Jẹnẹsis
16 Asaọkiephana Serai aye rẹ Ebram ji rhi vwiẹ emọ kẹẹ, ẹkẹvuọvo o vwo odibo ọvo rọ dia ohwo rẹ Ijipt, odẹ rọyen Hega. 2 Ọtiọyena Serai da ta kẹ Ebram: “Asaọkiephana biko! Jihova da vwẹ obọ ji mi vwo jẹ emọ evwiẹ. Biko nene odibo mẹ na vwerhẹn. Ọkiọvo mi se vwo emọ wan oma rọyen.” Ọtiọyena Ebram da kerhọ rẹ oborẹ Serai tare. 3 Ebram vwọ dia otọ ri Kenan te ẹgbukpe ihwe re, Serai aye rẹ Ebram da reyọ odibo rọyen Hega rọ dia ohwo rẹ Ijipt vwọ kẹ ọshare rọyen Ebram rere ọ dia aye rọyen. 4 Ọtiọyena o de nene Hega vwerhẹn, ọ da mrevun. Ọke rẹ Hega vwọ riẹn nẹ ọyen mrevun re, kọ jẹ onini rọyen Serai fia.
5 Ọtiọyena Serai da ta kẹ Ebram: “Wẹwẹ yen so obo re phia kẹ vwẹ na. Mẹvwẹ yen phi odibo mẹ phiyọ obọ wẹn, ẹkẹvuọvo ọ rhe vwọ riẹn nẹ ọyen mrevun re, kọ jẹ vwẹ fia. E jẹ Jihova brorhiẹn mẹ vẹ ọwẹn.” 6 Ọtiọyena Ebram da ta kẹ Serai: “Nighere! Odibo wẹn hẹ otọ rẹ ogangan wẹn. Ruo obo ri je we eje.” Serai da phọphọ, Hega da djẹ jovwo.
7 Ọke vwọ yan obaro, amakashe ri Jihova da mrẹ vwẹ ogbugbu rẹ ame ọvo vwẹ aton na, ogbugbu rẹ ame rọhẹ idjerhe ra wan kpo Shọ. 8 Ọ da ta: “Hega odibo ri Serai, tivọ wo nẹcha, tivọ wọ ra?” Ọ da kpahen kẹ: “Me djẹ kẹ onini mẹ Serai.” 9 Ọtiọyena amakashe ri Jihova da ta kẹ: “Rhivwin bru onini wẹn Serai ra, rere wọ vwomakpotọ kẹ.” 10 Amakashe ri Jihova da je ta: “Me cha nẹrhẹ emọ* wẹn dia buebun, rere e vwo jẹ ayen e se kere.” 11 Vwọba, amakashe ri Jihova da ta: “Wọ mrevun re, wo che vwiẹ ọmọshare, wo mi se Ishmẹl,* kidie Jihova nyo kpahen ukpokpogho wẹn re. 12 Ọ cha dia ọshare rọ họhọ ekẹkẹtẹ rẹ aghwa rọ djoma. Obọ rọyen cha vwọso ihwo ejobi, obọ rẹ ihwo eje je cha vwọsuọ, ọ cha dia obovrẹ rẹ iniọvo rọyen eje.”*
13 Ọtiọyena o de se odẹ ri Jihova, ohwo rọ ta ota kẹ na: “Wẹwẹ Ọghẹnẹ rọ mrorẹ,” kidie ọ tare: “Me ghene mrẹ ọ rọ mrẹ vwẹ na re?” 14 Kọyensorọ re vwo se orhare na Biẹ-lehai-rọi.* (Ọ hẹ uvwre rẹ Kedẹsh vẹ Birẹd.) 15 Ọtiọyena Hega de vwiẹ ọmọshare kẹ Ebram, Ebram de se ọmọshare rọyen rẹ Hega vwiẹre na Ishmẹl. 16 Ebram hẹ ẹgbukpe 86 ọke rẹ Hega vwo vwiẹ Ishmẹl kẹ.