Die Yen Ọtanhirhe na Yono Avwanre?

1. Erere vọ yen avwanre mrẹ siẹrẹ e de kpo Ẹkarophiyọ rẹ ughwu ri Kristi kukpe kukpe?

VWỌRẸ uyota, wọ cha rhọnvwe nẹ ọtanhirhe na ọyen okẹ ọghanghanre! (2Kọ 9:15) Kidie nẹ Jesu vwẹ arhọ rọyen vwọ kpahotọ, ọnana kọ nẹrhẹ owẹ vẹ Jihova Ọghẹnẹ se vwo uvi rẹ oyerinkugbe ọkpẹkpẹkpẹ. Wo ji se rhẹro nẹ wo che vwo arhọ ri bẹdẹ. Mavọ yen ọ vwerhoma te re vwo dje ọdavwaro kpahen ọtanhirhe na ji te Jihova rọ dia ohwo ro ruẹ ọrhuẹrẹphiyotọ na! (Ro 5:8) Rere e se vwo dje ọdavwaro phia, e vwo jẹ ọtanhirhe na e no phovwin, Jesu da vwẹ iji mu nẹ e ru Ẹkarophiyọ rẹ ughwu rọyen kukpe kukpe.​—Lu 22:19, 20.

2. Die yen a cha ta ota kpahen vwẹ uyono nana?

² Vwẹ enukpe na, e che ru Ẹkarophiyọ rẹ ughwu ri Jesu vwẹ Saturday, April 12, 2025. Aphro herọọ, nẹ avwanre eje muegbe ra vwọ ra. Avwanre cha mrẹ erere gbidiki siẹrẹ a da rhuẹrẹ ọke phiyọ vwo roro kokodoa kpahen oborẹ Jihova vẹ Ọmọ rọyen ru kẹ avwanre uvwre ọke rẹ Ẹkarophiyọ na. Vwẹ uyono nana, a cha ta ota kpahen oborẹ ọtanhirhe na yono avwanre kpahen Jihova vẹ Ọmọ rọyen. Vwẹ uyono rọ vwọ kpahen ọnana, a cha vwẹ ukẹcha kẹ avwanre vwo vwo ẹruọ rẹ obo ra sa vwọ mrẹ erere nẹ ọtanhirhe na rhe kugbe obo re se vwo dje ọdavwaro kpahọn.

OBORẸ ỌTANHIRHE NA YONO AVWANRE KPAHEN JIHOVA

3. Mavọ yen ughwu rẹ ohwo ọvo se vwo sivwin iduduru rẹ ihwo? (Ni uhoho na.)

³ Ọtanhirhe na yono avwanre kpahen orhiẹn ọsoso ri Jihova. (Urh 32:4) Vwẹ idjerhe vọ? De vwẹ ẹwẹn roro: Ghwe vwo nẹ ọke rẹ Adam vwo gbevwọso Jihova, yen avwanre vwọ riuku rẹ umwemwu rọ ghwa ughwu rhe. (Ro 5:12) E se vwo si avwanre nẹ obọ rẹ umwemwu vẹ ughwu, Jihova de ru ọrhuẹrẹphiyotọ rere Jesu vwọ tan avwanre hirhe. Kẹ, mavọ yen izobo rẹ ohwo ọvo se vwo sivwin iduduru rẹ ihwo? Ọyinkọn Pọl de dje ọtiọna: “Kirobo rẹ jẹmienyo rẹ ohwo ọvo [Adam] ru ihwo buebun phiyọ irumwemwu na, ọtiọyen yen ẹmienyo rẹ ohwo ọvo [Jesu] ji che ru ihwo buebun phiyọ evwata.” (Ro 5:19; 1Ti 2:6) Ọtiọyena, rọ vwọ dianẹ jẹmienyo rẹ ohwo ọvo rọ gbare yen nẹrhẹ avwanre dia eviẹn kẹ umwemwu ji ghwẹ na, ọtiọyen ẹmienyo rẹ ohwo ọvo rọ gbare ji che sivwin avwanre.

4. Diesorọ Jihova rha vwẹ uphẹn kẹ emọ rẹ Adam ri vwo ẹwẹn esiri nẹ ayen dia bẹdẹẹ?

⁴ Ofori nẹ Jesu ghini ghwu o se vwo sivwin avwanre? Jihova rha sa vwẹ uphẹn vwọ kẹ emọ rẹ Adam ri vwo ẹwẹn esiri nẹ e dia bẹdẹ? Vwọ kẹ ihworakpọ re gbaree, ayen se no nẹ ọyen ghwa obo ro fori nẹ o ru. Ẹkẹvuọvo, ọnana dje orhiẹn abavo ri Jihova phiaa. Kidie nẹ Jihova ọyen ohwo ro brorhiẹn ọsoso, ọ cha kpairoro vrẹ umwemwu ọgangan rẹ Adam ruru naa.

5. Diesorọ e vwo vwo imuẹro nẹ ọkieje yen Jihova che vwo ru obo ri shephiyọ?

⁵ Kẹ, ọ da rha dianẹ ukperẹ Jihova vwo ru ọrhuẹrẹphiyotọ rẹ ọtanhirhe na, ọ da kpairoro vrẹ orhiẹn ọsoso je vwo uphẹn kẹ emọ rẹ Adam re gbaree nẹ ayen dia bẹdẹ vwoo? Ọnana sa nẹrhẹ ihwo vwo ẹwẹn ivivẹ sẹ Ọghẹnẹ cha kpairoro vrẹ orhiẹn ọsoso siẹrẹ eta efa da vwomaphia. Kerẹ udje, ihwo evo se roro nẹ o ji che ru nene obo ro veri? E jẹ ọyena kpokpo ẹwẹn avwanre nẹ emu ọtiọyen cha phiaa. Jihova da sa reyọ Ọmọ rọyen ọghanghanre vwo ze izobo kidie nẹ ọ guọnọ orhiẹn ọsoso, ọyena kẹ avwanre imuẹro nẹ ọkieje yen o che vwo ru obo ri shephiyọ.

6. Ọrhọ yen idjerhe ọvo ọtanhirhe na vwo dje ẹguọnọ ri Jihova phia? (1 Jọn 4:9, 10)

⁶ Dede nẹ ọtanhirhe na nẹrhẹ e vwo ẹruọ rẹ oborẹ orhiẹn ọsoso ri Jihova hepha, ma rho ọ nẹrhẹ e vwo ẹruọ rẹ obo ro vwo ẹguọnọ avwanre te. (Jọ 3:16; se 1 Jọn 4:9, 10.) Uyono rẹ ọtanhirhe na djerephia nẹ ọ dia Jihova de guọnọ nẹ avwanre vwo arhọ ri bẹdẹ ọvoo, ọ je guọnọ nẹ a dia usun rẹ ihwo rehẹ orua rọyen. Di roro: Ọke rẹ Adam vwo ru umwemwu, Jihova da djẹ nẹ orua rẹ ihwo rọyen re vwẹ ẹga kẹ. Ọtiọyena, avwanre rha hẹ orua rẹ Ọghẹnẹ ọke re vwo vwiẹ avwanree. Ẹkẹvuọvo, fikirẹ ọtanhirhe na, Jihova de vwo ghovwo imwemwu rẹ avwanre, ọ je cha vwẹ avwanre vwọba orua rọyen siẹrẹ e de vwo esegbuyota ji nyẹme rọyen. Enẹna, e ji se vwo uvi oyerinkugbe vẹ ọyen kugbe iniọvo rẹ avwanre. Vwọrẹ uyota, avwanre eje mrẹ erere vwo nẹ ẹguọnọ ri Jihova rhe!​—Ro 5:10, 11.

7. Idjerhe vọ yen oja rẹ Jesu re re vwọ nẹrhẹ e vwo ẹruọ rẹ oborẹ Jihova vwo ẹguọnọ rẹ avwanre te?

⁷ A sa nabọ vwo ẹruọ rẹ oborẹ Jihova vwo ẹguọnọ rẹ avwanre siẹrẹ e de roro kpahen oborẹ ughwu rẹ Ọmọ rọyen na darọ te. Eshu tare nẹ, o vwo odibo rẹ Ọghẹnẹ vuọvo rọ cha fuevun kẹ ọ da bẹn ro vwo ru ọtiọyeen. E se vwo dje Eshu phiyọ ọvwọrefian, Jihova da vwẹ uphẹn kẹ Jesu nẹ ọ rioja tavwen o ki ghwu. (Job 2:1-5; 1Pi 2:21) Jihova mrẹrẹ ọke rẹ ihwo ẹga re vwọsua vwọ reyọ vwọ jehwẹ, isodje vwọ fa, kugbe ọke ra vwọ kanrọ mu urhe rẹ oja na. Jihova je mrẹ ọke ra vwọ yanjẹ Ọmọ rọyen ọghanghanre vwo nẹ ọ rioja ji ghwu ughwu rẹ osọnọ. (Mt 27:28-31, 39) Jihova vwo ẹgba rọ vwọ dobọ rẹ erọnvwọn nana eje ji. Kerẹ udje, Jihova rhe se ru ọtiọyen ọke rẹ ihwo re vwọsua vwọ tanẹ: “E gbe jẹ [Ọghẹnẹ] sivwon asaọkiephana siẹrẹ ọ da guọnọ sivwon.” (Mt 27:42, 43) Ẹkẹvuọvo, siẹrẹ Ọghẹnẹ de ru ọtiọyen, Jesu rha sa hwosa rẹ ọtanhirhe naa, iphiẹrophiyọ vuọvo rha herọ vwọ kẹ avwanree. Ọtiọyena, Jihova da vwẹ uphẹn kẹ Ọmọ rọyen nẹ o chirakon rioja bẹsiẹ o vwo ku ẹwẹn phiyọ.

8. Ọ da Jihova rọ vwọ mrẹ Ọmọ rọyen rọ rioja? Djekpahọn. (Ni uhoho na.)

⁸ E jẹ e roro nẹ kidie nẹ Ọghẹnẹ ọromevwẹgba na, emu vuọvo rha daa! Ọ ma avwanre họhọ oma rọyen, vẹ ẹgba ra vwọ riẹn siẹrẹ orọnvwọn de te avwanre oma, ọtiọyena o vwo erọnvwọn re je miavwọn oma. Baibol na tare nẹ a sa kpare “ophu” rọyen nẹ erọnvwọn je ‘da.’ (Un 78:40, 41) Vwọba, ji roro kpahen obo re phia kẹ Ebraham vẹ Aizik. Wọ karophiyọ nẹ Jihova vuẹrẹ nẹ ọ reyọ ọmọ rọyen vuọvo vwo ze izobo. (Jẹ 22:9-12; Hib 11:17-19) A cha sa vwẹ ẹwẹn roro ofudjevwe kugbe ọmiaovwẹ rọhẹ oma rẹ Ebraham ọke rọ vwọ choma vẹ aphia ro che vwo hwe Aizikii. Mavọ yen ọ da Jihova te rọ vwọ mrẹ Ọmọ rọyen rẹ ihwo gboja kẹ re, ayen de ji hwe ghwu!​—Ni ividio na Vwẹrokere Esegbuyota Rayen​—Ebraham, Ẹbẹre 2 vwẹ jw.org.

9. Mavọ yen Rom 8:32, 38, 39 vwọ vwẹ ukẹcha vwọ kẹ avwanre vwo vwo ẹruọ oborẹ ẹguọnọ ri Jihova kodo te?

⁹ Ọtanhirhe na yono avwanre nẹ o vwo ohwo vuọvo ro vwo ẹguọnọ avwanre te Jihovaa​—te ọ dia ohwo orua yẹrẹ ugbeyan rọ ma ghanre. (Se Rom 8:32, 38, 39.) Aphro herọọ nẹ Jihova vwo ẹguọnọ avwanre vrẹ avwanre komobọ. Wọ guọnọ dia bẹdẹ? Ọyen oborẹ Jihova ma guọnọ kẹ wẹ. Wọ guọnọ nẹ a vwẹ imwemwu wẹn vwo ghovwo uwe? Ọyen ghwa hẹ oborẹ Jihova guọnọre. Jẹ, obo rọ guọnọ mie we yen wo vwo rhiabọreyọ okẹ rẹ ọtanhirhe na womarẹ wo vwo vwo esegbuyota kpahọn, ji nyẹme rọyen. Ọtanhirhe na ọyen uvi rẹ odjephia rẹ ẹguọnọ rẹ Ọghẹnẹ vwọ kẹ avwanre. Vwẹ akpọ kpokpọ na, avwanre che yono kpahen ẹguọnọ ri Jihova kpobarophiyọ.​—Agh 3:11.

OBORẸ ỌTANHIRHE NA YONO AVWANRE KPAHEN JESU

10. (a) Die yen ma da Jesu kpahen ughwu rọyen? (b) Idjerhe vọ yen Jesu vwo ru odẹ ri Jihova fon? (Ni ekpeti na “Ọyọnregan ri Jesu ru Odẹ ri Jihova Fon.”)

¹⁰ Jesu vwo ọdavwẹ rẹ odẹ rẹ Ọsẹ rọyen mamọ. (Jọ 14:31) Ọ da Jesu mamọ nẹ eta rẹ ẹgua ra tanẹ ọ tare nẹ ọyen ohwo ro ji gbevwọsua sa ghwa ekan rhe odẹ rẹ Ọsẹ rọyen. Ọnana yen sorọ ọ vwọ nẹrhovwo nẹ: “Ọsẹ mẹ, ọ da dia oborẹ wo se ru, jẹ uko nana wan vwẹ vrẹ.” (Mt 26:39) Jesu ru odẹ rẹ Ọsẹ rọyen fon, rọ vwọ sẹro rẹ ọyọnregan rọyen te ọke ro vwo ghwu.

11. Idjerhe vọ yen Jesu vwo djephia nẹ ọyen vwo ẹguọnọ rẹ ihworakpọ mamọ? (Jọ 13:1)

¹¹ Ọtanhirhe na ji yono avwanre nẹ Jesu vwo ọdavwẹ rẹ ihwo mamọ, ma rho ọdavwẹ rẹ idibo rọyen. (Isẹ 8:31; se Jọn 13:1.) Kerẹ udje, Jesu riẹnre nẹ iruo aghwoghwo rọyen vwẹ otọrakpọ na cha vọn vẹ egbabọse, ma rho ughwu rẹ osọnọ ro che ghwu. Jẹ, ro vwo ruiruo rọyen vwẹ otọrakpọ na, ọ dia o di ghwe ruo kidie ọyen obo ro fori nẹ o ruu. Ukperẹ ọtiọyen, Jesu mu ẹwẹn rọyen eje phiyọ iruo aghwoghwo na, eyono, o ji gbe odibo kẹ ihwo efa. Vwẹ ẹdẹ ro ghwuru dede, Jesu ghwọrọ ọke vwọ hworhẹ awọ rẹ iyinkọn rọyen je vwẹ uchebro vẹ ọbọngan vwọ kẹ ayen. (Jọ 13:12-15) Ọke rọ tobọ vwọ hẹ enu rẹ urhe oja na, Jesu je vwẹ iphiẹrophiyọ kẹ oji ra guọnọ hwe, o de ji ru ọrhuẹrẹphiyotọ a sa vwọ vwẹrote oni rọyen. (Lu 23:42, 43; Jọ 19:26, 27) Vwọrẹ uyota, ọ dia ọke rẹ ughwu rọyen ọvo yen Jesu vwo dje ẹguọnọ phiaa, o ru ọtiọyen vwẹ akpeyeren rọyen eje rọ vwọ hẹ otọrakpọ na.  

12. Idjerhe vọ yen a sa vwọ tanẹ Jesu vwẹ ukẹcha kẹ avwanre enẹna?

¹² Dede nẹ “ẹsiẹvo goi” yen Jesu ghwuru, jẹ ọ dia ọmọrhiẹ erọnvwọn yen o ji ruẹ vwọ kẹ avwanree. (Ro 6:10) Diesorọ a vwọ ta ọtiọyen? Ọ ghwọrọ ọke vẹ ẹgba rọyen vwọ wian rere a sa vwọ mrẹ erere vwo nẹ ọtanhirhe na rhe. Roro kpahen obo ro ruẹ enẹna. O suẹn kerẹ Ovie rẹ avwanre, ọ ga kerẹ Orherẹn Rode, ọ ke rha dia ọgbuyovwin rẹ ukoko na. (1Kọ 15:25; Ẹf 5:23; Hib 2:17) Ọyen vwẹrote owian re vwo koko itu ra jẹreyọ kugbe otu gbidigbidi na, owian rọ cha wian bẹsiẹ ukpokpogho rode na ki vwoba.b (Mt 25:32; Mk 13:27) Ọ je davwẹngba rere a sa vwọ nabọ reyọ Ota rẹ Ọghẹnẹ vwọ ghẹrẹ idibo rọyen re fuevun vwẹ ọke rẹ oba na. (Mt 24:45) Vwẹ Usuon rẹ Ẹgbukpe Uriorin rọyen na, ọkieje yen ọ cha vwẹrote ọdavwẹ rẹ avwanre. Uyota nẹ, Jihova ghene vwẹ Ọmọ rọyen kẹ avwanre!  

WỌ DOBỌ RẸ EYONO JẸẸ

13. Idjerhe vọ yen erorokodo sa vwẹ ukẹcha kẹ wẹ vwo yono kpahen ẹguọnọ rẹ Ọghẹnẹ kugbe Jesu vwo kpahen avwanre?

¹³ Wọ sa vwẹ ọkieje yono kpahen ẹguọnọ rẹ Jihova Ọghẹnẹ kugbe Jesu Kristi vwo kpahen avwanre siẹrẹ wo de roro kokodo kpahen oborẹ ayen ru kẹ avwanre. Ọkiọvo vwẹ uvwre rẹ ọke Ẹkarophiyọ na, wọ sa frẹkotọ se ọvo yẹrẹ ivẹ usun rẹ ẹbe ẹne rẹ ikuegbe akpeyeren ri Jesu. Wo brokpakpa se ẹkpo buebun ofuọvoo. Ukperẹ ọtiọyen, ememerha se, wọ je guọnọ erọnvwọn efa re sorọ o vwo fo avwanre vwo vwo ẹguọnọ ri Jihova vẹ Jesu. Davwẹngba wọ vuẹ ihwo efa kpahen obo ru wo yonori wo vwo ruẹ isese na.

14. Vwo nene obo rehẹ Une rẹ Ejiro 119:97 kugbe eta rehẹ obotọ, idjerhe vọ yen ehiahiẹ sa vwọ vwẹ ukẹcha kẹ avwanre vwo yono ọkieje kpahen ọtanhirhe na vẹ iyono efa? (Ni uhoho na.)

¹⁴ Ọ dianẹ wẹ hẹ ukoko na vwẹ ikpe buebun re, wo se roro sẹ a je sa mrẹ ọhọ kpokpọ vwẹ iyovwinreta rẹ avwanre riẹnre jovwo kerẹ orhiẹn ọsoso rẹ Ọghẹnẹ, ẹguọnọ rọyen kugbe ọtanhirhe na. Vwọrẹ uyota, ọkieje yen e che vwo yono erọnvwọn kpokpọ kpahen iyovwinreta nana vẹ efa. Ọtiọyena, die wo se ru? Reyọ uphẹn nana vwọ guọnọ evuẹ efa ra sa mrẹ vwẹ ẹbe rẹ ukoko na. Ọ da dianẹ wọ mrẹ ẹkpo ọvo ru wo vwo ẹruọ rọyeen, ru ehiahiẹ. Ọtiọyena, gba vwẹ ẹdẹ na eje vwo roro kpahen obo ru wọ mrẹre kugbe obo ro yono uwe kpahen Jihova, Ọmọ rọyen, kugbe ẹguọnọ rayen kpahen owẹ.​—Se Une rẹ Ejiro 119:97.c

15. Diesorọ a vwọ guọnọ erọnvwọn kpokpọ vwẹ Baibol na?

¹⁵ Wo jẹ ofu dje we wọ rha mrẹ orọnvwọn kpokpọ yẹrẹ ọ rọ vwerhoma kọke kọke wo de chidia se yẹrẹ ruẹ ehiahiẹẹ. Ọ ghwa họhọ nẹ wọ pha kerẹ ohwo rọ guọnọ oro. Ihwo re guọnọ oro vwẹ erhiorin ghwọrọ inọke yẹrẹ ẹdẹ buebun tavwen ayen ke mrẹ oro ro te emuọvoo. Dedena, oma bẹn ayeen, ayen nabọ frẹkotọ guọnọ kidie ayen riẹn oborẹ oro tutuno ghanre te vwọ kẹ ayen. Eriyin ọ je hepha nẹ orọnvwọn kpokpọ re yono mrẹ vwẹ Baibol na ghanre vrẹ oro dibidibi! (Un 119:127; Isẹ 8:10) Ọtiọyena, vwo erhiorin wo ji tinkamu ọrhuẹrẹphiyotọ rẹ isese ri Baibol wẹn.​—Un 1:2.

16. Mavọ yen a sa vwọ vwẹrokere Jihova kugbe Jesu?

¹⁶ Wo vwo yono na, gbẹn idjerhe rẹ obo wọ sa vwọ reyọ obo ru wo yono na vwo ruiruo. Kerẹ udje, vwẹrokere orhiẹn ọsoso ri Jihova womarẹ wo vwo jẹ ihwo e no ruẹ. Vwẹrokere ẹguọnọ rẹ Jesu vwo kpahen Ọsẹ rọyen kugbe ihwo efa vẹ owenvwe ru wọ vwọ rioja fikirẹ odẹ ri Jihova je vwẹ oma ze vwọ kẹ iniọvo na. Vwọba, vwẹrokere Jesu womarẹ wo vwo soseri kẹ ihwo efa rere ayen ji se vwo vwo uphẹn vwo rhiabọreyọ okẹ rẹ ọtanhirhe ri Jihova na.

17. Die yen a cha ta ota kpahen vwẹ uyono rọ vwọ kpahen ọnana?

¹⁷ E vwo vwo ẹruọ ji dje ọdavwaro kpahen ọtanhirhe na phiyọ ye, ẹguọnọ rẹ avwanre kpahen Jihova vẹ Ọmọ rọyen kọ cha rha ganphiyọ. Ọtiọyena, ẹguọnọ rayen kpahen avwanre kọ je cha ganphiyọ. (Jọ 14:21; Jem 4:8) E gbe jẹ a reyọ kemu kemu rẹ Jihova vwọ kẹ avwanre vwo yono kpahen ọtanhirhe na ọkieje. Uyovwinrota rọ vwọ kpahen ọnana cha ta ota kpahen idjerhe evo ra sa vwọ mrẹ erere vwo nẹ ọtanhirhe na rhe ji dje ọdavwaro phia kpahen ẹguọnọ ri Jihova.