Joshua

13 Asaọkiephana Joshua ghwore, ikpe rọyen ji kpenu re. Ọtiọyena Jihova da ta kẹ nẹ: “Wọ ghwore, ikpe wẹn ji kpenu re; jẹ buebun rẹ otọ na ji chekọ ra cha vwọ re ughwẹ.* 2 Ọnana yen otọ ro chekọ: ekogho rẹ ihwo ri Filistia eje kugbe ọ rẹ ihwo ri Gẹshọ eje 3 (vwo nẹ oghọn ri Nail* na kọyen ẹbẹre ọnre va nẹcha* rẹ Ijipt re te ughwru rẹ Ẹkrọn rọhẹ obohwẹre ọnre na, re keri phiyọ ekogho rẹ ihwo ri Kenan jovwo) vẹ e rẹ isun iyorin rẹ ihwo ri Filistia, ihwo ri Gaza, ihwo rẹ Ashdọd, ihwo rẹ Ashkẹlọn, ihwo ri Gat, kugbe ihwo rẹ Ẹkrọn; vẹ e rẹ Avim 4 vwẹ obọrhen ọnre na; otọ rẹ ihwo ri Kenan ejobi; Mẹara rọ dia ọ rẹ ihwo ri Saidọn, rhirin re te Efẹk, re te ughwru rẹ ihwo rẹ Amọ; 5 otọ rẹ ihwo ri Gibal vẹ Lẹbanọn eje vwẹ ẹbẹre ọnre va nẹcha, vwo nẹ Bel-gad vwẹ obotọ rẹ Ugbenu ri Hẹmọn kpo Libo-hemat;* 6 ihwo eje re dia ekogho rẹ igbenu na vwo nẹ Lẹbanọn re te Misrefọt-meim; vẹ ihwo ri Saidọn eje. Me cha djẹ ayen nẹ* obaro rẹ ihwo rẹ Izrẹl na. Orọnvwọn vuọvo ru wo che ru yen wọ vwọ gharọ vwọ kẹ ihwo rẹ Izrẹl kerẹ uku, kirobo ri mi ji iji rọyen kẹ wẹ. 7 Asaọkiephana ku wọ ghare otọ nana kerẹ uku vwọ kẹ uvwiẹ irhirin na kugbe ubro rẹ uvwiẹ ri Manasẹ.”

8 Uvwiẹ ri Rubẹn vẹ Gad nene ubro rẹ uvwiẹ ri Manasẹ ro chekọ reyọ uku rayen rẹ Mosis vwọ kẹ ayen vwẹ ẹbẹre ọnre va nẹcha ri Jọdan na kirobo rẹ Mosis odibo ri Jihova vwerọ kẹ ayen; 9 vwo nẹ Aroa, rọhẹ orhoma rẹ Iyara* rẹ Anọn, kugbe orere rọhẹ uherevie rẹ iyara na, vẹ otọ ro kpenu rọ pha riẹriẹriẹ ri Mẹdeba ejobi rhirin re te Daibọn; 10 kugbe irere eje rẹ Ovie Saihọn rẹ ihwo rẹ Amọ, ro sunru vwẹ Hẹshbọn, re te ughwru rẹ ihwo rẹ Amọn; 11 ji te Giliẹd vẹ ekogho rẹ ihwo ri Gẹshọ kugbe ihwo ri Meakat vẹ Ugbenu ri Hẹmọn eje kugbe Beshan eje rhirin re te Salẹka; 12 ekogho rẹ Ọg eje vwẹ Beshan, ro sunru vwẹ Ashtarọt vẹ Ẹdriai. (Ọyen ọvo vwẹ usun rẹ ihwo ri Rẹfeim ri ghwu kuko.) Mosis phi ayen kparobọ, ọ da djẹ ayen no.* 13 Ẹkẹvuọvo ihwo rẹ Izrẹl djẹ* ihwo ri Gẹshọ vẹ ihwo ri Meakat noo, kidie Gẹshọ vẹ Meakat je dia ohri rẹ Izrẹl rhi te ọke na.

14 Uvwiẹ ri Livae ọvo yen o jẹ uku ẹghara kẹ. Okẹ ra vwọ kẹ Jihova Ọghẹnẹ rẹ Izrẹl womarẹ erhanre yen uku rayen, kirobo ro ve kẹ ayen.

15 Ọtiọyena Mosis da ghare uku kẹ uvwiẹ ri Rubẹn vwo nene erua rayen, 16 ekogho rayen nẹ Aroa, rọhẹ orhoma rẹ Iyara* rẹ Anọn, kugbe orere na rọhẹ uherevie rẹ iyara na, kugbe otọ na eje ro kpenu rọ pha riẹriẹriẹ rọ kẹrẹ Mẹdeba; 17 Hẹshbọn kugbe irho rọyen eje rehẹ otọ ro kpenu rọ pha riẹriẹriẹ, Daibọn, Bemọt-bel, Bẹt-bel-miọn, 18 Jehaz, Kẹdẹmọt, Mẹfeat, 19 Kiriateim, Sibma, vẹ Zirẹt-sheha rọhẹ ugbenu rẹ iyara* na, 20 Bẹt-piọ, eghwrọrọ ri Pisga, Bẹt-jẹshimọt, 21 irere na eje rehẹ otọ ro kpenu rọ pha riẹriẹriẹ na, kugbe ekogho eje rẹ Ovie Saihọn rẹ ihwo rẹ Amọ, ro sunru vwẹ Hẹshbọn. Mosis phiro kparobọ kugbe isun rẹ ihwo ri Midian na Ivai, Rikẹm, Zọ, Họr, kugbe Riba, ivie rehẹ otọ ri Saihọn re dia otọ na. 22 Belam ọmọ ri Biọ, ọmraro na, ọyen ohwo ọvo vwẹ usun rẹ ihwo rẹ Izrẹl vwẹ ọlọkọ hwe vẹ ihwo ri chekọ na. 23 Jọdan yen ughwru rẹ uvwiẹ ri Rubẹn; ekogho nana yen uku rẹ uvwiẹ ri Rubẹn vwo nene erua rayen, irere na, vẹ eko rayen.

24 Vwọba, Mosis da ghare uku vwọ kẹ uvwiẹ ri Gad, vwo nene erua rayen, 25 ekogho rayen yen Jeza vẹ irere ri Giliẹd eje kugbe ubro rẹ otọ rẹ ihwo rẹ Amọn rhirin re te Aroa, ro hirharoku Raba; 26 kugbe vwo nẹ Hẹshbọn re te Remat-mizpa vẹ Bẹtonim, kugbe vwo nẹ Mehaneim re te ughwru ri Dibiẹ; 27 vẹ iyara* na, Bẹt-heran, Bẹt-nimra, Sọkọt, vẹ Zafọn, asan ri chekọ vwẹ ekogho rẹ Ovie Saihọn ri Hẹshbọn, vẹ Jọdan na kerẹ ughwru rọyen vwo nẹ asan ro kpotọ vwẹ oboba rẹ Abadi ri Kinẹrẹt* vwẹ ẹbẹre ọnre va nẹcha ri Jọdan na. 28 Ọnana yen uku rẹ uvwiẹ ri Gad vwo nene erua rayen, vẹ irere na kugbe eko rayen.

29 Kpobarophiyọ, Mosis da ghare uku kẹ ubro rẹ uvwiẹ ri Manasẹ, vwo nene erua rayen. 30 Ekogho rayen nẹ Mehaneim re te Beshan eje, ekogho rẹ Ovie Ọg ri Beshan eje, kugbe eko ri Jeẹ eje ra bọn itughẹ phiyọ vwẹ Beshan, irho 60. 31 A da rha vwẹ ubro ri Giliẹd vẹ Ashtarọt kugbe Ẹdriai, irere rẹ ekogho rẹ Ovie Ọg ri Beshan, vwọ kẹ emọ ri Mekiẹ ọmọ ri Manasẹ, vwọ kẹ ubro rẹ emọ ri Mekiẹ vwo nene erua rayen.

32 Enana yen uku rẹ Mosis ghare kẹ ayen vwẹ aton ri Moab, vwẹ obovrẹ ri Jọdan na, vwẹ ẹbẹre ọnre va nẹcha ri Jẹriko.

33 Ẹkẹvuọvo Mosis ghare uku kẹ uvwiẹ ri Livaee. Jihova Ọghẹnẹ rẹ Izrẹl yen uku rayen, kirobo ro ve kẹ ayen.