Timo‘tiyga yo‘llangan birinchi maktub
6 Allohning ismi va Uning ta’limoti haqoratlanmasligi uchun+, qullik bo‘yinturug‘i ostida bo‘lganlar xo‘jayinlarini to‘la hurmatga loyiq hisoblasinlar+. 2 Xo‘jayinlari imonli bo‘lganlar esa birodar deb, o‘z xo‘jayinlariga hurmatsizlik qilmasinlar. Aksincha, ularga yanada ko‘proq tirishib xizmat qilsinlar. Chunki ularning halol xizmatidan foyda oladigan xo‘jayinlar — imondoshlari va ularning sevikli birodarlari.
Bu borada ta’lim berib, nasihat qil. 3 Agar qandaydir kishi soxta ta’limotni yoysa, Hazratimiz Iso Masihning sog‘lom so‘zlari+ va xudojo‘ylikka* muvofiq ta’limotga qo‘shilmasa+, 4 u mag‘rurlanib ketgan va hech narsani tushunmayapti+. U so‘roq-savollar hamda so‘zlar dastidan bahslashish kasalligiga chalingan+. Bu esa hasad, janjalkashlik, tuhmat* va badgumonlikni, 5 shuningdek, haqiqatdan uzoqlashgan va aqli buzuq odamlar+ o‘rtasida arzimagan narsalar haqida uzluksiz tortishuvlarga sabab bo‘ladi. Ular xudojo‘ylik tufayli biror narsaga erishish mumkin, deb o‘ylashadi+. 6 Albatta, xudojo‘ylik+ va boriga qanoat qilish orqali ko‘p narsaga erishish mumkin. 7 Biz dunyoga hech narsa olib kelmadik va undan hech narsa olib keta olmaymiz ham+. 8 Xullas, yegulik va kiyimimiz* bor bo‘lsa, shular bilan qanoat qilaylik+.
9 Boyib ketish niyatida yurganlar esa vasvasaga tushib, tuzoqga ilinib+, insonlarni halokat-u o‘limga olib boradigan ko‘p bema’ni va zararli istaklarga mubtalo bo‘ladilar+. 10 Har turli yomonlikning negizi pulparastlikdir. Ba’zilar unga berilib, imondan qaytishdi va ko‘pgina azoblarga duch kelib, o‘zlarini yaralashdi+.
11 Biroq sen, ey Xudoning xizmatchisi, bulardan uzoqlash. Buning o‘rniga odillik, xudojo‘ylik, imon, muhabbat, sabr-bardosh va muloyimlik+ kabi fazilatlarni rivojlantirishdan to‘xtama. 12 Imon uchun jon-jahding bilan kurash, abadiy hayotni mahkam ushla. Chunki sen shu hayot uchun da’vat etilib, u haqda ko‘p odamlar oldida yaxshi shohidlik bergansan.
13 Pontiy Pilatga ochiqchasiga shohidlik qilgan Iso Masih+ hamda borliqqa hayot ato etib turgan Xudo oldida senga buyuraman: 14 Hazrati Iso Masihning oshkor bo‘lishigacha+ beg‘ubor va beayb qolib, ushbu buyruqqa amal qil. 15 Baxtiyor va yagona Hukmdor, podshohlarning Podshohi, Oliy Hazratimizning+ oshkor bo‘lishi esa belgilangan vaqtda sodir bo‘ladi. 16 Tanho u o‘lmaslikka ega bo‘lib+, yaqinlashib bo‘lmaydigan nurda turadi+, uni hech bir inson ko‘rmagan va ko‘ra olmaydi+. Unga shon-shuhrat va abadiy kuch-qudrat bo‘lsin! Omin.
17 Bu zamonda* boy bo‘lganlarga shunday buyur: ular kekkaymasinlar hamda bevafo boylikka emas+, balki zavq olishimiz uchun har narsani mo‘l-ko‘l qilib taqdim etayotgan Allohga tayansinlar+, 18 yaxshilik qilib, ezgu ishlari bilan boyisinlar, saxiy bo‘lsinlar va bor narsalarini baham ko‘rishga shay tursinlar+, 19 haqiqiy hayotni qo‘ldan boy bermaslik uchun+, kelajakka mustahkam poydevor bo‘ladigan hamda yo‘q bo‘lmaydigan xazina to‘plasinlar+.
20 O‘g‘lim Timo‘tiy, senga ishonib topshirilgan narsalarni saqlab+, muqaddas narsalarni bulg‘aydigan quruq gaplardan va «bilim», deb atalgan ixtiloflardan chetda yur+. 21 Sababi, ba’zilar bunday «bilim» bilan kerilib, imondan qaytishdi.
Xudoning inoyati sizlarga yor bo‘lsin.