Қобил кимга уйланган?

Муқаддас Китоб асосида жавоб

Қобил илк жуфтликнинг тўнғич фарзанди бўлган ва у сингилларидан бирига ёки яқин қариндошига уйланган. Бундай хулосага Муқаддас Китобда Қобил ва унинг оиласи ҳақида ёзилган баёнотни кўриб чиқиб, келишимиз мумкин.

Қобил ва унинг оиласи ҳақидаги ҳақиқатлар

• Барча инсонлар Одамато ва Момоҳаводан келиб чиққан. «Бутун ер юзида яшасинлар деб, Худо барча миллатларни бир одамдан [Одаматодан] вужудга келтирди». (Ҳаворийлар 17:26) Одаматонинг хотини Момоҳаво «барча яшаётганларнинг онаси бўлди». (Ибтидо 3:20, изоҳ) Демак, Қобил Одамато ва Момоҳавонинг авлодидан келиб чиққан қизга уйланган.

• Қобил ва унинг укаси Ҳобил Момоҳавонинг биринчи фарзандлари бўлишган. (Ибтидо 4:1, 2) Қобил укасини ўлдиргани учун қувғунда бўлганида Худога шундай шикоят қилган: «Ким мени учратса, ўлдириши шубҳасиз». (Ибтидо 4:14) У кимдан қўрққан? Муқаддас Китобда Одамато «кўпгина ўғил-қизларнинг отаси бўлгани» ҳақида айтилган. (Ибтидо 5:4) Афтидан, Одамато ва Момоҳавонинг бошқа авлодлари Қобилнинг ҳаётига таҳдид солган бўлиши мумкин.

• Инсониятнинг илк тарихида қариндош билан турмуш қуриш ғайритабиий бўлмаган. Масалан, садоқатли Иброҳим пайғамбар ҳам ўгай синглисига уйланган. (Ибтидо 20:12) Қобил яшаган даврдан асрлар ўтиб, биринчи марта Мусонинг Таврот китобида қариндош билан оила қуриш тақиқланган эди. (Левилар 18:9, 12, 13) Бундан кўриняптики, илгари қариндош билан қурилган никоҳдан туғилган фарзандлар ҳозиргидай нуқсон билан туғилмаган.

• Муқаддас Китобдаги Одамато, Момоҳаво ва уларнинг оиласи ҳақидаги баёнот тарихий жиҳатдан аниқ. Одаматодан бошланган насабнома ҳақидаги тафсилотларни нафақат Мусо пайғамбарнинг Ибтидо китобидан, балки тарихчи Эзра ва Луқонинг баёнотларидан ҳам топишимиз мумкин. (Ибтидо 5:3–5; 1 Солномалар 1:1–4; Луқо 3:38) Муқаддас Китоб ёзувчилари Қобил ҳақидаги ҳикояни тарихий воқеа сифатида келтиришади. (Ибронийларга 11:4; 1 Юҳанно 3:12; Яҳудо 11)