Iguẹdjọ
4 Ẹkẹvuọvo ọke rẹ Ihọd vwo ghwu nu, ihwo rẹ Izrẹl da rhoma ru obo re brare vwẹ ẹro ri Jihova. 2 Ọtiọyena Jihova da shẹ ayen kẹ Jebin ovie ri Kenan, ro sunru vwẹ Hezọ. Onotu rẹ otuofovwin rọyen yen Sisẹra rọ dia Haroshẹt rẹ ẹgborho na.* 3 Ihwo rẹ Izrẹl de kperi se Jihova, kidie Jebin* vwo ekpẹrẹ rẹ ofovwin 900 ri vwo ephia rẹ utehru re pha grongron vwẹ idjugẹ rayen, ọ da vwẹ oja ọgangan vwọ re ihwo rẹ Izrẹl na ẹgbukpe 20.
4 Asaọkiephana ọmraro rẹ aye Dẹbora, aye ri Lapidọt yen guẹdjọ rẹ Izrẹl ọke yena. 5 O chidia otọ rẹ oriẹ ri Dẹbora rọhẹ uvwre ri Rema vẹ Bẹtẹl vwẹ ekogho rẹ igbenu rẹ Ifrem; ihwo rẹ Izrẹl ki bro ra rere o guẹdjọ rayen. 6 Ọ da tanẹ e re se Berak ọmọ rẹ Abinoam vwo nẹ Kidẹsh-naftalai rhe, ọ da ta kẹ: “Jihova Ọghẹnẹ rẹ Izrẹl ji rhi ji iji na? ‘Yanran kpo Ugbenu ri Tebọ, rere wọ reyọ eshare 10,000 ri Naftalai kugbe Zẹbulọn nene oma. 7 Me cha reyọ Sisẹra, onotu rẹ otuofovwin ri Jebin vẹ ekpẹrẹ rẹ ofovwin kugbe isodje rọyen rhe we vwẹ asan ivwori* ri Kaishọn, ki mi che phio phiyọ obọ wẹn.’”
8 Ọtiọyena Berak da ta kẹ: “Ọ da dianẹ wo che nene uvwe, me cha ra. Ẹkẹvuọvo wo rhe nene uvwee, me cha raa.” 9 Dẹbora da ta: “Vwọrẹ uyota, mi che nene uwe. Ẹkẹvuọvo ofovwin nana ru wọ ra na cha ghwa urinrin bru we rhee, kidie obọ rẹ aye yen Jihova che phi Sisẹra phiyọ.” Ọtiọyena o de vrẹn, o de nene Berak kpo Kidẹsh. 10 Berak de se Zẹbulọn kugbe Naftalai kpo Kidẹsh, eshare 10,000 de nene, Dẹbora de ji nene.
11 Da kẹ Hiba ohwo ri Kẹn na hẹrioma vwo nẹ ihwo ri Kẹn, emọ ri Hobab, ọgọ ri Mosis jovwo re, ọ bọn utughẹ rọyen kẹrẹ asan urhe rode na vwẹ Zeananim rọhẹ Kidẹsh.
12 A da niyẹnrẹn kẹ Sisẹra nẹ Berak ọmọ rẹ Abinoam kpo Ugbenu ri Tebọ re. 13 Siẹvuọvo na Sisẹra da rhuẹrẹ ekpẹrẹ rẹ ofovwin rọyen eje—ekpẹrẹ rẹ ofovwin 900 ri vwo ephia rẹ utehru re pha grongron vwẹ idjugẹ rayen—vẹ isodje eje re vẹ ọyen gba herọ vwo nẹ Haroshẹt rẹ ẹgborho na, rere ayen kpo ivwori* ri Kaishọn na. 14 Asaọkiephana Dẹbora da ta kẹ Berak: “Vrẹn, kidie ọnana yen ẹdẹ rẹ Jihova che phi Sisẹra phiyọ obọ wẹn. Ọ dia Jihova yen kobaro kẹ wẹ na?” Berak de wontọ vwo nẹ Ugbenu ri Tebọ vẹ eshare 10,000 ri nenire. 15 Ọtiọyena Jihova da so oyanghan kẹ Sisẹra vẹ ekpẹrẹ rẹ ofovwin rọyen eje kugbe otuofovwin na eje vwẹ obaro rẹ ọlọkọ ri Berak. Ukuotọ rọyen Sisẹra de wontọ nẹ akpẹrẹ rọyen, ọ da vwẹ owọ djẹ. 16 Berak da vwọtua ekpẹrẹ rẹ ofovwin na kugbe otuofovwin na rhirin re te Haroshẹt rẹ ẹgborho na. Ọtiọyena a da vwẹ ọlọkọ hwe otuofovwin ri Sisẹra eje; ọvuọvo dede chekọọ.
17 Ẹkẹvuọvo Sisẹra da vwẹ owọ djẹ kpo utughẹ ri Jeẹl aye ri Hiba, ohwo ri Kẹn, kidie ufuoma hẹ uvwre ri Jebin ovie ri Hezọ kugbe uwevwin ri Hiba, ohwo ri Kẹn na. 18 Jeẹl da ro otafe ra vwa Sisẹra, ọ da ta kẹ nẹ: “Ro uwevwin ọrovwovwe, ro uwevwin rhe etinẹ. Wo jẹ oshọ mu wee.” Ọtiọyena ọ da ro evunrẹ utughẹ rọyen, Jeẹl da vwẹ amwa* vwo phopho. 19 Sisẹra da ta kẹ Jeẹl: “Biko, kẹ vwẹ amame rere me da, kidie urhuru rẹ ame si vwe.” Jeẹl de rhie ọgọ rẹ ophiẹn rẹ ameivie, ọ da kẹ da, ọyena vwọ wan nu, ọ da rhoma phopho. 20 Sisẹra da ta kẹ: “Mudia anurhoro rẹ utughẹ na, ọ da dianẹ ohwo rhere, ọ da nọ wẹn nẹ, ‘Ọshare vuọvo hẹ etinẹ?’ wọ me tanẹ, ‘Ẹjo!’”
21 Ẹkẹvuọvo Jeẹl rẹ aye ri Hiba da yọnrọn ipini rẹ utughẹ kugbe ihama vwẹ obọ rọyen. Ọke rọ vwọ vwerhẹn kodo re, rẹ oma vwọ ghwọrọ re, ọ da yanran riẹiriẹi kpo asan rọ hepha, ọ da teyen ipini na ro ẹbẹre ọvo rẹ arhare rọyen muotọ, o de ghwu.
22 Berak da vwọtua Sisẹra kpo etiyin, Jeẹl da ro otafe bro ra, ọ da ta kẹ: “Yanrhe, mi che dje ọshare ru wọ guọnọ na kẹ wẹ.” O de nene ruọ, ọ da mrẹ orivwin ri Sisẹra vwẹ otọ, vẹ ipini rẹ utughẹ na re hwe ro ẹbẹre ọvo rẹ arhare rọyen fi.
23 Ọtiọyena vwẹ ẹdẹ yena, Ọghẹnẹ de phi Jebin ovie ri Kenan kparobọ vwẹ obaro rẹ ihwo rẹ Izrẹl. 24 Obọ rẹ ihwo rẹ Izrẹl kọ ganphiyọ ganphiyọ kpahen Jebin ovie ri Kenan, bẹsiẹ rẹ ayen rhe vwọ ghwọrọ Jebin ovie ri Kenan.