Joshua
11 Ugege rẹ Jebin ovie ri Hezọ vwo nyo kpahọn, ọ da vwẹ ovuẹ rhe Jobab ovie ri Medọn, kugbe ovie ri Shimrọn, vẹ ovie rẹ Akshaf, 2 ivie rehẹ obohwẹre ọnre rẹ ekogho rẹ igbenu na, e rehẹ uphẹphẹn* rẹ obọrhen ọnre ri Kinẹrẹt, e rehẹ Shẹfila na kugbe eghwrọrọ ri Dọ vwẹ ẹbẹre ọnre shera, 3 ihwo ri Kenan vwẹ ẹbẹre ọnre va nẹcha kugbe ẹbẹre ọnre shera, ihwo rẹ Amọ, ihwo ri Hẹt, ihwo ri Pẹriz, ihwo ri Jẹbus vwẹ ekogho rẹ igbenu na, kugbe ihwo ri Haiv vwẹ obotọ rẹ Ugbenu ri Hẹmọn vwẹ otọ ri Mizpa. 4 Ọtiọyena ayen da yan phia vẹ ituofovwin rayen eje, ayen pha buebun gbidiki kerẹ ehavwo rehẹ orhoma rẹ abadi, vẹ iyesi buebun kugbe ekpẹrẹ rẹ ofovwin. 5 Ivie nana eje da rhọnvwe nẹ ayen cha vwoma, ayen da rhe, ayen de koko wonphiyọ* asan ame ri Mẹrọn, rere ayen nene Izrẹl họnre.
6 Ọtiọyena Jihova da ta kẹ Joshua nẹ: “Wo jẹ oshọ mu we fiki rayeen, kidie vwẹ omarẹ ọke nana vwẹ odẹ rọ cha na, me cha vwẹ ayen eje kẹ Izrẹl hwe. Ovwan me kon* iyesi rayen, ovwan me je torhẹ ekpẹrẹ rẹ ofovwin rayen vwẹ erhanre.” 7 Joshua vẹ ituofovwin na eje da ro ayen ọrhan vwẹ orhoma rẹ ame ri Mẹrọn. 8 Jihova de phi ayen phiyọ obọ rẹ Izrẹl, ayen de phi ayen kparobọ je vwọtua ayen re te Saidọn Rode kugbe Misrefọt-meim kugbe Iyara ri Mizpa vwẹ ẹbẹre ọnre va nẹcha, ayen da nyavwe ayen hwe rhirin re te ọke rẹ ohwo vuọvo rhe chekọọ. 9 Joshua de ru ayen kirobo rẹ Jihova vuẹrẹ, ọ da kon iyesi rayen je torhẹ ekpẹrẹ rẹ ofovwin rayen vwẹ erhanre.
10 Vwọ vrẹ ọyena, Joshua de rhivwin, ọ da reyọ Hezọ, ọ da vwẹ ọlọkọ vwo hwe ovie rọyen, kidie Hezọ yen osun rẹ ivie nana eje jovwo. 11 Ayen da vwẹ ọlọkọ vwo hwe kohwo kohwo* rọhẹ evun rọyen, ayen da ghwọrọ ayen totọ. O vwo obo re wẹn vuọvo ro chekọọ. Ọ da vwẹ erhanre torhẹ Hezọ. 12 Joshua da reyọ irere rẹ ivie nana ejobi je vwẹ ọlọkọ vwo hwe ivie rayen eje. Ọ ghwọrọ ayen totọ kirobo rẹ Mosis odibo ri Jihova vwẹ iji na phia. 13 Ẹkẹvuọvo, Izrẹl torhẹ ọvuọvo vwẹ usun rẹ irere rehẹ asan ri kpenu naa jokparẹ Hezọ ọvo; ọyen ọvo yen Joshua torhẹre. 14 Ihwo rẹ Izrẹl da ghwẹ ekuakua rẹ irere nana ji mu ichuru rayen reyọ. Ẹkẹvuọvo ayen vwẹ ọlọkọ hwe kohwo kohwo bẹsiẹ rẹ ayen vwọ ghwọrọ ayen re. Ayen yanjẹ ohwo vuọvo rọ wẹn vwoo. 15 Kirobo rẹ Jihova vwẹ iji kẹ Mosis odibo rọyen, ọtiọyen Mosis je vwẹ iji kẹ Joshua, ọtiọyen Joshua ruru. O vwo orọnvwọn ọvuọvo ro je ruo vwẹ usun rẹ erọnvwọn eje rẹ Jihova vwẹ iji rọyen kẹ Mosis naa.
16 Joshua phi otọ nana eje kparobọ, ekogho rẹ igbenu na, Nẹgẹb ejobi, otọ ri Goshẹn eje, Shẹfila na, Araba na, kugbe ekogho rẹ igbenu rẹ Izrẹl vẹ Shẹfila* rọyen, 17 vwo nẹ Ugbenu ri Helak, ro kpo Siẹ rhirin re te Bel-gad vwẹ Iyara ri Lẹbanọn, vwẹ obotọ rẹ Ugbenu ri Hẹmọn. O mu ivie rayen eje ji phi ayen kparobọ, ọ da teyen ayen hwe. 18 Joshua nene ivie nana eje phi ofovwin vwẹ ọmọke evo. 19 O vwo orere vuọvo ro vwo ọrhọnvwekugbe rẹ ufuoma vẹ ihwo rẹ Izrẹẹl jokparẹ ihwo ri Haiv re dia Gibiọn. Ayen phi irere ri chekọ na eje kparobọ vwẹ ofovwin. 20 Jihova yen vwẹ uphẹn kẹ ubiudu rayen nẹ ọ gan rere ayen se vwo nene Izrẹl phi ofovwin, rere ọ vwọ ghwọrọ ayen karekare vwọrẹ jẹ arodọnvwẹ egbe kẹ ayen. Ofori nẹ a ghwọrọ ayen kirobo rẹ Jihova vwẹ iji vwọ kẹ Mosis.
21 Vwẹ ọke yena Joshua da ghwọrọ ihwo rẹ Anak na vwo nẹ ekogho rẹ igbenu na, vwo nẹ Hẹbrọn, Dibiẹ, Enab, kugbe ekogho rẹ igbenu ri Juda eje vẹ ekogho rẹ igbenu rẹ Izrẹl eje. Joshua da ghwọrọ ayen vẹ irere rayen karekare. 22 O vwo ohwo rẹ Anak vuọvo ra yan jovwo vwẹ otọ rẹ ihwo rẹ Izrẹẹl; Gaza, Gat, kugbe Ashdọd ọvo yen ayen de chekọ. 23 Ọtiọyen kọyen Joshua reyọ otọ na eje kirobo rẹ Jihova ve vwọ kẹ Mosis, Joshua da vwọ kẹ ihwo rẹ Izrẹl kerẹ uku, nẹ ayen gharọ vwo nene uvwiẹ rayen. E rhe phi ofovwin vwẹ otọ na ọfaa.