Enọ Rẹ Ihwo Ri Se Ẹbe Avwanre Nọre
Amono yen “emekashe ra sanere na” ra ta ota kpahen vwẹ 1 Timoti 5:21?
Ọyinkọn Pọl si ọbe rhe Timoti rọ je ga kerẹ ọkpako nẹ: “Mi jurhi kẹ wẹ vwẹ obaro rẹ Ọghẹnẹ kugbe Kristi Jesu kugbe emekashe ra sanere na nẹ wo nene odjekẹ nana vwọ vrabọ rẹ omaẹfẹnẹ yẹrẹ e vwo nẹ ohwo ruẹ.”—1Ti 5:21.
Ẹsosuọ, je ke djunute emekashe re cha sa dia usun rẹ e ra sanere naa. O muẹro nẹ, ayen dia usun rẹ 144,000 naa. Ọke rẹ Pọl vwo si ọbe nana rhe Timoti, jẹ evrẹnushi rẹ Inenikristi ra jẹreyọ na vwo kpo odjuvwu je rhe tonphiyọọ. Iyinkọn na vẹ e ra jẹreyọ ri chekọ je rhe dia ihwo rẹ ẹwẹẹn, ọtiọyena ayen cha sa dia “emekashe ra sanere” naa.—1Kọ 15:50-54; 1Tẹ 4:13-17; 1Jọ 3:2.
Vwọba, “emekashe ra sanere na” cha sa dia emekashe ri jẹ urhi rẹ Ọghẹnẹ ẹyọnrọn vwẹ ọke rẹ Oghwe naa. Emekashe yena vwomaba Eshu rọ dia Idẹbono na, je rhe dia ivwighrẹn ri Jesu. (Jẹ 6:2; Lu 8:30, 31; 2Pi 2:4) Vwẹ ọke rọ cha vwẹ obaro na, e che do ayen vẹ Idẹbono phiyọ ukpotọ ro jẹ oba evwo na vwẹ ẹgbukpe 1,000, a ke rhe ghwọrọ ayen.—Jud 6; Ẹvw 20:1-3, 10.
“Emekashe ra sanere” rẹ Pọl ta ota kpahen na, enana emekashe rehẹ obodjuvwu ri biẹcha “Ọghẹnẹ kugbe Kristi Jesu,” re ji djunute vwẹ owọrota vuọvo na.
Emekashe uriorin buebun yen fuevun kẹ Ọghẹnẹ. (Hib 12:22, 23) Ofori avwanre vwo roro nẹ iruo vuọvo yen Ọghẹnẹ vwọ kẹ ayen ejee. (Ẹvw 14:17, 18) Karophiyọ nẹ amakashe ọvo yen a vwẹ owian kẹ nẹ ọ ghwọrọ isodje rẹ Asiria ri bun te 185,000. (2Iv 19:35) Ọ sa dianẹ, emekashe buebun yen a vwẹ owian kẹ nẹ i “koko erọnvwọn eje re sua ekprowọ kugbe ihwo ri jurhi ẹyọnrọn vwo nẹ Uvie [ri Jesu]” na. (Mt 13:39-41) Efa se vwo owian ayen vwo “koko ihwo rọ jẹreyọ” na kpo obodjuvwu. (Mt 24:31) O ji vwo efa ra vwẹ iji kẹ nẹ i ni je ‘rhẹrẹ idjerhe avwanre ejobi.’—Un 91:11; Mt 18:10; ni Matiu 4:11; Luk 22:43.
“Emekashe ra sanere na” re djunute vwẹ 1 Timoti 5:21 sa dia emekashe ra vwẹ owian rẹ oghẹresan vwọ kẹ nẹ ayen vwẹrote ihwo rẹ Ọghẹnẹ. Pọl ke rhe ta ota nana, ọ ka vwẹ uchebro rẹ aghwanre vwọ kẹ ekpako na kpahen oborẹ ayen wian owian rayen wan ayen se vwo muwan rẹ ọghọ vwobọ rẹ iniọvo rẹ ukoko na. A guọnọre nẹ, ekpako na ruiruo rayen “vwọ vrabọ rẹ omaẹfẹnẹ yẹrẹ e vwo nẹ ohwo ruẹ,” ayen je frẹkotọ roro tavwen ayen ki brorhiẹn. Kidie nẹ ayen hẹ “obaro rẹ Ọghẹnẹ kugbe Kristi Jesu kugbe emekashe ra sanere na” ko fori nẹ ekpako na nene uchebro ri Pọl na. O fiotọ dẹn nẹ, a vwẹ owian vwọ kẹ emekashe evo nẹ ayen vwẹrote ukoko na, dia ochọnvwe vwọ kẹ ihwo rẹ Ọghẹnẹ, vwẹrote iruo rẹ aghwoghwo na je niyẹnrẹn kẹ Jihova.—Mt 18:10; Ẹvw 14:6