E Vwo Sikẹrẹ Ohwohwo Phiyọ Ọyen Obo ri Yovwirin!

1-2. Die yen orọnvwọn ọvo rọ ma ghanre vwọ kẹ Jihova, kẹ die yen ọ guọnọre nẹ avwanre ru?

OBO ra vẹ ihwo efa yerẹn wan ghanre mamọ vwọ kẹ Jihova. Jesu yonori nẹ e vwo ẹguọnọ rẹ ọrivẹ avwanre kirobo re vwo ẹguọnọ rẹ oma avwanre. (Mat. 22:37-39) Ọnana churobọ si e vwo dje uruemu esiri vwọ kẹ ihwo rẹ avwanre vẹ ayen vwo esegbuyota vuọvoo. E de dje uruemu esiri tiọyena phia, jẹ a vwẹrokere Jihova Ọghẹnẹ avwanre, rọ “nẹrhẹ ọnre rọyen lo muẹ ihwo umwemwu vẹ ihwo esiri, ọ je nẹrhẹ osio rhọ kuẹ evwata kugbe ihwo ri jẹ evwata ẹdia.”—Mat. 5:45.

² Dede nẹ Jihova vwo ẹguọnọ rẹ ihworakpọ eje, ihwo ri ruẹ obo ri yovwirin yen o me vwo ẹguọnọ rayen. (Jọn 14:21) Ọ guọnọre nẹ a vwẹrokere ọyen. O jiriro kẹ avwanre nẹ e vwo “ẹguọnọ okokodo” kpahen iniọvo avwanre ji dje “uvi rẹ ẹguọnọ” kẹ ayen. (1 Pita 4:8; Rom 12:10) Ẹwẹn avwanre sa djẹ kpo uvi oyerinkugbe avwanre vẹ ohwo rẹ orua yẹrẹ ugbeyan ọghanghanre vwori, e de roro kpahen obo re se vwo dje uvi ẹguọnọ tiọyena kẹ ohwo.

3. Siẹrẹ a da ta ota kpahen ẹguọnọ, die yen ofori nẹ a karophiyọ?

³ Ẹguọnọ pha kerẹ okankọn ra kọnre rọ guọnọ ẹroevwote rere ọ sa vwọ rho. Ọyinkọn Pọl vwẹ uchebro kẹ Inenikristi nẹ: “Ovwan vwo ẹguọnọ rẹ ohwohwo ọkieje kerẹ iniọvo.” (Hib. 13:1) Jihova guọnọre nẹ e dje ẹguọnọ kẹ ihwo efa ọkieje. Uyono nana cha ta ota kpahen oboresorọ o vwo fo e vwo sikẹrẹ iniọvo avwanre phiyọ kugbe obo re se vwo ru ọtiọyen ọkieje.

OBORESORỌ O VWO FO E VWO SIKẸRẸ OHWOHWO PHIYỌ

4. Vwo nene obo rehẹ Une rẹ Ejiro 133:1, mavọ yen e se vwo dje ọdavwaro kpahen okugbe rẹ iniọvo avwanre? (Ni uhoho na.)

⁴ Se Une rẹ Ejiro 133:1. Avwanre rhọnvwephiyọ oborẹ ọbuine na siri nẹ ọyen obo ri “yovwirin” rọ je “vwerhoma” ra vẹ iniọvo avwanre ri vwo ẹguọnọ ri Jihova vwo vwo uvi rẹ oyerinkugbe. Jẹ, kirobo rẹ ohwo sa vwẹ ẹro ri phovwin vwo nẹ urhe rode rọ mrẹ kẹdẹ kẹdẹ ye, avwanre je sa vwẹ ẹro ri phovwin vwo ni erhuvwu rẹ okugbe rẹ iniọvo avwanre. Avwanre mrẹ iniọvo avwanre kọke kọke, ọkievo abọ buebun vwẹ udughwrẹn. Mavọ yen e se vwo dje ọdavwaro phia kẹ ayen? Siẹrẹ a da ghwọrọ ọke vwo roro kpahen oborẹ iniọvo avwanre ọvuọvo ghanre te vwọ kẹ ukoko na ji te avwanre komobọ, ẹguọnọ rẹ avwanre vwo kpahen ayen kọ cha ganphiyọ.

5. Die yen ẹguọnọ avwanre kpahen ohwohwo se ru vwẹ oma rẹ ihwo efa?

⁵ Obọ rẹsosuọ ihwo evo ka vwọ rhe uyono avwanre je mrẹ ẹguọnọ rẹ avwanre vwo kpahen ohwohwo, ọnana te ẹwẹn rayen mamọ. Fikirẹ obo rẹ ayen mrẹre, ayen sa tanẹ ayen mrẹ uyota na re. Jesu da ta: “Womarẹ ọnana yen ihwo eje cha vwọ riẹn nẹ ovwan idibo mẹ—ọ da dianẹ ovwan vwo ẹguọnọ vwẹ ohri rẹ ovwan.” (Jọn 13:35) Roro kpahen obo re phia kẹ Chaithra, ọmọ ro kpo yunivasiti ro nene Iseri ri Jihova yono Baibol na. E durhire kpo ọghwẹkoko rode ọ da rhọnvwe nẹ ọyen cha ra. Ọ vwọ ra vwẹ ẹdẹ rẹsosuọ nu, ọ da vuẹ ohwo rọ vwẹ Baibol yono nẹ: “Ọsẹ vẹ oni mẹ je rhe gbanọ ovwẹ dẹvoo. Jẹ vwẹ ọghwẹkoko rẹ ovwan, ihwo 52 yen gbanọ ovwẹ vwẹ ẹdẹ ọvo! Womarẹ orua nana me da rhe mrẹ ẹguọnọ ri Jihova. Me guọnọ dia ọvo usun rẹ orua nana.” Ọkieje kọyen Chaithra vwọ yanphiaro, o de rhi bromaphiyame vwẹ 2024. Vwọrẹ uyota, siẹrẹ ihwo kpokpọ da mrẹ iruo esiri rẹ avwanre, ji te ẹguọnọ re vwo kpahen ohwohwo, ọnana mu ayen vwọ vwẹ ẹga kẹ Jihova.—Mat. 5:16.

6. Re vwo siẹkẹrẹ iniọvo avwanre phiyọ, idjerhe vọ yen ọ vwọ dia ekpọfia?

⁶ E vwo siẹkẹrẹ iniọvo avwanre sa dia ekpọfia vwọ kẹ avwanre. Pọl jiriro vwọ kẹ Inenikristi nẹ: “Ovwan rhe phiuduphiyọ ohwohwo awọ kẹdi kẹdẹ . . . rere ẹgba rẹ ophiẹnvwe rẹ umwemwu vwo jẹ ubiudu rẹ ohwo vuọvo vwẹ usun rẹ ovwan eruo gan.” (Hib. 3:13) Ọ da dianẹ ofu dje avwanre te ẹdia rẹ awọ avwanre ke guọnọ bo ghwrẹ nẹ idjerhe rẹ uyota na, Jihova sa reyọ oniọvo ro nẹ emu sua vwọ vwẹ ukẹcha ro fori vwọ kẹ avwanre. (Une 73:2, 17, 23) Oka rẹ uchebro tiọyena ghini yovwin kẹ avwanre.

7. Idjerhe vọ yen ẹguọnọ kugbe okugbe vwo churobọ si ohwohwo? (Kọlose 3:13, 14)

⁷ Avwanre riavwerhen rẹ ebruphiyọ buebun kidie avwanre usun rẹ ẹko rẹ ihwo re wian gangan e vwo dje ẹguọnọ kẹ ohwohwo. (1 Jọn 4:11) Kerẹ udje, ẹguọnọ nẹrhẹ e “chirakon rẹ ohwohwo,” ọnana toroba okugbe rẹ iniọvo avwanre. (Se Kọlose 3:13, 14; Ẹfe. 4:2-6) Ọtiọyena, avwanre ke riavwerhen rẹ emẹvwa avwanre, asan rọ pha riẹin rẹ avwanre da ga ẹga ra mrẹ ọkpọ rọyen vwẹ akpọ naa.

MUỌGHỌ KẸ OHWOHWO

8. Die yen Jihova ruru vwọ cha avwanre uko vwọ dia vwọrẹ okugbe?

⁸ Okugbe rẹ akpọ eje rẹ avwanre riavwerhen rọyen na igbunu. Dede nẹ avwanre ihwo re gbaree, Jihova yen ruro ọ sa vwọ dia ọtiọyen. (1 Kọr. 12:25) Baibol na tare nẹ ‘Ọghẹnẹ yono avwanre obo re vwo ẹguọnọ rẹ ohwohwo nure.’ (1 Tẹsa. 4:9) Kọyen, Jihova womarẹ Baibol na vuẹ avwanre obo ro fori nẹ e ghini ru, e se vwo sikẹrẹ ohwohwo phiyọ. Ọghẹnẹ se “yono avwanre” womarẹ a vwọ frẹkotọ fuẹrẹn iyono rọyen je reyọ ayen vwo ruiruo. (Hib. 4:12; Jems 1:25) Ọyena ghwa hẹ oborẹ Iseri ri Jihova davwẹngba vwo ruẹ.

9. Die yen e yono nẹ Rom 12:9-13 kpahen ọghọemuo?

⁹ Idjerhe vọ yen Ota rẹ Ọghẹnẹ vwo yono avwanre vwo siẹkẹrẹ ohwohwo phiyọ? Roro kpahen oborẹ Pọl ta kpahen ota nana vwẹ Rom 12:9-13. (Se.) Jokaphiyọ eta nana “a da ta ota kpahen ọghọemuo, ovwan kobaro rọyen.” Die yen otọ rẹ eta yena? Ofori nẹ a jowọ e vwo dje “uvi ẹguọnọ” kẹ ihwo efa womarẹ a vwọ reyọ vwo ghovwo ayen, re vwo dede ayen, re vwo ru ẹse kẹ ayen ji te erọnvwọn efa. (Ẹfe. 4:32) Ọtiọyena, o rhe fo nẹ a hẹrhẹ iniọvo na nẹ ayen yen che sikẹrẹ avwanree. Wọ sa “kobaro” wo vwo ru ọtiọyen. Jesu tarọ phephẹn nẹ: “Omavwerhovwẹn herọ ra vwọ kẹ okẹ vrẹ ra vwọ reyọ.”—Iruo 20:35.

10. A da ta ota kpahen “ọghọemuo” idjerhe vọ yen a sa vwọ dia egbowian? (Ni uhoho na.)

¹⁰ Ọ vwerhoma nẹ, ugege rẹ Pọl vwọ vuẹ avwanre nẹ a da ta ota kpahen ọghọemuo avwanre kobaro rọyen nu, ọ da tanẹ a ‘dia egbowian, ọ dia evwiẹrẹẹ.’ Ọgbowian ọyen ohwo vẹ oruru rọ wian gangan. Siẹrẹ a da vwẹ owian vwọ kẹ, ọ nabọ gbẹrophiyotọ vwo ruo. Isẹ 3:27, 28 vuẹ avwanre nẹ: ‘Wọ vwẹ emu esiri djahe uko kẹ ohwo ro rherhevii, siẹ rẹ ogangan na de rhe we wo vwo ruo.’ Ọtiọyena, siẹrẹ avwanre da mrẹ ohwo rọ guọnọ ukẹcha, avwanre ru oborẹ avwanre se ru eje a sa vwọ vwẹ ukẹcha kẹ. Avwanre rhe bibe; yẹrẹ no nẹ ohwo ọfa cha vwẹrote ẹdia naa.—1 Jọn 3:17, 18.

11. Die yen sa vwẹ ukẹcha kẹ avwanre vwo sikẹrẹ ohwohwo phiyọ?

¹¹ Idjerhe ọfa e se vwo muọghọ kẹ ihwo efa yen a vwọ fobọ vwo ghovwo ayen siẹrẹ ayen de gbe avwanre ku. Ẹfesọs 4:26 tare nẹ: ‘Wo jẹ ọnre she ghene uwe rẹ wo ji vwo muophu naa.’ Diesorọ? Owọ 27 vuẹ avwanre nẹ e de ru ọtiọyen jẹ a ‘vwẹ uphẹn kẹ Idẹbono.’ Vwẹ Baibol na, abọ buebun yen Jihova vuẹ avwanre nẹ e vwo ghovwo ohwohwo. Kọlose 3:13 jiriro kẹ avwanre nẹ e “rhe . . . vwo ghovwo ohwohwo ọphẹ.” Ra vwọ reyọ oruchọ vẹ ogbeku rẹ ihwo vwo ghovwo ayen, ọnana nẹrhẹ avwanre siẹkẹrẹ ayen phiyọ. Siẹrẹ e de ru ọtiọyen, ọ nẹrhẹ a “sẹro rẹ okugbe rẹ ẹwẹn na” ro churu avwanre kugbe vwọrẹ ufuoma. (Ẹfe. 4:3) Vwọrẹ uyota, evwoghovwo toroba okugbe vẹ ufuoma rẹ avwanre.

12. Idjerhe vọ yen Jihova vwọ vwẹ ukẹcha kẹ avwanre vwọ reyọ vwo ghovwo?

¹² Vwọrẹ uyota, a sa mrẹ bẹnbẹn a vwọ reyọ vwo ghovwo ihwo re gbe avwanre ku. Jẹ e se ru ọtiọyen womarẹ ukẹcha ẹwẹn ọfuanfon na. Baibol na vwọ vuẹ avwanre nẹ e vwo “uvi rẹ ẹguọnọ kpahen ohwohwo” je “dia egbowian” nu, ọ da ta: “Jẹ ẹwẹn ọfuanfon na phi oruru phiyọ ovwan oma.” Ohwo vẹ “oruru” ọyen ohwo ro vwo “owenvwe vẹ osasavwe” fikirẹ ẹwẹn ọfuanfon na ro ruiruo vwẹ oma rọyen. (Rom 12:11.) Ọtiọyena, ẹwẹn ọfuanfon rẹ Ọghẹnẹ sa nẹrhẹ e dje uvi rẹ ẹguọnọ ji vwo ghovwo ohwohwo ọphẹ. Kọyensorọ, avwanre vwọ nabọ rẹ Jihova nẹ ọ vwẹ ukẹcha kẹ avwanre.—Luk 11:13.

‘E JẸ A MRẸ OHẸRIẸ VWẸ OHRI RẸ OVWAAN’

13. Die yen sa so ohẹriẹ phiyọ ohri rẹ avwanre?

¹³ “Koka koka rẹ ihwo” ri vwo ẹkuruemu sansan ri ji nẹ asan sansan rhe yehẹ evunrẹ ukoko na. (1 Tim. 2:3, 4) E rhe nomasoo, ofẹnẹ nana sa so ohẹriẹ fikirẹ ojevwe romobọ kerẹ irhuon vẹ osẹnvwe, ẹdia rẹ oma kpokpọ kugbe erọnvwọn ra vwọ diotọ. (Rom 14:4; 1 Kor. 1:10) Ofori nẹ a jomaotọ e vwo jẹ tanẹ ojevwe rẹ avwanre yovwin vrẹ ọ rẹ ihwo efa kidie ‘Ọghẹnẹ yono avwanre obo re vwo ẹguọnọ rẹ ohwohwo nure.’—Fil. 2:3.

14. Die yen ofori nẹ avwanre davwẹngba vwo ru ọkieje, kẹ diesorọ?

¹⁴ Avwanre je sa kẹnoma kẹ ohẹriẹ vwevunrẹ ukoko na womarẹ a vwọ davwẹngba vwo nene ihwo vwo yerẹn vwọrẹ ufuoma ji phiuduphiyọ ayen awọ. (1 Tesa. 5:11) Okrinọọ na, ihwo buebun re dobọ rẹ uyono ẹra ji yẹrẹ re si nẹ ukoko na rhoma rhivwin rhe. Avwanre dede ayen sasasa! (2 Kọr. 2:8) Jokaphiyọ obo re phia kẹ oniọvo aye ọvo rọ dobọ uyono ẹra ji ẹgbukpe ihwe ọ vwọ rhoma rhivwin rhe Ọguan Ruvie. Ọ da ta, “Ayen bẹre ehwẹ je sa vwẹ obọ ọke rẹ ayen vwo yeren uvwe.” (Iruo 3:19) Die yen uruemu esiri nana re dje kẹ na ru vwẹ oma rọyen? Ọ da ta, “Ọ nẹrhẹ me riẹn nẹ Jihova guọnọre nẹ me rhoma vwo omavwerhovwẹn.” Siẹrẹ a da dia ihwo ri phiuduphiyọ ohwohwo awọ, Jesu sa reyọ avwanre vwọ vwẹ ukẹcha kẹ ihwo re “wian gangan re ji krun oghwa nyẹ” vwo ru oghwa rayen phapharhe.—Mat. 11:28, 29.

15. Ọrhọ yen idjerhe ọfa e se vwo toroba okugbe rẹ ukoko na? (Ni uhoho na.)

¹⁵ Idjerhe ọfa e se vwo toroba okugbe yen womarẹ oborẹ avwanre ta. Job 12:11 tare nẹ: “Orhọn rha davwẹn eta nẹ kirobo rẹ ẹrẹnvwe unu davwẹn emu?” Kirobo rẹ ohwo rọ nabọ riẹn emu chere davwen emu nẹ sẹ ọ nabọ vwerhen tavwen ọ ke jẹ vwọ kẹ ihwo efa, ọtiọyen o ji fo nẹ a nabọ jomaotọ vwo roro kpahen obo ra cha ta tavwen a ke ta. (Une 141:3) Ọtiọyena e jẹ a davwẹngba ọkieje rere oborẹ avwanre cha ta se vwo phiuduphiyọ ihwo awọ, sasa ayen oma ji “fierere kẹ ihwo ri nyoro.”—Ẹfe. 4:29.

16. Amono yen a ma guọnọ nẹ e ta eta rẹ ọbọngan?

¹⁶ Ofori nẹ eshare re rọvwọnre kugbe emiọvwọn ta eta re sa vwẹ ọbọngan kẹ ihwo efa. (Kọl. 3:19, 21; Tai. 2:4) Kerẹ ihwo re vwẹrote igodẹ ri Jihova, o ji fo nẹ ekpako ta eta rẹ ọbọngan ji phiuduphiyọ ihwo awọ. (Aiz. 32:1, 2; Gal. 6:1) Isẹ ọvo vwẹ Baibol na tare nẹ: “Ubiota rọ shamu—mavọ oyovwi te!”—Isẹ 15:23.

VWẸ “URUEMU VẸ UYOTA” VWO DJE ẸGUỌNỌ PHIA

17. Mavọ yen a sa vwọ riẹn nẹ ẹguọnọ rẹ avwanre kpahen iniọvo na nẹ otọ rẹ ubiudu rhe?

¹⁷ Ọyinkọn Jọn jiriro kẹ avwanre nẹ e jẹ ‘ẹguọnọ rẹ avwanre dia ọ rẹ ota yẹrẹ ọ rẹ unu ọvoo, ẹkẹvuọvo ọ rẹ uruemu vẹ uyota.’ (1 Jọn 3:18) Avwanre guọnọre nẹ ẹguọnọ rẹ avwanre vwo kpahen iniọvo avwanre nẹ otọ rẹ ubiudu rhe. Mavọ yen e se vwo ru ọtiọyen? Avwanre de nene iniọvo avwanre ghwọrọ ọke kuẹgbe ọkieje, ọnana cha nẹrhẹ e sikẹrẹ ohwohwo phiyọ, ẹguọnọ avwanre kpahen ohwohwo kọ je cha ganphiyọ. Gbẹn idjerhe sansan wẹ vẹ ihwo efa sa vwọ ghwọrọ ọke kugbe vwẹ uyono kugbe iruo rẹ aghwoghwo na. Rhuẹrẹ ọke phiyọ wọ vwọ kọn bru ayen ra. E de ru ọtiọyen jẹ e djephia nẹ, ‘Ọghẹnẹ yono avwanre obo re vwo ẹguọnọ rẹ ohwohwo.’ (1 Tẹsa. 4:9) Ọtiọyena avwanre komobọ ke cha mrẹ oborẹ “oyovwi te rọ vwerhe te rẹ iniọvo da dia kugbe vwẹ okugbe!”—Une 133:1.