Ekisoda

4 Naho zwo ralo, Mushe a fhindula a ri: “Arali vha sa ntenda, vha si thetshelese zwine nda zwi amba,+ vha ri: ‘Yehova ho ngo ḓa ha iwe.’” 2 Yehova a amba nae a ri: “Ndi mini itsho tshe wa fara?” A fhindula a ri: “Ndi thonga.” 3 Mudzimu a ri: “I pose fhasi.” A i posa fhasi, ya shanduka ya vha ṋowa;+ Mushe a i shavha. 4 Yehova a amba na Mushe a ri: “Isa tshanḓa u i fare nga mutshila.” A isa tshanḓa a i fara, ya dovha ya vha thonga tshanḓani tshawe. 5 Mudzimu a ri: “Hezwi ndi u itela uri vha tende uri Yehova Mudzimu wa vhomakhulukuku wavho, Mudzimu wa Abrahamu, Mudzimu wa Isaka na Mudzimu wa Yakobo,+ o ḓa kha iwe.”+

6 Yehova a amba nae a ri: “Ndi khou humbela uri u dzhenise tshanḓa gwakwani* ḽau.” A dzhenisa tshanḓa gwakwani ḽawe. Musi a tshi tshi bvisa, a wana tsho tshena nga mapele vhunga mahaḓa.+ 7 Mudzimu a ri: “Dovha u dzhenise tshanḓa tshau gwakwani.”* A dovha a tshi dzhenisa. Musi a tshi tshi bvisa, tsha bva tsho fhola tshi tshi fana na muvhili wawe woṱhe. 8 A ri: “Arali vha sa u tenda kana u dzhiela nṱha vhuṱolo ha u thoma, vha ḓo tenda vhuṱolo ha vhuvhili.+ 9 Naho zwo ralo, arali vha sa tenda honovhu vhuṱolo vhuvhili, vha hana u u thetshelesa, u ke maḓi Mulamboni wa Nili u a shele ho omaho, eneo maḓi e wa a ka Nili a ḓo shanduka a vha malofha henefho fhethu ho omaho.”+

10 Mushe a amba na Yehova a ri: “Aiwaa Yehova, a thi koni u amba zwavhuḓi, zwiḽa u sa athu u amba na nṋe mushumeli wau kana u bva tshee wa thoma u amba na mushumeli wau, ndi amba nga u ongolowa na lulimi lwanga lu a ongolowa.”+ 11 Yehova a amba nae a ri: “Ndi nnyi o ṋeaho muthu mulomo kana o itaho* uri a si kone u amba, uri a dzinge nḓevhe, a vhone kana a si kone u vhona? Naa a si nṋe Yehova? 12 Tshimbila zwino, ndi ḓo vha na iwe musi u tshi amba,* ndi ḓo u funza zwine wa fanela u zwi amba.”+ 13 Fhedzi a ri: “Mpfarele Yehova, ndi khou humbela uri u rume muṅwe muthu ane wa funa u mu ruma.” 14 Yehova a sinyutshela Mushe, a ri: “Fhedzi hu na Aroni+ mukomana wau wa Mulevi. Ndi a zwi ḓivha uri u a kona u amba zwavhuḓi. Huno u nḓilani u khou ḓa u ṱangana na iwe. Musi a tshi u vhona, mbilu yawe i ḓo takala.+ 15 U ambe nae, u mu vhudze zwe nda u vhudza;+ ndi ḓo vha na iwe nae musi ni tshi amba,+ ndi ḓo ni funza zwine na fanela u zwi ita. 16 U ḓo u ambela na vhathu, u ḓo vha muambeli wau, iwe u ḓo nga Mudzimu khae.*+ 17 U fare yeneyi thonga u ite ngayo vhuṱolo.”+

18 Nga zwenezwo, Mushe a humela kha Yetero makhulu* wawe,+ a amba nae a ri: “Ndi khou humbela u ṱuwa, ndi humele kha vhahashu vha re ngei Egipita uri ndi vhone arali vha tshee vho takala.” Yetero a amba na Mushe a ri: “Tshimbila nga mulalo.” 19 Nga murahu ha zwenezwo, Yehova a amba na Mushe ngei Midiani a ri: “Vhuyelela Egipita, ngauri vhanna vhoṱhe vha ṱoḓaho u u vhulaya vho fa.”+

20 Mushe a dzhia mufumakadzi wawe na vhana vhawe a vha ṋamedza donngi, a vhuyelela shangoni ḽa Egipita. Zwiṅwe hafhu, Mushe a dzhia na thonga ya Mudzimu wa ngoho. 21 Yehova a amba na Mushe a ri: “Musi wo no vhuyelela Egipita, u ite vhuṱolo hoṱhe phanḓa ha Farao nga maanḓa e nda u ṋea one.+ Fhedzi ndi ḓo tendela mbilu yawe i tshi rindila,+ ha nga litshi vhathu vha tshi ṱuwa.+ 22 U vhudze Farao uri: ‘Zwe Yehova a zwi amba ndi hezwi: “Isiraele ndi murwa wanga, tanzhe ḽanga.+ 23 Ndi a u vhudza ndi ri: Litsha murwa wanga a ṱuwe uri a kone u ntshumela. Fhedzi arali wa sa mu tendela a tshi ṱuwa, ndi ḓo vhulaya murwa wau, tanzhe ḽau.”’”+

24 Musi e nḓilani e fhethu ha u eḓela, Yehova+ a ṱangana nae, a ṱoḓa u mu vhulaya.+ 25 Mafheleloni Tsipora+ a dzhia lufhanga lu re na vhuhali a fumbisa murwa wawe, a ita uri lukanda lwawe lu kwame milenzhe ya muruṅwa, a ri: “Ndi ngauri u munna wanga wa malofha.” 26 Nga zwenezwo, a mu litsha a ṱuwa. Nga tshenetsho tshifhinga Tsipora a ri: “U munna wanga wa malofha,” nga nṱhani ha u fumba.

27 Yehova a amba na Aroni a ri: “Iya sogani uri u ṱangane na Mushe.”+ Nga zwenezwo, a ya a ṱangana nae thavhani ya Mudzimu wa ngoho,+ a mu lumelisa nga u mu khisa. 28 Mushe a vhudza Aroni zwoṱhe zwe Yehova a mu vhudza zwone a tshi mu ruma,+ na vhuṱolo hoṱhe he a mu laedza uri a vhu ite.+ 29 Nga murahu ha zwenezwo, Mushe na Aroni vha ya vha kuvhanganya vhahulwane vhoṱhe vha Vhaisiraele.+ 30 Aroni a vha vhudza zwoṱhe zwe Yehova a zwi vhudza Mushe, a ita vhuṱolo+ phanḓa ha vhathu. 31 Vhathu vha tshi vhona zwenezwo vha tenda.+ Musi vha tshi pfa uri Yehova u khou ṱhogomela Vhaisiraele+ na uri o vhona u tambula havho,+ vha losha, vha luvha.