Livitikọs
8 Jihova da rhoma ta ota kẹ Mosis, ọ da ta: 2 “Reyọ Erọn vẹ emọ rọyen, iwun na, evwri rẹ ẹjẹreyọ na, erhuẹn rẹ izobo rẹ umwemwu na, egbon ivẹ na, kugbe obere rẹ ibrẹdi ro jephuo na, 3 rere wo koko ọghwẹgbe na eje vwẹ asan ra wan rua utughẹ ra da vwoma na.”
4 Mosis de ru oborẹ Jihova ji iji rọyen kẹ na, ọghwẹgbe na de koko vwẹ asan ra wan rua utughẹ ra da vwoma na. 5 Asaọkiephana Mosis da ta kẹ ọghwẹgbe na: “Ọnana yen oborẹ Jihova ji iji rọyen kẹ avwanre nẹ e ru.” 6 Ọtiọyena Mosis da reyọ Erọn vẹ emọ rọyen rhe, ọ da vwẹ ame hworhẹ ayen. 7 Ọyena vwọ wan nu, o de ku ewun ogrongron na phiyọ Erọn, ọ da vwẹ umuehun na vwo muo, o de ku ikotu ro jẹ abọ evwo na phiyọ, o de ku ẹfọd na phiyọ, ọ da vwẹ umuehun re rhuonri na vwọ gba ẹfọd na, ọ da gba muo kokoroko. 8 O vwo ru ọyena nu, o de ku orhurhudu na phiyọ, o de phi Yurim vẹ Tọmim na phiyọ orhurhudu na. 9 Ọ da vwẹ ọpharuyovwin rẹ oghẹresan na vwọ phare uyovwin rọyen, o de phi ophapha rẹ oro ro lo na phiyọ obaro rẹ ọpharuyovwin na, oka ọfuanfon rẹ omaẹvwọkpahotọ na,* kirobo rẹ Jihova ji iji rọyen kẹ Mosis.
10 Mosis da reyọ evwri rẹ ẹjẹreyọ na, o de vwo ghworo itabanako na vẹ erọnvwọn eje rehẹ evun rọyen, o de ru ayen fon. 11 Ọyena vwọ wan nu, Mosis da fẹrẹn evo rọyen ku agbada na vẹ ekuakua rọyen eje abọ ighwrẹn, oze na vẹ awọ rọyen rere o vwo ru ayen fon. 12 Ukuotọ rọyen, o de ku evwri rẹ ẹjẹreyọ na evo ku uyovwin rẹ Erọn, ọ da jẹ reyọ rere o vwo ruo fon.
13 Mosis da reyọ emọ rẹ Erọn rhe, o de ku iwun igrongron phiyọ ayen, ọ da vwẹ umuehun vwo mu ayen, ọ da vwẹ ọpharuyovwin vwọ phare uyovwin rayen, kirobo rẹ Jihova ji iji rọyen kẹ Mosis.
14 Ọ da reyọ erhuẹn rẹ izobo rẹ umwemwu na rhe, Erọn vẹ emọ rọyen da ghwabọ rayen kpahen uyovwin rẹ erhuẹn rẹ izobo rẹ umwemwu na. 15 Mosis de hwe, ọ da vwẹ urhiobọ rọyen vwọ reyọ ọbara na, o de vwo ghworo idjo rẹ agbada na vwẹ ẹbẹre rọyen eje, o de ru agbada na fon vwo nẹ umwemwu, ẹkẹvuọvo o de ku ọbara ro chekọ na kuotọ kẹrẹ agbada na rere o vwo ruo fon, e se vwo ru arhuẹrẹ vwẹ enu rọyen. 16 O vwo ru ọyena nu, ọ da reyọ ivwri na eje rehẹ ivun na, ivwri rẹ irhue na, kugbe ibiehun ivẹ na vẹ ivwri rayen, Mosis da nẹrhẹ ayen bru ivwirhi vwẹ enu rẹ agbada na. 17 O vwo ru ọyena nu, a da vwẹ erhanre vwọ torhẹ ọ ro chekọ vwẹ erhuẹn na, ohọrọ rọyen, uvwo rọyen, kugbe isọn rọyen, vwẹ otafe rẹ asan rẹ ayen wonphiyọ* na, kirobo rẹ Jihova ji iji rọyen kẹ Mosis.
18 Ọ da reyọ egbon rẹ izobo rẹ ẹtorhẹ na rhe, Erọn vẹ emọ rọyen da ghwabọ rayen kpahen uyovwin rẹ egbon na. 19 Mosis de hwe, ọ da fẹrẹn ọbara rọyen ku ẹbẹre eje rẹ agbada na. 20 O de bru egbon na ibribro, Mosis da nẹrhẹ uyovwin na, ibro na, vẹ ivwri re riariẹ ibiehun na phiyọ bru ivwirhi. 21 Ọ da vwẹ ame vwọ hworhẹ ivun na vẹ awọ na, Mosis da nẹrhẹ ọsoso rẹ egbon na bru ivwirhi vwẹ enu rẹ agbada na. Ọyen izobo rẹ ẹtorhẹ kerẹ ọnrhe ọvwevwerhen. Ọyen izobo ra vwẹ erhanre torhẹ kẹ Jihova, kirobo rẹ Jihova ji iji rọyen kẹ Mosis.
22 O vwo ru ọyena nu, ọ da reyọ egbon rivẹ na rhe, egbon rẹ evwomuẹ na, Erọn vẹ emọ rọyen da ghwabọ rayen kpahen uyovwin rẹ egbon na. 23 Mosis de hwe, ọ da reyọ evo vwẹ usun rẹ ọbara rọyen, o de phio phiyọ orhọ rẹ obọrhen rẹ Erọn kugbe urhiobọ rode rẹ obọrhen rọyen kugbe urhiowọ rode rẹ owọrhen rọyen. 24 Mosis vwo ru ọyena nu, ọ da reyọ emọ rẹ Erọn rhe, o de phi evo vwẹ usun rẹ ọbara na phiyọ orhọ rẹ obọrhen rayen vẹ urhiobọ rode rẹ obọrhen rayen kugbe urhiowọ rode rẹ owọrhen rayen; ẹkẹvuọvo Mosis de mirin ọbara ro chekọ na ku ẹbẹre eje rẹ agbada na.
25 Ọ da reyọ ivwri na, ivwri rẹ urhurhu na, ivwri na eje rehẹ ivun na, ivwri rẹ irhue na, ibiehun ivẹ na vẹ ivwri rayen, kugbe owọrhen na. 26 Ọ da reyọ ibrẹdi ọvo ro jephuo re ru họhọ ubiosa, ibrẹdi ọvo re ru họhọ ubiosa ra vwẹ evwri ghworo, kugbe ibrẹdi ọvo rọ pha pẹpẹghẹ vwo nẹ obere rẹ ibrẹdi ro jephuo rọhẹ obaro ri Jihova rhe. O de mu ayen phiyọ enu rẹ ibro rẹ ivwri na vẹ owọrhen na. 27 O vwo ru ọyena nu, o de mu ayen eje phiyọ abọ rẹ Erọn kugbe abọ rẹ emọ rọyen, ko djuẹ ayen kpuko kparo kerẹ izobo rẹ edjuo vwẹ obaro ri Jihova. 28 Ọyena vwọ wan nu, Mosis da reyọ ayen nẹ abọ rayen, ọ da nẹrhẹ ayen bru ivwirhi vwẹ agbada na, vwẹ enu rẹ izobo rẹ ẹtorhẹ na. Ayen izobo rẹ evwomuẹ kerẹ ọnrhe ọvwevwerhen. Ọyen izobo ra vwẹ erhanre torhẹ kẹ Jihova.
29 Mosis da reyọ evie na, o de djuo kpuko kparo kerẹ izobo rẹ edjuo vwẹ obaro ri Jihova. Ọ da rhe dia ẹkẹn ri Mosis vwo nẹ egbon rẹ evwomuẹ na kirobo rẹ Jihova ji iji rọyen kẹ Mosis.
30 Mosis da reyọ evo vwẹ usun rẹ evwri rẹ ẹjẹreyọ na kugbe evo vwẹ usun rẹ ọbara rọhẹ enu rẹ agbada na, o de miron ku Erọn vẹ iwun rọyen kugbe emọ rọyen vẹ iwun rẹ emọ rọyen re vẹ ọyen gba herọ. Ọtiọyena o de ru Erọn vẹ iwun rọyen kugbe emọ rọyen vẹ iwun rayen fon.
31 Mosis da ta kẹ Erọn vẹ emọ rọyen: “Ovwan chere uvwo na vwẹ asan ra wan rua utughẹ ra da vwoma na, ovwan cha riọ vwẹ etiyin vẹ ibrẹdi rọhẹ evunrẹ obere rẹ evwomuẹ na, kirobo re ji iji rọyen kẹ vwẹ, ‘Erọn vẹ emọ rọyen cha riọ.’ 32 Ovwan me vwẹ erhanre vwọ torhẹ obo ri chekọ vwẹ uvwo vẹ ibrẹdi na. 33 Ovwan yan sherẹ kẹ asan ra wan rua utughẹ ra da vwoma na vwẹ ẹdẹ ighwrẹẹn, bẹsiẹ rẹ ẹdẹ rẹ evwomuẹ rẹ ovwan ke gba, kidie evwomuẹ rẹ ovwan kerẹ irherẹn cha reyọ ẹdẹ ighwrẹn. 34 Jihova ji iji nẹ avwanre ru oborẹ avwanre ruru nonẹna rere e se vwo ru arhuẹrẹ kẹ ovwan. 35 Ovwan me dia asan ra wan rua utughẹ ra da vwoma na te ason te uvo vwẹ ẹdẹ ighwrẹn, ovwan mi ruiruo rẹ Jihova vwọ kẹ ovwan rere ovwan vwo jeghwo; kidie ọtiọyen o ji iji rọyen kẹ vwẹ.”
36 Erọn vẹ emọ rọyen de ru erọnvwọn eje rẹ Jihova ji iji rọyen womarẹ Mosis.