Vwẹrokere Oruru ri Jesu Vwẹ Iruo Aghwoghwo Na

1. Ọrhọ yen orọnvwọn ọvo re vwo vughe ofẹnẹ rẹ idibo ri Jihova vẹ Inenikristi rẹ efian?

ORỌNVWỌN ọvo re vwo vughe ofẹnẹ rẹ idibo ri Jihova vẹ Inenikristi rẹ efian yen orurua rayen kpahen iruo aghwoghwo na. (Tai. 2:14) Dedena, o vwo ọkievo wọ vwọ mrẹ bẹnbẹn ru wo vwo vwo oruru kpahen iruo rẹ aghwoghwo na. Ọ sa dianẹ oma ru we kirobo rẹ ọkpako ọvo rọ wian gangan tare, “Ọkievo, owenvwe rẹ iruo aghwoghwo na nama rhe vwee.”

2. Die yen sa nẹrhẹ ọ bẹn e vwo vwo oruru rẹ iruo aghwoghwo na?

² Avwanre se vwo omavwerhovwẹn kpahen ẹdia iruo efa vwẹ ẹga ri Jihova vrẹ iruo aghwoghwo na. Diesorọ? Ọ sa dianẹ avwanre ghwa mrẹ erhuvwu rẹ oborẹ avwanre ruẹ na siẹrẹ e de vwobọ vwẹ iruo rẹ ebanbọn, vwẹrote iwevwin rẹ ukoko, vwẹ ukẹcha kẹ iniọvo rẹ oghwọrọ ri kpregede te oma yẹrẹ vwẹ ọbọngan kẹ iniọvo rẹ avwanre. Siẹrẹ e de nene iniọvo avwanre wian kuẹgbe, avwanre riavwerhen rẹ ufuoma kugbe ẹguọnọ kidie avwanre riẹnre nẹ ayen vwo ọdavwaro kpahen oborẹ avwanre ruẹ vwọ kẹ ayen. Vwọ vrẹ ọyena, ọ sa dianẹ ekogho vuọvo yen avwanre de ghwoghwo vwẹ ikpe buebun re, jẹ ihwo re kerhọ te emuọvoo. Yẹrẹ avwanre yan kanre ihwo re rhọnvwa nyo ovuẹ naa. Vwọba, oba na vwo siẹkẹrẹ phiyọ na, ihwo ki vwo utuoma kpahen ovuẹ rẹ avwanre na. (Mat. 10:22) Die yen sa cha avwanre uko vwọ sẹro yẹrẹ ru oruru avwanre vwo kpahen iruo aghwwoghwo na ganphiyọ?

3. Mavọ yen Luk 13:6-9 djisẹ rẹ oruru ri Jesu?

³ E se yono vwo nẹ udje ri Jesu kpahen obo re se vwo vwo oruru vwẹ iruo aghwoghwo na. Ọke ro vwo ruiruo rẹ aghwoghwo na, ọ vwẹ uphẹn kẹ oruru rọyen nẹ o shekpotọọ. Vwọrẹ uyota, ọke vwọ yanran na, o de muomaphiyọ iruo aghwoghwo na kpobarophiyọ. (Se Luk 13:6-9.) Kerẹ ohwo rọ vwẹrote ivaini rọ ghwọrọ ẹgbukpe erha soso vwọ vwẹrote urhe rẹ ifigi rọ rhọnvwe mọ ubi vuọvoo, ọtiọyen Jesu je ghwọrọ omarẹ ẹgbukpe erha vwo ghwoghwo kẹ ihwo ri Ju, buebun rayen rhọnvwe nyoo. Ẹkẹvuọvo, kirobo rẹ ohwo rọ vwẹrote ivaini na kpairoro vrẹ urhe rẹ ifigi na naa, ọtiọyen Jesu je kpairoro vrẹ ihwo naa yẹrẹ siobọ rẹ iruo aghwoghwo na kpotọọ. Ukpe ro vwo ru ọtiọyen, ọ da wian gangan rere o se vwo te ubiudu rayen.

4. Erhọ yen ẹdia ẹne vwẹ udje ri Jesu ra cha ta ota kpahen?

⁴ Vwẹ uyono nana, a cha ta ota kpahen oborẹ Jesu dje oruru phia, ma rho uvwre rẹ emeranvwe esan re koba rẹ iruo aghwoghwo rọyen. (Ni “After these things” rọhẹ study note ri Luk 10:1.) E de yono nẹ obo ro yonori je vwẹrokere obo ro ruru, ọ cha vwẹ ukẹcha kẹ avwanre vwo vwo oruru nonẹna. E jẹ a fuẹrẹn udje ri Jesu vwẹ ẹdia ẹne: (1) Ọ tẹnrovi ọhọre ri Jihova, (2) o vwo oniso rẹ aroẹmrẹ ri Baibol, (3) ọ vwẹroso Jihova nẹ ọ cha vwẹ ukẹcha kẹ ọyen, kugbe (4) o vwo imuẹro nẹ itu evo cha kerhọ rọyen.

Ọ TẸNROVI ỌHỌRE RI JIHOVA

5. Idjerhe vọ yen Jesu vwo djephia nẹ ọyen tẹnrovi eruo rẹ ọhọre rẹ Ọghẹnẹ?

⁵ Jesu ghwoghwo “iyẹnrẹn esiri rẹ Uvie” na vẹ oruru, kidie ọ riẹnre nẹ ọyen owian Ọghẹnẹ guọnọre nẹ ọyen ru. (Luk 4:43) Iruo aghwoghwo na yen Jesu ma vwọ karo vwẹ akpeyeren. Tobọ vwẹ emeranvwe re koba rẹ iruo aghwoghwo rọyen, o nẹ “orere kpo orere, nẹ ọko kpo ọko,” ro vwo yono ihwo efa. (Luk 13:22) O ji yono idibo efa ri che nene wian kerẹ ighwoghwota.​—Luk 10:1.

6. Idjerhe vọ iruo aghwoghwo na vwo churobọ si ewian efa rẹ Jihova vwọ kẹ avwanre nẹ e ru? (Ni uhoho na.)

⁶ Nonẹna, iruo aghwoghwo rẹ iyẹnrẹn esiri na yen Jihova vẹ Jesu guọnọre nẹ avwanre vwọ kobaro. (Mat. 24:14; 28:19, 20) Iruo aghwoghwo na vẹ ewian efa vwevunrẹ ukoko na churobọ si ohwohwo. Kerẹ udje, siẹrẹ e de ruiruo rẹ ebanbọn yẹrẹ ga vwẹ bẹtẹl, avwanre ruẹ enana vwo biẹcha iruo aghwoghwo na. Ọ dia a de vwomakpahotọ vwo biẹcha iniọvo oghworọ ri kpregede te oma ọvoo, ẹkẹvuọvo avwanre je vwẹ ukẹcha phia rere ayen sa vwọ ton uyono vẹ iruo aghwoghwo phiyọ. E de vwo ọmrẹvughe rẹ oborẹ iruo aghwoghwo na ghanre te, je karophiyọ nẹ ọyen owian rọ ma kenu rẹ Jihova guọnọre nẹ avwanre ru, ọnana kọ cha nẹrhẹ avwanre vwo owenvwe re vwo vwobọ vwẹ iruo aghwoghwo na ọkieje. János, ọkpako ọvo vwẹ Hungary, tare nẹ, “Me karophiyọ oma mẹ nẹ o vwo iruo vuọvo re se vwo wene iruo aghwoghwo naa; ọyen owian rẹ avwanre rọ ma kenu kparobọ.”

7. Diesorọ Jihova vwọ guọnọ nẹ e muomaphiyọ iruo aghwoghwo na ọkieje? (1 Timoti 2:3, 4)

⁷ E se ru oruru rẹ avwanre kpahen iruo aghwoghwo na ganphiyọ siẹrẹ a da vwẹ ẹro rẹ Jihova vwo nẹ ihwo vwo nẹ ayen. Ọ guọnọre nẹ koka koka rẹ ihwo nyo iyẹnrẹn esiri na ji rhiabọreyọ. (Se 1 Timoti 2:3, 4.) Ọtiọyena, ko yono avwanre rere a sa vwọ tẹn ona rẹ obo re se vwo ghwoghwo ovuẹ nana ro che sivwin arhọ rẹ ihwo na. Kerẹ udje, ibroshọ ri Vwo Ẹguọnọ rẹ Ihwo​—Yono Ayen Vwọ Dia Idibo vwo iroroẹjẹ sansan phia re sa vwẹ ukẹcha kẹ avwanre vwọ tuẹn otaẹtakuẹgbe phiyọ vẹ ẹwẹn re vwo gbe idibo. Ọ da tobọ dianẹ ihwo rhọnvwe kerhọ enẹnaa, ayen vwẹ uphẹn ayen se vwo ru ọtiọyen tavwen ukpokpogho rode na ki vwo oba. Ọ sa dianẹ oborẹ avwanre vuẹ ayen enẹna yen che mu ayen vwo ku ẹwẹn rhẹriẹ vwẹ obaro na. Jẹ, ọnana sa phia ọ da dianẹ e muomaphiyọ iruo aghwoghwo na ọkieje.

O VWO ONISO RẸ AROẸMRẸ RI BAIBOL

8. Aroẹmrẹ ri Baibol vọ yen vwẹ ukẹcha kẹ Jesu vwọ reyọ ọke rọyen vwo ruiruo vwẹ idjerhe ro fori?

⁸ Jesu vwo ẹruọ rẹ oborẹ aroẹmrẹ ri Baibol che rugba wan. Ọ riẹnre nẹ ẹgbukpe erha gbẹ ubro yen iruo aghwoghwo rọyen che kri te. (Dan. 9:26, 27) Ọ je riẹn aroẹmrẹ ro shekpahen ọke vẹ obo ro che ghwu wan. (Luk 18:31-34) Vẹ iroro yena vwẹ ẹwẹn, Jesu da vwẹ ọke rọyen vwo ruiruo vwẹ idjerhe ro fori. Ọtiọyena, o de ghwoghwo vẹ oruru rere o se vwo ruiruo ra vwọ kẹ na re.

9. Diesorọ aroẹmrẹ ri Baibol na vwo mu avwanre vwo ghwoghwo vẹ oruru?

⁹ Siẹrẹ e de vwo ẹruọ rẹ aroẹmrẹ ri Baibol, ọnana se mu avwanre vwo ghwoghwo vẹ oruru. Avwanre riẹnre nẹ ọke ro chekọ vwọ kẹ eyeren nana rhe te emuọvoo. Avwanre je mrẹ nẹ oborẹ Baibol na ta phiyotọ nẹ e che vwo vughe ẹdẹ oba na kugbe obo re phia vwẹ akpọ na vẹ iruemu rẹ ihwo djephia nonẹna abavo. Avwanre ji vwo oniso rẹ oborẹ ẹvwọsuọ rẹ ẹgba usuon rẹ Anglo-America vẹ Russia kugbe ihwo ri biẹcha vwo ru orugba rẹ aroẹmrẹ ro shekpahen ovie rẹ obọrhen ọnre na vẹ ovie rẹ obohwẹre ọnre na vwẹ “ọke rẹ obo oba na.” (Dan. 11:40) Vwọba, kirobo re djisẹ rọyen vwẹ Daniẹl 2:43-45, avwanre riẹnre nẹ ẹgba usuon rẹ Anglo-America mudiaphiyọ awọ rẹ oma na. Ọtiọyena avwanre vwo imuẹro nẹ kirobo ri Baibol na djere, kẹrẹkpẹ​—o rhe che krii​—Uvie rẹ Ọghẹnẹ kọ cha ghwọrọ isuon rẹ ihworakpọ eje. Aroẹmrẹ nana eje djerephia nẹ avwanre yerẹn vwẹ ọke rẹ oba na, ọnana ko mu avwanre vwo ghwoghwo vẹ okpakpa.

10. Mavọ yen aroẹmrẹ ri Baibol evo sa nẹrhẹ oruru rẹ avwanre ganphiyọ?

¹⁰ Aroẹmrẹ ri Baibol kẹ avwanre ovuẹ re che ghwoghwo vẹ oruru. Oniọvo aye ọvo rọ ga vwẹ Dominican Republic re se Carrie, tare nẹ, “Ive rẹ erhuvwu ri Jihova kpahen obaro na mu vwe vwọ vuẹ ihwo efa kpahen uyota na. Siẹrẹ me da mrẹ oborẹ ihwo hirharokuẹ nonẹna, ki mi no nẹ ọ dia omẹvwẹ ọvo yen e ve ive nana kẹẹ, ẹkẹvuọvo ji te ayen rhe.” Aroẹmrẹ ri Baibol na nẹrhẹ avwanre siomaukoo, kidie avwanre riẹnre nẹ Jihova yehẹ obuko rẹ iruo aghwoghwo avwanre na. Leila, rọ dia Hungary, tare nẹ: “Aizaya 11:6-9 nẹrhẹ mi ghwoghwo iyẹnrẹn esiri na kẹ ihwo ri ruẹ kerẹsiẹ a da mrẹ nẹ ayen che nyoo. Me riẹnre nẹ womarẹ ukẹcha ri Jihova kohwo kohwo se ru ewene.” Christopher ro nẹ Zambia rhe, da rha tanẹ: “Kirobo rẹ Mak 13:10 mraro rọyen phiyotọ nẹ e che ghwoghwo iyẹnrẹn esiri na ro akpọ na eje, oma vwerhen ovwẹ nẹ mi vwobọ vwẹ orugba rẹ aroẹmrẹ yena.” Aroẹmrẹ ri Baibol vọ yen mu we vwo ghwoghwo ọkieje?

Ọ VWẸROSO JIHOVA NẸ Ọ CHA VWẸ UKẸCHA KẸ ỌYEN

11. Diesorọ o vwo fo rẹ Jesu vwọ vwẹroso Jihova vwọ kẹ ukẹcha vwo ghwoghwo vẹ oruru ọkieje? (Luk 12:49, 53)

¹¹ Jesu vwẹroso Jihova nẹ ọ cha vwẹ ukẹcha kẹ ọyen vwo ghwoghwo vẹ oruru ọkieje. Dede nẹ Jesu ọyen ohwo vẹ aghẹnghẹn, ọ riẹnre nẹ iyẹnrẹn esiri rẹ Uvie na cha so aphro ọgangan je ghwa ẹvwọsuọ rhe. (Se Luk 12:49, 53.) Fikirẹ iruo aghwoghwo ri Jesu, abọ buebun yen ilori ẹga na davwẹngba vwo hwe. (Jọn 8:59; 10:31, 39) Dedena Jesu ghwoghwori ọkieje kidie ọ riẹnre nẹ Jihova vẹ ọyen herọ. Ọ da ta: ‘Ọ dia omẹvwẹ ọvo yen herọọ, ẹkẹvuọvo Ọsẹ na ro ji vwe rhe na vẹ ovwẹ herọ. . . . Ọ yanjẹ uvwe vwo nẹ mẹvwẹ ọvo diaa, kidie ọkieje yen mi vwo ruẹ erọnvwọn ri je.’​—Jọn 8:16, 29.

12. Mavọ yen Jesu muegbe rẹ idibo rọyen vwo ghwoghwo ọkieje vwẹ ọke rẹ omukpahen?

¹² Jesu karophiyọ idibo rọyen nẹ ayen sa vwẹroso Jihova nẹ o che bicha ayen. Abọ buebun yen Jesu vwẹ imuẹro kẹ ayen nẹ Jihova cha vwẹ ukẹcha kẹ ayen ọ da tobọ dianẹ ayen hirharoku omukpahen. (Mat. 10:18-20; Luk 12:11, 12) Ọtiọyena, ọ da vuẹ ayen nẹ ayen gbẹrophiyotọ. (Mat. 10:16; Luk 10:3) Ọ vuẹ ayen nẹ ayen gba ihwo re guọnọ nyoo vwo nyo ovuẹ rayeen. (Luk 10:10, 11) Ọ je ta kẹ ayen nẹ ayen djẹ siẹrẹ e de muẹkpahen ayen. (Mat. 10:23) Dede nẹ Jesu ọyen ohwo vẹ oruru rọ je vwẹroso Jihova, o phi arhọ rọyen phiyọ imuoshọ rẹ ọkamukaa.​—Jọn 11:53, 54.

13. Diesorọ o vwo muwẹro nẹ Jihova cha vwẹ ukẹcha kẹ wẹ?

¹³ Nonẹna siẹrẹ avwanre de hirharokuẹ ẹvwọsuọ, a guọnọ ukẹcha ri Jihova e se vwo ghwoghwo vẹ oruru ọkieje. (Ẹvwọ. 12:17) Diesorọ o vwo muwẹro nẹ Jihova che bicha wẹ? Roro kpahen ẹrhovwo ri Jesu re si phiyọ Jọn uyovwin 17. Jesu rẹ Jihova nẹ ọ rhẹrẹ iyinkọn na, Jihova da kpahenphiyọ oyare yena. Ọbe rẹ Iruo rẹ Iyinkọn Na niyẹnrẹn rẹ obo rọ vwẹ ukẹcha kẹ iyinkọn na vwo ghwoghwo vẹ oruru dede nẹ ayen hirharoku omukpahen. Vwẹ ẹrhovwo rọyen, Jesu je rẹ Jihova nẹ ọ sẹro rẹ ihwo ri se oborẹ iyinkọn na ghwoghwori gbuyota. Wẹ jehẹ usun rẹ ihwo na. Jihova je rhe dobọ rẹ ẹkpahọnphiyọ ẹrhovwo ri Jesu na jii; Ọ je cha vwẹ ukẹcha kẹ wẹ kirobo ro ji ru kẹ iyinkọn na.​—Jọn 17:11, 15, 20.

14. Mavọ yen avwanre ru riẹn nẹ e se ruiruo aghwoghwo na vẹ oruru ọkieje? (Ni uhoho na.)

¹⁴ Avwanre cha mrẹ ukẹcha ra guọnọre eje, ọ da tobọ dianẹ ọ bẹnre e vwo ghwoghwo vẹ oruru oba na vwo siẹkẹrẹ na. (Luk 21:12-15) Kerẹ Jesu vẹ idibo rọyen, avwanre vwẹ uphẹn kẹ ihwo vwo brorhiẹn sẹ ayen cha kerhọ yẹrẹ ayen cha sen, avwanre je kẹnoma kẹ aphro rẹ ọkamuka. Vwẹ ẹkuotọ ra da tobọ siobọ rẹ iruo avwanre kpotọ dede, iniọvo na ji se ghwoghwo iyẹnrẹn esiri na ọkieje kidie ayen vwẹroso Jihova, ọ dia ẹgba romobọ rayeen. Kirobo rẹ Jihova kẹ idibo rọyen ẹgba vwẹ ẹgbukpe ujorin rẹsosuọ, ọtiọyen ọ je kẹ avwanre ẹgba nonẹna rere a sa vwọ “nabọ ruiruo rẹ aghwoghwo na fiotọ” kirobo rọ guọnọre. (2 Tim. 4:17) Wọ da vwẹroso Jihova, imuẹro herọ nẹ wo se ruiruo aghwoghwo na vẹ oruru ọkieje.

O VWO IMUẸRO NẸ ITU EVO CHA KERHỌ

15. Die yen djerephia nẹ Jesu vwo imuẹro nẹ erhuvwu che nẹ iyẹnrẹn esiri na rhe?

¹⁵ Jesu vwo imuẹro nẹ ihwo evo cha kerhọ rẹ iyẹnrẹn esiri na. Ọnana da nẹrhẹ o ghwoghwo iyẹnrẹn esiri na vẹ oruru. Kerẹ udje, oba rẹ ukpe ri 30 C.E., ọ vwọ ton iruo aghwoghwo rọyen phiyọ nu, Jesu da rhe mrẹ nẹ ihwo buebun herọ re guọnọ kerhọ kẹ ovuẹ rọyen na, ọ da reyọ ayen vwo dje udju rọ vware rẹ orhọ rọyen ghwo te evuo re. (Jọn 4:35) Omarẹ ẹgbukpe ọvo vwọ wan nu, ọ da vuẹ idibo rọyen: “Orhọ na rhoro.” (Mat. 9:37, 38) Ọke vwọ yanran na, ọ da rhoma kanrunumuo nẹ: “Orhọ na rhoro . . . Ovwan rẹ Onini rẹ orhọ na nẹ o ji ewiowian ro evunrẹ orhọ rọyen.” (Luk 10:2) Jesu nabọ vwo imuẹro nẹ ihwo cha kerhọ kẹ iyẹnrẹn esiri na, oma vwerherọ ayen vwo ru ọtiọyen.​—Luk 10:21.

16. Idjerhe vọ yen udje ri Jesu vwo dje oboresorọ a vwọ vwẹ ẹro abavo vwo nẹ iruo aghwoghwo na? (Luk 13:18-21) (Ni uhoho na.)

¹⁶ Jesu yono idibo rọyen nẹ siẹrẹ ayen da vwẹ ẹro abavo vwo ni ovuẹ rayen, ọnana cha nẹrhẹ ayen sẹro rẹ oruru rayen. Kerẹ udje, e jẹ a fuẹrẹn idje rọyen ivẹ. (Se Luk 13:18-21.) Vwẹ udje ọvo ri Jesu ruru, ọ reyọ ubi rẹ imọstadi vwo dje oborẹ ovuẹ rẹ Uvie na cha hẹrabọ ro asan eje vwọrẹ igbevwunu, nẹ ọtiọyen ihwo buebun ji che rhiaboreyọ iyẹnrẹn esiri na, nẹ o vwo emu vuọvo rọ cha sa dobọ rẹ ọnana jii. Ọ je reyọ iphuephu vwo dje oborẹ ovuẹ rẹ Uvie na cha hrabọ nene asan eje, rọ cha nẹrhẹ ihwo ru ewene re che niso ugege yenaa. Ọtiọyena, Jesu da vwẹ imuẹro kẹ idibo rọyen nẹ ovuẹ rẹ ayen ghwoghwo na cha vwẹ ukẹcha kẹ ihwo buebun.

17. Erhọ yen iroro evo re sorọ e vwo vwo imuẹro nẹ erhuvwu che nẹ iruo aghwoghwo na rhe?

¹⁷ Nonẹna siẹrẹ avwanre da mrẹ oborẹ iruo aghwoghwo na vwẹ ukẹcha kẹ ihwo buebun vwẹ akpọ na eje, ọnana ko muẹ avwanre vwo ghwoghwo vẹ oruru. Kukpe kukpe yen iduduru rẹ ihwo ri dje omavwerhovwẹn phia vwo kpo Ẹkarophiyọ rẹ Ughwu ri Jesu ji nene avwanre yono Baibol na kuẹgbe. Uriorin buebun yen bromaphiyame je vwomaba avwanre vwẹ iruo aghwoghwo na. Avwanre riẹn uchunu rẹ ihwo ri ji che rhiabọreyọ iyẹnrẹn esiri naa, ẹkẹvuọvo avwanre riẹnre nẹ Jihova koko otu gbidigbidi re cha wan ukpokpogho rode na vrẹ. (Ẹvwọ. 7:9, 14) Onini rẹ orhọ na vwo imuẹro nẹ ihwo buebun che rhiabọreyọ iyẹnrẹn esiri na, ọtiọyena ọkieje kọyen e che vwo ghwoghwo.

18. Die yen avwanre guọnọre nẹ ihwo efa niso vwẹ oma rẹ avwanre?

¹⁸ Orọnvwọn ọvo re vwo vughe idibo ri Jesu yen oruru rayen kpahen iruo aghwoghwo na. Ọke rẹ ihwo vwọ mrẹ uduoyivwin rẹ iyinkọn na, “ayen de rhi noso nẹ ayen vẹ Jesu yen gba herọ jovwo.” (Iruo 4:13) Siẹrẹ ihwo da mrẹ avwanre vwẹ iruo aghwoghwo na, e jẹ ayen vwo oniso nẹ avwanre vwẹrokere udje rẹ oruru ri Jesu.