kẹ diesorọ? (2 Kọrẹnt 13:5)

¹⁴ Wo de bromaphiyame nu, o che yovwin wọ da fuẹrẹn oma wẹn ọkieje. (Se 2 Kọrẹnt 13:5.) Nọke ra ruọke, ghwọrọ ọke vwọ fuẹrẹn omamọ rẹ iruemu wẹn sẹ wọ nẹrhovwo kedi kẹdẹ, se ji yono Baibol na, kpo emẹvwa, ji vwobọ vwẹ iruo rẹ aghwoghwo na. Davwẹngba wọ sa vwọ guọnọ idjerhe wo se vwo ru yovwinphiyọ vwẹ ẹga wọ vwọ kẹ Jihova vwẹ ẹdia re djunute na. Kerẹ udje, nọ oma wẹn enọ kerẹ: ‘Mi se dje iyono elọlọhọ rehẹ Baibol na fiotọ kẹ ihwo efa? O vwo erọnvwọn mi se ru me vwọ riavwerhen rẹ iruo rẹ aghwoghwo mẹ kpobarophiyọ? Die yen mi djunute vwẹ ẹrhovwo mẹ, kẹ i djephia nẹ me vwẹroso Jihova kare kare? Mi kpo emẹvwa ọkieje? Idjerhe vọ yen mi se vwo ru yovwinphiyọ re me vwọ nabọ kerhọ ji vwobọ vwẹ emẹvwa?’

15-16. Die yen wo yono vwo nẹ oborẹ oniọvo ọshare ọvo rhiẹromrẹ kpahen obo ra sa vwọ sen ọdavwini?

¹⁵ O ji che yovwin wọ da fuẹrẹn oma wẹn kpahen ẹdia ru wọ da vwiẹrẹ. Oniọvo ọshare re se Robert gbikun rẹ obo ro rhiẹromrẹ rọ nabọ dje ẹkpo nana phẹn: “Me vwọ hẹ omarẹ ẹgbukpe 20, me da mrẹ owian rẹ ubrọke. Ẹdẹ ọvo rẹ owian vwo kuphiyọ nu, ohwo re me vẹ ọyen gba wian de durhie uvwe nẹ me rhe uwevwin rọyen. Ọ tare nẹ avwanre ihwo ivẹ ọvo yen cha nabọ ghwọrọ ọke kugbe, ‘kọyen ọ guọnọ nene uvwe vwerhẹn.’ Ẹsosuọ, me senre kpọrọn kpọrọn, ukuotọ rọyen me da tanẹ ẹjo je vuẹ oboresorọ.” Robert sen ọdavwini na, ọ riẹn ru dẹn. Ọke vwọ yanran na, o de rhi ni kpuko je mrẹ nẹ manẹ ọyen rhe ru yovwinphiyọ vrẹ ọtiọyen. Ọ da ta: “Me fobọ sen edurhie na kirobo ri Josẹf sen aye ri Pọtifaa. (Jẹ 39:7-9) Vwọrẹ uyota o gbevwunu, nẹ me mrẹrẹ bẹnbẹn me sa vwọ sen. Obo re phiare na cha vwẹ uko vwọ mrẹvughe nẹ ofori nẹ me bọn oyerinkugbe re me vẹ Jihova vwori gan.”

¹⁶ Wọ je sa mrẹ erere norhe wọ da fuẹrẹn oma wẹn kerẹ obo ri Robert ruru. Ọ da tobọ dianẹ wo se phi ọdavwini kparobọ, nọ oma wẹn, ‘Mavọ yen ọ reyọ ovwẹ kri te me ke sa tanẹ ẹjo?’ Wọ da mrẹ nẹ ofori nẹ wo ru yovwinphiyọ, wo jẹ ofu dje wee. Jẹ oma vwerhen owẹ nẹ wo vwo oniso rẹ asan ru wọ da vwiẹrẹ. Nẹrhovwo kpahọn, wo ji ru erọnvwọn re cha nẹrhẹ wo yeren akpọ nene iwan ri Jihova.​—Un 139:23, 24.

17. Idjerhe vọ yen obo ri Robert rhiẹromrẹ vwo churobọ si odẹ ri Jihova?

¹⁷ O vwo erọnvwọn efa re se yono vwo nẹ obo ri Robert rhiẹromrẹ. Ọ da je ta: “Me vwọ sen edurhie rẹ aye re me vẹ ọyen gba wian kuẹgbe na nu, aye na da ta, ‘Wọ wan ọdavwini na!’ Me da nọ oboresorọ ọ vwọ ta ọtiọyen. Ọ da vuẹ vwẹ nẹ ugbeyan rọyen ọvo rọ dia Oseri ri Jihova jovwo, vuẹrẹ nẹ ighene re dia Iseri ri Jihova eje yeren akpọ rẹ aro ivẹ, nẹ uphẹn rẹ ayen vwo ru obo re chọre de rhiephiyọ, ayen che rhiabọreyọ. Ọ tare nẹ ọyen vuẹ ugbeyan rọyen na nẹ ọyen cha davwen ovwẹ ni. Oma vwerhen ovwẹ nẹ me ghwa ujiri rhe odẹ ri Jihova re me vwọ sen.”

18. Die yen wo brorhiẹn nẹ wo che ru wo de bromaphiyame nu? (Ni ekpeti na “Iyovwinreta ri Che Fierere kẹ Wẹ.”)

¹⁸ Wọ da vwomakpahotọ kẹ Jihova ji bromaphiyame, wo djephia nẹ wọ guọnọ ru odẹ rọyen fon o toro obo re phiaree. O se muwẹro nẹ Jihova riẹn ebẹnbẹn ru wo hirharokuẹ kugbe edavwini ru wọ senre. O che bruba ẹgbaẹdavwọn wẹn ru wọ vwọ fuevun kẹ ọkieje. Jẹ o muwẹro nẹ womarẹ ẹwẹn ọfuanfọn rọyen, ọ cha kẹ wẹ ẹgba ru wọ guọnọre wo vwo ru ọtiọyen. (Lu 11:11-13) Jihova cha vwẹ ukẹcha kẹ wẹ vwo nene Jesu ọkieje wo de bromaphiyame nu.