Ukeri

30 Ọtiọyena Mosis da ta ota kẹ igbuyovwin rẹ ivwiẹ rẹ Izrẹl, ọ da ta: “Ọnana yen oborẹ Jihova ji iji rọyen: 2 Ọ da dianẹ ọshare ve ive kẹ Jihova yẹrẹ ko duvwun iyorin rọ vwọ gba oma rọyen vwo ru nene* ive ro veri nẹ ọyen cha kẹnoma kẹ orọnvwọn, e jẹ o wene unuu. E gbe jẹ o ru kemu kemu ro veri nẹ ọyen che ru na.

3 “Ọ da dianẹ aye ve ive kẹ Jihova yẹrẹ o ve ive rọ vwọ kẹnoma kẹ orọnvwọn ọke rọ vwọ hẹ eghene rọ je vwọ dia uwevwin rẹ ọsẹ rọyen na 4 ọsẹ rọyen de nyo kpahen ive rọyen na yẹrẹ ive ro ve kẹ oma rọyen* nẹ ọyen cha kẹnoma kẹ orọnvwọn na jẹ ọsẹ rọyen vwọsuọọ, ive rọyen eje ke dia ọtiọyen, erọnvwọn eje ro ve kẹ oma rọyen nẹ ọyen cha kẹnoma kẹ na ke dia ọtiọyen. 5 Ẹkẹvuọvo ọsẹ rọyen da sen ọke ro vwo nyo kpahen ive rọyen na yẹrẹ obo ro ve kẹ oma rọyen nẹ ọyen cha kẹnoma kẹ na, ọ rha cha dia ọtiọyeen. Jihova che vwo ghovwo kidie ọsẹ rọyen sen kẹ.

6 “Ẹkẹvuọvo ọ da dianẹ ọ rọvwọn ọshare ọke rọ vwọ hẹ otọ rẹ ive rọyen yẹrẹ ive ro roro te tavwen o ki ve kẹ oma rọyen naa 7 ọshare rọyen de nyo kpahọn jẹ ọ vwọsuọ vwẹ ẹdẹ ro nyo kpahọn naa, ive rọyen na yẹrẹ ive rọ vwọ kẹnoma kẹ orọnvwọn ro ve kẹ oma rọyen na kọ dia ọtiọyen. 8 Ẹkẹvuọvo ọshare rọyen da siọn kẹ vwẹ ẹdẹ ro nyo kpahọn, ọ sa phan ive na yẹrẹ ive ro roro te tavwen o ki ve kẹ oma rọyen naa, Jihova ko che vwo ghovwo.

9 “Ẹkẹvuọvo ayeuku yẹrẹ aye rọ fan orọnvwe de ve ive, kemu kemu ro ve kẹ oma rọyen kọ dia ọtiọyen.

10 “Ẹkẹvuọvo aye de ve ive kẹ oma rọyen yẹrẹ o de ve nẹ ọyen cha kẹnoma kẹ orọnvwọn ọvo ọke rọ vwọ hẹ uwevwin rẹ ọshare rọyen 11 ọshare rọyen de nyo kpahọn jẹ ọ sen kẹẹ, ive rọyen eje yẹrẹ ive rọ vwọ kẹnoma kẹ orọnvwọn ro ve kẹ oma rọyen na kọ dia ọtiọyen. 12 Ẹkẹvuọvo ẹdẹ ro nyo kpahen ayen, ọshare rọyen da sen kive kive yẹrẹ ive rọ vwọ kẹnoma kẹ orọnvwọn ro duvwun iyorin rọyen na, ayen rha cha dia ọtiọyeen, ọshare rọyen sen ayen, Jihova che vwo ghovwo. 13 Vwọ kpahen kive kive yẹrẹ kiyorin kiyorin eduvwon ro churobọ si ive ra vwọ kẹnoma kẹ orọnvwọn re vwo gboja kẹ oma rẹ ohwo,* ọshare rọyen me rhọnvwephiyọ yẹrẹ ọshare rọyen me siọn. 14 Ẹkẹvuọvo ọ da dianẹ nẹ ẹdẹ ra ro ẹdẹ, ọshare rọyen rha sen ayeen, jẹ ọ rhọnvwephiyọ ive rẹ aye na eje yẹrẹ ive eje rọ vwọ kẹnoma ke orọnvwọn ro ve kẹ oma rọyen. Ọ rhọnvwephiyọ ayen kidie ọ sen ayen vwẹ ẹdẹ ro vwo nyo aye na ro ve ive naa. 15 Jẹ ọ da dianẹ ẹdẹ evo wan nu vwo nẹ ẹdẹ ro vwo nyo ayen tavwen ọ ke sen ayen, kọ cha rioja rẹ abe rẹ aye na.

16 “Enana irhi rẹ Jihova vwọ kẹ Mosis ri shekpahen ọshare vẹ aye rọyen, kugbe ọsẹ vẹ ọmọtẹ rọyen rọ dia uwevwin rọyen.”