Obo ra sa Vwọ Mrẹ Erere nẹ Ẹguọnọ ri Jihova rhe

1. Die yen e se ru rere oma vwọ vwerhen Jihova?

DE VWẸ ẹwẹn roro nẹ wọ kẹ ohwo okẹ ọghanghanre ọvo ro ji fo. Mavọ yen oma che ru we siẹrẹ ohwo na de do phiyọ idọrọ je kpairoro vrẹ vwẹ etiyin! Vwọ vrẹ ọyena, oma cha vwerhen owẹ ọ da dianẹ ohwo na reyọ okẹ wọ kẹ rẹ na vwo ruiruo ji dje ọdavwaro kpahọn. Die yen ẹkpo na? Jihova vwẹ Ọmọ rọyen kẹ avwanre. Mavọ yen oma cha vwerhen Jihova te siẹrẹ e de dje ọdavwaro kpahen okẹ rọ vwọ kẹ avwanre na ji te ẹguọnọ rọyen, rọ nẹrhẹ o ru ọrhuẹrẹphiyotọ rẹ ọtanhirhe na!​—Jọ 3:16; Ro 5:7, 8.

2. Die yen a cha ta ota kpahen vwẹ uyono nana?

² Ọke vwọ yanran na, a sa vwẹ ẹro okueku vwo ni okẹ rẹ ọtanhirhe na. E de ru ọtiọyen, kọ ghwa họhọ nẹ e do okẹ rẹ Ọghẹnẹ na phiyọ evunrẹ idọrọ. Oma vwerhen avwanre a ka vwọ reyọ vwọ kẹ avwanre, jẹ a da kpairoro vrẹ. Rere a sa vwọ vrẹ abọ rẹ emu ọtiọyen, ofori nẹ a vwẹ ọkieje vwo dje ọdavwaro phia kpahen oborẹ Ọghẹnẹ vẹ Kristi ru kẹ avwanre. Uyono nana cha cha avwanre uko vwo ru ọtiọyen. A cha ta ota kpahen erere avwanre cha mrẹ nẹ ọtanhirhe na rhe enẹna kugbe erere rẹ avwanre cha mrẹ vwẹ obaro na. A je cha fuẹrẹn obo re se vwo dje ọdavwaro kpahen ẹguọnọ ri Jihova, ma rho uvwre rẹ ọke rẹ Ẹkarophiyọ na.

ERERE AVWANRE MRẸ ASAỌKIEPHANA

3. Ọrhọ yen idjerhe ọvo avwanre vwọ mrẹ erere vwo nẹ ọtanhirhe na cha asaọkiephana?

³ Enẹna, avwanre mrẹ erere vwo nẹ ọtanhirhe rẹ izobo ri Kristi na cha re. Kerẹ udje, Jihova vwẹ imwemwu rẹ avwanre vwo ghovwo avwanre fikirẹ izobo rẹ ọtanhirhe na. Ọ rha rhọnvwe vwo ghovwo avwanree, ọ churhi vuọvoo. Ẹkẹvuọvo ọyen obo rọ guọnọ ru. Ọbuine na da ta: “Kidie wọwẹ, E Ọrovwohwo, ohwo esiri vẹ evwoghovwo.”​—Un 86:5; 103:3, 10-13.

4. Amono yen Jihova vwẹ fikirẹ ayen ru ọrhuẹrẹphiyotọ rẹ ọtanhirhe na? (Luk 5:32; 1 Timoti 1:15)

⁴ Itu evo se no nẹ ayen muwan rẹ evwoghovwo ri Jihovaa. Vwọrẹ uyota, o vwo avwanre vuọvo ro muwan rọyeen. Ọyinkọn Pọl riẹnre nẹ ọyen “fo ohwo re se ọyinkọ-ọn.” Vwọba, ọ da ta: “Womarẹ ẹse rẹ Ọghẹnẹ re muwan rọye-en yen me vwọ hẹ obo re me hepha na.” (1Kọ 15:9, 10) Siẹrẹ avwanre de kurhẹriẹ nẹ imwemwu rẹ avwanre, Jihova vwo ghovwo avwanre. Diesorọ? Ọ dia kidie nẹ e muwan rọyeen, ẹkẹvuọvo o vwo ẹguọnọ rẹ avwanre. Ọ da dianẹ ẹwẹn kpokpo uwe kidie wo roro nẹ wo muwan rẹ evwoghovwo ri Jihovaa, karophiyọ nẹ ọ dia fikirẹ ihwo rẹ umwemwu kanre oma yen nẹrhẹ Jihova ru ọrhuẹrẹphiyotọ rẹ ọtanhirhe naa, ẹkẹvuọvo o ruro fikirẹ irumwemwu re guọnọ kurhẹriẹ.​—Se Luk 5:32; 1 Timoti 1:15.

5. Avwanre ghene sa tanẹ avwanre muwan rẹ arodọnvwẹ ri Jihova? Djekpahọn.

⁵ E jẹ avwanre ọvuọvo roro nẹ ọyen muwan rẹ arodọnvwẹ ri Jihova kidie ikpe buebun yen ọyen ga cha ree. Vwọrẹ uyota, Jihova vwo ọdavwaro kpahen evun-ẹfuọn avwanre. (Hib 6:10) Ọ vwẹ Ọmọ rọyen kẹ avwanre ọphẹ, ọ dia ọ reyerọ vwọ hwosa rẹ obo re ruruu. Ọ da dianẹ avwanre no nẹ e muwan rẹ arodọnvwẹ rọyen yẹrẹ erorokẹ roghẹresan, kọ ghwa họhọ nẹ avwanre tanẹ Jesu ghwu kufia.​—Ni Galesha 2:21.

6. Diesorọ Pọl vwọ wian gangan vwẹ ẹga ri Jihova?

⁶ Pọl riẹnre nẹ ọyen muwan rẹ aroesiri rẹ Ọghẹnẹẹ. Kẹ, diesorọ ọ vwọ wian gangan vwẹ ẹga ri Jihova? Ọ dia o ruro vwo djephia nẹ ọyen muwaan, ẹkẹvuọvo vwo dje ọdavwaro kpahen ẹse ri Jihova ro muwan rọyeen. (Ẹf 3:7) Kerẹ Pọl, e jẹ avwanre ga Jihova vẹ oruru ọkieje, ọ dia kidie nẹ e muwan rẹ arodọnvwẹ rọyeen, ẹkẹvuọvo re vwo dje ọdavwaro kpahọn.

7. Ọrhọ yen idjerhe ọfa a vwọ mrẹ erere nẹ ọtanhirhe na cha asaọkiephana? (Rom 5:1; Jems 2:23)

⁷ Idjerhe ọfa avwanre vwọ mrẹ erere nẹ ọtanhirhe na cha asaọkiephana yen avwanre vẹ Jihova se vwo uvi oyerinkugbe ọkpẹkpẹkpẹ komobọ.a Kirobo re djunute vwẹ uyono rọ wanre na, re vwo vwiẹ avwanre, avwanre vwo oyerinkugbe vẹ Ọghẹnẹẹ. Jẹ, fikirẹ ọtanhirhe na, avwanre ki se vwo “ufuoma vẹ Ọghẹnẹ” rọ nẹrhẹ avwanre siẹkẹrẹ.​—Se Rom 5:1; Jems 2:23.

8. Diesorọ o vwo fo e vwo dje ọdavwaro phia kẹ Jihova fikirẹ uphẹn rẹ ẹrhovwo?

⁸ Roro kpahen orọnvwọn ọvo re se vwo fikirẹ oyerinkugbe avwanre vẹ Jihova​—uphẹn rẹ ẹrhovwo. Ọ dia ẹrhovwo rẹ idibo rọyen nẹ rhe vwẹ azagba siẹrẹ ayen de siomakoko ọvo yen Jihova nyoo, ẹkẹvuọvo o ji nyo ẹrhovwo rẹ avwanre ọvuọvo nẹ rhe vwẹ odjahọn. Ẹrhovwo sa nẹrhẹ ẹwẹn rẹ avwanre totọ je kẹ avwanre ufuoma, ẹkẹvuọvo ọ vrẹ omamọ ona rẹ omaesivwon dibidibi. O ruẹ oyerinkugbe avwanre vẹ Ọghẹnẹ ganphiyọ. (Un 65:2; Jem 4:8; 1Jọ 5:14) Ọke rẹ Jesu vwọ hẹ otọrakpọ na, ọ nẹrhovwo abọ buebun kidie ọ riẹnre nẹ Jihova nyo, nẹ ẹrhovwo cha nẹrhẹ oyerinkugbe rọyen vẹ ọ rẹ Ọsẹ rọyen ganphiyọ. (Lu 5:16) Mavọ yen ọ vwerhoma te, nẹ womarẹ izobo ri Jesu na, avwanre vẹ Jihova ki se vwo uvi rẹ oyerinkugbe je ta ota Kẹ vwẹ ẹrhovwo!

OBO RA SA VWỌ MRẸ ERERE VWẸ OBARO NA

9. Idjerhe vọ yen ọtanhirhe na che vwo fierere kẹ idibo ri Jihova re fuevun vwẹ obaro na?

⁹ Mavọ yen idibo ri Jihova re fuevun sa vwọ mrẹ erere nẹ ọtanhirhe na rhe vwẹ obaro na? A cha vwẹ arhọ ri bẹdẹ vwọ kẹ ayen. Ihwo buebun roro nẹ emu ọtiọyen cha sa phiaa kidie ikpe uriorin buebun yen ihworakpọ vwo ghwẹ cha re. Jẹ, ọhọre rẹ Ọghẹnẹ vwọ kẹ ihworakpọ ọyen ayen vwọ dia bẹdẹ. Ọ da dianẹ Adam ru umwemwu jovwoo, ohwo vuọvo rhe roro nẹ akpọ rẹ ughwu kanre cha sa dia uyotaa. Dede nẹ ọ pha bẹnbẹn enẹna re vwo rhẹro nẹ e che vwo arhọ ri bẹdẹ, jẹ e de roro kpahen osa rẹ Jihova reyọ arhọ rẹ Ọmọ rọyen ọghanghanre vwọ hwa na, ke se vwo imuẹro nẹ e se vwo arhọ ri bẹdẹ.​—Ro 8:32.

10. Die yen ihwo ra jẹreyọ na vẹ igodẹ efa na rhẹro rọyen?

¹⁰ Dede nẹ arhọ ri bẹdẹ ọyen erere ro che te ohwo obọ vwẹ obaro na, Jihova guọnọre nẹ avwanre roro kpahọn asaọkiephana. Ihwo ra jẹreyọ na rhẹro rẹ uvi akpeyeren vwẹ obodjuvwu rẹ ayen vẹ Kristi che vwo sun otọrakpọ na. (Ẹvw 20:6) Igodẹ efa na nẹ kiọkiọkiọ rẹ ayen cha vwọ dia iparadaisi rẹ ọmiaovwẹ vẹ uvweri kanre. (Ẹvw 21:3, 4) Wẹwẹ ọvo usun rẹ igodẹ efa na ro rhẹro rọ vwọ dia otọrakpọ na bẹdẹ? Osaẹhwa yena dia aro ephoro kẹ avwanree! Ọyen oborẹ Jihova vwo vwẹ ẹwẹn rọ vwọ ma ihworakpọ. Akpeyeren vwẹ otọrakpọ cha dia ọ rẹ omavwerhovwẹn.

11-12. Erhọ yen ebruphiyọ evo re se rhẹro rọyen vwẹ Iparadaisi na? (Ni ihoho na.)

¹¹ Vwẹ ẹro roro oborẹ akpeyeren cha dia vwọ kẹ wẹ vwẹ Iparadaisi vwẹ otọrakpọ na. Wọ cha ro ẹnwan rẹ ọga yẹrẹ ughwuu. (Aiz 25:8; 33:24) Jihova che ru kọdavwẹ kọdavwẹ rẹ obo ru wọ guọnọre eje vwọ kẹ wẹ. Die yen wọ guọnọ yono kpahen? Fizisi? Kẹmistri? Ihwehworo? Obo ra ya ihoho? Aphro herọọ nẹ a cha guọnọ ihwo ri si iplani rẹ iwevwin, ihwo ri ruiruo rẹ ebanbọn kugbe eghwẹrẹ. Vwọrẹ uyota, a je cha guọnọ ihwo re cha vwẹ ukẹcha phia, kerẹ ihwo ri che chere emu, ihwo ri che duvwun ekuakua ra vwọ wiowian, kugbe ihwo re cha kọn egba je vwẹrote ayen. (Aiz 35:1; 65:21) Kidie nẹ avwanre cha dia bẹdẹ, ku wọ cha mrẹ ọke vwo yono kpahen ona sansan ru wọ guọnọre.

¹² Mavọ yen ọ cha vwerhoma te re che vwo dede ihwo ra kpare nushi rhe! (Iru 24:15) Je vwẹ ẹro roro omavwerhovwẹn ru wọ cha mrẹ, wo che vwo yono kpahen Jihova phiyọ je fuẹrẹn erọnvwọn buebun rọ mare. (Un 104:24; Aiz 11:9) Obo re ma ghanre yen, ẹwẹn rhe kpokpo avwanre vwẹ ẹga rẹ avwanre vwọ kẹ Jihovaa! Wọ guọnọre nẹ ebruphiyọ nana eje va wẹ abọ fikirẹ ‘avwerhen rẹ umwemwu ọmọke krẹn’? (Hib 11:25) Ẹjo kakaka! Ebruphiyọ nana eje vrẹ kemu kemu re vwo ze enẹna. Karophiyọ, ọ dia kọke kọke yen avwanre che vwo rhẹro Iparadaisi vwẹ otọrakpọ vwẹ obaro naa. Vwọrẹ uyota, ọ cha rhe, ka je cha dia evunrẹ rọyen dẹn. Erọnvwọn nana eje rha sa phiaa, ọ da dianẹ Jihova vwo ẹguọnọ avwanre tẹ ẹdia ro de siobọnẹ Ọmọ rọyen nẹ o ghwu kẹ avwanree!

DJE ỌDAVWARO PHIA KPAHEN ẸGUỌNỌ RI JIHOVA

13. Idjerhe vọ yen e se vwo dje ọdavwaro kpahen ẹguọnọ ri Jihova? (2 Kọrẹnt 6:1)

¹³ Mavọ yen e se vwo dje ọdavwaro phia kẹ Jihova kpahen ọtanhirhe na? Ọyehẹ ra vwọ reyọ owian rọyen vwọ kobaro vwẹ akpeyeren. (Mt 6:33) Kidie avwanre riẹnre nẹ, Jesu ghwuru “rere otu ri yerẹn vwo jẹ yerẹn kẹ oma obọ rayen ọfa, ẹkẹvuọvo vwọ kẹ ohwo rọ vwẹ fikirẹ ayen ghwu ra da kparọ vrẹn na.” (2Kọ 5:15) Ọtiọyena, e jẹ a vwẹ ẹro okueku vwo nẹ ẹse ri Jihova re muwan rọyeen na.​—Se 2 Kọrẹnt 6:1.

14. Mavọ yen a sa vwọ vwẹroso odjekẹ ri Jihova?

¹⁴ E ji se dje ọdavwaro kpahen ẹguọnọ ri Jihova womarẹ a vwọ vwẹroso odjekẹ rọyen. Vwẹ idjerhe vọ? Siẹrẹ e de vwo erhiẹn rẹ avwanre che bru, kerẹ asan ra guọnọ yono ẹbe te yẹrẹ oka rẹ iruo rẹ avwanre guọnọ ru, e jẹ e vwo oniso rẹ oborẹ Jihova guọnọre. (1Kọ 10:31; 2Kọ 5:7) Siẹrẹ e de mu erhiẹn avwanre kpahen esegbuyota rẹ avwanre vwo kpahen Jihova, oyerinkugbe vẹ esegbuyota avwanre kọ cha rha ganphiyọ. Iphiẹrophiyọ avwanre kọ je cha ganphiyọ.​—Ro 5:3-5; Jem 2:21, 22.

15. Idjerhe vọ yen e se vwo dje ọdavwaro phia ọke rẹ Ẹkarophiyọ na?

¹⁵ O ji vwo idjerhe ọfa re se vwo dje ọdavwaro kpahen ẹguọnọ ri Jihova. Ọyehẹ ra vwọ reyọ uvwre ọke rẹ Ẹkarophiyọ na vwo dje kẹ Jihova oborẹ ọtanhirhe na ghanre te vwọ kẹ avwanre. Re vwo muegbe re vwo kpo Ẹkarophiyọ na, e ji se durhie ihwo efa nẹ e rhe. (1Ti 2:4) Nabọ dje kẹ ihwo ru wo che durhie na obo re che ru vwẹ Ẹkarophiyọ na. O che yovwin siẹrẹ wo de dje ividio rẹ Diesorọ Jesu Vwo Ghwu? kugbe Karophiyọ Ughwu rẹ Jesu vwọ kẹ ayen vwẹ jw.org. O ji fo nẹ ekpako durhie ihwo re dobọ rẹ uyono ẹra ji. Vwẹ ẹwẹn roro aghọghọ rọ cha dia odjuvwu vẹ otọrakpọ siẹrẹ ogodẹ ri Jihova ọvo ro bo ghwru de rhivwin rhe uchuru rọyen! (Lu 15:4-7) Vwẹ ẹdẹ Ẹkarophiyọ na, e jẹ avwanre yeren omoma rẹ avwanre ọvoo ẹkẹvuọvo e je yeren ihwo kpokpọ kugbe ihwo re rhe krire. E je dje kẹ ayen nẹ oma vwerhen avwanre ra vwọ mrẹ ayen!​—Ro 12:13.

16. Diesorọ e vwo ru bunphiyọ vwẹ iruo aghwoghwo na ọke rẹ Ẹkarophiyọ na?

¹⁶ Wo se ru bunphiyọ vwẹ iruo aghwoghwo wẹn uvwre ọke rẹ Ẹkarophiyọ na? Ọyen idjerhe ọvo wo se vwo dje ọdavwaro phia kpahen oborẹ Ọghẹnẹ kugbe Kristi ru kẹ avwanre. Re vwo muomaphiyọ ẹga ri Jihova ye, avwanre ke cha mrẹ ukẹcha rọyen, ọtiọyena ẹroẹvwọsuọ rẹ avwanre vwo kpahọn kọ cha rha ganphiyọ. (1Kọ 3:9) Vwọba, nabọ se isese ri Baibol rẹ Ẹkarophiyọ na rehẹ Fuẹrẹn Isiesi Ọfuanfon na Kẹdẹ Kẹdẹ yẹrẹ e rehẹ ekpeti rẹ ọbe uyono rẹ uvwre udugwhrẹn na. Wọ sa tobọ reyọ ẹkpo ri Baibol yena vwo ru uyono romobọ.

17. Die yen nẹrhẹ oma vwerhen Jihova? (Ni ekpeti na “Idjerhe Sansan E se Vwo Dje Ọdavwaro Phia Kpahen Ẹguọnọ ri Jihova.”)

¹⁷ Vwọrẹ uyota, ọ sa bẹn kẹ wẹ wo vwo nene iroroẹjẹ eje ra ta ota kpahen vwẹ uyono nana fikirẹ ẹdia ru wọ hepha. Ẹkẹvuọvo karophiyọ nẹ, Jihova reyọ obo ru wo ruru vwọ vwanvwẹ e rẹ ihwo efaa; ọ mrẹ obo rehẹ evunrẹ ubiudu wẹn. Siẹrẹ ọ da mrẹ nẹ wo dje ọdavwaro phia kpahen okẹ rẹ ọtanhirhe na, oma vwerhọn.​—1Sa 16:7; Mk 12:41-44.

18. Diesorọ e vwo dje ọdavwaro phia kẹ Jihova Ọghẹnẹ vẹ Jesu Kristi?

¹⁸ Ọtanhirhe na yen nẹrhẹ a sa vwẹ imwemwu avwanre vwo ghovwo avwanre, vwo uvi rẹ oyerinkugbe vẹ Jihova ji vwo iphiẹrophiyọ rẹ arhọ ri bẹdẹ. E jẹ a vwẹ ọkieje dje ọdavwaro phia kpahen ẹguọnọ ri Jihova, rọ nẹrhẹ ọ kẹ avwanre ebruphiyọ nana eje. (1Jọ 4:19) Vwọba, e jẹ e dje ọdavwaro phia kẹ Jesu, rọ reyọ arhọ rọyen vwọ kpahotọ kẹ avwanre kidie o vwo ẹguọnọ rẹ avwanre mamọ!​—Jọ 15:13.