Jẹnẹsis

24 Asaọkiephana Ebraham ghwore, ọ ghwanre vwọrẹ ikpe re, Jihova ji bruba kẹ Ebraham vwẹ kemu kemu. 2 Ebraham da ta kẹ odibo rọyen, ọ rọ ma kpako vwẹ evwruwevwin rọyen, rọ vwẹrote erọnvwọn eje ro vwori: “Biko phi obọ wẹn phiyọ obotọ rẹ ekpoghowọ mẹ, 3 rere wo duvwun iyorin vwẹ odẹ ri Jihova, Ọghẹnẹ rẹ idjuvwu na kugbe Ọghẹnẹ rẹ otọrakpọ na, nẹ wọ cha reyọ aye kẹ ọmọ mẹ vwo nẹ emetẹ ri Kenan re me dia ohri rayen naa. 4 Wo mi kpo orere mẹ bru ihwo rẹ orua mẹ ra, rere wọ reyọ aye kẹ ọmọ mẹ, Aizik.”

5 Ẹkẹvuọvo odibo na da ta kẹ: “Kẹ ọ da rha dianẹ aye na rhọnvwe nene uvwe rhe otọ nanaa vwo? Me gba reyọ ọmọ wẹn rhivwin kpo otọ ru wo nurhe na?” 6 Ọtiọyena Ebraham da ta kẹ: “Wọ nama reyọ ọmọ mẹ kpo oboyiin. 7 Jihova Ọghẹnẹ rẹ idjuvwu na, rọ reyọ ovwẹ vwo nẹ uwevwin rẹ ọsẹ mẹ kugbe otọ rẹ ihwo rẹ orua mẹ rhe, rọ ta ota kẹ vwẹ ji duvwun iyorin kẹ vwẹ nẹ: ‘Me cha reyọ otọ nana vwọ kẹ emọ* wẹn,’ o che ji amakashe rọyen kobaro kẹ wẹ, o vwo obo rọ wanree, ku wọ cha reyọ aye kẹ ọmọ mẹ nẹ oboyin rhe. 8 Aye na rha rhọnvwe nene uwe rhee, ju wọ vrabọ rẹ iyorin nana. Ẹkẹvuọvo wọ nama reyọ ọmọ mẹ kpo oboyiin.” 9 Ọtiọyena odibo na de phi obọ rọyen phiyọ obotọ rẹ ekpoghowọ rẹ onini rọyen Ebraham, o de duvwun iyorin kẹ kpahen ota nana.

10 Ọtiọyena odibo na da reyọ ikamẹl rẹ onini rọyen ihwe, ọ da yanran, ọ je reyọ koka koka rẹ erọnvwọn iyoyovwin eje mie onini rọyen nene oma. Ọ da yanran kpo Mẹsopotemia, vwo kpo orere ri Nehọ. 11 Ọ da nẹrhẹ ikamẹl na rhuẹn totọ vwẹ asan orhare ame ọvo vwẹ otafe rẹ orere na. Ọke na hẹ omarẹ ovwọnvwọn, ọyen ọke rẹ eya na vwo kpo otafe de re vo ame. 12 Ọ da ta: “Jihova Ọghẹnẹ rẹ onini mẹ Ebraham, biko jẹ ẹdẹ ri nonẹna yovwin kẹ vwẹ, rere wo dje ẹguọnọ wẹn ro jẹ rhẹriẹ na kẹ onini mẹ Ebraham. 13 Enẹna mi mudia kẹrẹ orhare ame, emetẹ rẹ ihwo rẹ orere na rua otafe cha, che rhi vo ame. 14 E jẹ ọ dianẹ eghene aye re me cha ta kẹ nẹ, ‘Biko vwẹ ochẹ rẹ ame wẹn na kpotọ rere me da ame,’ rọ cha kpahen kẹ vwẹ nẹ, ‘Da ame, me je cha vwẹ ame kẹ ikamẹl wẹn,’ e jẹ ọnana dia ọ ru wọ sanere vwọ kẹ odibo wẹn Aizik; rere womarẹ ọnana me je vwọ riẹn nẹ wo dje ẹguọnọ wẹn ro jẹ rhẹriẹ na kẹ onini mẹ re.”

15 Tavwen ọ ke tobọ ta ota na re, Rebeka rọ dia ọmọtẹ ri Bẹtuẹl, ọmọshare ri Milka, aye ri Nehọ, oniọvo rẹ Ebraham da rhe vẹ ochẹ rẹ ame rọyen ro mu kpahen igabọ. 16 Asaọkiephana eghene aye na vwo erhuvwu mamọ, ọmọtobẹ yen o ruẹ, ọshare vuọvo ji rhi nene vwerhẹn dẹvoo. Ọ da yanran kpo orhare ame na, o de vo ame vọn ochẹ rẹ ame rọyen, o de rhivwin rhe. 17 Siẹvuọvo na, odibo na da djẹ bro ra, ọ da ta: “Biko kẹ vwẹ amame da vwo nẹ ochẹ wẹn na.” 18 Ọ da kpahen: “Da, ọrovwovwe.” Ọtiọyena o de brokpakpa mu ochẹ rọyen phiyọ obọ, ọ da vwẹ ame kẹ da. 19 Ọ vwọ vwẹ ame kẹ da nu, ọ da ta: “Mi ji che vo ame kẹ ikamẹl wẹn da, bẹsiẹ rẹ evun vwọ vọn ayen.” 20 Ọtiọyena o de brokpakpa ku ame rọhẹ evunrẹ ochẹ rọyen na phiyọ asan re kuẹ ame rẹ eranvwe na phiyọ, ọ da djẹ yanran abọ buebun re vo ame nẹ orhare na rhe, ko dje ame evevo vwọ kẹ ikamẹl na eje. 21 O vwo ruẹ enana eje na, jẹ ọshare na fọre ro vwo no vwọrẹ igbevwunu, jẹ o roro sẹ Jihova bruba kẹ oyan rọyen na re yẹrẹ o ji rhi ru ọtiọyeen.

22 Ọke rẹ ikamẹl na vwọ da ame nu, ọshare na da reyọ ubiosa rẹ oro re phiẹ phiyọ uwen rọ họhọ te ubro ri shẹkẹl* kugbe orọnvwọn obọ rẹ oro ivẹ re họhọ te shẹkẹl* ihwe, ọ da vwẹ ayen kẹ, 23 ọ da ta: “Biko vuẹ vwẹ, wẹwẹ ọmọ rẹ ono? Uvun vuọvo rhiephiyọ vwẹ uwevwin rẹ ọsẹ wẹn rẹ avwanre sa dia hrọke?” 24 Ọtiọyena ọ da kpahen kẹ: “Mẹvwẹ ọmọtẹ ri Bẹtuẹl, ọmọshare ri Milka, ro vwiẹ kẹ Nehọ.” 25 Ọ da je ta: “Avwanre vwo ẹbe eyaya vẹ emu eranvwe buebun kugbe asan rẹ ovwan sa dia hrọke.” 26 Ọshare na da vwẹ uyovwin kpotọ, ọ da riẹn totọ vwẹ obaro ri Jihova, 27 ọ da ta: “Ejiro dia kẹ Jihova, Ọghẹnẹ rẹ onini mẹ Ebraham, kidie ọ je rhe kpairoro vrẹ ẹguọnọ rọyen ro jẹ rhẹriẹ kugbe evun-ẹfuọn rọyen kpahen onini mẹẹ. Jihova sun vwe rhe uwevwin rẹ iniọvo rẹ onini mẹ re.”

28 Eghene aye na da djẹ yanran ra vuẹ ihwo rẹ evwruwevwin rẹ oni rọyen kpahen erọnvwọn nana. 29 Asaọkiephana Rebeka vwo oniọvo ọshare ọvo rẹ odẹ rọyen dia Leban. Ọtiọyena Leban da djẹ bru ọshare na ra vwẹ otafe vwẹ asan orhare na. 30 Ọke rọ vwọ mrẹ ubiosa rẹ uwen na kugbe erọnvwọn obọ rehẹ abọ rẹ oniọvo rọyen ọmọtẹ, ji nyo eta rẹ oniọvo rọyen Rebeka rọ tanẹ, “Ọnana yen oborẹ ọshare na ta ota kẹ vwẹ wan,” ọ da rhe vwa ọshare na ro ji mudia etiyin kẹrẹ ikamẹl rọyen vwẹ asan orhare na. 31 Ugege yena ọ da ta: “Yanrhe, wẹwẹ rẹ Jihova bruphiyọ kẹ na. Diesorọ wo ji vwo mudia etinẹ? Mi muegbe rẹ uwevwin na kugbe asan rẹ ikamẹl na cha dia re.” 32 Ọtiọyena ọshare na da ro evunrẹ uwevwin na, o* de si ifi nẹ unu rẹ ikamẹl na, ọ da vwẹ odin eyaya vẹ emu eranvwe vwọ kẹ ikamẹl na, ọ da je vwẹ ame kẹ vwọ hworhẹ awọ rọyen kugbe awọ rẹ eshare re vẹ ọyen gba herọ. 33 Ẹkẹvuọvo ọke re vwo mu obo rọ cha re phiyọ obaro rọyen, ọ da ta: “Me cha riemuu, jokpanẹ me ta oborẹ me guọnọ ta tavwen.” Ọtiọyena Leban da ta: “Gba ta!”

34 Ọ da ta: “Mẹvwẹ odibo rẹ Ebraham. 35 Jihova bruba kẹ onini mẹ mamọ, ọ je nẹrhẹ o fe gangan, rọ vwọ kẹ igodẹ vẹ erhuẹn, idọnọ efuanfon vẹ iro, idibo eshare vẹ e rẹ eya, kugbe ikamẹl vẹ ekẹkẹtẹ. 36 Vwọba, Sera rọ dia aye rẹ onini mẹ, vwiẹ ọmọshare ọvo kẹ onini mẹ ọke rọ vwọ ghwo nu, onini mẹ cha kẹ erọnvwọn eje ro vwori. 37 Ọtiọyena onini mẹ da nẹrhẹ mi duvwun iyorin, rọ vwọ ta: ‘Wọ reyọ aye kẹ ọmọ mẹ nẹ ohri rẹ emetẹ ri Kenan re me dia otọ rayen naa. 38 Ẹkẹvuọvo wo mi kpo uwevwin rẹ ọsẹ mẹ, bru orua mẹ ra, rere wọ reyọ aye kẹ ọmọ mẹ.’ 39 Ẹkẹvuọvo me da ta kẹ onini mẹ: ‘Kẹ aye na rha rhọnvwe nene uvwe rhee vwo?’ 40 Ọ da ta kẹ vwẹ: ‘Jihova re me yanre vwẹ obaro rọyen na che ji amakashe rọyen nene uwe, kọ nẹrhẹ oyan wẹn na shephiyọ, wọ me reyọ aye kẹ ọmọ mẹ vwo nẹ orua mẹ kugbe uwevwin rẹ ọsẹ mẹ rhe. 41 Wọ cha vrabọ rẹ iyorin ru wo duvwun kẹ vwẹ na, siẹrẹ wo de bru orua mẹ ra jẹ ayen rhọnvwe kẹ wẹ ọmọtẹ naa. Ọnana kọ nẹrhẹ wọ vrabọ rẹ iyorin ru wo duvwunru na.’

42 “Mi vwo te asan orhare na nonẹna, me da ta: ‘Jihova Ọghẹnẹ rẹ onini mẹ Ebraham, ọ da dianẹ wọ cha nẹrhẹ oyan mẹ shephiyọ, 43 mi mudia asan orhare. Obo re cha phia kẹ ọna, siẹrẹ eghene aye de rhi vo ame, ke me cha tanẹ, “Biko, juvwe da amame nẹ ochẹ wẹn na rhe,” 44 ọ me ta kẹ vwẹ, “Gba da, mi ji che vo ame kẹ ikamẹl wẹn.” E jẹ aye yena dia ọ rẹ Jihova sanere vwọ kẹ ọmọ rẹ onini mẹ.’

45 “Tavwen me ke ta ota vwẹ ubiudu mẹ nu, Rebeka kọ yancha, ọ vẹ ochẹ ro mu kpahen igabọ rọyen, ọ da yanran kpo asan orhare na, ko vo ame. Ọtiọyena me da ta kẹ: ‘Biko, kẹ vwẹ ame me da.’ 46 Ọtiọyena o de brokpakpa mu ochẹ rọyen kpotọ nẹ igabọ rọyen, ọ da ta: ‘Gba da, me je cha vwẹ ame kẹ ikamẹl wẹn.’ Ọtiọyena me da da, ọ da je vwẹ ame kẹ ikamẹl na. 47 Ọyena vwọ wan nu, me da nọ, ‘Wẹwẹ ọmọ rẹ ono?’ ọ da kpahen nẹ, ‘Ọmọtẹ ri Bẹtuẹl, ọmọshare ri Nehọ, rẹ Milka vwiẹ kẹ.’ Ọtiọyena mi de phi ubiosa na phiyọ uwen rọyen ji ku erọnvwọn obọ na phiyọ abọ rọyen. 48 Me da vwẹ uyovwin kpotọ je riẹn totọ vwẹ obaro ri Jihova, mi de jiri Jihova Ọghẹnẹ rẹ onini mẹ Ebraham, ohwo ro sun vwe vwẹ idjerhe ro shephiyọ rhe reyọ ọmọtẹ rẹ oniọvo rẹ onini mẹ vwọ kẹ ọmọ rọyen. 49 Asaọkiephana gba vuẹ vwẹ ọ da dianẹ wo che dje ẹguọnọ ro jẹ rhẹriẹ kugbe evun-ẹfuọn vwọ kẹ onini mẹ; ẹkẹvuọvo ọ rha dia ọtiọyeen, vuẹ vwẹ rere me ra guọnọ vwẹ asan ọfa.”*

50 Ọtiọyena Leban vẹ Bẹtuẹl da kpahen: “Obọ ri Jihova yen ọnana nurhe. Avwanre cha sa vuẹ wẹ e yẹrẹ ẹjoo.* 51 Rebeka yehẹ obaro wẹn na. Reyọ rere wọ yanran, e jẹ ọ dia aye rẹ ọmọ rẹ onini wẹn kirobo rẹ Jihova tarọ.” 52 Ọke rẹ odibo rẹ Ebraham vwo nyo eta rayen, ọ da vwẹ uyovwin kpotọ vwẹ ugege yena vwẹ obaro ri Jihova. 53 Odibo na da reyọ ekuakua ra vwẹ idọnọ efuanfon vwo ru vẹ e ra vwẹ iro vwo ru kugbe iwun, ọ da vwẹ ayen kẹ Rebeka, ọ da je vwẹ erọnvwọn eghanghanre vwọ kẹ oniọvo rọyen ọshare kugbe oni rọyen. 54 Ọyena vwọ wan nu, ọ vẹ eshare re vẹ ọyen gba herọ na da re je da, ayen da dia etiyin hrọke.

O vwo vrẹn vwẹ urhiọke, ọ da ta: “Ovwan siobọnu vwe rere mi bru onini mẹ ra.” 55 Ọtiọyena oniọvo rọyen ọshare vẹ oni rọyen da ta: “E jẹ eghene aye na nene avwanre dia, ọ da hanvwe mamọ ẹdẹ ihwe. Kẹsiẹye ọ ke yanran.” 56 Ẹkẹvuọvo ọ da ta kẹ ayen: “Ovwan da vwẹ obọ jẹẹ, rọ vwọ dianẹ Jihova nẹrhẹ oyan mẹ yovwin na. Ovwan siobọnu vwe rere mi bru onini mẹ ra.” 57 Ọtiọyena ayen da ta: “E jẹ avwanre se eghene aye na rere a nọ.” 58 Ayen de se Rebeka, ayen da ta kẹ: “Wo che nene ọshare nana yanran?” Ọ da kpahen: “Me guọnọ yanran.”

59 Ọtiọyena ayen de siobọnu Rebeka rọ dia oniọvo rayen ọmọtẹ vẹ ọyọnrọmọ* rọyen kugbe odibo rẹ Ebraham vẹ eshare rọyen. 60 Ayen de bruba kẹ Rebeka, ayen da ta kẹ: “Oniọvo rẹ avwanre ọmọtẹ, e jẹ wọ dia uriorin buebun abọ uriorin ihwe,* e jẹ emọ* wẹn riuku rẹ irere* rẹ ihwo ri vwo utuoma kpahen ayen.” 61 Ọtiọyena Rebeka vẹ idibo rọyen rẹ eya de vrẹn, ayen da ro enu rẹ ikamẹl na, ayen de nene ọshare na. Ọtiọyena odibo na da reyọ Rebeka, ọ da ro idjerhe.

62 Asaọkiephana Aizik nẹ ẹbẹre ri Biẹ-lehai-rọi rhe, kidie ọ dia otọ ri Nẹgẹb. 63 Aizik kọ yan vwẹ otafe vwẹ omarẹ ovwọnvwọn ro vwo roro kokodo. Ọke rọ vwọ kpare opharo, nighere, ọ da mrẹ ikamẹl re cha! 64 Rebeka vwọ kpare opharo, ọ da kparo mrẹ Aizik, o de brokpakpa wontọ nẹ ikamẹl na. 65 Ọtiọyena ọ da nọ odibo na: “Ọyen ọshare vọ yen yan brẹ ohwo cha na?” Odibo na da ta: “Ọyen onini mẹ.” Ọtiọyena ọ da vwẹ amwa rọyen vwo rhurhu oma. 66 Odibo na da vuẹ Aizik erọnvwọn eje ro ruru. 67 Ọyena vwọ wan nu, Aizik da reyọ ro evunrẹ utughẹ rẹ oni rọyen Sera. Ọtiọyena ọ da reyọ Rebeka vwo ru aye rọyen; o de vwo ẹguọnọ rọyen, Aizik da mrẹ onẹrhẹvwe ọke rẹ oni rọyen vwo ghwu nu.