Diutaronomi
29 Enana yen eta rẹ ọphọ rẹ Jihova vuẹ Mosis nẹ ọ vẹ ihwo rẹ Izrẹl re vwẹ otọ ri Moab, vwọ ba ọphọ rọ vẹ ayen gba re vwẹ Horẹb.
2 Ọtiọyena Mosis de se Izrẹl eje koko, ọ da ta kẹ ayen: “Ovwan mrẹ erọnvwọn eje rẹ Jihova ru Fero vẹ idibo rọyen eje kugbe otọ rọyen eje vwẹ irharo rẹ ovwan vwẹ otọ rẹ Ijipt, 3 ẹdjọeguo* ride rẹ ẹro rẹ ovwan mrẹre, eka vẹ igbevwunu ride yena. 4 Ẹkẹvuọvo, Jihova je rhe kẹ ovwan ubiudu re vwo vwo ẹruọ vẹ ẹro ra vwọ mrorẹ kugbe erhọ re vwo nyẹme rhi te nonẹnaa. 5 ‘Vwẹ ẹgbukpe 40 ri mi vwo sun ovwan vwẹ aton na, iwun rẹ ovwan bẹre dje ovwan omaa, isabatu rẹ ovwan ji vwrẹ dje ovwan awọọ. 6 Ovwan re ibrẹdii, ovwan je da iwaini yẹrẹ udi vuọvo ro muẹ ohwoo, rere ovwan vwọ riẹn nẹ mẹvwẹ Jihova Ọghẹnẹ rẹ ovwan.’ 7 Ukuotọ rọyen, ovwan de rhi te etinẹ, Saihọn ovie ri Hẹshbọn kugbe Ọg ovie ri Beshan da kpare ofovwin bru avwanre rhe, ẹkẹvuọvo avwanre de phi ayen kparobọ. 8 Ọyena vwọ wan nu, avwanre da reyọ otọ rayen, avwanre da reyọ vwọ kẹ uvwiẹ ri Rubẹn, Gad, kugbe ubro rẹ uvwiẹ ri Manasẹ kerẹ uku. 9 Ọtiọyena, ovwan sẹro rẹ eta rẹ ọphọ nana ji ru nene ayen rere kemu kemu rẹ ovwan ruẹ vwo yovwin kẹ ovwan.
10 “Ovwan ihwo eje mudia obaro ri Jihova Ọghẹnẹ rẹ ovwan nonẹna, igbuyovwin rẹ ivwiẹ rẹ ovwan, ekpako rẹ ovwan, inotu rẹ ovwan, kọshare kọshare rẹ Izrẹl, 11 emọ rẹ ovwan, eya rẹ ovwan, kugbe erhorha rẹ ovwan re dia ohri rẹ ovwan vwẹ asan rẹ ovwan wonphiyọ,* vwo nẹ ọ ro koko irhe kẹ ovwan re te ọ ro vo ame kẹ ovwan. 12 Ovwan rhe etinẹ rere ovwan vẹ Jihova Ọghẹnẹ rẹ ovwan vwọ re ọphọ ji vwo obọechuro, rọ dia oborẹ Jihova Ọghẹnẹ rẹ ovwan vẹ ovwan che ru nonẹna 13 rere ọ sa vwọ vwẹ ovwan mu kerẹ ihwo rọyen nonẹna, ọ je vwọ dia Ọghẹnẹ rẹ ovwan kirobo ro ve kẹ ovwan, kirobo ro ji duvwun iyorin rọyen kẹ esẹ rẹ ovwan ride, Ebraham, Aizik, kugbe Jekọp.
14 “Asaọkiephana ọ dia ovwan ọvo yen mẹ vẹ ayen gba re ọphọ nana ji vwo obọechuro nanaa, 15 ẹkẹvuọvo mẹ vẹ ihwo re vẹ avwanre gbe mudia etinẹ nonẹna vwẹ obaro ri Jihova Ọghẹnẹ rẹ avwanre kugbe ihwo re vẹ avwanre gba hẹ etinẹ nonẹnaa. 16 (Kidie ovwan nabọ riẹn oborẹ avwanre yerin wan vwẹ otọ rẹ Ijipt kugbe oborẹ avwanre wanvrẹ uherevie rẹ ẹgborho sansan vwẹ oyan rẹ avwanre na. 17 Ovwan je mrẹ erọnvwọn rẹ ẹgua rayen kugbe ema rayen ri tuoma* rehẹ ohri rayen ra vwẹ urhe kugbe ukuta, idọnọ ọfuanfon kugbe oro vwo ru.) 18 Ovwan jomaotọ rere e vwo jẹ ọshare yẹrẹ aye, orua yẹrẹ uvwiẹ ẹmrẹ vwẹ ohri rẹ ovwan nonẹna, rẹ ubiudu rọyen bo ghwru vwo nẹ Jihova Ọghẹnẹ rẹ avwanre ra ga eghẹnẹ rẹ ẹgborho yena, rere e vwo jẹ awọ rẹ urhe rọ mọ orharhe rẹ omamọ kugbe okankọn rọ yara ẹmrẹ vwẹ ohri rẹ ovwan.
19 “Ẹkẹvuọvo ohwo de nyo eta rẹ obọechuro nana, ọ da je vwẹ obọ sa udu nẹ, ‘Mi che vwo ufuoma, dede nẹ me yan vwẹ idjerhe rẹ ubiudu romobọ mẹ,’ ọ da so oghwọrọ vwọ kẹ kemu kemu* rọhẹ idjerhe rọyen, 20 Jihova che vwo owenvwe rọ vwọ reyọ vwo ghovwoo. Ukperẹ ọtiọyen, ophu ọgangan ri Jihova cha tua kpahen ohwo yena, ekan na eje re si phiyọ ọbe nana ke cha dia enu rẹ uyovwin rọyen, vwọrẹ uyota, Jihova ko che phoro odẹ rọyen vwo nẹ otọ rẹ idjuvwu na. 21 Jihova kọ cha sanọ phia vwo nẹ ivwiẹ rẹ Izrẹl eje vwọ kẹ okpetu vwo nene ekan rẹ ọphọ na eje re si phiyọ ọbe rẹ Urhi na.
22 “Ọke rẹ uvwiẹ rẹ emọ rẹ ovwan re cha vwẹ obaro na kugbe erhorha ri nẹ otọ oshesheri rhe da mrẹ etiekọ rẹ otọ na kugbe oja rẹ Jihova vwọ rhe enu rọyen— 23 isọfọ vẹ ughwanka kugbe ẹtorhẹ, rere e vwo jẹ ekankọn ẹkọn yẹrẹ ekankọn vwo jẹ djẹ vwẹ otọ rọyen ejobi yẹrẹ ẹbe vuọvo vwo jẹ djẹ vwọ kirobo re phi Sọdọm vẹ Gomora, Adma kugbe Zeboim kparobọ, rẹ Jihova phikparobọ vwẹ ophu kugbe ivun emiovwo rọyen— 24 ayen vẹ ẹgborho na eje ke cha tanẹ, ‘Diesorọ Jihova vwo ru otọ nana ọtiọna? Die yen so ophu ọgangan nana rọ tua na?’ 25 Kẹ ayen cha tanẹ, ‘Kidie nẹ ayen gbobọnyẹ ọphọ ri Jihova, Ọghẹnẹ rẹ esẹ rayen ride, ọphọ rọ vẹ ayen rere ọke rọ vwọ reyọ ayen nẹ otọ rẹ Ijipt rhe. 26 Ẹkẹvuọvo, ayen da yanran ra ga eghẹnẹ efa je vwẹ uyovwin kpotọ kẹ ayen, eghẹnẹ rẹ ayen riẹnre jovwoo, rọ je rhọnvwe kẹ ayen nẹ ayen gaa.* 27 Ọtiọyena ophu ọgangan ri Jihova rọ tua na da rhe vwọso ihwo rẹ otọ yena, womarẹ ọ vwọ reyọ ekan na eje re si phiyọ evunrẹ ọbe nana vwo rhe ayen. 28 Jihova de ghwie ayen nẹ otọ rayen vwẹ ophu ọgangan rọyen kugbe ivun emiovwo ọgangan rọyen, ọ da reyọ ayen kpo otọ ọfa, asan rẹ ayen hepha nonẹna.’
29 “Erọnvwọn re sinu, e rẹ Jihova Ọghẹnẹ rẹ avwanre, ẹkẹvuọvo erọnvwọn ra vwọ phia, e rẹ avwanre kugbe e rẹ emọ rẹ avwanre bẹdẹ, rere avwanre se vwo ru nene eta rẹ Urhi nana eje.