Jẹnẹsis

18 Ọke vwọ yanran, Jihova da vwomaphia kẹ kẹrẹ irhe ride ri Mamre, ọke ro vwo chidia anurhoro rẹ utughẹ na vwẹ uvwre rẹ ọke rọ ma rhorha vwẹ ẹdẹ na. 2 Ọ vwọ kpare opharo, ọ da mrẹ eshare erha ri mudia asan ro sherabọ kẹ emerha. Ọke rọ vwọ mrẹ ayen, ọ da djẹ nẹ anurhoro rẹ utughẹ na ra vwa ayen, ọ da vwẹ uyovwin kpotọ. 3 Ọtiọyena ọ da ta: “Jihova, ọ da dianẹ me mrẹ ẹroesiri wẹn, biko wọ wanvrẹ odibo wẹẹn. 4 Biko, e jẹ a vwẹ amame rhe, a hworhẹ awọ rẹ ovwan; rere ovwan rovwoma vwẹ otọ rẹ urhe na. 5 Ọ vwọ dianẹ ovwan bru odibo rẹ ovwan rhe etinẹ na, gbe juvwe reyọ imibrẹdi rhe, rere ọ kẹ ovwan ẹgba* tavwen ovwan ke ro idjerhe.” Ọtiọyena ayen da ta: “O shephiyọ. Wo se ru kirobo ru wọ tare na.”

6 Ọtiọyena Ebraham de brokpakpa bru Sera ra vwẹ utughẹ na, ọ da ta: “Jọphẹre! Reyọ ovwanvwọ* erha rẹ omamọ rẹ iflawa, gbe kugbe rere wo ru ibrẹdi.” 7 O vwo ru ọtiọyen nu, Ebraham da djẹ kpo asan rẹ ichuru rọyen hepha, ọ da sane erhuẹn otete ọvo* rọ pha tubie tubie. Ọ da vwọ kẹ odibo rọyen, odibo rọyen de brokpakpa re muegbe rọyen. 8 Ọ da reyọ ibọta vẹ ameivie kugbe erhuẹn otete ro muegbe rọyen na, o de mu emu na phiyọ obaro rayen. O de mudia kẹrẹ ayen vwẹ otọ rẹ urhe na rẹ ayen vwọ riemu na.

9 Ayen da ta kẹ: “Tivọ yen aye wẹn Sera hepha?” Ọ da kpahen: “Ọ hẹ etinẹ vwevunrẹ utughẹ na.” 10 Ọvo vwẹ usun rayen da ta: “Vwọrẹ imuẹro, mi che rhivwin bru we rhe vwẹ ọke ọtiọna vwẹ ukpe rọ cha na, nighere! aye wẹn Sera che vwiẹ ọmọshare.” Asaọkiephana Sera kerhọ vwẹ anurhoro rẹ utughẹ rọhẹ obuko rẹ ọshare na. 11 Ebraham vẹ Sera ghwore, ayen ghwanre mamọ re. Sera vrẹ edje rẹ ohwo ro vwiẹ re.* 12 Ọtiọyena Sera kọ hwẹ kẹ oma rọyen, ọ da ta: “Me vwọ ghwore na, rẹ ọrovwovwe je vwọ ghwore na, mi ghini se vwo omavwerhovwẹn nana?” 13 Ọtiọyena Jihova da ta kẹ Ebraham: “Diesorọ Sera vwọ hwẹ je tanẹ, ‘Mi ghini se vwiẹ dede nẹ me ghwore?’ 14 O vwo obo re bẹn Jihova eruo? Mi che rhivwin bru we rhe vwẹ ọke ọtiọna vwẹ ukpe rọ cha na, Sera che vwiẹ ọmọshare.” 15 Ẹkẹvuọvo Sera da siọn, rọ vwọ ta, “Me hwẹree!” kidie oshọ muo. Ọtiọyena Ọghẹnẹ da ta: “E! Wọ hwẹre.”

16 Eshare na vwo vrẹn rẹ ayen cha vwọ yanran, ayen de ni ẹbẹre ri Sọdọm, Ebraham kọ yan nene ayen ro vwo sun ayen. 17 Jihova da ta: “Mi siẹ obo ri mi che ru nẹ vwọ kẹ Ebraham? 18 Vwọrẹ uyota, Ebraham cha dia ẹgborho rode ro vwo ẹgba, wan oma rọyen yen ẹgborho rẹ akpọ na eje che vwo vwo ebruphiyọ.* 19 Kidie mi rhi vughe re, rere ọ vwọ vwẹ iji kẹ emọ rọyen vẹ evwruwevwin rọyen re cha vwẹ obaro, rẹ ayen vwo nene idjerhe ri Jihova womarẹ ayen vwo ruẹ obo ri shephiyọ kugbe obo re dia ọsoso, rere Jihova vwo ru obo ro ve kẹ Ebraham.”

20 Ọtiọyena Jihova da ta: “Enuebro vwọ kpahen Sọdọm vẹ Gomora ganre gangan, umwemwu rayen vwo ọkpan mamọ. 21 Mi che wontọ re no sẹ ayen ruẹ nene enuebro ri mi nyori na. Ọ rha dia ọtiọyeen, ke me cha riẹn.”

22 Ọtiọyena eshare na de nẹ etiyin yanran, ayen de kpo ẹbẹre ri Sọdọm, ẹkẹvuọvo Jihova vẹ Ebraham jehẹ etiyin. 23 Ebraham de sikẹrẹ, ọ da ta: “Wọ cha ghene ghwọrọ evwata vẹ irumwemwu kugbe? 24 Ọ da dianẹ evwata 50 hẹ evunrẹ orere na. Wọ cha ghwọrọ ayen eje, wo rhe vwo ghovwo orere na fikirẹ evwata 50 rehẹ evun rọyen na? 25 Ọ dia obo re se roro kakaka nẹ wo che hwe ọvwata vẹ orumwemwu rere obo re phia kẹ orumwemwu je vwọ phia kẹ ọvwataa! Ọyena dia obo re se roroo. Oguẹdjọ rẹ akpọ na eje rhe che ru obo ri shephiyọ?” 26 Ọtiọyena Jihova da ta: “Me da mrẹ evwata 50 vwevunrẹ orere ri Sọdọm, me cha vwẹ fiki rayen vwo ghovwo orere na eje.” 27 Ẹkẹvuọvo Ebraham da rhoma ta: “Biko, juvwe ta ota kẹ wẹ kpobarophiyọ Jihova, dede nẹ mẹvwẹ ekpẹn vẹ iwurhie. 28 Ọ da rha dianẹ iyorin nẹ evwata 50 na vwo? Wọ cha ghwọrọ ọsoso rẹ orere na fikirẹ ihwo iyorin na?” Ọtiọyena ọ da ta: “Me cha ghwọrọọ siẹrẹ me da mrẹ ihwo 45 vwọ.”

29 Ẹkẹvuọvo Ebraham da rhoma ta ota kẹ obọfa nẹ: “Ọ da dia evwata 40 yen a mrẹre vwẹ etiyin vwo?” Ọ da kpahen: “Fikirẹ ihwo 40 na, me cha ghwọrọọ.” 30 Ẹkẹvuọvo ọ da rhoma ta: “Jihova biko, wo jẹ ophu mu wee, ẹkẹvuọvo juvwe je ta ota kpobarophiyọ: Ọ da dianẹ ihwo 30 ọvo yen a mrẹre vwẹ etiyin vwo?” Ọ da kpahen: “Me da mrẹ ihwo 30 vwẹ etiyin, me cha ghwọrọọ.” 31 Ẹkẹvuọvo ọ da je ta: “Biko, juvwe je ta ota kẹ Jihova kpobarophiyọ: Ọ da dianẹ ihwo 20 ọvo yen a mrẹre vwẹ etiyin vwo?” Ọ da kpahen: “Fikirẹ ihwo 20 na, me cha ghwọrọọ” 32 Ukuotọ rọyen ọ da ta: “Jihova biko, wo jẹ ophu mu wee, ẹkẹvuọvo juvwe je ta ota kẹ wẹ obọfa: Ọ da dianẹ ihwo ihwe ọvo yen a mrẹre vwẹ etiyin vwo?” Ọ da kpahen: “Fikirẹ ihwo ihwe na, me cha ghwọrọọ.” 33 Jihova vwọ ta ota kẹ Ebraham nu, ọ da yanran, Ebraham de rhivwin kpo asan rọyen.