Iguẹdjọ

6 Ẹkẹvuọvo ihwo rẹ Izrẹl da rhoma ru obo re brare vwẹ ẹro ri Jihova, ọtiọyena Jihova de phi ayen phiyọ obọ ri Midian vwẹ ẹgbukpe ighwrẹn. 2 Obọ ri Midian da gan nọ ọ rẹ ihwo rẹ Izrẹl. Fikirẹ Midian, ihwo rẹ Izrẹl de ru asan re de se siomanu* kẹ oma rayen vwevunrẹ igbenu na, vwẹ inu na, kugbe vwevunrẹ asan re bẹn e te na. 3 Izrẹl da kọn okankọn, Midian vẹ Amalẹk kugbe ihwo rehẹ Ẹbẹre Ọnre Va Nẹcha na me họnre vwọso ayen. 4 Kẹ ayen kpare ofovwin brẹ ayen ra je ghwọrọ ekankọn rẹ otọ na rhirin re te Gaza, ayen yanjẹ emu vuọvo vwo kẹ Izrẹl nẹ ọ ree, ayen je yanjẹ igodẹ, erhuẹn yẹrẹ ekẹkẹtẹ vuọvo vwoo. 5 Kidie ayen vẹ ichuru kugbe itughẹ rayen re pha buebun kerẹ ebaka* na mi tue rhe, e se kere ayen vẹ ikamẹl rayeen, ayen me ro evunrẹ otọ na rere ayen ghwọrọ. 6 Ọtiọyena Izrẹl da rhe dia ẹdia rẹ ogbere fikirẹ Midian; ihwo rẹ Izrẹl na de kperi se Jihova vwọ kẹ ukẹcha.

7 Ọke rẹ ihwo rẹ Izrẹl vwo kperi se Jihova vwọ kẹ ukẹcha fikirẹ Midian, 8 Jihova de ji ọmraro bru ihwo rẹ Izrẹl ra, ọ da ta kẹ ayen nẹ: “Ọnana yen oborẹ Jihova Ọghẹnẹ rẹ Izrẹl tare, ‘Mẹvwẹ yen reyọ ovwan vwo nẹ Ijipt je reyọ ovwan vwo nẹ uwevwin rẹ ọviẹn rhe. 9 Ọtiọyena mi de sivwin ovwan vwo nẹ obọ rẹ ihwo rẹ Ijipt na vẹ ihwo ri shenyẹ ovwan eje, me da djẹ ayen nẹ obaro rẹ ovwan je vwẹ otọ rayen vwọ kẹ ovwan. 10 Me da ta kẹ ovwan nẹ: “Mẹvwẹ Jihova Ọghẹnẹ rẹ ovwan. Ovwan djoshọ rẹ eghẹnẹ rẹ ihwo rẹ Amọ rẹ ovwan dia otọ rayen naa.” Ẹkẹvuọvo ovwan nyupho mẹẹ.’”*

11 Ọke vwọ yan obaro, amakashe ri Jihova da rhe, o de chidia otọ rẹ urhe rode rọhẹ Ọfra rọ dia ọ rẹ Joash ro nẹ uvwiẹ rẹ Abi-iza rhe. Gidiọn ọmọ rọyen teyan iwiti vwẹ asan re de mie iwaini rere Midian vwo jẹmrẹ. 12 Amakashe ri Jihova da vwomaphia kẹ, ọ da tanẹ: “Jihova vẹ owẹ herọ, ọgba ofovwin na.” 13 Ọtiọyena Gidiọn da ta kẹ nẹ: “Biko ọrovwovwe, ọ da dianẹ Jihova vẹ avwanre herọ, diesorọ erọnvwọn nana eje vwọ phia kẹ avwanre? Iruo rẹ igbunu rọyen eje rẹ esẹ rẹ avwanre gbe kẹ avwanre na ke rhọ, rẹ ayen vwọ tanẹ, ‘Ọ dia Jihova yen reyọ avwanre vwo nẹ Ijipt rhe?’ Asaọkiephana Jihova kpairoro vrẹ avwanre re, o de phi avwanre phiyọ obọ ri Midian.” 14 Jihova de hirhe opharo kuo, ọ da tanẹ: “Yanran vẹ ogangan ro rhe we na, wo che sivwin Izrẹl vwo nẹ obọ ri Midian. Ọ dia omẹvwẹ yen ji we?” 15 Gidiọn da kpahen kẹ nẹ: “Biko, Jihova, mavọ yen mi se vwo sivwin Izrẹl? Nighere! Orua mẹ yen ma hanvwe vwẹ uvwiẹ ri Manasẹ, mẹvwẹ yen je ma hanvwe vwẹ uwevwin rẹ ọsẹ mẹ.” 16 Ẹkẹvuọvo Jihova da ta kẹ nẹ: “Kidie nẹ mẹ vẹ owẹ cha dia, wo che phi Midian kparobọ kerẹsiẹ ra da mrẹ nẹ ayen ohwo ọvo.”

17 Ọyena vwọ wan nu, Gidiọn da ta kẹ nẹ: “Ọ da dianẹ me mrẹ ẹroesiri vwẹ obaro wẹn, gbe dje oka kẹ vwẹ me vwọ riẹn nẹ owẹ yen nene uvwe ta ota na. 18 Biko wo vrẹn nẹ etinẹ bẹsiẹ mi vwo muegbe rẹ emu ri mi che mu rhe wee.” Ọtiọyena ọ da ta: “Me cha daji etinẹ bẹsiẹ wo vwo rhivwin rhe.” 19 Gidiọn da yanran, o de chere ọmọ rẹ ẹvwe je reyọ iflawa rẹ ovwanvwọ rẹ ifah* ọvo vwo ru ibrẹdi ro jephuo. Ọ da yọrọ eranvwe na phiyọ evunrẹ obere ji ku ame ro vwo rho eranvwe na phiyọ itaso re vwo chere emu; o de mu ayen bro ra, o de mu ayen phiyotọ vwẹ obotọ rẹ urhe rode na.

20 Asaọkiephana amakashe rẹ Ọghẹnẹ rẹ uyota na da ta kẹ nẹ: “Reyọ eranvwe na vẹ ibrẹdi ro jephuo na rere wo mu ayen phiyọ enu rẹ oragha rode rọhẹ etiyin na, wo mi ji ku ame re vwo rho na kuo.” O de ru ọtiọyen. 21 O vwo ru ọtiọyen nu, amakashe ri Jihova da riẹn ọkpọ rọhẹ obọ rọyen na, o de vwo te eranvwe na vẹ ibrẹdi ro jephuo na, erhanre da la nẹ evunrẹ oragha na rhe, ọ da torhẹ eranvwe na vẹ ibrẹdi ro jephuo na. Ọyena vwọ wan nu, ọ rha mrẹ amakashe ri Jihova na ọfaa. 22 Gidiọn da rhe mrẹvughe nẹ amakashe ri Jihova yen o ruẹ.

Ugege yena, Gidiọn da tanẹ: “Mi ghwuruoo, Ọrovwori ro Me Kpenu Jihova, kidie me mrẹ opharo rẹ amakashe ri Jihova re!” 23 Ẹkẹvuọvo Jihova da ta kẹ nẹ: “E jẹ ufuoma nene uwe dia. Wo jẹ oshọ mu wee; wo che ghwuu.” 24 Ọtiọyena Gidiọn da so agbada kẹ Jihova vwẹ etiyin, e de se Jihova-shalọm* rhi te ọke na. Ọ jehẹ Ọfra, orere rẹ uvwiẹ rẹ Abi-iza.

25 Jihova da ta kẹ vwẹ ason yena nẹ: “Reyọ ọmọ rẹ erhuẹn rẹ ọsẹ wẹn, ọmọ rẹ erhuẹn rivẹ rọhẹ ẹgbukpe ighwrẹn na, rere wọ guọghọ agbada ri Bel rẹ ọsẹ wẹn, wọ me je nyavwe ọkpọ rẹ ẹga* rọ kẹrerẹ na totọ. 26 Ọke wo de mu ikuta kpahen ohwohwo vwọ so agbada kẹ Jihova Ọghẹnẹ wẹn vwẹ enu rẹ asan ro fuoma nana nu, gba reyọ ọmọ rẹ erhuẹn rivẹ na rere wo vwo ze izobo rẹ ẹtorhẹ vwẹ enu rẹ irhe ru wo she nẹ ọkpọ rẹ ẹga* ru wọ nyavwe she na.” 27 Ọtiọyena Gidiọn da reyọ eshare ihwe vwẹ usun rẹ idibo rọyen, o de ru kirobo rẹ Jihova ghwa vuẹ na. Ẹkẹvuọvo oshọ rẹ evwruwevwin rẹ ọsẹ rọyen kugbe eshare rẹ orere na muro mamọ te ẹdia o rhe ruo vwẹ aruphẹẹn, ọtiọyena o de ruo vwẹ ason.

28 Ọke rẹ eshare rẹ orere na vwo vrẹn vwẹ edegburhiọke rẹ ẹdẹ rọ vwọ kpahọn, ayen da mrẹ nẹ a guọghọ agbada ri Bel totọ, a je nyavwe ọkpọ rẹ ẹga* rọ kẹrerẹ na totọ, a da je vwẹ ọmọ rẹ erhuẹn rivẹ na vwo ze izobo vwẹ enu rẹ agbada ra soro na. 29 Ayen da nọ ohwohwo: “Ono yen ru ọnana?” Ọke rẹ ayen vwọ guọnọ otọ rọyen nu, ayen da tanẹ: “Gidiọn ọmọ ri Joash yen ru ọnana.” 30 Ọtiọyena eshare rẹ orere na da ta kẹ Joash nẹ: “Reyọ ọmọ wẹn na phia rere avwanre teyọn hwe, kidie ọ guọghọ agbada ri Bel je nyavwe ọkpọ rẹ ẹga* rọ kẹrerẹ na totọ.” 31 Joash da ta kẹ ihwo eje rẹ ophu muẹ na nẹ: “Ovwan yen cha chochọn ri Bel? Ovwan yen che sivwon? Kohwo kohwo rọ chochọn rọyen, ka teyọn hwe urhiọke na. Ọ da dianẹ ọghẹnẹ yen o ruẹ, e jẹ ọ chochọn rẹ oma rọyen, kidie ohwo ọvo guọghọ agbada rọyen totọ.” 32 O de se Gidiọn Jerubel* vwẹ ẹdẹ yena, ọ da tanẹ: “E jẹ Bel chochọn rẹ oma rọyen, kidie ohwo ọvo guọghọ agbada rọyen totọ.”

33 Midian eje vẹ Amalẹk kugbe ihwo rehẹ Ẹbẹre Ọnre Va Nẹcha na de ku isodje rayen kugbe; ayen da shariẹ vrẹ* ro evunrẹ Iyara* ri Jẹzriẹl, ayen de wonphiyọ* etiyin. 34 Ọtiọyena Jihova da vwẹ ẹwẹn ọfuanfon rọyen kẹ Gidiọn, o de hworo ọgban na, uvwiẹ rẹ Abi-iza da rhe vwẹ ukẹcha kẹ. 35 O de ji ikọn nene uvwiẹ ri Manasẹ eje, ayen da je rhe vwẹ ukẹcha kẹ. O de ji ji ikọn nene uvwiẹ rẹ Asha, Zẹbulọn, kugbe Naftalai, ayen de ji bro rhe.

36 Ọtiọyena Gidiọn da ta kẹ Ọghẹnẹ rẹ uyota na nẹ: “Ọ da dianẹ wọ cha wan oma mẹ vwo sivwin Izrẹl kirobo ru wo veri na, 37 mi che phi ophiẹn rẹ ẹton rẹ ogodẹ phiyọ asan re de wonro ibi ekankọn na. Ọ da dianẹ ẹton rẹ ogodẹ na ọvo yen irho rho ku jẹ otọ rọ riarierẹ phiyọ yare, ke me cha riẹn nẹ wọ cha wan oma mẹ vwo sivwin Izrẹl kirobo ru wo veri na.” 38 Ọtiọyen yen ọ phiare. Ọke ro vwo vrẹn vwẹ edegburhiọke rẹ ẹdẹ rọ vwọ kpahọn, o de mie ẹton rẹ ogodẹ na, ame rẹ irho ro rho kuo na da vọn omoze oyoyovwin rode re vwo mu emu kẹ ọrhorha. 39 Ẹkẹvuọvo Gidiọn da ta kẹ Ọghẹnẹ rẹ uyota na nẹ: “Wo jẹ ophu wẹn tua kpahan ovwẹẹ, ẹkẹvuọvo je me je nokpẹn rẹ orọnvwọn ọvo. Biko je me je vwẹ ẹton rẹ ogodẹ na vwọ davwen orọnvwọn ọvo ni obọ ọvo. Biko e jẹ ẹton rẹ ogodẹ na ọvo ya, jẹ irho vọn otọ na eje.” 40 Ọtiọyen yen Ọghẹnẹ ruro vwẹ ason yena; ẹton rẹ ogodẹ na ọvo yen yare, jẹ irho rho kuotọ na eje.