Jẹnẹsis
23 Sera da dia ẹgbukpe 127; enana yen uche ikpe rẹ Sera dia akpọ. 2 Ọtiọyena Sera de ghwu vwẹ Kiriat-aba, kọyen Hẹbrọn, vwẹ otọ ri Kenan, Ebraham de vweri je viẹ fikirẹ Sera. 3 Ọtiọyena Ebraham de vrẹn nẹ obaro rẹ orivwin rẹ aye rọyen, ọ da ta kẹ emọ ri Hẹt: 4 “Mẹvwẹ ọrhorha rọ rhe dia ohri rẹ ovwan. Ovwan kẹ vwẹ asan rọ cha dia kerẹ asan re se shi ohwo phiyọ vwẹ ohri rẹ ovwan, rere mi se vwo shi ohwo mẹ ro ghwuru na.” 5 Emọ ri Hẹt da kpahen kẹ Ebraham: 6 “Kerhọ rẹ avwanre, ọrovwovwe. Wẹwẹ osun rẹ Ọghẹnẹ jẹreyọ* vwẹ ohri rẹ avwanre. Wo se shi ohwo wẹn ro ghwuru na phiyọ asan rẹ avwanre shi ihwo phiyọ ro me yovwin kparobọ. O vwo ohwo vuọvo vwẹ usun rẹ avwanre rọ cha da wẹ obọ ji, wo vwo jẹ ohwo wẹn ro ghwuru na esho phiyọ asan ro shi ihwo phiyọọ.”
7 Ọtiọyena Ebraham de vrẹn, ọ da vwẹ uyovwin kpotọ vwọ kẹ ihwo rẹ otọ na, vwọ kẹ emọ ri Hẹt, 8 ọ da ta kẹ ayen: “Ovwan* da rhọnvwe nẹ mi mu ohwo mẹ ro ghwuru re shi, ovwan kerhọ mẹ rere ovwan ta ota kẹ Ifrọn ọmọ ri Zoha 9 rere ọ shẹ unu rẹ ukuta ri Makpila rọ dia ọrọyen na kẹ vwẹ; ọ hẹ ọkọkọ rẹ udju rọyen. E jẹ ọ shẹ kẹ vwẹ vwẹ irharo rẹ ovwan vwẹ unu rẹ idọnọ efuanfon ro muru, rere mi se vwo vwo asan ri mi se shi ohwo phiyọ.”
10 Asaọkiephana Ifrọn chidia ohri rẹ emọ ri Hẹt. Ọtiọyena Ifrọn ohwo ri Hẹt da kpahen kẹ Ebraham vwẹ irharo* rẹ emọ ri Hẹt, kugbe obaro rẹ ihwo eje re wan anurhoro rẹ orere rọyen, ọ da ta: 11 “Ẹjo, ọrovwovwe! Kerhọ mẹ. Me kẹ wẹ udju na kugbe unu rẹ ukuta rọhẹ evun rọyen. Me vwerọ kẹ wẹ vwẹ irharo rẹ ihwo mẹ. Shi ohwo wẹn ro ghwuru.” 12 Ọtiọyena Ebraham da vwẹ uyovwin kpotọ vwẹ obaro rẹ ihwo rẹ otọ na 13 ọ da ta kẹ Ifrọn vwẹ irharo rẹ ihwo na, nẹ: “Biko kerhọ mẹ! Me cha kẹ wẹ unu rẹ idọnọ efuanfon rẹ udju na muru. Reyọ mie vwe rere mi se vwo shi ohwo mẹ ro ghwuru phiyọ etiyin.”
14 Ọtiọyena Ifrọn da kpahen kẹ Ebraham: 15 “Ọrovwovwe, kerhọ mẹ. Otọ nana te shẹkẹl* rẹ idọnọ efuanfon 400, ẹkẹvuọvo die yen ọyena firi vwẹ uvwre mẹ vẹ ọwẹn? Ọtiọyena shi ohwo wẹn ro ghwuru.” 16 Ebraham da kerhọ rẹ Ifrọn, Ebraham da vwanvwe unu rẹ idọnọ efuanfon rẹ Ifrọn djunute vwẹ irharo rẹ emọ ri Hẹt na vwọ kẹ, shẹkẹl* rẹ idọnọ efuanfon 400 vwo nene ovwanvwọ rẹ ineki na reyọ. 17 Ọtiọyena udju rẹ Ifrọn rọhẹ Makpila vwẹ obaro ri Mamre—udju na vẹ unu rẹ ukuta rọhẹ evun rọyen, kugbe irhe na eje rehẹ evunrẹ udju na da rhe dia obo ra rhọnvwephiyọ nẹ 18 ọyen oborẹ Ebraham vwẹ igho rọyen dẹ vwẹ irharo rẹ emọ ri Hẹt, vwẹ obaro rẹ ihwo eje re wan anurhoro rẹ orere rọyen. 19 Ọyena vwọ wan nu, Ebraham de shi aye rọyen Sera vwẹ unu rẹ ukuta rọhẹ udju ri Makpila vwẹ obaro ri Mamre, kọyen Hẹbrọn vwẹ otọ ri Kenan. 20 Ọtiọyena emọ ri Hẹt da vwẹ udju na kugbe unu rẹ ukuta rọhẹ evun rọyen vwọ kẹ Ebraham kerẹ asan ro se shi ohwo phiyọ.