Diutaronomi

24 “Ọ da dianẹ ọshare rọvwọn aye ẹkẹvuọvo o jeree, kidie ọ mrẹ obo ri je fo vwẹ oma rọyen, e jẹ o si ọbe rẹ orọnvwe-ẹfan vwọ kẹ, o phiọ phiyọ obọ rọyen rere ọ djẹ nẹ uwevwin rọyen. 2 O de nẹ uwevwin rọyen nu, ọ sa yanran ra dia aye rẹ ọshare ọfa. 3 Ọshare rivẹ na de vwo utuoma kpahọn,* o de si ọbe rẹ orọnvwe-ẹfan vwọ kẹ, phio phiyọ obọ rọyen, je djẹ nẹ uwevwin rọyen yẹrẹ ọ da dianẹ ọshare rivẹ rọ rọnvwerọ na ko ghwuru, 4 a cha rhọnvwe nẹ ọshare rẹsosuọ rọ djẹrẹ na rhoma reyọ rhivwin kerẹ aye rọyen re vwo gbe ẹgua nure naa, kidie ọyen orọnvwọn ro tuẹn Jihova oma, ovwan hwarhiẹ umwemwu rua otọ rẹ Jihova Ọghẹnẹ rẹ ovwan cha vwọ kẹ ovwan kerẹ uku naa.

5 “Ọshare da rọvwọn nu obọ, e jẹ ọ ga kerẹ isodjee yẹrẹ a vwẹ iruo efa vwọ kẹẹ. E jẹ a yan jovwo ẹgbukpe ọvo rere ọ dia uwevwin, ọ nẹrhẹ oma vwerhen aye rọyen.

6 “E jẹ ohwo vuọvo reyọ ukuta robọ yẹrẹ ọmọ rẹ ukuta na kerẹ obo re vwo viẹnwa vwọ kẹ obo ro momo ohwoo, kidie ọyena mudiaphiyọ nẹ ọ reyọ oborẹ ohwo vwo yeren akpọ* vwo ru obo re vwo viẹnwa.

7 “E de mu ohwo ro mu ọvo* vwẹ usun rẹ oniọvo rọyen rọ dia ohwo rẹ Izrẹl re sinu, o de gboja kẹ je shẹ, e mi hwe ohwo ro mu ohwo re sinu na. Ovwan mi si obo re brare vwo nẹ ohri rẹ ovwan.

8 “Siẹrẹ ọga rẹ oti* da vwomaphia, ovwan nabọ jomaotọ vwo ru erọnvwọn eje rẹ irherẹn re dia ihwo ri Livae na vuẹ ovwan. Ovwan jomaotọ vwo ru obo re me ghwa vuẹ ayen dẹn. 9 Ovwan karophiyọ oborẹ Jihova Ọghẹnẹ rẹ ovwan ru Miriam ọke rẹ ovwan vwọ hẹ idjerhe nẹ Ijipt cha.

10 “Korọnvwọn korọnvwọn ru wo momo kẹ ọrivẹ wẹn, wọ rua uwevwin rọyen ra gba vwọ reyọ orọnvwọn ro vwo viẹnwa kẹ wẹ naa. 11 Wo mi mudia otafe, ohwo ru wo momo orọnvwọn kẹ na me reyọ obo ro vwo viẹnwa na bru we rhe. 12 Ọ da dianẹ ohwo na ogbere, wo jẹ obo ro vwo viẹnwa rọ vwọ kẹ wẹ na dia obọ wẹn kọkirhiee. 13 O vwo obo rọ wanree, wọ me reyọ obo ro vwo viẹnwa na rhe rhivwin ugege rẹ ọke de she nu, kọ cha vwẹ iwun rọyen vwọ vwerhẹn, ko che bruba kẹ wẹ; ọyena ko mudiaphiyọ ophiọnphiọn kẹ wẹ vwẹ obaro ri Jihova Ọghẹnẹ rẹ ovwan.

14 “Wọ ghwa ohwo rẹ akpọ bẹn rọ je dia ogbere ru wọ reyọ phiyọ iruo riaa, owenẹ ọ dia ọvo vwẹ usun rẹ iniọvo wẹn yẹrẹ ọrhorha rọ dia otọ rẹ ovwan vwevunrẹ irere* rẹ ovwan. 15 Wọ me hwosa rọyen kẹ vwẹ ẹdẹdẹ yena tavwen ọke ki she, kidie akpọ bẹn, e ji mu arhọ* rọyen kpahen osa rọyen. Ọ rha dia ọtiọyeen, ko che kperi se Jihova vwọso owẹ, ku wọ cha riabe rẹ umwemwu.

16 “E jẹ a teyan esẹ hwe fikirẹ oborẹ emọ rayen ruruu, e jẹ a je teyan emọ hwe fikirẹ oborẹ esẹ rayen ruruu. E jẹ a teyen ohwo hwe fikirẹ umwemwu robọ rọyen ọvo.

17 “Ovwan gẹrẹ ẹdjọeguo rẹ ọrhorha yẹrẹ ọ rẹ ọmọ ro jẹ ọsẹ evwoo,* ovwan je gba ayeuku vwọ reyọ ewun rọyen kerẹ obo re vwo viẹnwa vwọ kẹ obo ro momorii. 18 Ovwan karophiyọ nẹ ovwan dia eviẹn vwẹ Ijipt jovwo, Jihova Ọghẹnẹ rẹ ovwan da tan ovwan hirhe nẹ oboyin. Kọyensorọ me vwọ vwẹ iji kẹ ovwan nẹ ovwan ru ọnana.

19 “Ọke wo de vuẹn orhọ rẹ udju wẹn, ekrun rẹ eka da chọrọ owẹ ẹro vwevunrẹ udju na, wo rhivwin ra reyọọ. Yan jovwo kẹ erhorha, emọ ri jẹ esẹ evwo, kugbe eyauku rere Jihova Ọghẹnẹ rẹ ovwan se vwo bruba kẹ wẹ vwẹ erọnvwọn eje ru wo ruẹ.

20 “Ọke wo de kpogho urhe rẹ oliv wẹn, wọ rhoma kpogho eghọn rọyeen. Wọ me yanjẹ obo ri chekọ vwo kẹ erhorha, emọ ri jẹ esẹ evwo, kugbe eyauku.

21 “Ọke wo de koko igrepu rẹ ogba rẹ ivaini wẹn, wo rhivwin re koko i ri chekọọ. Yanjẹ ayen vwo kẹ erhorha, emọ ri jẹ esẹ evwo, kugbe eyauku. 22 Ovwan karophiyọ nẹ ovwan dia eviẹn vwẹ otọ rẹ Ijipt jovwo. Kọyensorọ me vwọ vwẹ iji kẹ ovwan nẹ ovwan ru ọnana.