Jẹnẹsis
40 Enana vwọ wan nu, onotu rẹ imuidi rẹ ovie rẹ Ijipt kugbe onotu rẹ ihwo ri ruẹ ibrẹdi na de ru umwemwu vwọso onini rayen, ovie rẹ Ijipt. 2 Ọtiọyena ophu de mu Fero kpahen inotu rọyen ivẹ na, onotu rẹ imuidi na kugbe onotu rẹ ihwo ri ruẹ ibrẹdi na, 3 o de mu ayen phiyọ uwodi rọhẹ uwevwin rẹ onotu rẹ ihwo re rhẹrẹ Fero, uwodi re mu Josẹf phiyọ na. 4 Onotu rọ rhẹrẹ na da vwẹ Josẹf vwo mu nẹ ọ vẹ ayen dia rere ọ je vwẹrote ayen, ayen da dia evunrẹ uwodi na vwẹ uvwre rẹ ọke evo.*
5 Omuidi na vẹ ohwo ro ruẹ ibrẹdi rẹ ovie rẹ Ijipt re mu phiyọ uwodi na, ayen ihwo ivẹ na da vwerhẹn evwerhẹn vwẹ ason ọvuọvo, evwerhẹn na vwo dohwo dotọ rọyen. 6 Urhiọke rẹ ẹdẹ rivẹ rẹ Josẹf vwọ rhe rhe mrẹ ayen, ayen muomaphiyọ. 7 Ọtiọyena ọ da nọ idibo ri Fero re vẹ ọyen gba hẹ uwodi vwẹ uwevwin rẹ onini rọyen na: “Diesorọ ovwan vwo mu opharo phiyọ nonẹna?” 8 Ayen da ta kẹ: “Avwanre ihwo ivẹ na vwerhẹn evwerhẹn, ẹkẹvuọvo o vwo ohwo vuọvo rọ vẹ avwanre gba herọ rọ sa fan otọ rayeen.” Josẹf da ta kẹ ayen: “Ọ dia obọ rẹ Ọghẹnẹ yen efanfan nẹcha? Biko, ovwan vuẹ vwẹ kpahọn.”
9 Ọtiọyena onotu rẹ imuidi na da vuẹ Josẹf evwerhẹn rọyen rọ vwọ ta kẹ: “Vwevunrẹ evwerhẹn mẹ, urhe rẹ ivaini ọvo hẹ obaro mẹ. 10 Eghọn erha hẹ urhe rẹ ivaini na, ọke rọ vwọ djẹ, ọ da kpipho, emu rọyen da vware, o de hirhephiyọ igrepu. 11 Jẹ uko ri Fero hẹ obọ mẹ, me da reyọ igrepu na, mi de mie ayen phiyọ uko ri Fero. Mi vwo ru ọyena nu, mi de mu uko na phiyọ obọ ri Fero.” 12 Ọtiọyena Josẹf da ta kẹ: “Ọnana yen otọ rọyen: Eghọn erha na mudiaphiyọ ẹdẹ erha. 13 Ẹdẹ erha vwo nẹ ọke nana, Fero che si we nẹ etinẹ na,* ọ cha rhoma phi we phiyọ akon rẹ iruo wẹn, ku wo che mu uko ri Fero phiyọ obọ rọyen kirobo wo ruẹ jovwo ọke wọ vwọ dia omuidi rọyen. 14 Ẹkẹvuọvo wọ me karophiyọ ovwẹ ọke rẹ erọnvwọn de shephiyọ kẹ wẹ re. Biko dje ẹguọnọ ro jẹ rhẹriẹ kẹ vwẹ, rere wọ vuẹ Fero kpahen ovwẹ, rere wo se vwo si vwe nẹ etinẹ na. 15 Vwọrẹ uyota, e cho vwe nẹ otọ rẹ ihwo ri Hibru, mi ji ru emu vuọvo vwẹ etinẹ na rọ nẹrhẹ e mu vwe phiyọ uwodi naa.”*
16 Ọke rẹ onotu rẹ ihwo ri ruẹ ibrẹdi na vwọ mrẹ nẹ oborẹ Josẹf fan evwerhẹn na wan yovwirin, ọ da ta kẹ: “Me je vwerhẹn evwerhẹn, ibere erha rẹ ibrẹdi efuanfon hẹ enu rẹ uyovwin mẹ, 17 obere rọ kenu eje na vọnre vẹ koka koka rẹ erọnvwọn ra vwẹ iflawa vwo ru vwọ kẹ Fero, ephran ke ria ayen vwo nẹ obere rọhẹ enu rẹ uyovwin mẹ na.” 18 Ọtiọyena Josẹf da kpahen nẹ, “Ọnana yen otọ rọyen: Ibere erha na mudiaphiyọ ẹdẹ erha. 19 Ẹdẹ erha vwo nẹ ọke nana, Fero che bru uyovwin wẹn no,* ọ cha vwẹ owẹ ya urhe, ephran ke re uvwo wẹn.”
20 Asaọkiephana ẹdẹ rerha na kẹ ẹdevwiẹ ri Fero, ọ da re orẹ kẹ idibo rọyen ejobi, ọ da reyọ* onotu rẹ imuidi na kugbe onotu rẹ ihwo ri ruẹ ibrẹdi na rhe obaro rẹ idibo rọyen. 21 Ọ da reyọ onotu rẹ imuidi na rhivwin kpo akon rẹ iruo rọyen kerẹ omuidi, ko muẹ uko na phiyọ obọ ri Fero. 22 Ẹkẹvuọvo ọ da vwẹ onotu rẹ ihwo ri ruẹ ibrẹdi na vwọ ya urhe kirobo rẹ Josẹf fan evwerhẹn na kẹ ayen. 23 Ẹkẹvuọvo onotu rẹ imuidi na rha karophiyọ Josẹfuu; ọ da chọrọ ẹro.