Joshua
23 Ẹdẹ buebun vwọ wan nu, rẹ Jihova vwọ vwẹ urovwoma vwọ kẹ Izrẹl vwo nẹ obọ rẹ ivwighrẹn rọyen eje re riarierẹ phiyọ nu, ọke rẹ Joshua vwọ ghwore, rẹ ikpe rọyen vwo kpenu re, 2 Joshua de se Izrẹl ejobi, ekpako rọyen, igbuyovwin rọyen, iguẹdjọ rọyen, vẹ inotu rọyen, ọ da ta kẹ ayen nẹ: “Me ghwore; ikpe mẹ kpenu re. 3 Ovwan komobọ mrẹ erọnvwọn eje rẹ Jihova Ọghẹnẹ rẹ ovwan ru ẹgborho nana eje fikirẹ ovwan, kidie Jihova Ọghẹnẹ rẹ ovwan yen ohwo rọ họnra kẹ ovwan. 4 Nighere, me vwẹ itẹ vwọ ghare otọ rẹ ẹgborho na ro chekọ kẹ ivwiẹ rẹ ovwan kerẹ uku, ọtiọyen ji te e rẹ ẹgborho na eje re me ghwọrọre vwo nẹ Jọdan na re te Abadi Rode na* vwẹ ẹbẹre ọnre shera na. 5 Jihova Ọghẹnẹ rẹ ovwan yen genre ayen egengenre vwo nẹ obaro rẹ ovwan, ọ da djẹ* ayen no kẹ ovwan, ovwan da reyọ otọ rayen vwọ re ughwẹ, kirobo rẹ Jihova Ọghẹnẹ rẹ ovwan ve kẹ ovwan.
6 “Asaọkiephana ovwan gbe fiudugberi rere ovwan yọnrọn, ji ru erọnvwọn eje re si phiyọ ọbe rẹ Urhi ri Mosis na, womarẹ ovwan vwo jẹ ọke vuọvo ẹvwẹriẹ no kpo obọrhen yẹrẹ obohwẹre, 7 rẹ ovwan vwo jẹ ẹgborho nana ri chekọ na enene ruẹ kuẹgbe. Ovwan tobọ se edẹ rẹ eghẹnẹ rayen yẹrẹ vwẹ ayen duvwun iyoriin, ovwan vwẹ ọke vuọvo vwọ vwẹ ẹga kẹ ayen yẹrẹ vwẹ uyovwin kpotọ kẹ ayeen. 8 Ẹkẹvuọvo ovwan churu mu Jihova Ọghẹnẹ rẹ ovwan, kirobo rẹ ovwan ruẹ rhi te ọke na. 9 Jihova cha djẹ ẹgborho ride ri ji vwo ẹgba vwo nẹ obaro rẹ ovwan, kidie o ji rhi vwo ohwo vuọvo ro se mudia vwẹ obaro rẹ ovwan rhi te ọke naa. 10 Ohwo ọvo vwẹ usun rẹ ovwan cha vwọtua uriorin, kidie Jihova Ọghẹnẹ rẹ ovwan yen họnra vwọ kẹ ovwan, kirobo ro ve vwọ kẹ ovwan. 11 Ọtiọyena ovwan gbe nomaso ọkieje* womarẹ ovwan vwo vwo ẹguọnọ rẹ Jihova Ọghẹnẹ rẹ ovwan.
12 “Ẹkẹvuọvo ọ da dianẹ ovwan kpairoro vrẹ Ọghẹnẹ, rẹ ovwan de kuomakugbe ihwo ri chekọ vwẹ ẹgborho nana re vẹ ovwan gba herọ na, rẹ ovwan vẹ ayen de vwo obọechuro rẹ orọnvwe* rẹ ovwan vẹ ayen de mu ugbeyan, 13 ovwan gba riẹn vwọrẹ imuẹro nẹ Jihova Ọghẹnẹ rẹ ovwan rha cha djẹ* ẹgborho nana no vwọ kẹ ovwaan. Ayen cha dia ufi vẹ ugodo kugbe uphiaphia ra vwọ fa ovwan ẹfẹn kugbe iwen vwẹ ẹro rẹ ovwan, bẹsiẹ rẹ ovwan vwọ ghwọrọ vwo nẹ otọ oyoyovwin nana rẹ Jihova Ọghẹnẹ rẹ ovwan vwọ kẹ ovwan na.
14 “Asaọkiephana nighere! Ọke rẹ ughwu mẹ siẹkẹrẹ re,* ovwan nabọ riẹn vẹ ubiudu rẹ ovwan eje kugbe erhi* rẹ ovwan eje nẹ o vwo ọvuọvo vwẹ usun rẹ ive esiri eje rẹ Jihova Ọghẹnẹ rẹ ovwan ve vwọ kẹ ovwan ro shefiaa. Eje rugba re vwọ kẹ ovwan. O vwo ọvuọvo vwẹ usun rayen ro shefiaa. 15 Ẹkẹvuọvo kirobo rẹ ive esiri ejobi rẹ Jihova Ọghẹnẹ rẹ ovwan ve vwọ kẹ ovwan rugba kẹ ovwan na, ọtiọyen Jihova je cha reyọ okpetu eje ro ve vwọ kẹ ovwan na* vwọ rhe enu rẹ uyovwin rẹ ovwan, je ghwọrọ ovwan vwo nẹ otọ oyoyovwin nana rẹ Jihova Ọghẹnẹ rẹ ovwan vwọ kẹ ovwan nure na. 16 Ọ da dianẹ ovwan gbe ọphọ ri Jihova Ọghẹnẹ rẹ ovwan rọ vwẹ iji kẹ ovwan nẹ ovwan yọnre na ẹgua, ovwan da yanran ra ga eghẹnẹ efa je vwẹ uyovwin kpotọ kẹ ayen, ọke yena Jihova ko che muophu ọgangan kpahen ovwan, kẹ ovwan cha ghwọrọ kpakpata vwo nẹ otọ oyoyovwin nana rọ vwọ kẹ ovwan nure na.”