• Ken Hwe Ebẹl
    Obo Wo Se Yono Vwẹ Baibol Na
    • Ken muophu ọke rẹ Ebẹl vwo ze izobo kẹ Jihova

      UYONO 4

      Ken Hwe Ebẹl

      Adam vẹ Ivi vwo vrẹn nẹ ogba rẹ Idẹn nu, ayen de vwiẹ emọ. Ọmọkpako rayen yen Ken, ọghwẹrẹ o ruẹ. Ebẹl kọyen vwọ kpahọn, rọ dia osuigegede.

      Ẹdẹ ọvo Ken vẹ Ebẹl de ze izobo kẹ Jihova. Wọ riẹn obo re se izobọ? Ọyen okẹ ra vwọ kẹ Ọghẹnẹ. Oma vwerhen Jihova kpahen izobo rẹ Ebẹl, ẹkẹvuọvo oma vwerhenrọ kpahen ọ rẹ Ken na-a. Ivun de miovwo Ken mamọ. Jihova da vwẹ uchebro kẹ Ken nẹ ophu rọyen na sa nẹrhẹ o ru obo re brare. Ẹkẹvuọvo, Ken kerhọ-ọ.

      Ukperẹ ọtiọyen, Ken da vuẹ Ebẹl: ‘Mọ, rhi nene uvwe kpo aghwa.’ Ayen vwọ hẹ aghwa na, Ken da teyen oniọvo rọyen hwe. Die yen Jihova ru kpahen ọnana? Jihova da vwẹ oja riọ, rọ vwọ djẹ nẹ orua rọyen shesheri. Ken rha cha sa rhoma rhivwin bru orua rọyen rhe-e.

      Ken vẹ Ebẹl vwevunrẹ aghwa

      Die yen ọnana yono avwanre? Ophu se mu avwanre siẹrẹ e rhe ru orọnvwọn nene oborẹ avwanre guọnọre-e. Ophu na da gan mamọ yẹrẹ ihwo efa da vwẹ uchebro kẹ avwanre kpahọn, e jẹ e sio nẹ evun kpakpata rere o vwo jẹ avwanre esuon.

      Jihova cha karophiyọ Ebẹl kidie o vwo ẹguọnọ rẹ Jihova, o ji ru obo ri yovwirin. Ọghẹnẹ cha rhọvwọn Ebẹl nushi ọke ro de ru akpọ na phiyọ iparadaisi nu.

      “Wọ vẹ omoni wẹ na rhuẹrẹ kugbe tavwe rere wo ki rhi ze izobo wẹn.”​—Matiu 5:24

  • Okọ rẹ Noa
    Obo Wo Se Yono Vwẹ Baibol Na
    • Noa vẹ orua rọyen kare okọ na

      UYONO 5

      Okọ rẹ Noa

      O vwo te ọke ọvo, ihwo da rhe vọn otọrakpọ na. Buebun rayen brare mamọ. Emekashe evo vwẹ odjuvwu dede da je dia brabra. Ayen nẹ odjuvwu rhe otọrakpọ na. Wọ riẹn oboresorọ? Ayen guọnọ dia kerẹ ihworakpọ, je rọvwọn eya.

      Eya re rọvwọn emekashe na de rhi vwiẹ emọ. Emọ na vwọ ghwanre, ayen da rhe dia erhuanran vẹ inogbozighi. Ayen wan ihwo oma. Jihova cha sa vwẹ uphẹn kẹ erọnvwọn tiọye-en. O de brorhiẹn nẹ ọ cha vwẹ oghwe vwọ ghwọrọ erharhe ihwo na.

      Noa vẹ orua rọyen kare okọ na and prepare food

      Ẹkẹvuọvo, o vwo ọshare ọvo rọ fẹnẹre. O vwo ẹguọnọ rẹ Jihova. Odẹ rọyen Noa. O vwo aye vẹ emeshare erha re se Shem, Ham, kugbe Jafet. Emeshare erha na je rọvwọnre. Jihova vuẹ Noa nẹ ọ kare okọ rode rere ọ vẹ orua rọyen se vwo sivwinrhọ vwẹ Oghwe na. Okọ nana pha kerẹ ekpeti rode ro se phorhẹ vwẹ enu rẹ ame. Jihova je vuẹ Noa nẹ o mu eranvwe buebun ro okọ na, rere ayen ji se vwo sivwinrhọ.

      Noa da ton ẹkarọ rẹ okọ na phiyọ. Noa vẹ orua rọyen kare okọ na omarẹ ẹgbukpe 50. Ayen ruro vwo nene oborẹ Jihova ghwa vuẹ ayen. Vwẹ ọke yena, Noa ji si ihwo na orhọ kpahen Oghwe na. Jẹ ohwo ọvuọvo kerhọ kẹ-ẹ.

      Ọke rẹ ayen cha vwọ ro okọ na de rhi te. Die kọyen phiare?.

      “Kirobo rọ epha vwẹ ọke ri Noa, eriyin ẹcha rẹ Ọmọ rẹ ohwo je cha dia.”​—Matiu 24:37