Esitere

5 Nga ḓuvha ḽa vhuraru+ Esitere a ambara zwiambaro zwa vhuhosi a ya a ima muṱani wa nga ngomu wa nnḓu* ya khosi, o livhana na nnḓu ya khosi, ngeno khosi yo dzula kha khuluṋoni yayo nḓuni ya musanda yo livhana na muṋango. 2 Musi khosi i tshi tou vhona Esitere mufumakadzi wayo o ima muṱani, ya mu takalela, khosi ya sumba Esitere nga lubaḓa lwa musuku+ lwe ya vha yo lu fara. Esitere a sendela a kwama ṱhodzi ya lubaḓa.

3 Khosi ya mu vhudzisa ya ri: “Mulandu ndi mini Esitere mufumakadzi wanga? U khou ṱoḓa mini? Naho wa humbela hafu ya muvhuso wanga ndi ḓo u ṋea!” 4 Esitere a fhindula a ri: “Arali khosi i tshi zwi takalela, ndo vha ndi tshi khou humbela uri iwe na Hamani+ ni ḓe tshimimani tshihulu ṋamusi tshe nda ni lugiselela tshone.” 5 Khosi ya amba na vhanna vhayo ya ri: “Vhudzani Hamani uri a ḓe nga u ṱavhanya uri ri ite zwe Esitere a humbela zwone.” Khosi na Hamani vha ya tshimimani tshihulu tshe Esitere a vha lugiselela tshone.

6 Musi vha tshi khou nwa waini, khosi ya amba na Esitere ya ri: “U khou ṱoḓa u humbela mini? Tshine wa ḓo humbela u ḓo ṋewa! U khou ṱoḓa mini? Naho wa humbela hafu ya muvhuso wanga u ḓo ṋewa!”+ 7 Esitere a fhindula a ri: “Ndi khou humbela uri, 8 Arali khosi i tshi ntakalela, arali zwi tshi takadza khosi uri i ite zwine nda khou humbela zwone, iwe na Hamani ndi khou humbela uri ni ḓe tshimimani tshihulu matshelo; ndi hone ndi tshi ḓo vhudza khosi zwine nda khou ṱoḓa u humbela.”

9 Nga ḽeneḽo ḓuvha Hamani a ṱuwa o takala na mbilu yawe yo rula. Fhedzi musi Hamani a tshi vhona Maradokai e khoroni ya khosi na uri ho ngo takuwa a sumbedza khuliso musi a tshi fhira, Hamani a sinyutshela Maradokai.+ 10 Naho zwo ralo, Hamani a ḓifara a ya nḓuni yawe. A vhidza khonani dzawe na mufumakadzi wawe Serese.+ 11 Hamani a vha zuwela nga lupfumo lwawe luhulu, na nga ha vharwa vhawe vhanzhi,+ na nga nḓila ye khosi ya mu hudza ngayo na u mu hulisa u fhira vharangaphanḓa na vhashumeli vha khosi.+

12 Hamani a dovha a ri: “Zwiṅwe hafhu, Esitere mufumakadzi wa khosi o ramba nṋe na khosi fhedzi tshimimani tshihulu tshe a tshi lugiselela.+ O dovha a nthamba uri ndi ḓe matshelo na khosi.+ 13 Fhedzi zwenezwi zwoṱhe a zwi ntakadzi musi ndi tshi kha ḓi vhona Maradokai wa Muyuda e khoroni ya khosi.” 14 Mufumakadzi wawe Serese na khonani dzawe dzoṱhe vha ri: “Imisa danda ḽo lapfaho khubithi dza 50.* Nga matsheloni u vhudze khosi uri Maradokai a fhahewe khaḽo.+ U tshi fhedza u ṱuwe na khosi u ye u ḓiphiṋe ngei tshimimani.” Zwenezwo zwa takadza Hamani, a imisa ḽeneḽo danda.