Vwẹroso Jihova, Kirobo ri Samsin Ruru

1-2. Diesorọ o vwo fo e vwo yono kpahen ikuegbe ri Samsin?

DIE yen djẹ ro ẹwẹn wẹn siẹrẹ wo de nyo odẹ na Samsin? Ẹwẹn wẹn ghwe kpo ọshare ọvo ro vwo ẹgba mamọ. Ọyena ghini uyota. Ẹkẹvuọvo o vwo orhiẹn ọvo ri Samsin bruru rọ so okpetu vwọ kẹ. Dedena, Jihova tẹnrovi erhuvwu ri Samsin, Ọ da vwẹ ikuegbe rọyen vwọ ba Baibol na rere avwanre sa vwọ mrẹ erere norhe.

² Jihova vwẹ Samsin vwo ru emu rẹ igbevwunu buebun, vwọ cha ihwo rọyen Izrẹl uko. Ikpe ujuorin buebun vwọ wan ri Samsin vwo ghwu nu, Jihova da vwẹ ẹwẹn Ọfuanfon rọyen vwo mu ọyinkọn Pọl vwọ vwẹ odẹ ri Samsin vwọ ba edẹ rẹ ihwo re fuevun. (Hib 11:​32-34) Udje ri Samsin na sa bọn avwanre gan. Ọke rọ vwọ hẹ ẹdia ebẹnbẹn, ọ vwẹroso Jihova. E jẹ a ta ota kpahen obo re se yono mie Samsin kugbe oborẹ udje rọyen sa vwọ vwẹ ọbọngan kẹ avwanre.

SAMSIN VWẸROSO JIHOVA

3. Owian vọ yen te Samsin obọ?

³ Ọke re vwo vwiẹ Samsin, ihwo ri Filistia yen suẹn ubrotọ rẹ Izrẹl ji shenyẹ ayen. (Igu 13:1) Orharhe usuon rayen na ghwa oja ọgangan rhe ihwo rẹ Izrẹl. Jihova da jẹ Samsin nẹ o “sivwi Izrẹl nẹ obọ rẹ Filistia.” (Igu 13:5) Ọyena dia ọmọrhiẹ owia-an! Rọ sa vwọ wian owian ọgangan nana fiotọ, Samsin cha vwẹroso Jihova.

4. Mavọ yen Jihova vwọ vwẹ ukẹcha kẹ Samsin vwọ vrabọ rẹ ihwo ri Filistia? (Iguẹdjọ 15:​14-16)

⁴ Roro kpahen udje rẹ obo ri Samsin vwẹroso Jihova wan kugbe ukẹcha ri Jihova vwọ kẹ. Vwẹ ẹdẹ ọvo, isodje rẹ ihwo ri Filistia da yanran re mu Samsin vwẹ Lẹhi, ọ sa dianẹ vwẹ Juda. Kidie nẹ oshọ muẹ ihwo ri Juda, ayen de siobọnẹ Samsin kẹ ivwighrẹn na. Ihwo ri Samsin da vwẹ ifi kpokpọ ivẹ vwọ gba kokoroko ayen de muo rhe ihwo ri Filistia. (Igu 15:​9-13) Ẹkẹvuọvo, “Erhi rẹ Ọrovwohwo de muo gangan” Samsin da rhan irihrẹ ra vwọ gba na nẹ oma. Ọtiọyena “ọ da mrẹ ubeku ọkpokpọ rẹ ọhwa rẹ ekẹtẹkẹtẹ ọvo,” ọ da tọrọ, ọ da reyọ vwo hwe eshare 1,000 rẹ ihwo ri Filistia!​—Se Iguẹdjọ 15:​14-16.

5. Idjerhe vọ yen Samsin vwo djephia nẹ ọ vwẹroso Jihova ọke rọ vwọ reyọ ubeku ọhwa ekẹkẹtẹ na vwo ruiruo?

⁵ Diesorọ Samsin vwọ tọrọ ubeku ọhwa ekẹkẹtẹ? Ọ ghwa dia orọnvwọn ra ghwa kpo ofovwi-in. Aphro herọ-ọ, Samsin riẹnre nẹ ophikparobọ rọyen obọ ri Jihova yen o che nurhe, o toro erọnvwọn rọ reyọ vwọ họnre-e. Uyota nẹ ọshare nana rọ fuevun na reyọ obo rọ mrẹre vwo ru ọhọre ri Jihova. O phẹnre dẹn nẹ, Samsin phikparobọ kidie nẹ ọ vwẹroso Jihova.

6. Die yen e se yono mie Samsin, siẹrẹ e de ruiruo ra vwọ kẹ avwanre vwẹ ukoko na?

⁶ Jihova je sa kẹ avwanre ẹgba vwo ruiruo rọ vwọ kẹ avwanre, ọ da tobọ dianẹ e pha gangan. Oborẹ Ọghẹnẹ che ruo wan se gbe avwanre unu. Vwo imuẹro nẹ Jihova rọ vwẹ ẹgba vwọ kẹ Samsin, cha cha wẹ uko vwo ru ọhọre Rọyen ọ da dianẹ wọ vwẹrosuọ.​—Isẹ 16:3.

7. Udje vọ yen djerephia nẹ ọyen obo re ghanre ra vwọ nọ mie Jihova kpahen odjekẹ rọyen?

⁷ Iniọvo eya vẹ e rẹ eshare buebun ri vwobọ vwẹ ewian rẹ ebanbọn rẹ ukoko na djerephia nẹ ayen vwẹroso Jihova. Vwẹ ọke re wanre, iniọvo na yen si ihoho je bọn Eguan Ruvie kpokpọ vẹ iwevwin efa. Kidie nẹ ukoko ri Jihova rhuaphiyọ, ewene da rhe vwomaphia. tIniọvo nana ri tedje na da guọnọ ukẹcha ri Jihova womarẹ ẹrhovwo je davwen ena kpokpọ womarẹ ayen vwọ dẹ iwevwin je rhuẹrẹ ayen. Robert, ro nene iniọvo buebun wian vwẹ iruo rẹ ebanbọn vwẹ ikpe evo rhire na tare nẹ, “Vwẹ Ẹsosuọ, ọ ghwa dia obo re lọhọre rẹ iniọvo evo vwọ reyọ ena ekpokpọ nana vwo ruiruo-o. Ọnana fẹnẹ oborẹ avwanre ruẹ erọnvwọn wan vwẹ ikpe buebun vwẹ obuko re. Ẹkẹvuọvo iniọvo na vwo owenvwe rẹ ayen vwọ nuẹ, ọnana odjephia nẹ Jihova bruba ẹgbaẹdavwọn rayen na.” Ọnana usun rẹ udje ọvo ro dje oborẹ Jihova suẹn ihwo rọyen vwo ru ọhọre rọyen. Nọke ra ruọke, e jẹ a rha nọ oma rẹ avwanre, ‘Mi nene odjekẹ ri Jihova vẹ owenvwe mi vwo ru ewene vwẹ ẹga re me vwọ kẹ?’

SAMSIN REYỌ ERỌNVWỌN RI JIHOVA VWỌ KẸ VWO RUIRUO VỌNVỌN

8. Ẹdẹ ọvo urhuru rẹ ame vwo si Samsin, die yen o ruru?

⁸ Ọ sa dianẹ wo se kpahen ikuegbe sansan ri Samsin de ru emu rẹ igbevwunu re. Samsin ọvo reyọ ugbobọ vwo hwe okpohrokpo, ọke vwọ yanran na o de rhe hwe eshare 30 rẹ ihwo ri Filistia vwẹ orere ri Ashkẹlọn. (Igu 14:​5, 6, 19) Samsin riẹnre nẹ ababọ rẹ ukẹcha ri Jihova, ọyen che se ru erọnvwọn nana-a. Ọnana yen ghwa hẹ obo re phiare ọke rẹ urhuru ame vwo sio ro vwo hwe ihwo ri Filistia 1,000 nu. Die kọyen o ruru? Ukpe rọ vwọ vwẹroso omobọ rọyen guọnọ ame, o de kperi se Jihova nẹ ọ cha ọyen uko.​—Igu 15:18.

9. Die yen Jihova ruru ọke ri Samsin vwọ nẹrhovwo rhe nẹ ọ cha ọyen uko? (Iguẹdjọ 15:19)

⁹ Jihova nyo use ri Samsin ọ da vwẹ ame kẹ da vwọrẹ igbevwunu. Ọke rọ vwọ da ame na nu, “erhi rọyen de bro rhe, oma rọye de rherhevi.” (Se Iguẹdjọ 15:19) Ọ sa dianẹ ẹtẹrhe ame nana je herọ ikpe evo rẹ ẹwẹn Ọfuanfon na vwo mu ọmraro Samuẹl vwo si ọbe rẹ Iguẹdjọ. Ẹtẹrhe ame yena rọ djẹ na sa karophiyọ ihwo rẹ Izrẹl re mrẹrẹ nẹ Jihova cha vwẹ ukẹcha kẹ ihwo re fuevun ga siẹrẹ ayen da vwẹrosuọ.

10. Die yen o fori nẹ e ru siẹrẹ a da guọnọ nẹ Jihova vwẹ ukẹcha kẹ avwanre? (Ni uhoho na.)

¹⁰ O toro ena, okẹ yẹrẹ oborẹ avwanre ru re vwẹ ẹga rọye-en, a je guọnọ ukẹcha ri Jihova. E jẹ a vwomakpotọ mrẹvughe nẹ uvi rẹ ophikparobọ, obọ ri Jihova yen o nẹ cha siẹrẹ a da vwẹrosuọ. Kirobo ri Samsin vwo ẹgba ọke rọ vwo da ame ri Jihova vwọ kẹ na, a cha mrẹ ọbọngan siẹrẹ a da reyọ erọnvwọn eje ri Jihova vwọ kẹ avwanre vwo ruiruo vọnvọn.​—Mt 11:28.

11. Mavọ yen avwanre sa vwọ vwẹroso Jihova siẹrẹ a da guọnọ ukẹcha? Djudje rọyen.

¹¹ Roro kpahen udje ri Aleksey, ọvo usun rẹ iniọvo rẹ avwanre rehẹ Russia ro chiranko rẹ omukpahen ọgangan. Die yen vwẹ ukẹcha vwọ kẹ o se vwo chirakon vwẹ ẹdia rẹ omukpahen ọgangan yena? Ọ vẹ aye rọyen vwo uvi ọrhuẹrẹphiyotọ rẹ uyono ri Baibol. Ọ da ta: “Me davwẹngba me vwọ yanmu ọrhuẹrẹphiyotọ rẹ uyono romobọ mẹ kugbe isese ri Baibol. Kurhiọke kurhiọke, yen me vẹ aye mẹ vwọ fuẹrẹn isese ri kẹde kẹde na kuẹgbe je nẹrhovwo rhe Jihova.” Die yen ọnana yono avwanre? Ukpe ra vwọ vwẹrosuo omobọ rẹ ohwo, e jẹ a vwẹroso Jihova. Vwẹ idjerhe vọ? Womarẹ e vwo ru erọnvwọn re sa bọn esegbuyota rẹ avwanre gan kerẹ uyono ri Baibol romobọ, ẹrhovwo ẹnẹ, uyono ẹra kugbe iruo rẹ aghwoghwo na. E de ru enana eje, Jihova che bruba ẹgbaẹdavwọn rẹ avwanre vwọ reyọ ẹga vwọ kẹ. Kirobo rẹ Ọghẹnẹ vwẹ ọbọngan vwọ kẹ Samsin, Ọ je cha bọn avwanre gan.

SAMSIN DOBỌ RẸ ERUO RẸ ỌHỌRE RI JIHOVA JI-I

12. Orhiẹn ọchọchọ vọ yen Samsin bruru, kẹ mavọ yen ọnana vwọ fẹnẹ i ri chekọ?

¹² Samsin ọyen ohwo rọ gbare-e kerẹ avwanre, ọtiọyena o vwo ọkievo ro vwo brorhiẹn re chọre. Orhiẹn ọvo ro bruru so okpetu ọgangan kẹ. Samsin vwọ ga kerẹ oguẹdjọ vwẹ uvwre rẹ ọkievo re, “ọ da ra guọnọ aye ọvo vwẹ iyara ri Sorẹk, odẹ re se aye na ki Dẹlila.” (Igu 16:4) Tavwen ọyena ke phia, Samsin kọnphiyọ ọmọtẹ rẹ ohwo ri Filistia ọvo, ẹkẹvuọvo “obọ rẹ Ọrovwohwo” yen ọnana nurhe, kidie Ọ “guọnọ idjerhe ro vwo nene Filistia na họnre.” Ọke vwọ yanran na, Samsin de bru igberadja ọvo ra vwẹ Filistia vwẹ orere ri Gaza. Vwẹ ẹdẹ yena, Jihova da vwẹ ẹgba vwọ kẹ Samsin rere o se vwo mu ẹchẹ rọhẹ anurhoro rẹ orere na ji phi ihwo ri Filistia na kparobọ. (Igu 14:​1-4; 16:​1-3) Ẹkẹvuọvo, oyerinkugbe ri Samsin vẹ ọ ri Dẹlila fẹnẹre kidie ọ sa dianẹ Dẹlila ohwo rẹ Izrẹl.

13. Mavọ yen Dẹlila riẹriẹ Samsin wan vwo she phiyọ okpetu?

¹³ Dẹlila da shẹ Samsin kẹ ihwo ri Filistia na, ayen da hwa igho buebun vwọ kẹ. Ọ vwẹrọso Dẹlila tẹdia rẹ ẹguọnọ ro vwo kpahọn jọ sa riẹn nẹ aghwanre yen o hworo? O toro oborẹ ẹdia na wanre-e, kọke kọke yen Dẹlila vwo kpokpo Samsin nẹ ọ vuẹ ọyen asan rẹ ẹgba rọyen nurhe, ofu rhi vwo dje re, ọ da vuẹ. Ọ da ohwo mamọ nẹ Samsin she ro ufi rọ nẹrhẹ ẹgba rọyen vabọ ji ku aroesiri ri Jihova kufia vwẹ ọmọke.​—Igu 16:​16-20.

14. Die yen phia kẹ Samsin kidie nẹ ọ vwẹroso Dẹlila?

¹⁴ Samsin rioja gangan fiki rẹ obo ro ruru na kidie ọ vwẹroso Dẹlila ukpe rọ vwọ vwẹroso Jihova. Ihwo ri Filistia de muo ji rhu ẹro rọyen. Ayen de muo phiyọ uwodi vwẹ Gaza rọ dia orere ro ghwie ẹchẹ vẹ ichivwo rọyen, ayen da reyọ vwo ru ọviẹn ghevweghe rọ nọ eka. Ọke rẹ ihwo ri Filistia na vwo siomakoko ru orẹ, ayen da phọphọ. Ayen de ze izobo rode kẹ ẹdjọ rayen Dagọn, kidie ayen niro nẹ ọyen nẹrhẹ obọ rayen te Samsin. Ayen de se Samsin nẹ uwodi rhe je reyọ vwo jehwẹ nẹ o rhi “gbeha” kẹ ayen.​—Igu 16:​21-25.

15. Mavọ yen Samsin vwọ djephia nẹ ọyen rhoma vwẹroso Jihova? (Iguẹdjọ 16:​28-30) (Ni uhoho rọhẹ opharo ọbe na.)

¹⁵ Obo ri Samsin ruru na ghene bra mamọ, jẹ ọ dobọ rẹ ẹga rọ vwọ kẹ Jihova ji-i. Ọ gbẹn idjerhe ọfa ro vwo nene ihwo ri Filistia na họnre kidie ọyen oborẹ Ọghẹnẹ guọnọre. (Se Iguẹdjọ 16:​28-30.) Samsin da rẹ Jihova nẹ, jẹ me sa “choja rẹ ibiẹro mẹ ive na vwẹ uyovwi rẹ ihwo ri Filistia na.” Ọghẹnẹ rẹ uyota na da kpahenphiyọ ẹrhovwo ri Samsin je rhoma reyọ ẹgba rọyen vwọ kẹ. Udje nana, Samsin de hwe ihwo ri Filistia buebun vrẹ obo ri jovwo.

16. Die yen e se yono nẹ oruchọ ri Samsin rhe?

¹⁶ Dede nẹ Samsin rioja rẹ obo ro ruru na, ọ dobọ rẹ ega rọ vwọ kẹ Jihova ji-i. Ọ da dianẹ e ru obo re chọre rọ nẹrhẹ a ghwọku avwanre yẹrẹ nẹrhẹ uphẹn rẹ ẹga va avwanre abọ, e jẹ a dobọ rẹ ẹga ri Jihova jẹ-ẹ. Karophiyọ nẹ, Jihova muegbe ro vwo ghwovwo avwanre. (Un 103:​8-10) O toro oruchọ rẹ avwanre-e, Jihova cha kẹ avwanre ẹgba re vwo ru ọhọre rọyen kirobo ro ru kẹ Samsin.

17-18. Die yen vwerhen owẹ oma vwẹ udje ri Michael na? (Ni uhoho na.)

¹⁷ Roro kpahen udje rẹ oniọvo ọshare ọvo re se Michael. Ọ nabọ muomaphiyọ ẹga ri Jihova, ọ gan kerẹ ọdibo owian kugbe ọkobaro ọkieje. O ru obo re chọre rọ nẹrhẹ uphẹn ro vwori vwẹ evun rẹ ukoko na vabọ. Ọ da ta: “Bẹsiẹ rẹ uphẹn rẹ ẹga na ke rhe va vwẹ abọ, me nabọ muomaphiyọ ẹga ri Jihova. Siẹvuọvo na, o rhe vwo emu vuọvo mi se ruẹ vwẹ ẹga ri Jihova-a. Me nama roro nẹ Jihova cha kpairoro vrẹ vwẹ-ẹ, ẹkẹvuọvo kẹ mi roro sẹ oyerinkugbe mẹ vẹ ọ rọyen cha rhoma dia obo rọ hepha gbanẹ se me sa rhoma ga vwẹ ukoko na kirobo mi ruẹ jovwo.”

¹⁸ Ọ vwerhen oma nẹ Michael dobọ rẹ ẹga rọyen ji-i. Ọ da ta: “Me da tẹnrovi obo re me sa vwọ rhuẹrẹ oyerinkugbe mẹ vẹ ọ rọyen phiyọ womarẹ ẹrhovwo ẹnẹ ọkieje, uyono kugbe erorokodo.” Ọke vwọ yanran na, uphẹn rẹ ẹga re va rọ abọ jovwo da rhoma rhi te obọ. Enẹna ọ ga kerẹ ọkpako kugbe ọkobaro ọkieje. Ọ da je ta: “Obicha vẹ ọbọngan me mrẹre marho womarẹ ekpako na nẹrhẹ me mrẹvughe nẹ Jihova ji vwo ẹguọnọ mẹ. Enẹna ke me ga vwẹ ukoko na vẹ ẹwẹn obrorhiẹn rọ fonro. Obo re phiare na yono uvwe nẹ Jihova che vwo ghovwo kohwo kohwo ro ghini kurhẹriẹ nẹ otọ rẹ ubiudu rhe.” E se vwo imuẹro nẹ Jihova che bruba je reyọ avwanre vwo ruiruo ọ da tobọ dianẹ e ru obo re chọre, takpe nẹ e ru oborẹ avwanre se ru eje vwo ru ewene ro fori je vwẹrosuọ ọkieje.​—Un 86:5; Isẹ 28:13.

19. Idjerhe vọ yen udje ri Samsin vwọ bọn wẹ gan?

¹⁹ Vwẹ uyono nana, a ta ota kpahen erọnvwọn evo kiriguo re phiare vwẹ akpeyeren ri Samsin. Ọ dia ohwo rọ gbare-e; dedena, ro vwo she ro ufi ri Dẹlila nu, ọ dobọ rẹ ẹga rọ vwọ kẹ Jihova ji-i. Jihova kpairoro vrẹ-ẹ, ọ je reyọ vwo ruiruo. Ọghẹnẹ je rhoma reyọ Samsin vwo ruiruo vwẹ idjerhe rẹ igbevwunu. Jihova niro nẹ ọyen ohwo ro vwo uvi rẹ esegbuyota, ọ da je vwọba evwata rẹ ihwo re si edẹ rayen phiyọ Hibru uyovwin 11. Mavọ yen ọ vwerhoma te ra vwọ riẹn nẹ a vwẹ ẹga kẹ Ọse rẹ avwanre ro vwo ẹguọnọ, ro vwo owenvwe rọ vwọ vwẹ ukẹcha phia marho e de hirharoku ebẹnbẹn! Kerẹ Samsin, e jẹ a rẹ Jihova nẹ: “Karophihọ ovwẹ, me rẹ wẹ, gbe ru uvwe goma.”​—Igu 16:28.