Diutaronomi

27 Etiyin Mosis vẹ ekpako rẹ Izrẹl da vwẹ iji kẹ ihwo na, ayen da ta: “Ovwan ru nene iji na eje re me vwọ kẹ ovwan nonẹna. 2 Ẹdẹ rẹ ovwan cha shariẹ Jọdan na vrẹ ra ro otọ rẹ Jihova Ọghẹnẹ rẹ ovwan cha vwọ kẹ ovwan na, ovwan vwẹ ikuta ride vwo vi rere ovwan rhare ayen.* 3 Ovwan mi si eta rẹ Urhi nana eje phiyọ ayen ọke rẹ ovwan da shariẹ vrẹ nu, rere ovwan sa vwọ ro evunrẹ otọ rẹ Jihova Ọghẹnẹ rẹ ovwan cha vwọ kẹ ovwan na, otọ rọ djẹ ọkẹre rẹ ameivie vẹ ame ọnyọn, kirobo rẹ Jihova Ọghẹnẹ rẹ esẹ rẹ ovwan ride ve kẹ ovwan. 4 Ọke rẹ ovwan da shariẹ Jọdan na vrẹ nu, ovwan me vwẹ ikuta nana vwo vi vwẹ Ugbenu rẹ Ibal je rhare ayen,* kirobo ri mi ji iji rọyen kẹ ovwan nonẹna. 5 Ovwan me je so agbada vwẹ etiyin kẹ Jihova Ọghẹnẹ rẹ ovwan, agbada rẹ ikuta. Ovwan vwẹ orọnvwọn ra vwẹ utehru vwo ru vwọ kara ikuta naa. 6 Ovwan me vwẹ ikuta ọsoso vwọ so agbada ri Jihova Ọghẹnẹ rẹ ovwan na ji ze izobo rẹ ẹtorhẹ kẹ Jihova Ọghẹnẹ rẹ ovwan vwẹ enu rọyen. 7 Ovwan me vwẹ izobo rẹ ọrekugbe vwọ kpahotọ je re ayen vwẹ etiyin, kẹ ovwan cha ghọghọ vwẹ obaro ri Jihova Ọghẹnẹ rẹ ovwan. 8 Ovwan mi si eta rẹ Urhi nana eje phenphẹn phiyọ ikuta na.”

9 Ọtiọyena Mosis vẹ irherẹn re dia ihwo ri Livae na da ta ota kẹ ihwo rẹ Izrẹl eje, ayen da ta: “Ovwan fotovwin rere ovwan kerhọ, E Izrẹl. Nonẹna ovwan rhe dia ihwo ri Jihova Ọghẹnẹ rẹ ovwan re. 10 Ovwan me kerhọ rẹ urhuru ri Jihova Ọghẹnẹ rẹ ovwan ji ru nene iji rọyen kugbe irhi rọyen re me vwọ kẹ ovwan nonẹna.”

11 Mosis da vwẹ iji kẹ ihwo na vwẹ ẹdẹ yena rọ vwọ ta: 12 “Ivwiẹ nana che mudia Ugbenu ri Gẹrizim vwo bruba kẹ ihwo na ọke rẹ ovwan da shariẹ Jọdan na vrẹ nu: Simiọn, Livae, Juda, Isaka, Josẹf, kugbe Bẹnjamin. 13 Enana mi rhe mudia Ugbenu rẹ Ibal vwo ghwoghwo ekan na: Rubẹn, Gad, Asha, Zẹbulọn, Dan, kugbe Naftalai. 14 Ihwo ri Livae na me rha kpahen kẹ kohwo kohwo rẹ Izrẹl vẹ urhuru ọgangan:

15 “‘Ekan vwọ kẹ ohwo rọ kare oma yẹrẹ ma oma rẹ utehru,* orọnvwọn ro tuẹn Jihova oma, iruo rẹ obọ rẹ ọwena,* ro de sionu.’ (Ihwo na ejobi me kpahen nẹ, ‘Isẹ!’*)

16 “‘Ekan vwọ kẹ ohwo rọ jẹ ọsẹ rọyen yẹrẹ oni rọyen fia.’ (Ihwo na ejobi me tanẹ, ‘Isẹ!’)

17 “‘Ekan vwọ kẹ ohwo ro mu obo re vwo gbere ughwru phiyọ otọ rẹ ọrivẹ rọyen vwo nẹ asan rọ hepha.’ (Ihwo na ejobi me tanẹ, ‘Isẹ!’)

18 “‘Ekan vwọ kẹ ohwo ro sun orhuẹro ghwru vwẹ idjerhe.’ (Ihwo na ejobi me tanẹ, ‘Isẹ!’)

19 “‘Ekan vwọ kẹ ohwo rọ gẹrẹ orhiẹn-ebro rẹ ọrhorha, ọmọ ro jẹ ọsẹ evwo,* yẹrẹ ayeuku.’ (Ihwo na ejobi me tanẹ, ‘Isẹ!’)

20 “‘Ekan vwọ kẹ ohwo ro nene aye rẹ ọsẹ rọyen vwerhẹn, kidie ọ phọphọ ọsẹ rọyen.’ (Ihwo na ejobi me tanẹ, ‘Isẹ!’)

21 “‘Ekan vwọ kẹ ohwo ro nene koka koka rẹ eranvwe vwerhẹn.’ (Ihwo na ejobi me tanẹ, ‘Isẹ!’)

22 “‘Ekan vwọ kẹ ohwo ro nene oniọvo rọyen ọmọtẹ vwerhẹn, owenẹ ọ dia ọmọ rẹ ọsẹ rọyen yẹrẹ ọmọ rẹ oni rọyen.’ (Ihwo na ejobi me tanẹ, ‘Isẹ!’)

23 “‘Ekan vwọ kẹ ohwo ro nene oni aye rọyen vwerhẹn.’ (Ihwo na ejobi me tanẹ, ‘Isẹ!’)

24 “‘Ekan vwọ kẹ ohwo rọ hwa phiyọ hẹrhẹ ọrivẹ rọyen je teyọn hwe.’ (Ihwo na ejobi me tanẹ, ‘Isẹ!’)

25 “‘Ekan vwọ kẹ ohwo rọ re udi rọ vwọ teyen ohwo rẹ abọ rọyen fonro hwe.’ (Ihwo na ejobi me tanẹ, ‘Isẹ!’)

26 “‘Ekan vwọ kẹ ohwo rọ rhọnvwe serọ rẹ eta rẹ Urhi nana ji ru nene ayeen.’ (Ihwo na ejobi me tanẹ, ‘Isẹ!’)